စီၤယၤကိာ်
အလံာ်ပရၢ
JAMES
လံာ်ပရၢလၢစီၤယၤကိာ်အအိၣ်အံၤမ့ၢ်တၢ်ပာ်ဖှိၣ်တၢ်သိၣ်လိသီ လိဘၣ်ဃးမုၢ်ဆ့ၣ်မုၢ်ဂီၤအတၢ်အိၣ်မူတဖၣ်လၢအဘၣ်တၢ်ကွဲး အီၤဆူကစၢ်ယွၤအပှၤဂီၢ်မုၢ်ခဲလၢာ်လၢအအိၣ်ရၤလီၤအသး လၢဟီၣ်ခိၣ်ချၢဒီဘ့ၣ်ညါအပူၤန့ၣ်လီၤ. ပှၤကွဲးတၢ်သူဝဲတၢ်ကတိၤဒိကတိၤတဲာ်တၢ်လၢအဖျါဆှံဂ့ၤမး လၢတၢ်ဟ့ၣ်လီၤတၢ်သိၣ်ဂ့ၤသီဘၣ်အပူၤ, ဘၣ်ထွဲဒီးတၢ်ကူၣ်သ့လၢတၢ်မၤအပူၤဒီးတၢ်နဲၣ်ကျဲလၢခရံာ်ဖိ အတၢ်ပာ်သူၣ်ပာ်သးဒီးအသကဲာ်ပဝးတဖၣ်အဂီၢ်န့ၣ်လီၤ. အဝဲပာ်ဖျါထီၣ်ခရံာ်ဖိအတၢ်ထံၣ်ဘၣ်ဃးတၢ်ထူးတၢ်တီၤ ဒီးတၢ်ဖှီၣ်တၢ်ယာ်, တၢ်လ့ပစီ, သကဲာ်ပဝးဂ့ၤ, တၢ်ဆိကမိၣ်စံၣ်ညီၣ်ကမၣ်ပှၤ, တၢ်စူၢ်တၢ်နာ်ဒီးတၢ်မၤ, တၢ်သူပျ့ၤ, တၢ်ကူၣ်သ့, တၢ်အ့ၣ်လိာ်ဆိးက့လိာ်, တၢ်ပာ်ထီၣ်ထီသး ဒီးတၢ်ဆီၣ်လီၤသး, တၢ်စံၣ်ညီၣ်ပှၤဂၤတဖၣ်, တၢ်ပာ်ကဖၢလၢသး, တၢ်ဝံသးစူၤ, ဒီးတၢ်ထုကဖၣ်န့ၣ်လီၤ.
လံာ်ပရၢအံၤပာ်ဒိၣ်တၢ်စူၢ်တၢ်နာ်အိၣ်ဒီးတၢ်မၤ, လၢတၢ်အိၣ်မူမၤထွဲခရံာ်ဖိအတၢ်ဘူၣ်တၢ်ဘါအပူၤ န့ၣ်လီၤ.
1
1 စီၤယၤကိာ်, ကစၢ်ယွၤဒီးကစၢ်ယ့ၣ်ၡူးခရံာ်အခ့အပှၤ, ကတိၤဒိၣ်ဒီးဆၢဂ့ၤဆၢဝါဘၣ်ပှၤတဆံခံဒူၣ်လၢအအိၣ် လၢတၢ်လီၤပြံလီၤပြါအပူၤန့ၣ်လီၤ.
2 ယဒီပုၢ်ဝဲၢ်သ့ၣ်ဧၢ, တုၤတၢ်မၤကွၢ်အကလုာ်ကလုာ်ဟဲဘၣ် သုဒီးပာ်အီၤဒ်အမ့ၢ်တၢ်သးခုလၢသုဂီၢ်တက့ၢ်.
3 အဂ့ၢ်ဒ်လဲၣ်န့ၣ်, သုသ့ၣ်ညါလၢတၢ်မၤကွၢ်သုတၢ်စူၢ်တၢ်နာ်အံၤဒုး အိၣ်ထီၣ်တၢ်သ့တူၢ်တၢ်န့ၣ်လီၤ.
