28
1 တနံၣ်ဃီအဝဲန့ၣ်, လၢစီၤစံးဒယံယၤကဲထီၣ်သီစီၤပၤပှဲၤထီၣ် လွံၢ်နံၣ်တနံၣ်, လၢလါယဲၢ်လါတလါအပူၤန့ၣ်, ပှၤဝ့ၢ်ကံး ဘိၣ်ဖိ စီၤဧၤစူၢ်အဖိခွါ ဝံဃနၤနယၤကတိၤတၢ်ဒီး ယၤလၢယွၤအတၢ်လုၢ်ဟံၣ်အပူၤန့ၣ်လီၤ. လၢပှၤလုၢ်တၢ်အခိၣ်တဖၣ်ဒီး ပှၤဂီၢ်မုၢ်အမဲာ်ညါန့ၣ်, အဝဲဒၣ်တဲဘၣ်ယၤလၢ,
2 ယွၤသ့တၢ်လၢာ်, အံၣ်စရ့လးအကစၢ်ယွၤစံးတ့ၢ်ဝဲဒ်အံၤ, “ယမၤဟးဂီၤကွံာ် ကီၢ်ဘၤဘူၤလိၣ်အစီၤပၤ အစိကမီၤလံ.
3 လၢခံနံၣ်အတီၢ်ပူၤန့ၣ်, ယကဟဲက့ၤစိာ်ကဒါက့ၤ ယွၤအတၢ်လုၢ်ဟံၣ် အတၢ်လုၢ်ဒိၣ်ပှ့ၤဒိၣ်ခဲလၢာ်လၢ စီၤပၤနဘူၤကးန့စၢ် က့ၤစိာ်ကွံာ်ဆူ ကီၢ်ဘၤဘူၤလိၣ်န့ၣ်ဆူတၢ်လီၢ်အံၤလီၤ.
4 စီၤယဟိၤယါကံၣ် အဖိခွါ ကီၢ်ယူဒၤအစီၤပၤစီၤယဟိၤယါခံၣ်, ဃုာ်ဒီးကီၢ်ယူဒၤအပှၤဂီၢ်မုၢ်ခဲလၢာ်လၢ အဘၣ်တၢ်စိာ်မၢကဲကုၢ်အီၤဆူ ကီၢ်ဘၤဘူၤလိၣ်အပူၤန့ၣ် ယကဟဲက့ၤစိာ်ကဒါက့ၤစ့ၢ် ကီးအီၤန့ၣ်လီၤ. သပှၢ်ကတၢၢ်, ယကမၤဟးဂီၤကွံာ်ကီၢ်ဘၤဘူၤလိၣ် အစီၤပၤအစိကမီၤန့ၣ်လီၤ. ယၤ, ယွၤအံၤ, ကတိၤလံတၢ်လံ.”
5 ဝံၤဒီး, လၢပှၤလုၢ်တၢ်အခိၣ်တဖၣ်ဒီး ပှၤခဲလၢာ်လၢအဆၢထၢၣ်လၢယွၤအတၢ်လုၢ်ဟံၣ်ပူၤ အမဲာ်ညါ န့ၣ်, ယစံးဘၣ်စီၤဃနၤနယၤ,
6 “ဂ့ၤဒိၣ်မးလီၤ. ယမုၢ်လၢ်လၢယွၤ ကမၤတၢ်အံၤလီံၤ. ယမုၢ်လၢ်သပှၢ်ကတၢၢ်လၢ အဝဲကမၤလၢထီၣ်ပှဲၤထီၣ် နတၢ်ကတိၤ လၢဝံအကျိာ်ဒီး ကဟဲက့ၤစိာ်ကဒါက့ၤ ယွၤအတၢ်လုၢ်ဟံၣ် အတၢ်ထူးတၢ်တီၤခဲလၢာ်ဒီး ပှၤဂီၢ်မုၢ်ခဲလၢာ်လၢ အဘၣ်တၢ်စိာ်ကွံာ်အီၤဒ်ပှၤဘၣ် တၢ်မၢကဲကုၢ်အီၤ အသိးလၢကီၢ်ဘၤဘူၤလိၣ်တခီန့ၣ်လီၤ.
7 ဘၣ်ဆၣ်ဒီး ဒိကနၣ်တၢ်လၢ ယစံးဘၣ်နၤဒီး ယစံးဘၣ်ပှၤဂီၢ် မုၢ်အံၤန့ၣ်တက့ၢ်.
8 ဝံတဖၣ်လၢ အကတိၤတ့ၢ်လံတၢ်လၢပျၢၤ, တချုးလၢယဆၢကတီၢ်ဒီး နဆၢကတီၢ်န့ၣ်, တဲဆိပာ်ဝဲလၢ တၢ်ဒုးတၢ်ယၤ, တၢ်သၣ်ဝံၤလီၤဒိ, ဒီးတၢ်ဆူးတၢ်ဆါကဟဲဘၣ်ပှၤအါကလုာ် ဒီးဘီမုၢ်လၢ အဒိၣ်စိဒိၣ်ကမီၤတဖၣ်န့ၣ်လီၤ.
