စီၤယိၤဟၣ်
ကွဲးဟ့ၣ်ယုၢ်လီၤဝဲအသိး
JOHN
စီၤယိၤဟၣ်အလံာ်တၢ်သးခုအကစီၣ်အံၤပာ်ဖျါထီၣ်ယ့ၣ်ၡူးဒ် ‘ကစၢ်ယွၤအကလုၢ်အထူအယိာ်’ အသိး, လၢအ “ကဲထီၣ်တၢ်ညၣ်” ဒီးအိၣ်ဝဲဆိးဝဲလၢပကျါန့ၣ်လီၤ. ဒ်လံာ်အံၤစံးဝဲအသိး, တၢ်သးခုအကစီၣ်အံၤဘၣ်တၢ်ကွဲးအီၤဒ်သိး ပှၤလၢအဖးအီၤတဖၣ်ကစူၢ်က့ၤနာ်က့ၤဝဲလၢယ့ၣ်ၡူးမ့ၢ်ခရံာ် လၢတၢ်စံးပာ်တ့ၢ်လၢအဂ့ၢ်, ကစၢ်ယွၤအဖိခွါ, ဒီးခီဖျိတၢ်နာ်အီၤန့ၣ်အဝဲသ့ၣ်ကန့ၢ်ဘၣ်တၢ်မူအဂီၢ်န့ၣ်လီၤ (ယိၤ ၂၀:၃၁).
လၢတၢ်ကတိၤဆှၢနုာ်လၢအပာ်ဖျါကစၢ်ယွၤ အကလုၢ်အထူအယိာ်ဒီးယ့ၣ်ၡူးမ့ၢ်တၢ်တမံၤဃီဝံၤအလီၢ် ခံ, လံာ်တၢ်သးခုအကစီၣ်အံၤအခီၣ်ထံးတပတီၢ် ပာ်ဖျါဝဲတၢ်လီၤလးတဖၣ်အကလုာ်ကလုာ်လၢအဒုးနဲၣ်ဖျါဝဲလၢ ယ့ၣ်ၡူးမ့ၢ်တၢ်အုၣ်က့ၤခီၣ်က့ၤကစၢ်လၢအဘၣ်တၢ်စံးပာ်တ့ၢ်ဝဲ, ကစၢ်ယွၤအဖိခွါတဂၤန့ၣ်လီၤ. တၢ်တဖၣ်အံၤအလီၢ်ခံပိာ်ထွဲထီၣ်ဝဲတၢ်ကတိၤတဖၣ် လၢအပာ်ဖျါတၢ်လၢတၢ်လီၤလးတဖၣ်လီၣ်ဖျါထီၣ်ဝဲန့ၣ်လီၤ. လံာ်အဝဲအံၤတပတီၢ် စံးဘၣ်တဲဘၣ်ပှၤလၢပှၤတနီၤစူၢ်က့ၤနာ် က့ၤယ့ၣ်ၡူးဒီးပိာ်ထီၣ်အခံဒ်လဲၣ်, ဒီးပှၤတနီၤတခီထီဒါအီၤဒီးတစူၢ်က့ၤနာ်က့ၤအီၤအဂ့ၢ်န့ၣ် လီၤ. လံာ်အံၤအဆၢဒိၣ် ၁၃ တုၤ ၁၇ ပာ်ဖျါထီၣ် ယ့ၣ်ၡူးဒီးအပှၤတၢ်မၢဖိတဖၣ်အတၢ်ရ့လိာ်မုာ်လိာ် အသးဘူးဘူးတံၢ်တံၢ်ဖဲမုၢ်နၤလၢအဝဲဘၣ်တၢ်ဟံးဃာ်ဖီၣ် ဃာ်အီၤ, ဒီးအဝဲအတၢ်ကတိၤဟ့ၣ်ဂံၢ်ဟ့ၣ်ဘါအတၢ်မၢဖိတဖၣ် ဖဲမုၢ်ဟါလၢအဝဲကဘၣ်တၢ်ပျၤထီအီၤလၢထူၣ်စုညါအလိၤန့ၣ် လီၤ. လံာ်အံၤအဆၢဒိၣ်လၢအကတၢၢ်တဖၣ် ပာ်ဖျါထီၣ်ယ့ၣ်ၡူးဘၣ်တၢ်ဟံးဃာ်ဖီၣ်ဃာ်အီၤဒီးဘၣ်တၢ် သမံသမိးအီၤအဂ့ၢ်, ဘၣ်တၢ်ပျၤထီအီၤလၢထူၣ်စုညါအလိၤဒီးအတၢ်ဂဲၤဆၢထၢၣ်သမူ ထီၣ်က့ၤအဂ့ၢ်, ဒီးအတၢ်လီၣ်ဖျါထီၣ်အသးလၢအတၢ်မၢဖိတဖၣ်ဖဲအဂဲၤဆၢထၢၣ် သမူထီၣ်က့ၤဝံၤအလီၢ်ခံန့ၣ်လီၤ.