4 မ်သုတၢ်တူၢ်တၢ်အံၤကဆှၢသုဆူတၢ်အကတၢၢ်တစုတအိၣ် ဒီးတၢ်လီၤတူာ်လီၤကာ်ဘၣ်, ဒ်သိးသုကလၢထီၣ်ပှဲၤထီၣ်ဒီး အိၣ်ဒီးတၢ်ခဲလၢာ်ဒီးတလီၤဆံးလီၤစှၤလၢတၢ်နီတမံၤဘၣ် အဂီၢ်န့ၣ်တက့ၢ်.
5 ဘၣ်ဆၣ်ဒီး, “သုဝဲသ့ၣ်အကျါတဂၤဂၤမ့ၢ်လိၣ်ဘၣ်တၢ်ကူၣ် သ့န့ၣ်, အဝဲကြၢးဃ့ထုကဖၣ်ကစၢ်ယွၤဒီးကဟ့ၣ်လီၤအီၤ န့ၣ်လီၤ. အဂ့ၢ်မ့ၢ်လၢကစၢ်ယွၤဟ့ၣ်တၢ်ညီဒီးဟ့ၣ်တၢ်လၢတၢ်သူၣ် ကညီၤသးကညီၤလၢပှၤခဲလၢာ်အဂီၢ်အဃိန့ၣ်လီၤ.
6 ဘၣ်ဆၣ်တုၤသုဃ့ဘါထုကဖၣ်တၢ်ဒီး, သုကဘၣ်နာ်တၢ်ဒီးတဘၣ်သးဒ့ဒီနီတစဲးဘၣ်. ပှၤလၢ အသးဒ့ဒီတဂၤန့ၣ်, လီၤဂာ်ဒီးလပီလၢပီၣ်လဲၣ်ပူၤလၢကလံၤအူဘၣ်အီၤဒီး ဟူးဝးဝဲန့ၣ်လီၤ.
7 ပှၤဒ်န့ၣ်သိးတဂၤန့ၣ်, တဘၣ်ဆိကမိၣ်လၢအကဒိးန့ၢ်ဘၣ်တၢ်တမံၤမံၤလၢကစၢ် အအိၣ်န့ၣ်တဂ့ၤ.
8 အဂ့ၢ်ဒ်လဲၣ်န့ၣ်လၢတၢ်ခဲလၢာ်လၢအဝဲမၤဝဲအပူၤန့ၣ်, အသးတဂၢၢ်ဘၣ်ဒီးစံၣ်ညီၣ်တဲာ်တၢ်တသ့ဘၣ်အဃိ န့ၣ်လီၤ.
9 ပှၤခရံာ်ဖိလၢအဖှီၣ်တဂၤဖဲကစၢ်ယွၤပာ်ထီၣ်ထီအီၤန့ၣ်, ကဘၣ်သးခုလီၤ.
10 ဒီးပှၤခရံာ်ဖိလၢအထူးအတီၤတဂၤဖဲကစၢ်ယွၤဆီၣ်လီၤ အီၤန့ၣ်, ကဘၣ်သးခုလီၤ. အဂ့ၢ်ဒ်လဲၣ်န့ၣ်ပှၤထူးပှၤတီၤ ကလဲၤပူၤကွံာ်ဒ်နီၣ်ဧိၤမံၤဧိၤအဖီအသိးန့ၣ်လီၤ.
11 မုၢ်ဟဲထီၣ်ဒီးအတၢ်ကိၢ်လၢအဆူၣ်န့ၣ်မၤဃ့ထီကွံာ်နီၣ်ဧိၤမံၤဧိၤဒီး အဖီလီၤဆှု ကွံာ်ဒီးအတၢ်ဃံတၢ်လၤဟးဂီၤကွံာ်ဝဲန့ၣ်လီၤ. ဒ်န့ၣ်အသိး, ပှၤထူးပှၤတီၤကဘၣ်တၢ်မၤဟးဂီၤအီၤဖဲ အဝဲလဲၤက့ၤဖံးမၤတၢ်အဆၢကတီၢ်န့ၣ်လီၤ.
