14
1 ဘၣ်ထွဲဒီးတၢ်ယီၤဃ့န့ၣ်, ယွၤစံးဘၣ်ယၤဒ်အံၤ,
2 “ကီၢ်ယူဒၤဟီၣ်တၢ်ယၢၤတၢ်လီၤ.
အဝ့ၢ်တဖၣ်ဟါမၢ်ကွံာ်လၢာ်လံ.
အပှၤဂီၢ်မုၢ်မံလီၤလၢဟီၣ်ခိၣ်လိၤလၢတၢ် သူၣ်အုးသးအုးအပူၤဒီးဝ့ၢ်ယရူၤၡလ့ၣ် ကိးထီၣ်လၢတၢ်မၤစၢၤအဂီၢ်လီၤ.
3 ပှၤထူးပှၤတီၤတဖၣ်မၢလီၤအကုၢ်အပှၤတဖၣ် လၢကလဲၤဃုမၤန့ၢ်ထံအဂီၢ်လီၤ.
အဝဲသ့ၣ်လဲၤဆူထံပူၤတဖၣ်,
ဘၣ်ဆၣ်တထံၣ်န့ၢ်ထံနီတစဲးဘၣ်.
အဝဲသ့ၣ်ဟဲက့ၤကဒါက့ၤဒီးအသပၢၤထံတဖၣ်လၢအအိၣ်ကလီန့ၣ်လီၤ.
လၢတၢ်သးဟးဂီၤဒီးသးကဒံကဒါအပူၤ,
အဝဲသ့ၣ်မၤဘၢအမဲာ်သၣ်တဖၣ်န့ၣ်လီၤ.
4 မ့ၢ်လၢတၢ်တစူၤဘၣ်
ဒီးဟီၣ်ခိၣ်ဃ့ထီကွံာ်အဃိ,
ပှၤထူစံာ်ဖိတဖၣ်အသးလီၤစၢ်လီၤဘဲဝဲ
ဒီးမၤဘၢအမဲာ်သၣ်တဖၣ်န့ၣ်လီၤ.
5 လၢစံာ်ပျီအပူၤန့ၣ်တၤဟိမိၢ်
ပာ်လီၤတဲာ်ကွံာ်အဖိလၢအဖှံလီၤဝဲသီသီ,
မ့ၢ်လၢနီၣ်ဧိၤမံၤဧိၤတအိၣ်ဘၣ်အဃိန့ၣ်လီၤ.
6 ကသ့ၣ်ယီၤအမံၤတဖၣ်ဆၢထၢၣ်လၢတၢ်လူၢ်ဒီခိၣ်
ဒီးသါဟဲၤဟီၤဝဲဒ်ထွံၣ်ဟီၣ်ခိၣ်တဖၣ်အသိးလီၤ.
အဝဲသ့ၣ်အမဲာ်ချံအတၢ်ထံၣ်တအိၣ်လၢၤဘၣ်
မ့ၢ်လၢအဝဲသ့ၣ်အတၢ်အီၣ်တအိၣ်လၢၤဘၣ်အဃိလီၤ.
7 ယပှၤဂီၢ်မုၢ်ကိးထီၣ်ယၤ,
ယွၤဧၢ, ဒ်နအၢၣ်လီၤတ့ၢ်ပှၤအသိး, မၤစၢၤပှၤတက့ၢ်.
ပဃၣ်ကွံာ်ပသးလၢနၤအါဘျီလံ.
ပမၤတ့ၢ်တၢ်ဒဲးဘးထီဒါနၤလီၤ.
8 နမ့ၢ်ကီၢ်အံၣ်စရ့လးအတၢ်မုၢ်လၢ်ထဲတမံၤဧိၤလီၤ.
နမ့ၢ်ပှၤထဲတဂၤဧိၤလၢအအုၣ်က့ၤခီၣ်က့ၤပှၤလၢ တၢ်တတၢးတနါန့ၣ်လီၤ.
ဘၣ်မနုၤအဃိနလီၤဂာ်ဒ်ပှၤစီစၣ်တဂၤအသိးလၢပထံပကီၢ်အပူၤ, နလီၤဂာ်ဒ်ပှၤလဲၤတၢ်ဖိတဂၤအသိးလၢအအိၣ်ဝဲဆိးဝဲထဲတနၤဧိၤန့ၣ်လဲၣ်.