ပိာ်မုၣ်လၢအအဲၣ်ဘၢအဝၤတဂၤအဂ့ၢ် (၈:၁-၁၁), ဘၣ်တၢ်ပာ်ဖျါအီၤလၢတၢ်ပနီၣ်ကွီၤတူာ်အပူၤ မ့ၢ်လၢတၢ်ကွဲးလၢပျၢၤတနီၤအပူၤတၢ်တဒၢနုာ်အီၤဘၣ်, ဒီးတၢ်ကွဲးလၢပျၢၤတနီၤတခီ ဒၢနုာ်ဝဲလၢတၢ်လီၢ်အဂၤတဖၣ်အပူၤအဃိန့ၣ်လီၤ.
စီၤယိၤဟၣ်ပာ်ဒိၣ်တၢ်ဟ့ၣ်တၢ်မူအထူအယိာ်ခီဖျိခရံာ်, တၢ်ဟ့ၣ်လၢအစးထီၣ်အသးခဲအံၤ မ့ၢ်တၢ်ဟ့ၣ်လၢအဟဲတုၤအိၣ်ပှၤလၢအတူၢ်လိာ် ယ့ၣ်ၡူးဒ်အမ့ၢ်ကျဲ, တၢ်မ့ၢ်တၢ်တီဒီးတၢ်မူန့ၣ်လီၤ. တၢ်လၢအဖျါလီၤတိၢ်လီၤဆီလၢလံာ်ယိၤဟၣ်အပူၤအံၤမ့ၢ်ဝဲ တၢ်သူတၢ်လၢအဘၣ်ထွဲဒီးတၢ်အိၣ်မူမုၢ်ဆ့ၣ်မုၢ်ဂီၤဒ်ထံ, ကိၣ်, တၢ်ကပီၤ, ပှၤကွၢ်သိဒီးအသိ, စပံးမုၢ် ဒီးအသၣ်ဒီးဒုးကဲထီၣ်အီၤလၢတၢ်လၢအကဆှၢပှၤဆူသး အတၢ်မ့ၢ်တၢ်တီတဖၣ်အဂီၢ်န့ၣ်လီၤ.
1
1 လၢထံးလၢသီန့ၣ်, တၢ်ကလုၢ်အိၣ်တ့ၢ်ဝဲ, တၢ်ကလုၢ်န့ၣ်အိၣ်ဝဲဒီးကစၢ်ယွၤဒီးတၢ်ကလုၢ်န့ၣ် မ့ၢ်တၢ်တမံၤဃီဒီးကစၢ်ယွၤန့ၣ်လီၤ.
2 လၢအခီၣ်ထံးလံၤလံၤန့ၣ်, တၢ်ကလုၢ်န့ၣ်အိၣ်တ့ၢ်ဝဲဒီးကစၢ်ယွၤန့ၣ်လီၤ.
3 ခီဖျိအီၤန့ၣ်တၢ်ခဲလၢာ်ကဲထီၣ်ဝဲဒီးတၢ်လၢအဘၣ်တၢ်တ့အီၤ ခဲလၢာ်န့ၣ်တကဲထီၣ်လၢအစုပူၤဘၣ်ဒီးတအိၣ်ဘၣ်နီတမံၤဘၣ်.
4 တၢ်ကလုၢ်န့ၣ်မ့ၢ်တၢ်မူအဂံၢ်ခီၣ်ထံးဒီးတၢ်မူအံၤမ့ၢ်ပှၤကညီ အတၢ်ကပီၤန့ၣ်လီၤ.
