10
1 ယ့ၣ်ၡူးစံးဝဲဒၣ်, “ယစံးဘၣ်တဲဘၣ်သုတီတီလိၤလိၤ, ပှၤတဂၤလၢအတဟဲနုာ်ဘၣ်ဆူသိကရၢၢ်ပူၤခီဖျိကျဲစၢၤ, မ့မ့ၢ်ဟဲခီနုာ်ဝဲလၢကျဲအဂၤတပူၤဒၣ်န့ၣ်, မ့ၢ်တၢ်ဟုၣ်တၢ်ဘျၣ်ဒီးတမျိးတမျာ်န့ၣ်လီၤ.
2 မ့မ့ၢ်ပှၤလၢအဟဲနုာ်လီၤခီဖျိကျဲစၢၤတဂၤန့ၣ်, မ့ၢ်သိတဖၣ် အပှၤကွၢ်သိလီၤ.
3 ပှၤပၢၤကျဲစၢၤတဂၤအိးထီၣ်န့ၢ်ကျဲလၢအဂီၢ်ဒီးသိတဖၣ် နၢ်ဟူအကလုၢ်ဖဲအဝဲကိးအသိဒၣ်ဝဲအမံၤတဒုဘၣ်တဒု ဒီးအဝဲဒၣ်ဆှၢထီၣ်အသိတဖၣ်ဆူကရၢၢ်အချၢန့ၣ်လီၤ.
4 ဖဲအဝဲဆှၢထီၣ်အသိတဖၣ်ဆူတၢ်ချၢဝံၤဒီး, အဝဲလဲၤတၢ်လၢအဝဲသ့ၣ်တဖၣ်အမဲာ်ညါဒီးအဝဲသ့ၣ် ပိာ်ထီၣ်အခံမ့ၢ်လၢအသ့ၣ်ညါအကလုၢ်အဃိလီၤ.
5 အဝဲသ့ၣ်တပိာ်ပှၤဂၤအခံဘၣ်. အခိၣ်တလိာ်, အဝဲသ့ၣ်ကဃ့ၢ်ကွံာ်လၢပှၤဒ်န့ၣ်သိးတဖၣ်အအိၣ် မ့ၢ်လၢအတသ့ၣ်ညါအကလုၢ်အဃိလီၤ.”
6 ယ့ၣ်ၡူးစံးဘၣ်အဝဲသ့ၣ်လၢတၢ်ကတိၤဒိအံၤဘၣ်ဆၣ်ဒီး, အဝဲသ့ၣ်တနၢ်ပၢၢ်တၢ်ကတိၤဒိအံၤအခီပညီဘၣ်.
7 မၤသးဒ်န့ၣ်ဒီး ယ့ၣ်ၡူးစံးကဒီးဝဲ, “ယစံးဘၣ်တဲဘၣ်သုတီတီ လိၤလိၤ, ယမ့ၢ်ကျဲစၢၤလၢသိတဖၣ်အဂီၢ်လီၤ.
8 ပှၤအဂၤလၢအဟဲလၢယမဲာ်ညါတဖၣ် မ့ၢ်တၢ်ဟုၣ်တၢ်ဘျၣ်ဒီးတမျိးတမျာ်လီၤ. ဒီးသိတဖၣ်တကနၣ်အဝဲသ့ၣ်အကလုၢ်ဘၣ်.
9 ယဲဒၣ်အံၤယမ့ၢ်ကျဲစၢၤလီၤ. ပှၤတဂၤလၢ်လၢ်လၢအဟဲနုာ် ခီဖျိယၤန့ၣ်, ကဘၣ်တၢ်အုၣ်က့ၤခီၣ်က့ၤအီၤလီၤ. အဝဲကဟဲ နုာ်ဒီးကဟးထီၣ်ဒီးကထံၣ်န့ၢ်တၢ်အီၣ်ဆၣ်အလီၢ်န့ၣ်လီၤ.
10 တၢ်ဟုၣ်တၢ်ဘျၣ်န့ၣ်ဟဲဝဲဒ်သိးအကဟုၣ်တၢ်, မၤသံတၢ်ဒီးမၤဟးဂီၤတၢ်အဂီၢ်လီၤ. မ့မ့ၢ်ယဲဒၣ်အံၤယဟဲယဲဒ်သိးသုကန့ၢ်ဘၣ်တၢ်မူ ဒီးန့ၢ်ဘၣ်အီၤအါအါကလဲာ်အဂီၢ်လီၤ.
