လံာ်ယံးရမံယၤ
JEREMIAH
ဝံယံးရမံယၤအိၣ်မူတ့ၢ်ဝဲဖဲချခနနွံကယၤအကတၢၢ်အကတီၢ် ဒီးချ.ခ.န. ဃုကယၤအခီၣ်ထံးအကတီၢ်အပူၤအတ့ၤန့ၣ်လီၤ. ဖဲအဝဲမၤတၢ်လၢကစၢ်ယွၤအဂီၢ်ယံာ်မးအပူၤ, အဝဲဟ့ၣ်ပလီၢ်ကစၢ်ယွၤအပှၤဂီၢ်မုၢ်လၢတၢ်နးတၢ်ဖှီၣ်ဖးဒိၣ် ကလီၤဘၣ်ပှၤကလုာ်အဂ့ၢ်မ့ၢ်လၢအဝဲသ့ၣ်အတၢ်ဘါတၢ်ဂီၤတၢ်ဖီၣ် ဒီးအတၢ်ဒဲးဘးအဃိလီၤ. အဝဲအိၣ်မူဘၣ်ဝဲတုၤအထံၣ်ဘၣ်တၢ်တဲဆိတဖၣ်အံၤလၢထီၣ်ပှဲၤ ထီၣ်ဖဲဝ့ၢ်ယရူၤၡလ့ၣ်လီၤဆူကီၢ်ဘၤဘူၤလိၣ်အစီၤပၤနဘူးကး န့စၢ်အစုပူၤ, တၢ်မၤဟးဂီၤကွံာ်ဝ့ၢ်ဒီးယွၤအတၢ်လုၢ်ဟံၣ်, ဒီးစိာ်မၢကဲကုၢ်ကီၢ်ယူဒၤအစီၤပၤဒီးအပှၤဂီၢ်မုၢ်အါဂၤ ဆူကီၢ်ဘၤဘူၤလိၣ်န့ၣ်လီၤ. အဝဲကတိၤဆိပာ်စ့ၢ်ကီဲးတၢ်ကမၤအသးအဂ့ၢ်လၢအဘၣ်ထွဲဒီးပှၤ ဂီၢ်မုၢ်ကဟဲက့ၤကဒါက့ၤဘၣ်လၢတၢ်စိာ်မၢကဲကုၢ်အလီၢ်ဒီးသူၣ် ထီၣ်ဘှီထီၣ်က့ၤအထံအကီၢ်ဒီးအပှၤကလုာ်န့ၣ်လီၤ.
လံာ်ယံးရမံယၤအံၤတၢ်နီၤဖးလီၤအီၤဒ်လၢလာ်အသိးအံၤသ့ဝဲ လီၤ. (၁)တၢ်ကိးထီၣ်စီၤယံးရမံယၤ (၂)တၢ်ကစီၣ်တဖၣ်လၢအဟဲလၢကစၢ်ယွၤ အအိၣ်ဆူကီၢ်ယူဒၤဒီးအပှၤပၢတၢ်တဖၣ်ဖဲစီၤပၤတဖၣ်လၢအမ့ၢ် ယိၤၡံယၤ, ယဟိယါကံၣ်, ယဟိယါခံၣ်ဒီးစံးဒကံယၤတဖၣ်ပၢတၢ်အစိၤ (၃)တၢ် ဂ့ၢ်ဘၣ်ဃးဝံယံးရမံယၤအပှၤကွဲးလံာ်ဒိၣ်စီၤဘၤရူးအတၢ်သ့ၣ် နီၣ်အတၢ်ကွဲးတိၢ်နီၣ်တဖၣ်, အိၣ်ဃုာ်ဒီးဝံအတၢ်ကတိၤဆိတဖၣ်အကလုာ်ကလုာ်ဒီးတၢ်မၤအသးလၢ အကါဒိၣ်တဖၣ်လၢစီၤယံးရမံယၤအတၢ်အိၣ်မူအပူၤ. (၄)တၢ်ကစီၣ်တဖၣ်လၢအဟဲလၢယွၤအအိၣ်ဘၣ်ဃးတခီဘီမုၢ် အပှၤကလုာ်တဖၣ်အကလုာ်ကလုာ်အဂ့ၢ်. (၅)တၢ်စံၣ်စိၤတဲစိၤလၢတၢ်ကွဲးအါထီၣ်အီၤတမံၤလၢအပာ်ဖျါ ထီၣ်ဝ့ၢ်ယရူၤၡလ့ၣ်အတၢ်လီၤဆူဒုၣ်ဒါအစုပူၤအဂ့ၢ်ဒီးတၢ်စိာ် မၢကဲကုၢ်ဆူကီၢ်ဘၤဘူၤလိၣ်အဂ့ၢ်န့ၣ်လီၤ.