9 ဘၣ်မနုၤအဃိနလီၤဂာ်ဒ်ပှၤတဂၤလၢအကမၢကမၣ်ဒီးသးလီၤကတုၤအသိး,
နလီၤဂာ်ဒ်ပှၤသုးဖိတဂၤလၢတအိၣ်ဒီးအစိကမီၤလၢ ကမၤစၢၤတၢ်အသိးန့ၣ်လဲၣ်.
ယွၤဧၢ, နအိၣ်ဒီးပှၤသပှၢ်ကတၢၢ်လီၤ.
ပမ့ၢ်နပှၤဂီၢ်မုၢ်လီၤ.
ပာ်လီၤတဲာ်ကွံာ်ပှၤတဂ့ၤ.”
10 ယွၤစံးတၢ်ဘၣ်ဃးပှၤဂီၢ်မုၢ်သ့ၣ်တဖၣ်ဒ်အံၤ, “အဝဲသ့ၣ်အဲၣ်ဒိး ထွးထီၣ်ဃ့ၢ်ကွံာ်လၢယအိၣ်, ဒီးအဝဲသ့ၣ်တပၢၤအသးလၢၤဘၣ်. လၢတၢ်န့ၣ်အဃိ, ယတဘၣ်သူၣ်ဘၣ်သးအဝဲသ့ၣ်လၢၤဘၣ်. ယကသ့ၣ်နီၣ်ထီၣ်တၢ်ကမၣ်တဖၣ်လၢအဝဲသ့ၣ်မၤတ့ၢ်ဝဲဒီးစံၣ်ညီၣ် အဝဲသ့ၣ်လၢအတၢ်ဒဲးဘးတဖၣ်အဃိန့ၣ်လီၤ.”
11 ယွၤစံးဘၣ်ယၤ, “တဘၣ်ဃ့ဘါထုကဖၣ်ယၤလၢယကမၤစၢၤပှၤဂီၢ်မုၢ်သ့ၣ်တဖၣ်အံၤတဂ့ၤ.
12 အဝဲသ့ၣ်မ့ၢ်ဒုၣ်တၢ်အီၣ်တၢ်အီဒၣ်လဲာ်, ယတဒိကနၣ်အဝဲသ့ၣ် အတၢ်ကိးထီၣ်လၢတၢ်မၤစၢၤအဂီၢ်ဘၣ်. အဝဲသ့ၣ်မ့ၢ်လုၢ်ထီၣ်ယၤ လၢတၢ်လုၢ်မ့ၣ်အူတဖၣ်ဒီးတၢ်လုၢ်ဘုဧိၤဟုဧိၤတဖၣ်ဒၣ်လဲာ်, တမ့ၢ်ယကဘၣ်သူၣ်ဘၣ်သးလၢအဝဲသ့ၣ်န့ၣ်ဘၣ်. အခိၣ်တလိာ်, ယကမၤသံအဝဲသ့ၣ်လၢတၢ်ဒုးတၢ်ယၤအပူၤ, ဒီးခီဖျိတၢ်သၣ်ဝံၤ လီၤဒိဒီးတၢ်ဆူးတၢ်ဆါန့ၣ်လီၤ.”
13 အန့ၣ်ဒီးယစံး, “ယွၤပၢဘၣ်တၢ်ခဲလၢာ်ကစၢ်ဧၢ, နသ့ၣ်ညါလၢဝံတဖၣ်တဲဘၣ်ပှၤဂီၢ် မုၢ်လၢတၢ်ဒုးတၢ်ယၤဒီးတၢ်သၣ်ဝံၤလီၤဒိတအိၣ်လၢၤဘၣ်န့ၣ်လီၤ. အဂ့ၢ်ဒ်အံၤ, အဝဲသ့ၣ်စံးဝဲ, နအၢၣ်လီၤတ့ၢ်လၢ, သပှၢ်ကတၢၢ်လၢပထံပကီၢ်အပူၤအံၤန့ၣ်, ကအိၣ်ထဲတၢ်ဃူတၢ်ဖိးဧိၤန့ၣ်လီၤ.”