5 တၢ်ကပီၤအံၤကပီၤထီၣ်လၢတၢ်ခံးကျါဒီးတၢ်ခံးမၤဟါမၢ်ကွံာ်အီၤ တန့ၢ်ဘၣ်.
6 ကစၢ်ယွၤဆှၢလီၤအပှၤစိာ်တၢ်ကစီၣ်တဂၤလၢအမံၤမ့ၢ် စီၤယိၤဟၣ်န့ၣ်လီၤ.
7 အဝဲဒၣ်ဟဲလၢကအုၣ်အသးလၢတၢ်ကပီၤအဂ့ၢ်ဒ်သိး ပှၤခဲလၢာ်ကနၢ်ဟူဘၣ်ဒီးစူၢ်က့ၤနာ်က့ၤတၢ်ခီဖျိအီၤအဂီၢ်န့ၣ်လီၤ.
8 အဝဲအကစၢ်ဒၣ်ဝဲတမ့ၢ်တၢ်ကပီၤဘၣ်. မ့ၢ်ဒၣ်အဟဲဝဲဒ်သိးကအုၣ်အသးလၢတၢ်ကပီၤအဂ့ၢ်အဂီၢ်န့ၣ်လီၤ.
9 တၢ်ကပီၤနီၢ်နီၢ်အံၤမ့ၢ်တၢ်ကပီၤလၢအဟဲနုာ်ဆူဟီၣ်ခိၣ်ချၢဒီး ကပီၤထီၣ်လၢပှၤဟီၣ်ခိၣ်ဖိခဲလၢာ်အဂီၢ်န့ၣ်လီၤ.
10 တၢ်ကလုၢ်အံၤအိၣ်ဝဲလၢဟီၣ်ခိၣ်အပူၤ ဒီးကစၢ်ယွၤဒုးကဲထီၣ်ဟီၣ်ခိၣ်ခီဖျိအီၤဘၣ်ဆၣ်, ဟီၣ်ခိၣ်တသ့ၣ်ညါဘၣ်အီၤဘၣ်.
11 ဟဲဆူအထံအကီၢ်ဒၣ်ဝဲဒီးအပှၤကလုာ်ဒၣ်ဝဲတတူၢ်လိာ်ဘၣ်အီၤဘၣ်.
12 ဘၣ်ဆၣ်ဒီးပှၤတနီၤန့ၣ်တူၢ်လိာ်အီၤဒီးနာ်အီၤသတးဒီး အဝဲဒၣ်ဒုးကဲထီၣ်အီၤလၢကစၢ်ယွၤအဖိတဖၣ်န့ၣ်လီၤ.
13 တၢ်အံၤမၤအသးတမ့ၢ်လၢအဝဲသ့ၣ်အိၣ်ဖျဲၣ်ထီၣ်လၢမိၢ်ပၢ် တဖၣ်, မ့တမ့ၢ်လၢတၢ်ဖံးတၢ်ညၣ်အသးအတၢ်ဆၢန့ၢ်, မ့တမ့ၢ်လၢပှၤကညီအသးန့ၣ်ဘၣ်. မ့မ့ၢ်ကဲထီၣ်ဝဲလၢ ကစၢ်ယွၤအသးန့ၣ်လီၤ.
14 တၢ်ကလုၢ်န့ၣ်ကဲထီၣ်ပှၤကညီ, ဒီးလၢပှဲၤဝဲဒီးတၢ်ဘျုးတၢ်ဖှိၣ် ဒီးတၢ်မ့ၢ်တၢ်တီဒီးအိၣ်ဝဲဆိးဝဲလၢပကျါန့ၣ်လီၤ. ဒီးပထံၣ်ဘၣ်အလၤကပီၤလၢအဒိးန့ၢ်ဝဲဒ်ပၢ်အဖိခွါတဂၤဃီ အသိးန့ၣ်လီၤ.