စီၤယံးရမံယၤမ့ၢ်ပှၤလၢအသးဘၣ်ဒိဘၣ်ထံးသ့ညီတဂၤဒီးအဲၣ် ဘၣ်တ့ၢ်အပှၤဂီၢ်မုၢ်ဒိၣ်မး, ဒီးတသးအိၣ်ကတိၤဖျါထီၣ်ယွၤအတၢ်စံၣ်ညီၣ်လၢအဝဲသ့ၣ်အဖီခိၣ် ဘၣ်န့ၣ်လီၤ. လၢတၢ်ကွဲးအါတီၤအပူၤန့ၣ်, အဝဲကတိၤတ့ၢ်တၢ်လၢတၢ်သးဂဲၤယိာ် အပူၤလၢတၢ်တဖၣ်လၢအဝဲတူၢ်ဘၣ်တ့ၢ်ဝဲအဂ့ၢ်, မ့ၢ်လၢကစၢ်ယွၤကိးထီၣ်တ့ၢ်အီၤလၢကကဲထီၣ်ဘၣ်ဝံတဂၤအဃိန့ၣ် လီၤ. ယွၤအတၢ်ကတိၤလီၤဂာ်မးဒီးမ့ၣ်အူအီၣ်ဂီၤတၢ်လၢအဝဲအသးကံၢ် ပူၤ, ဒီးအဝဲမ့ၢ်တကတိၤဘၣ်ဝဲဒီးအိၣ်ဝဲတသ့ဘၣ်န့ၣ်လီၤ.
လၢလံာ်အံၤအပူၤ, တၢ်ကတိၤဖးဒိၣ်တနီၤညိၣ်ဃီၤပှၤ, ပျံကွံာ်စီၤယံးရမံယၤအကစၢ်ဒၣ်ဝဲအတၢ်ကီတၢ်ခဲကတီၢ်ဆူမုၢ် နံၤတနံၤဖဲတၢ်အၢၣ်လီၤအီလီၤအသီတမံၤကအိၣ်ထီၣ်ဝဲ, ဒီးတၢ်အၢၣ်လီၤအီလီၤတမံၤလၢကစၢ်ယွၤအပှၤဂီၢ်မုၢ်ကတိၢ်နီၣ် ဖံးဃာ်ဝဲ, ကအိၣ်ဘၣ်ဒီးသရၣ်တဂၤလၢကဒုးသ့ၣ်နီၣ်အဝဲသ့ၣ်ဒၣ်လဲာ်, မ့ၢ်လၢတၢ်အံၤကဘၣ်တၢ်ကွဲးနီၣ်အီၤလၢအဝဲသ့ၣ်အသးကံၢ်ပူၤ အဃိန့ၣ်လီၤ (၃၁:၃၁-၃၄).
1
1 လံာ်အံၤမ့ၢ်တၢ်ဂ့ၢ်ဘၣ်ဃးဒီးပှၤလုၢ်တၢ်အခိၣ်တဖၣ်အကျါတဂၤ လၢအအိၣ်လၢဝ့ၢ်ဧၤနသိးလၢကီၢ်ဘံၣ်ယၤမံၣ်အပူၤစီၤဃံးလကံယၤ အဖိခွါစီၤယံးရမံယၤစံးကတိၤတ့ၢ်ဝဲန့ၣ်လီၤ.
2 ယွၤကတိၤတၢ်ဒီးစီၤယံးရမံယၤဖဲကီၢ်ယူဒၤအစီၤပၤ, စီၤအၤမိၣ် အဖိခွါစီၤယိၤၡံယၤပၢတၢ်တဆံသၢနံၣ်တနံၣ်, အပူၤန့ၣ်လီၤ.
3 ဒီးအဝဲကတိၤကဒီးတၢ်ဒီးအီၤဖဲစီၤယိၤၡံယၤအဖိခွါစီၤယဟိယါကံၣ် ကဲထီၣ်စီၤပၤအခါန့ၣ်လီၤ. အန့ၣ်ဝံၤအလီၢ်ခံ, ယွၤကတိၤတၢ်ဒီးအီၤအါဘျီတုၤလီၤလၢ စီၤယိၤၡံယၤအဖိခွါစီၤစံးဒကံယၤပၢတၢ်တဆံတနံၣ်အကတီၢ်န့ၣ်လီၤ. လၢနံၣ်အဝဲန့ၣ်ယဲၢ်လါတလါအပူၤန့ၣ်, ပှၤဂီၢ်မုၢ်လၢဝ့ၢ်ယရူၤ ၡလ့ၣ်တဖၣ်ဘၣ်တၢ်စိာ်မၢကဲကုၢ်အီၤန့ၣ်လီၤ.