14 ဘၣ်ဆၣ်ဒီးယွၤစံးဆၢက့ၤဝဲ, “ဝံတဖၣ်န့ၣ်ကတိၤလီတၢ်လၢယမံၤအပူၤလီၤ. ယတမၢလီၤဘၣ်အဝဲသ့ၣ်မ့ၢ်ဂ့ၤ, ဟ့ၣ်လီၤအဝဲသ့ၣ်လၢယကလုၢ်တမံၤမံၤမ့ၢ်ဂ့ၤ, ကတိၤတၢ်တဘီဒၣ်လဲာ်ဒီးအဝဲသ့ၣ်မ့ၢ်ဂ့ၤန့ၣ်ဘၣ်. တၢ်ထံၣ်လၢညါခီတဖၣ်လၢအဝဲသ့ၣ်စံးကတိၤဝဲလၢ အဂ့ၢ်န့ၣ်တဟဲလၢယအိၣ်ဘၣ်. အဝဲသ့ၣ်အတၢ်ကတိၤဆိ ပာ်တၢ်တဖၣ်န့ၣ်မ့ၢ်တၢ်တဖၣ်လၢအလုၢ်အပှ့ၤတအိၣ် ဘၣ်လၢအဆိကမိၣ်ထီၣ်န့ၢ်ဒၣ်ဝဲန့ၣ်လီၤ.
15 ယၤ, ယွၤအံၤ, တဲဘၣ်နၤတၢ်လၢယကမၤဘၣ်ဝံတဖၣ်န့ၣ်လၢ ယတမၢလီၤအီၤဘၣ်, ဘၣ်ဆၣ်အဝဲသ့ၣ်မ့ၢ်ပှၤကတိၤတၢ်လၢယမံၤ အပူၤ, ဒီးစံးဝဲလၢတၢ်ဒုးတၢ်ယၤဒီးတၢ်သၣ်ဝံၤ လီၤဒိတမၤဘၣ်ဒိထံကီၢ်အံၤဘၣ်န့ၣ်လီၤ. ယကမၤသံအဝဲသ့ၣ်လၢ တၢ်ဒုးတၢ်ယၤအပူၤဒီးခီဖျိတၢ်သၣ်ဝံၤလီၤဒိန့ၣ်လီၤ.
16 ဒ်န့ၣ်အသိးပှၤဂီၢ်မုၢ်လၢအဝဲသ့ၣ်စံးဘၣ်တ့ၢ်အီၤတၢ်သ့ၣ်တဖၣ်အံၤ စ့ၢ်ကီးကဘၣ်တၢ်မၤသံအီၤလၢကျဲတဘိဃီန့ၣ်လီၤ. အဝဲသ့ၣ် အစိၣ်တဖၣ်ကဘၣ်တၢ်ကွံာ်အီၤလၢဝ့ၢ်ယရူၤၡလ့ၣ်အကျဲဘိတဖၣ် အပူၤ, ဒီးပှၤကခူၣ်လီၤအဝဲသ့ၣ်တအိၣ်နီတဂၤဘၣ်န့ၣ်လီၤ. တၢ်အံၤကမၤအသးဒီးအဝဲသ့ၣ်ခဲလၢာ်, ဃုာ်ဒီးအမါတဖၣ်, အဖိခွါတဖၣ်, ဒီးအဖိမုၣ်တဖၣ်န့ၣ်လီၤ. ယကမၢအဝဲသ့ၣ်ဟ့ၣ်တၢ်အပှ့ၤလၢအဝဲသ့ၣ်အတၢ်အၢတၢ်သီအဃိလီၤ.”
17 ယွၤမၤလိာ်တ့ၢ်ယၤလၢယကတဲဘၣ်ပှၤဂီၢ်မုၢ်ဘၣ်ဃးယတၢ်သူၣ်အုး သးအုးအဂ့ၢ်ဒီးစံး,
“မ်မဲာ်ထံတဖၣ်ယွၤလီၤလၢယမဲာ်ချံတဖၣ်အပူၤလၢမုၢ်ဆါဆဲးလၢမုၢ်နၤ,
ဒီးမ်ယသုတဆိကတီၢ်တၢ်ဟီၣ်တၢ်ယၢၤနီတစုတဂ့ၤ.
အဂ့ၢ်ဒ်အံၤ, ယပှၤဂီၢ်မုၢ်တဖၣ်ဘၣ်ဒိဘၣ်ထံးနးနးကလဲာ်ဒီး တၢ်မၤဘၣ်ဒိဆါအီၤအၢအၢသီသီန့ၣ်လီၤ.