15 စီၤယိၤဟၣ်အုၣ်အသးလၢအဂ့ၢ်ဒီးကိးသတြီထီၣ်ဝဲ, “ပှၤတဂၤအံၤမ့ၢ်ပှၤလၢယစံးဘၣ်တဲဘၣ်သုလၢအဂ့ၢ်လၢ, ‘အဝဲဒၣ်ဟဲလၢယလီၢ်ခံဘၣ်ဆၣ်ဒိၣ်န့ၢ်ယၤတက့ၢ် မ့ၢ်လၢအဝဲအိၣ်တ့ၢ်ဝဲတချုးယအိၣ်ဖျဲၣ်ထီၣ်ဒံးဘၣ်န့ၣ်လီၤ.’ ”
16 လၢအဝဲဒၣ်အတၢ်ဘျုးတၢ်ဖှိၣ်အတၢ်လၢတၢ်ပှဲၤအပူၤန့ၣ်, ပဝဲခဲလၢာ်ပဒိးန့ၢ်တၢ်ဘျုးတၢ်ဖှိၣ်တမံၤဝံၤတမံၤန့ၣ်လီၤ.
17 ကစၢ်ယွၤဟ့ၣ်လီၤတၢ်သိၣ်တၢ်သီခီဖျိစီၤမိၤၡ့, မ့မ့ၢ်တၢ်ဘျုးတၢ်ဖှိၣ်ဒီးတၢ်မ့ၢ်တၢ်တီန့ၣ် ဟဲခီဖျိယ့ၣ်ၡူးခရံာ်န့ၣ်လီၤ.
18 ပှၤတထံၣ်ဘၣ်ကစၢ်ယွၤနီတခီၣ်နီတဂၤဘၣ်. အဖိခွါထဲတဂၤဧိၤလၢအမ့ၢ်တၢ်တမံၤဃီဒီးအီၤ ဒီးအိၣ်ဘူးဒီးအီၤန့ၣ်, လီၣ်ဖျါထီၣ်အီၤလံန့ၣ်လီၤ.
(မး.၃:၁-၁၂; မၢ်.၁:၁-၈; လူၤ.၃:၁-၁၈)
19 ဖဲပှၤယူဒၤဖိအခိၣ်အနၢ်လၢယရူၤၡလ့ၣ်တဖၣ် မၢလီၤပှၤလုၢ်တၢ်အခိၣ်ဒီးပှၤလ့ၤဝံဖိတဖၣ်ဆူ စီၤယိၤဟၣ်အအိၣ်ဒ်သိးကသံကွၢ်အီၤ, “နမ့ၢ်မတၤလဲၣ်.” န့ၣ်ဒီး အဝဲအတၢ်အုၣ်အသးမ့ၢ်အအံၤန့ၣ်လီၤ.
20 အဝဲဒၣ်အၢၣ်လီၤဒီးကတိၤဝဲဖျါဖျါဒီးစံးဝဲ, “ယတမ့ၢ်ခရံာ်ဘၣ်.”
21 ဒီးအဝဲသ့ၣ်သံကွၢ်အီၤ, “မ့မ့ၢ်ဒ်န့ၣ်ဒီးနမ့ၢ်မတၤလဲၣ်. နမ့ၢ်ဝံအ့ၤလံယၤဧါ.” ဒီးစီၤယိၤဟၣ်စံးဆၢဝဲ, “တမ့ၢ်ဘၣ်.” သံကွၢ်ကဒီးဝဲ, “နမ့ၢ်ဝံလၢယွၤကမၢလီၤဝဲန့ၣ်ဧါ.” ဒီးအဝဲဒၣ်စံးဆၢဝဲ, “တမ့ၢ်ဘၣ်.”
22 အဝဲသ့ၣ်စံးဝဲဒၣ်, “နမ့ၢ်မတၤလဲၣ်န့ၣ်စံးဘၣ်တဲဘၣ်ပှၤ, ဒ်သိးပကစံးဘၣ်တဲဘၣ်က့ၤပှၤလၢအမၢလီၤပှၤတဖၣ်န့ၣ်တက့ၢ်. နဂ့ၢ်နကျိၤဒၣ်နဲန့ၣ်, နကစံးဒ်လဲၣ်.”
23 စီၤယိၤဟၣ်စံးဆၢဝဲဒ်ဝံယၡါယၤစံးဝဲအသိး,
“ယမ့ၢ်ပှၤအကလုၢ်သီၣ်လၢအကိးထီၣ်လၢပှၢ်မုၢ်ကနၢ
မၤလိၤမၤဘျၢပာ်ကျဲလၢကစၢ်ကလဲၤတၢ်အဂီၢ်တက့ၢ်” န့ၣ်လီၤ.