9 မ့မ့ၢ်, ဝံတဂၤလၢအကတိၤဆိပာ်လၢ တၢ်ဃူတၢ်ဖိးကမၤ အသးအဂ့ၢ်န့ၣ်, တၢ်သ့ၣ်ညါနီၣ်အီၤဒ်အမ့ၢ်ဝံတဂၤလၢ ယွၤမၢလီၤအီၤနီၢ်နီၢ်ကသ့ဝဲ ဖဲဝံအဝဲန့ၣ် အတၢ်ကတိၤဆိပာ်တဖၣ် လၢထီၣ်ပှဲၤထီၣ်ဝဲန့ၣ်လီၤ.”
10 အန့ၣ်ဝံၤဒီး, စီၤဃနၤနယၤဟံးထီၣ်ကွံာ် နီၣ်ယိးဘိလၢ ယကိာ်အလိၤ, မၤကၢ်လီၤကလဲကွံာ်အီၤ ခဲလၢာ်,
11 ဒီးစံးတၢ်လၢပှၤဂီၢ်မုၢ်ခဲလၢာ်အမဲာ်ညါဒ်အံၤ, “ယွၤစံးတ့ၢ်ဝဲလၢ အအံၤမ့ၢ်အဝဲကမၤကၢ်ကွံာ်နီၣ်ယိးဘိလၢ စီၤပၤနဘူၤကးန့စၢ် ပာ်ထီၣ်တ့ၢ်အီၤလၢ ပှၤကလုာ်ခဲလၢာ် အကိာ်လိၤဒ်လဲၣ် အဂ့ၢ်န့ၣ်လီၤ. အဝဲကမၤတၢ်အံၤ လၢခံနံၣ်အတီၢ်ပူၤန့ၣ်လီၤ.” အန့ၣ်ဝံၤဒီး, ယဟးထီၣ်ကွံာ်လီၤ.
12-13 လၢတၢ်အံၤဝံၤအလီၢ်ခံန့ၣ်, ယွၤတဲဘၣ်ယၤလၢ, ယကလဲၤဒီး စံးဘၣ်စီၤဃနၤနယၤဒ်အံၤ, “ယွၤစံးဝဲလၢ နမၤကၢ်နီၣ်ယိးဘိသ့ၣ် တဘိကသ့ဝဲသ့ၣ်သ့ၣ်, ဘၣ်ဆၣ်အဝဲကပာ်ကဒါက့ၤနီၣ်ယိးဘိထးတဘိလၢ အလီၢ်န့ၣ်လီၤ.
14 ယွၤသ့တၢ်လၢာ်, အံၣ်စရ့လးအကစၢ်ယွၤ, စံးတ့ၢ်ဝဲလၢအဝဲ ကပာ်နီၣ်ယိးဘိထးတဘိလၢ ပှၤကလုာ်ခဲလၢာ်အံၤအလိၤ, ဒီး လၢအဝဲသ့ၣ်ကမၤကီၢ်ဘၤဘူၤလိၣ်အစီၤပၤ နဘူၤကးန့စၢ် အတၢ်န့ၣ်လီၤ. ယွၤစံးတ့ၢ်ဝဲလၢ အဝဲကမၢဒၣ်လဲာ်ဆၣ်ဖိကီၢ်ဖိအမံၤ တဖၣ်မၤစီၤနဘူၤကးန့စၢ်အတၢ်န့ၣ်လီၤ.”
15 ယတဲစီၤဃနၤနယၤတၢ်အံၤ, ဝံၤဒီးယတဲအါထီၣ်ယဲ, “ဒိကနၣ်တက့ၢ်, စီၤဃနၤနယၤဧၢ, ယွၤတမၢလီၤနၤဘၣ်, ဒီးနမၢပှၤဂီၢ်မုၢ်တဖၣ်အံၤ နာ်တၢ်လီတၢ်ဝ့ၤတမံၤန့ၣ်လီၤ.
16 လၢတၢ်န့ၣ်အဃိ, ယွၤအကစၢ်ဒၣ်ဝဲစံးဝဲလၢ အဝဲကသုး ကွံာ်နၤန့ၣ်လီၤ. တချုးလၢနံၣ်တနံၣ်အံၤလၢာ်ဒံးန့ၣ်, နကသံနဲ, မ့ၢ်လၢနတဲဘၣ်ပှၤဂီၢ်မုၢ်လၢ ကပူထီၣ်တၢ်ထီဒါယွၤအဃိ န့ၣ်လီၤ.”
17 ဒီးစီၤဃနၤနယၤသံဝဲဖဲနံၣ်တနံၣ်ဃီန့ၣ်, လၢလါနွံလါ တလါ အပူၤန့ၣ်လီၤ.