11 ယဲဒၣ်အံၤယမ့ၢ်ပှၤကွၢ်သိလၢအဂ့ၤတဂၤလၢအဟ့ၣ်လီၤကွံာ် အသးသမူလၢအသိအဂီၢ်လီၤ.
12 ပှၤဒိးလဲအသးလၢအတမ့ၢ်ပှၤကွၢ်သိတဂၤဒီးသိတမ့ၢ်အတၢ် ဘၣ်န့ၣ်, တုၤအထံၣ်ထွံၣ်မံၤဟဲဒီးအဝဲပာ်တ့ၢ်ကွံာ်သိဒီးဃ့ၢ် ကွံာ်ဝဲသတးဒီး, ထွံၣ်မံၤဂုာ်အ့ၣ်သိဒီးမၤလီၤပြံပြါကွံာ်သိ တဖၣ်န့ၣ်လီၤ.
13 ပှၤဒိးလဲအသးတဂၤအံၤဃ့ၢ်ကွံာ်ဝဲမ့ၢ်လၢအဝဲမ့ၢ်ဒၣ်ပှၤဒိးလဲ အသးတဂၤဒီးအသးတအိၣ်ဘၣ်သိတဖၣ်အဃိလီၤ.
14 ယဲဒၣ်အံၤယမ့ၢ်ပှၤကွၢ်သိလၢအဂ့ၤတဂၤလီၤ. ဒ်ပၢ်သ့ၣ်ညါယၤဒီးယသ့ၣ်ညါပၢ်အသိးန့ၣ်, ယသ့ၣ်ညါ ယသိဒီးအဝဲသ့ၣ် သ့ၣ်ညါယၤလီၤ.
15 ဒီးယဟ့ၣ်လီၤကွံာ်ယသးသမူလၢယသိအဂီၢ်လီၤ.
16 သိအိၣ်ဝဲအဂၤတဖၣ်လၢအဘၣ်ဃးဒီးယၤလၢ အတအိၣ်လၢသိကရၢၢ်အဝဲအံၤအပူၤဘၣ်. ဘၣ်ဆၣ်ဒီးယကဘၣ်ဆှၢအီၤစ့ၢ်ကီးလီၤ. ဒီးအဝဲသ့ၣ်ကဒိကနၣ်ယကလုၢ်ဒီးကကဲထီၣ်သိ တဖုဃီအိၣ်ဒီးပှၤကွၢ်သိတဂၤဃီလီၤ.
17 လၢတၢ်ဂ့ၢ်အံၤအဃိ, ယပၢ်အဲၣ်ယၤမ့ၢ်လၢယဟ့ၣ်လီၤကွံာ် ယသးသမူဒ်သိးယကဒိးန့ၢ်က့ၤကဒီးအီၤအဂီၢ်လီၤ.
18 ပှၤဟံးန့ၢ်ကွံာ်ယသးသမူလၢယၤတသ့ဘၣ်နီတဂၤ ဘၣ်. ယဟ့ၣ်လီၤကွံာ်အီၤလၢယသးဒၣ်ယဲန့ၣ်လီၤ. ယအိၣ်ဒီးတၢ်စိကမီၤလၢယကဟ့ၣ်လီၤကွံာ်အီၤဒီး ယအိၣ်ဒီးတၢ်စိကမီၤလၢယကဟံးက့ၤအီၤအဂီၢ်လီၤ. အဝဲအံၤမ့ၢ်တၢ်လၢယပၢ်မၤလိာ်တ့ၢ်ယၤလၢယကမၤ အီၤအဂီၢ်လီၤ.”
19 မ့ၢ်လၢတၢ်ကတိၤတဖၣ်အံၤအဃိဒီး, တၢ်လီၤမုၢ်လီၤဖးအိၣ်ထီၣ်ကဒီးလၢပှၤယူဒၤဖိအကျါန့ၣ်လီၤ.