24 ပှၤစိာ်တၢ်ကစီၣ်တဖၣ်အံၤဘၣ်တၢ်မၢလီၤအီၤလၢပှၤဖၤရံၤၡဲ တဖၣ်န့ၣ်လီၤ.
25 အဝဲသ့ၣ်သံကွၢ်စီၤယိၤဟၣ်, “နမ့တမ့ၢ်ခရံာ်, မ့တမ့ၢ်ဘၣ်ဒီးဝံအ့ၤလံယၤ, မ့တမ့ၢ်ဘၣ်ဝံလၢယွၤကမၢလီၤအီၤန့ၣ်ဘၣ်ဒီး, ဘၣ်မနုၤအဃိလၢနဘျၢတၢ်လဲၣ်.”
26 စီၤယိၤဟၣ်စံးဆၢတၢ်ဒီးစံးဝဲ, “ယဘျၢသုလၢထံလီၤ. ဘၣ်ဆၣ်ဒီးပှၤလၢသုကျါလၢသုတသ့ၣ်ညါဘၣ်အီၤ တဂၤန့ၣ်အိၣ်ဝဲလီၤ.
27 အဝဲဒၣ်ကဟဲလၢယလီၢ်ခံဒီးထဲယကဃ့ၣ်လီၤအခီၣ်ဖံးအပျံၤဒၣ် လဲာ်န့ၣ်, ယတကြၢးတဘၣ်ယဲဘၣ်.”
28 တၢ်သ့ၣ်တဖၣ်အံၤမၤအသးခဲလၢာ်လၢသဝီဘ့ၤသနံလၢထံကျိယၢ် ဒ့ၣ်အမုၢ်ထီၣ်တကပၤ, ဖဲစီၤယိၤဟၣ်ဘျၢတၢ်န့ၣ်လီၤ.
29 မုၢ်ဆ့ၣ်ထီၣ်တနံၤစီၤယိၤဟၣ်ထံၣ်ဘၣ်ယ့ၣ်ၡူးဟဲဆူအအိၣ်ဒီး စံးဝဲ, “ကွၢ်ကွၢ်အဝဲမ့ၢ်ကစၢ်ယွၤအသိဖိလၢအစိာ်ထီၣ်ကွံာ် ပှၤဟီၣ်ခိၣ်ဖိအတၢ်ဒဲးဘးန့ၣ်လီၤ.
30 အဝဲတဂၤအံၤမ့ၢ်ပှၤလၢယကတိၤတ့ၢ်လံလၢအဂ့ၢ်ဖဲယစံး, ‘ပှၤကဟဲလၢယလီၢ်ခံတဂၤ, ဘၣ်ဆၣ်အဝဲဒၣ်ဒိၣ်န့ၢ်ယၤတက့ၢ် မ့ၢ်လၢအဝဲအိၣ်တ့ၢ်ဝဲတချုးယအိၣ်ဖျဲၣ်ထီၣ်ဒံးဘၣ်န့ၣ်လီၤ.’
31 အဝဲကမ့ၢ်မတၤလဲၣ်န့ၣ်ယတသ့ၣ်ညါဆိဘၣ်. ဘၣ်ဆၣ်ယဟဲဘျၢတၢ်လၢထံကျါဒ်သိးအဝဲ ကဘၣ်တၢ်လီၣ်ဖျါထီၣ်အီၤလၢပှၤအံၣ်စရ့လးဖိ အဂီၢ်န့ၣ်လီၤ.”
32 စီၤယိၤဟၣ်အုၣ်အသးဒီးစံးဝဲဒၣ်, “ယထံၣ်ယွၤအသးန့ၣ်ဟဲလီၤလၢမူခိၣ်ဒ်ထိၣ်လွံၢ်အသိး ဒီးအိၣ်ဝဲလၢအလိၤန့ၣ်လီၤ.
33 အဝဲဒၣ်မ့ၢ်မတၤလဲၣ်န့ၣ်ယတသ့ၣ်ညါယဲဒံးဘၣ်. မ့မ့ၢ်ကစၢ်ယွၤလၢအမၢလီၤယၤလၢယကဘျၢတၢ်လၢထံကျါ တဂၤန့ၣ်, စံးဘၣ်တ့ၢ်ယၤ, ‘နကထံၣ်ဘၣ်ယွၤအသးဟဲလီၤလၢပှၤ တဂၤအလိၤဒီးအဝဲတဂၤအံၤကဘျၢတၢ်လၢသးစီဆှံန့ၣ်လီၤ.’