4 ယွၤစံးဘၣ်ယၤ,
5 “ယဃုထၢတ့ၢ်နၤတချုးဒံးလၢယဟ့ၣ်နသးသမူဒၣ်လဲာ်, ဒီးတချုးဒံးလၢနအိၣ်ဖျဲၣ်ထီၣ်န့ၣ်, ယဃုထၢထီၣ်တ့ၢ်နၤဒ်သိး နကကဲထီၣ်ဝံတဂၤလၢပှၤကလုာ်တဖၣ်အဂီၢ်န့ၣ်လီၤ.”
6 ယစံးဆၢယဲ, “ယွၤပၢဘၣ်တၢ်ခဲလၢာ်ကစၢ်ဧၢ, ယကဘၣ်ကတိၤ တၢ်ဒ်လဲၣ်န့ၣ်ယတသ့ၣ်ညါယဲဘၣ်. ယသးစၢ်ကဲၣ်ဆိးဒံးလီၤ.”
7 ဘၣ်ဆၣ်ဒီးယွၤစံးဘၣ်ယၤ, “စံးလၢနသးစၢ်ကဲၣ်ဆိးတဂ့ၤ, မ့မ့ၢ်လဲၤဆူပှၤဂီၢ်မုၢ်လၢယမၢနလဲၤဆူအအိၣ်န့ၣ်, ဒီးစံးဘၣ်တဲဘၣ်အဝဲသ့ၣ်တၢ်ခဲလၢာ်လၢယမၤလိာ် နၤန့ၣ်တက့ၢ်.
8 ပျံၤအဝဲသ့ၣ်တဂ့ၤ. အဂ့ၢ်ဒ်အံၤ, ယကအိၣ်ဒီးနၤလၢယကဒီဒၣ် အိၣ်ပှိၤနၤအဂီၢ်လီၤ. ယၤ, ယွၤအံၤ, ကတိၤတ့ၢ်လံတၢ်လံ.”
9 အန့ၣ်ဝံၤဒီး, ယွၤယူာ်ထီၣ်အစု, ထိးဘၣ်ယနိးဖံးဒီးစံးဘၣ်ယၤ, “ဒိကနၣ်တက့ၢ်. ယဟ့ၣ်လံနၤတၢ်ကတိၤတဖၣ် လၢနကဘၣ်ကတိၤအီၤလီၤ.
10 မုၢ်မဆါတနံၤအံၤ, ယဟ့ၣ်လီၤနၤတၢ်န့ၢ်စိန့ၢ်ကမီၤလၢပှၤကလုာ်တဖၣ်ဒီးဘီ မုၢ်တဖၣ်အဖီခိၣ်လၢနကထဲးထီၣ်ဒီးဂုၤလီၤပှီၢ်ကွံာ်တၢ်, လၢနကမၤဟးဂီၤဒီးမၤလီၤတဲာ်ကွံာ်တၢ်, ဒီးလၢနကသူၣ်ထီၣ်ဘှီ ထီၣ်တၢ်ဒီးသူၣ်လီၤဖျးလီၤတၢ်အဂီၢ်န့ၣ်လီၤ.”
11 ယွၤသံကွၢ်ယၤ, “စီိၤယံးရမံယၤဧၢ, နထံၣ်တၢ်မနုၤလဲၣ်.”
ယစံးဆၢအီၤ, “ယထံၣ်သ့ၣ်ၡၤကးအဒ့တဒ့လီၤ.”
12 ယွၤစံးဝဲ, “နစံးတၢ်န့ၣ်ဘၣ်လီၤ. ယခိးကွၢ်တၢ်ဒ်သိးယကထံၣ် ဘၣ်ယတၢ်ကတိၤတဖၣ်ကလၢထီၣ်ပှဲၤထီၣ်ဝဲအဂီၢ်လီၤ.”
13 အန့ၣ်ဒီး, ယွၤကတိၤကဒီးတၢ်ဒီးယၤ, ဒီးသံကွၢ်ဝဲ, “နထံၣ်တၢ်အဂၤမနုၤဒံးလဲၣ်.”
ယစံးဆၢအီၤ, “ယထံၣ်သပၢၤတဖျၢၣ်ကလာ်ထီၣ်လၢကလံၤစိးတခီ, ဒီးမၤအသးဒ်ကတကျၢၢ်လီၤအသးဆူအံၤတကပၤအသိးန့ၣ်လီၤ.”