20 အဝဲသ့ၣ်အါဂၤစံးဝဲ, “ပှၤတဂၤအံၤတၢ်နါဒိးအီၤ, ဒီးအဝဲမ့ၢ်ပှၤအပျုၢ်လီၤ. ဘၣ်မနုၤအဃိသုဒိကနၣ်အီၤန့ၣ်လဲၣ်.”
21 ဘၣ်ဆၣ်ဒီးအဂၤတဖၣ်စံးဝဲ, “ပှၤလၢတၢ်နါဒိးအီၤန့ၣ်ကတိၤတၢ်ဒ်အံၤတသ့ဘၣ်. တၢ်နါဒုးထံၣ်ထီၣ်က့ၤပှၤလၢအမဲာ်ဘျီၣ်ဘၣ်ကသ့ဧါ.”
22 မ့ၢ်တၢ်ဂိၢ်ခါအဆၢကတီၢ်, ဒီးတၢ်ပာ်စီဆှံတၢ်လုၢ်ဟံၣ်အဘူၣ် ဘၣ်တၢ်မၤအီၤလၢဝ့ၢ်ယရူၤၡလ့ၣ်အပူၤလီၤ.
23 ယ့ၣ်ၡူးဟးထီၣ်ဟးလီၤလၢစီၤၡလိၤမိၤအတၢ်ဒုးခိၣ် အဖီလာ်လၢတၢ်လုၢ်ဟံၣ်အပူၤန့ၣ်လီၤ.
24 ဖဲန့ၣ်အခါ, ပှၤယူဒၤဖိတဖၣ်ဟဲအိၣ်ဝးတရံးအီၤ ဒီးသံကွၢ်တၢ်ဒီးစံးဝဲ, “နကပာ်ပှၤလၢတၢ်သးဒ့ဒီအပူၤ ဆံးယံာ်လဲၣ်. နမ့မ့ၢ်ခရံာ်ဒီးတဲဘၣ်ပှၤဖျါဖျါတက့ၢ်.”
25 ယ့ၣ်ၡူးစံးဆၢတၢ်ဒီးစံးဝဲ, “ယစံးဘၣ်တဲဘၣ်တ့ၢ်သုလံ. ဘၣ်ဆၣ်သုတနာ်ယၤဘၣ်. တၢ်မၤတဖၣ်လၢယမၤအီၤလၢ ယပၢ်အစိကမီၤန့ၣ်အုၣ်အသးလၢယဂီၢ်လီၤ.
26 သုတမ့ၢ်ယသိတဖၣ်အဃိ, သုတနာ်တၢ်ဘၣ်.
27 ယသိတဖၣ်ဒိကနၣ်ယကလုၢ်, ယသ့ၣ်ညါအီၤဒီးအဝဲသ့ၣ်ပိာ်ယခံလီၤ.
28 ယဟ့ၣ်အီၤလၢတၢ်မူအထူအယိာ်, ဒီးအဝဲသ့ၣ်တသံလၢၤနီတဘျီဘၣ်. ပှၤဂုာ်န့ၢ်ဆူၣ်အဝဲသ့ၣ်လၢယအိၣ်တသ့နီတဂၤဘၣ်.
29 ယပၢ်လၢအဟ့ၣ်လီၤအဝဲသ့ၣ်လၢယၤန့ၣ် ဒိၣ်န့ၢ်တၢ်ခဲလၢာ်, ဒီးပှၤဂုာ်န့ၢ်ဆူၣ်အဝဲသ့ၣ်လၢယပၢ်အစုပူၤ တသ့နီတဂၤဘၣ်.
30 ယပၢ်ဒီးယၤန့ၣ်မ့ၢ်တၢ်တမံၤဃီလီၤ.”
31 အန့ၣ်ဒီးပှၤယူဒၤဖိတဖၣ်ထၢထီၣ်ကဒီးလၢၢ်လၢကကွံာ်အီၤ အဂီၢ်လီၤ.
32 ယ့ၣ်ၡူးစံးဘၣ်အဝဲသ့ၣ်, “ယဒုးနဲၣ်တ့ၢ်သုတၢ်မၤအဂ့ၤအါမံၤလၢယပၢ်အအိၣ်လံ. သုသးအိၣ်ကွံာ်ယၤလၢလၢၢ်လၢတၢ်မၤဖဲလဲၣ်တမံၤအဃိ လဲၣ်.”