34 ယထံၣ်ဘၣ်ယဲလံဒီးယစံးဘၣ်တဲဘၣ်သုလၢ အဝဲတဂၤအံၤမ့ၢ်ကစၢ်ယွၤအဖိခွါန့ၣ်လီၤ.”
35 မုၢ်ဆ့ၣ်ထီၣ်တနံၤစီၤယိၤဟၣ်ဆၢထၢၣ်ကဒီးဝဲ ဒီးအပျဲၢ်အဘီၣ်ခံဂၤ
36 ဒီးထံၣ်ဘၣ်ယ့ၣ်ၡူးလဲၤတၢ်ဒီးစံး, “ကွၢ်ကွၢ်, ကစၢ်ယွၤအသိဖိန့ၣ်လီၤ.”
37 အပျဲၢ်အဘီၣ်ခံဂၤနၢ်ဟူစီၤယိၤဟၣ်ကတိၤတၢ်အံၤဒီး ပိာ်ထီၣ်ယ့ၣ်ၡူးအခံန့ၣ်လီၤ.
38 ယ့ၣ်ၡူးဃၣ်ဃီၤအသး, ထံၣ်ဘၣ်အဝဲသ့ၣ်ပိာ်ထီၣ် အခံ, ဒီးသံကွၢ်ဝဲ, “သုဃုမနုၤတမံၤလဲၣ်.”
အဝဲသ့ၣ်စံးဆၢဝဲ, “သရၣ်ဧၢ, နအိၣ်နဆိးဖဲလဲၣ်.”
39 ဒီးအဝဲဒၣ်စံးဆၢဝဲ, “ဟဲဒီးကွၢ်တက့ၢ်.” (အခါဖဲန့ၣ်ကဘၣ်မုၢ်ဃ့ၢ်လီၤလွံၢ်နၣ်ရံၣ်အကတီၢ်န့ၣ်လီၤ.) အဝဲသ့ၣ်လဲၤဒီးအီၤဒီးထံၣ်ဘၣ်ဝဲအတၢ်အိၣ်တၢ်ဆိး အလီၢ်လၢတၢ်န့ၣ်အဃိဒီးအိၣ်ဒီးအီၤတုၤနံၤအဝဲန့ၣ်ကတၢၢ် တစုလီၤ.
40 အပျဲၢ်အဘီၣ်ခံဂၤအကျါတဂၤလၢအနၢ်ဟူစီၤယိၤဟၣ်ကတိၤ တၢ်ဒီးပိာ်ထီၣ်ယ့ၣ်ၡူးအခံမ့ၢ်ဝဲစီၤၡံမိၣ်ပ့းတရူးအဒီပုၢ်ဝဲၢ် စီၤအၣ်ဒရ့းန့ၣ်လီၤ.
41 အဝဲဃုဒၣ်ထံၣ်န့ၢ်ဆိအဒီပုၢ်ဝဲၢ်စီၤၡံမိၣ်ဒီးစံးဘၣ်အီၤ, “ပထံၣ်န့ၢ်လံမ့းၡံအၤန့ၣ်လံ.” (အခီပညီမ့ၢ်ခရံာ်န့ၣ်လီၤ.)
42 ဒီးအဝဲဒၣ်လဲၤဆှၢစီၤၡံမိၣ်ဆူယ့ၣ်ၡူးအအိၣ်န့ၣ်လီၤ.
ဒီးယ့ၣ်ၡူးကွၢ်ဃီၤအီၤဒီးစံးဝဲ, “နမံၤမ့ၢ်စီၤၡံမိၣ်ဒီးနပၢ်အမံၤမ့ၢ် စီၤယိၤနါန့ၣ်လီၤ. ဘၣ်ဆၣ်တၢ်ကကိးက့ၤနၤလၢစီၤက့ၤဖးန့ၣ်လီၤ.” (မ့ၢ်တမံၤဃီဒီးစီၤပ့းတရူးလၢအခီပညီမ့ၢ်လၢၢ်လီၤ.)