12 ပှၤလၢအအိၣ်ဂၢၢ်ဆိးကျၢၤဖဲအဘၣ်တၢ်မၤကွၢ်အီၤ အခါန့ၣ်, ဘၣ်ဆိၣ်ဂ့ၤဝဲလီၤ. အဂ့ၢ်ဒ်အံၤ, ဖဲအဝဲမၤနၢၤတၢ်မၤကွၢ်ဒ်အံၤအသိးန့ၣ်, အဝဲကဒိးန့ၢ်ဘၣ်ခိၣ်ဖးလၢအမ့ၢ်တၢ်မူလၢကစၢ်ယွၤ အၢၣ်လီၤတ့ၢ်လၢပှၤလၢအအဲၣ်အီၤတဖၣ်အဂီၢ်န့ၣ်လီၤ.
13 ပှၤတဂၤဂၤမ့ၢ်ဘၣ်တၢ်လ့ပစီအီၤလၢတၢ်မၤကွၢ်ဒ်သိးအံၤ တဖၣ်ဒီး, မ်အသုတစံးလၢ “တၢ်လ့ပစီအံၤဟဲလၢကစၢ်ယွၤ အအိၣ်” တဂ့ၤ. အဂ့ၢ်ဒ်လဲၣ်န့ၣ်, တၢ်အၢတၢ်သီလ့ပစီယွၤ တန့ၢ်ဘၣ်, ဒီးအဝဲအနီၢ်ကစၢ်ဒၣ်ဝဲစ့ၢ်ကီးတလ့ပစီပှၤနီတဂၤဘၣ်.
14 ဘၣ်ဆၣ်ဒီး, ပှၤတဂၤဘၣ်တၢ်လ့ပစီအီၤဖဲလၢ အဝဲဒၣ်ဘၣ်တၢ်ကွဲန့ၢ်လွဲန့ၢ်ဒီးဖီၣ်န့ၢ်အီၤလၢအတၢ်သူၣ်လီ သးကွံအအၢအသီဒၣ်ဝဲအခါန့ၣ်လီၤ.
15 အန့ၣ်ဝံၤဒီး, အတၢ်သူၣ်လီသးကွံအအၢအသီဒၢထီၣ်ဒီး ဆံးစၢ်ထီၣ်တၢ်ဒဲးဘး, ဒီးတၢ်ဒဲးဘးအံၤတုၤအဒိၣ်တုာ်ခိၣ်ပှဲၤ ဒီးဆံးစၢ်ထီၣ်ဝဲတၢ်သံန့ၣ်လီၤ.
16 ယဒီပုၢ်ဝဲၢ်သးဘိသ့ၣ်ဧၢ, သုတဒိးတၢ်လီန့ၢ်သုတဂ့ၤ.
17 တၢ်ဟ့ၣ်အဂ့ၤဒီးတၢ်ဟ့ၣ်အလၢအပှဲၤကိးမံၤဒဲးန့ၣ်ဟဲလၢမူခိၣ်, လၢကစၢ်ယွၤလၢအတ့လီၤမူခိၣ်အတၢ်ကပီၤတဖၣ်အအိၣ် န့ၣ်လီၤ. ကစၢ်ယွၤတကဒံကဒါဒီးတဒုးအိၣ်ထီၣ်ဘၣ်တၢ်ခံး တၢ်နၤခီဖျိအဃၣ်ဒူချၢအသးန့ၣ်ဘၣ်.
18 ဖဲအသးဒၣ်ဝဲန့ၣ်, အဝဲဒၣ်ထီၣ်ဖိန့ၢ်ပှၤခီဖျိတၢ်မ့ၢ်တၢ်တီအကလုၢ် ကထါ, ဒ်သိးပကကဲထီၣ်တၤသၣ်ဆိတကလုာ်လၢအတၢ်ဘၣ်တ့ခဲလၢာ် အကျါအဂီၢ်န့ၣ်လီၤ.