33 ပှၤယူဒၤဖိတဖၣ်စံးဆၢအီၤ, “တမ့ၢ်လၢတၢ်မၤအဂ့ၤတမံၤမံၤ အဃိ, ပသးအိၣ်ကွံာ်သံနၤလၢလၢၢ်န့ၣ်ဘၣ်. မ့ၢ်လၢနကတိၤဒုၣ်ဒွဲၣ်စံးအၢယွၤအဃိလီၤ. နမ့ၢ်ဒၣ်ပှၤကညီ တဂၤလီၤ. ဘၣ်ဆၣ်နစံးလီၤနသးလၢနမ့ၢ်ကစၢ်ယွၤလီၤ.”
34 ယ့ၣ်ၡူးစံးဆၢအဝဲသ့ၣ်, “တၢ်ကွဲးအသးလၢသုတၢ်သိၣ် တၢ်သီဒၣ်ဝဲအပူၤလၢကစၢ်ယွၤစံးဝဲ, ‘သုမ့ၢ်ယွၤတဖၣ်လီၤ’ (စံး ၈၂:၆).
35 မ့မ့ၢ်ဒ်န့ၣ်ဒီးကစၢ်ယွၤအကလုၢ်ကထါလၢအမ့ၢ်ဝဲတီဝဲတဘိ ယူၢ်ဃီ, မ့ၢ်ကိးပှၤလၢအဒိးန့ၢ်ယွၤအကလုၢ်ကထါတဖၣ်လၢ ယွၤတဖၣ်ဒီး,
36 မ့ၢ်သုကစံးလၢယၤ, ပှၤလၢပၢ်ဃုထၢဒီးမၢလီၤဆူဟီၣ်ခိၣ်တဂၤ အံၤကတိၤဒုၣ်ဒွဲၣ်စံးအၢယွၤ, မ့ၢ်လၢယစံး, ‘ယဲဒၣ်အံၤယမ့ၢ် ကစၢ်ယွၤအဖိခွါ’ အဃိန့ၣ်ဧါ.
37 ယမ့ၢ်တမၤတၢ်တဖၣ်လၢယပၢ်သးအိၣ်လၢယကမၤ ဘၣ်ဒီး, တဘၣ်နာ်ယၤတဂ့ၤ.
38 ဘၣ်ဆၣ်ယမ့ၢ်မၤအီၤဒီး, သုမ့ၢ်တနာ်ယၤဒၣ်လဲာ်, နာ်တၢ်လၢယမၤတဖၣ်ဒ်သိးသုကသ့ၣ်ညါဒီးနၢ်ပၢၢ်လီၤတံၢ်လၢ ပၢ်အိၣ်လၢယပူၤဒီးယအိၣ်လၢပၢ်အပူၤန့ၣ်တက့ၢ်.”
39 အဝဲသ့ၣ်ကျဲးစၢးဟံးဃာ်ဖီၣ်ဃာ်ကဒီးယ့ၣ်ၡူး, ဘၣ်ဆၣ်အဝဲဟးပူၤဖျဲးကွံာ်အသးလၢအဝဲသ့ၣ်အစုပူၤလီၤ.
40 ယ့ၣ်ၡူးက့ၤကဒါက့ၤကဒီးဆူထံကျိယၢ်ဒ့ၣ်ဝၢ်ဘးခီဆူ တၢ်လီၢ်ဖဲစီၤယိၤဟၣ်ဘျၢတ့ၢ်ပှၤအလီၢ်, ဒီးအိၣ်ဝဲဖဲန့ၣ်လီၤ.
41 ဒီးပှၤဟဲအါဂၤဆူအအိၣ်ဒီးအဝဲသ့ၣ်စံးဝဲ, “စီၤယိၤဟၣ်တမၤတၢ်လီၤလးနီတမံၤဘၣ်. ဘၣ်ဆၣ်ကယဲၢ်တၢ်လၢအဝဲစံးဝဲဘၣ်ဃးပှၤတဂၤအံၤအဂ့ၢ် အကျိၤန့ၣ်, မ့ၢ်ဝဲတီဝဲခဲလၢာ်လီၤ.”
42 ဒီးပှၤဖဲန့ၣ်အါဂၤစူၢ်က့ၤနာ်က့ၤအီၤလီၤ.