43 မုၢ်ဆ့ၣ်ထီၣ်တနံၤယ့ၣ်ၡူးပာ်လီၤအသးလၢကလဲၤဆူ ကီၢ်ကၤလံၤလါန့ၣ်လီၤ. အဝဲထံၣ်န့ၢ်စီၤဖံလံးပူးဒီးစံးဘၣ်အီၤ, “ဟဲဒီးကဲဘၣ်ယပျဲၢ်ယဘီၣ်တက့ၢ်.”
44 (စီၤဖံလံးပူးမ့ၢ်ပှၤဘၣ်ဃးဒီးဝ့ၢ်ဘ့ၤသစဲဒၤ, ဝ့ၢ်လၢစီၤအၣ်ဒရ့းဒီးစီၤပ့းတရူးအိၣ်လၢအပူၤန့ၣ်လီၤ.)
45 စီၤဖံလံးပူးထံၣ်န့ၢ်စီၤနၤသန့လးဒီးစံးဘၣ်အီၤ, “ပထံၣ်န့ၢ်လံပှၤလၢစီၤမိၤၡ့ကွဲးလၢအဂ့ၢ်လၢလံာ် တၢ်သိၣ်တၢ်သီအပူၤဒီးဝံသ့ၣ်တဖၣ်ကွဲးစ့ၢ်ကီးလၢ အဂ့ၢ်တဂၤလံန့ၣ်လီၤ. အဝဲမ့ၢ်ပှၤနစၤရ့းဖိယ့ၣ်ၡူးလၢ အမ့ၢ်စီၤယိၤသးအဖိခွါန့ၣ်လီၤ.”
46 ဒီးစီၤနၤသန့လးသံကွၢ်ဝဲ, “တၢ်ဂ့ၤတၢ်ဝါတမံၤမံၤဟဲထီၣ်လၢ ဝ့ၢ်နစၤရ့းအပူၤဘၣ်ကသ့စ့ၢ်ကီးဧါ.”
စီၤဖံလံးပူးစံးဆၢဝဲ, “ဟဲဒီးကွၢ်တက့ၢ်.”
47 ဖဲယ့ၣ်ၡူးထံၣ်စီၤနၤသန့လးဟဲဆူအအိၣ်ဒီး အဝဲကတိၤတၢ်လၢအဂ့ၢ်ဒီးစံးဝဲ, “အဝဲမ့ၢ်ပှၤအံၣ်စရ့လးဖိနီၢ်နီၢ် တဂၤလၢတၢ်လီတၢ်ဝ့ၤတအိၣ်ဘၣ်လၢအပူၤန့ၣ်လီၤ.”
48 ဒီးစီၤနၤသန့လးသံကွၢ်အီၤ, “နသ့ၣ်ညါယၤဒ်လဲၣ်.” ယ့ၣ်ၡူးစံးဆၢအီၤ, “ယထံၣ်နၤဖဲနအိၣ်လၢချၢၣ်ဒၢအခီၣ်ထံး တချုးစီၤဖံလံးပူးကိးန့ၢ်နၤဒံးဘၣ်န့ၣ်လီၤ.”
49 စီၤနၤသန့လးစံးဆၢတၢ်ဒီးစံးဝဲ, “သရၣ်ဧၢ, နဲဒၣ်အံၤနမ့ၢ်ကစၢ်ယွၤ အဖိခွါ, နမ့ၢ်အံၣ်စရ့လးအစီၤပၤန့ၣ်လီၤ.”
50 ဒီးယ့ၣ်ၡူးစံးဝဲ, “မ့ၢ်ယစံးဘၣ်နၤလၢယထံၣ်နၤလၢချၢၣ်ဒၢ အခီၣ်ထံးအဃိဧိၤဒီးနနာ်တၢ်န့ၣ်ဧါ. နကထံၣ်ဘၣ်တၢ်ဒိၣ်န့ၢ်ဒံးတၢ်အံၤတဖၣ်န့ၣ်လီၤ.”
51 ဒီးစံးဘၣ်အီၤ, “ယစံးဘၣ်တဲဘၣ်သုတၢ်မ့ၢ်တၢ်တီ, လၢသုကထံၣ်ဘၣ်မူခိၣ်အိးထီၣ်အသးဒီး ကစၢ်ယွၤအကလူးတဖၣ်ဟဲလီၤဒီးက့ၤထီၣ်လၢ ပှၤကညီဖိခွါအအိၣ်န့ၣ်လီၤ.”