14 အဝဲစံးဘၣ်ယၤ, “တၢ်မၤဟးဂီၤကကလာ်ထီၣ် လၢကလံၤစိးတခီဒီးပုာ်ထီၣ်ယွၤလီၤဘၣ်ပှၤလၢအအိၣ်လၢ ထံကီၢ်တဘ့ၣ်အပူၤခဲလၢာ်လီၤ.
15 အဂ့ၢ်ဒ်အံၤ, ယကိးထီၣ်ပှၤကလုာ်တဖၣ်ခဲလၢာ်လၢကလံၤစိးတခီ ဒ်သိးကဟဲဝဲအဂီၢ်လီၤ. အဝဲသ့ၣ်အစီၤပၤတဖၣ်ကပာ်ထီၣ် အလီၢ်ပစိာ်တဖၣ်ဖဲဝ့ၢ်ယရူၤၡလ့ၣ်အတြဲၤတဖၣ်, ဒီးဝးတရံးအဒူၣ် တဖၣ်, ဒီးဝးတရံးကီၢ်ယူဒၤအဝ့ၢ်တဖၣ်စ့ၢ်ကီးန့ၣ်လီၤ.
16 ယကစံၣ်ညီၣ်ယပှၤဂီၢ်မုၢ်မ့ၢ်လၢအဝဲသ့ၣ်မၤတ့ၢ်တၢ်ဒဲးဘးအဃိလီၤ. အဝဲသ့ၣ်ပာ်လီၤတဲာ်ကွံာ်ယၤ, လုၢ်ထီၣ်တ့ၢ်တၢ်လုၢ်တၢ်ပာ်တဖၣ်ဆူ ကစၢ်အဂၤတဖၣ်အအိၣ်, ဒီးတ့ထီၣ်တၢ်ဂီၤတဖၣ်ဒီးဘူၣ်ထီၣ်ဘါထီၣ် တ့ၢ်အီၤအဃိလီၤ.
17 စီၤယံးရမံယၤဧၢ, အိၣ်ကတဲာ်ကတီၤနသး, လဲၤဒီးတဲဘၣ်အဝဲသ့ၣ်တၢ်ခဲလၢာ်လၢယမၤလိာ်နၤလၢနကစံးဘၣ် တဲဘၣ်န့ၣ်တက့ၢ်. ခဲကနံၣ်အံၤ, ပျံၤအဝဲသ့ၣ်တဂ့ၤ. မ့တမ့ၢ်ဘၣ်ဒီး, ယကဒုးလီၤတၢ်ပျံၤတၢ်ဖုးလၢနပူၤဒိၣ်ဒၣ်တၢ်တက့ၢ်ဖဲနအိၣ်ဒီးအဝဲသ့ၣ် အဆၢကတီၢ်န့ၣ်လီၤ.
18 စီၤယံးရမံယၤဧၢ, ဒိကနၣ်တက့ၢ်. ပှၤလၢအအိၣ်လၢထံကီၢ်တဘ့ၣ် အံၤအပူၤခဲလၢာ်, လၢအမ့ၢ်ကီၢ်ယူဒၤအစီၤပၤတဖၣ်,ပဒိၣ်ပပှၢ်တဖၣ်, ပှၤလုၢ်တၢ်အခိၣ်တဖၣ်, ဒီးပှၤဂီၢ်မုၢ်တဖၣ်ကထီဒါနၤလီၤ.
19 ဘၣ်ဆၣ်ဒီးမုၢ်မဆါတနံၤအံၤ, ယဟ့ၣ်လီၤလံနၤတၢ်ဂံၢ်တၢ်ဘါ လၢနကတြီဆၢအဝဲသ့ၣ်အဂီၢ်လီၤ. နကလီၤဂာ်ဒီးဝ့ၢ်တဝ့ၢ်လၢ အဘၣ်တၢ်မၤကျၢၤအီၤလၢတိာ်ဧိၤတာ်ဧိၤ, ထးအထူၣ်တထူၣ်, ဒီးတၢ်အခိၣ်ဒူတိၢ်ဘီတခါန့ၣ်လီၤ. အဝဲသ့ၣ်တမၤနၢၤမၤဃၣ် နၤဘၣ်. အဂ့ၢ်ဒ်အံၤ, ယကအိၣ်ဒီးနၤလၢယကဒီဒၣ်အိၣ်ပှိၤနၤ အဂီၢ်လီၤ. ယၤ, ယွၤအံၤယကတိၤလံတၢ်လံ.”