18 ဖဲယလဲၤဟးထီၣ်လၢစံာ်ပျီတဖၣ်အပူၤဒီး,
ယထံၣ်ဘၣ်ပှၤလၢအသံလၢတၢ်ဒုး တၢ်ယၤအပူၤတဖၣ်အစိၣ်န့ၣ်လီၤ.
ဖဲယလဲၤနုာ်ဆူဝ့ၢ်တဖၣ်အပူၤဒီး,
ယထံၣ်ဘၣ်ပှၤဂီၢ်မုၢ်သၣ်ဝံၤလီၤဒိဘူးလၢ အကသံန့ၣ်လီၤ.
အဂ့ၢ်ဒ်အံၤ, ဝံတဖၣ်ဒီးပှၤလုၢ်တၢ်အခိၣ်တဖၣ် မၤဒံးဒၣ်အဝဲသ့ၣ်အတၢ်မၤ,
ဘၣ်ဆၣ်ဒီးမၤတၢ်မနုၤလဲၣ်န့ၣ်အဝဲသ့ၣ်, တသ့ၣ်ညါဝဲဘၣ်.”
19 ယွၤဧၢ, မ့ၢ်နညိကွံာ်ကီၢ်ယူဒၤလၢာ်လၢာ်ဆ့ဆ့လံဧါ.
မ့ၢ်နသးဟ့ဝ့ၢ်စံယိၣ်အပှၤဂီၢ်မုၢ်လံဧါ.
ဘၣ်မနုၤအဃိနမၤဘၣ်ဒိဘၣ်ထံးပှၤအၢအၢသီသီ တုၤဒၣ်လဲာ်
တၢ်မၤဘျါက့ၤပှၤတသ့န့ၣ်လဲၣ်.
ပကွၢ်လၢ်တၢ်ဃူတၢ်ဖိး, ဘၣ်ဆၣ်တၢ်အဂ့ၤတမၤအသးနီတမံၤဘၣ်.
ပမုၢ်လၢ်တၢ်မၤဘျါက့ၤ, ဘၣ်ဆၣ်တၢ်မၤပျံၤမၤဖုးဟဲလၢအလီၢ်န့ၣ်လီၤ.
20 ယွၤဧၢ, ပမၤတ့ၢ်တၢ်ဒဲးဘးထီဒါနၤလီၤ.
ပအၢၣ်လီၤပတၢ်ဒဲးဘးဒၣ်ပဝဲတဖၣ်
ဒီးပမိၢ်ပၢ်ဖံဖုလၢပျၢၤတဖၣ်အတၢ်ဒဲးဘးတဖၣ်န့ၣ်လီၤ.
21 သ့ၣ်နီၣ်ထီၣ်က့ၤနတၢ်အၢၣ်လီၤအီလီၤတဖၣ်ဒီးသးဘၣ်အၢပှၤတဂ့ၤ.
ဟဲစိာ်တၢ်မဲာ်ဆှးဆူဝ့ၢ်ယရူၤၡလ့ၣ်,
တၢ်လီၢ်လၢအမ့ၢ်နတၢ်လၤကပီၤအလီၢ်ပစိာ် အဖီခိၣ်တဂ့ၤ.
မၤဟးဂီၤကွံာ်တၢ်အၢၣ်လီၤအီလီၤလၢနမၤတ့ၢ်ဒီး ပှၤန့ၣ်တဂ့ၤ.
22 ပှၤကလုာ်တဖၣ်အတၢ်ဂီၤတၢ်ဖီၣ်တဖၣ်လၢအဒုးစူၤလီၤတၢ်သ့န့ၣ်, တအိၣ်ဘၣ်.
မူကပိာ်လိၤအကစၢ်ဒၣ်ဝဲဒုးလီၤသဖှံၣ်မူခိၣ်ထံ တသ့စ့ၢ်ကီးဘၣ်.
အိ, ယွၤပကစၢ်ယွၤဧၢ, ပပာ်ပတၢ်မုၢ်လၢ်လၢနပူၤလီၤ.
အဂ့ၢ်ဒ်အံၤ, နမ့ၢ်ပှၤတဂၤလၢအမၤတၢ်သ့ၣ်တဖၣ်အံၤန့ၣ်လီၤ.