19 ယဒီပုၢ်ဝဲၢ်သးဘိသ့ၣ်ဧၢ, သ့ၣ်နီၣ်ထီၣ်က့ၤတၢ်အံၤတက့ၢ်. ပှၤကိးဂၤဒဲးကဘၣ်ချ့လၢတၢ်နၢ်ဟူတၢ်, ဒီးဃၢဝဲလၢတၢ်ကတိၤဒီးတၢ်သးဒိၣ်ထီၣ်န့ၣ်လီၤ.
20 အဂ့ၢ်ဒ်အံၤ, ပှၤကညီအတၢ်သးဒိၣ်ထီၣ်န့ၣ်, တမၤန့ၢ်ကစၢ်ယွၤအတၢ်တိာ်ပာ်အတီအလိၤန့ၣ်ဘၣ်.
21 လၢတၢ်န့ၣ်အဃိ, ညိကွံာ်လုၢ်လၢ်လၢအလီၤသးဘၣ်အၢဒီးသကဲာ်ပဝးအအၢ အသီခဲလၢာ်တက့ၢ်. ဆီၣ်လီၤသုသးလၢကစၢ်ယွၤအဖီလာ်, ဒီးတူၢ်လိာ်တၢ်အကလုၢ်အကထါလၢအဝဲသူၣ်လီၤလၢသုသးကံၢ်ပူၤ လၢအအုၣ်က့ၤခီၣ်က့ၤသုသ့န့ၣ်တက့ၢ်.
22 တဘၣ်လီလီၤသုသးခီဖျိထဲလၢတၢ်ဒိကနၣ်တၢ်ကလုၢ် ကထါဧိၤန့ၣ်တဂ့ၤ. မ့မ့ၢ်, အိၣ်မူမၤထွဲတၢ်ကလုၢ်ကထါအံၤတက့ၢ်.
23 ပှၤတဂၤလၢ်လၢ်လၢအဒိကနၣ်တၢ်ကလုၢ်ကထါဒီးတအိၣ်မူမၤ ထွဲဝဲန့ၣ်, လီၤဂာ်ဒီးပှၤတဂၤလၢအကွၢ်လီၤအသးလၢမဲာ်ထံကလၤ အပူၤဒီးထံၣ်လီၤက့ၤအသးဒ်အမ့ၢ်တၢ်အသိးန့ၣ်လီၤ.
24 အဝဲကွၢ်ထံလီၤအသးဒီးဟးထီၣ်ကွံာ်ဝဲ, ဒီးတဘျီဃီသးပ့ၤနီၣ်ကွံာ်ဝဲအနီၢ်ကစၢ်မၤအသးဒ်လဲၣ်န့ၣ်လီၤ.
25 ဘၣ်ဆၣ်ဒီးပှၤတဂၤဂ့ၤတဂၤဂ့ၤလၢအကွၢ်ထံတၢ်သိၣ်တၢ်သီ အလၢအပှဲၤလၢအမၤထူၣ်ဖျဲးပှၤကညီ, လၢအကွၢ်ထံမၤလိဝဲ တထံၣ်ဃီ, ဒီးတမ့ၢ်ထဲအဒိကနၣ်ဝဲဒီးသးပ့ၤနီၣ်ကွံာ်အီၤန့ၣ်ဘၣ်, မ့မ့ၢ်အိၣ်မူမၤထွဲဝဲန့ၣ်, ကစၢ်ယွၤကဆိၣ်ဂ့ၤအီၤလၢအတၢ်ဖံး တၢ်မၤအပူၤန့ၣ်လီၤ.
26 ပှၤတဂၤဂၤဆိကမိၣ်လီၤအသးလၢအမ့ၢ်ပှၤအဲၣ်ထူအဲၣ်ယွၤ န့ၣ်ဧါ. အဝဲမ့ၢ်တပၢၤအပျ့ၤဘၣ်ဒီးအတၢ်ဘူၣ်တၢ်ဘါမ့ၢ်တၢ်လၢ အလုၢ်အပှ့ၤတအိၣ်ဘၣ်ဒီးအဝဲဒၣ်လီလီၤအသးလီၤ.
27 တၢ်လၢပၢ်ကစၢ်ယွၤပာ်ဝဲလၢအမ့ၢ်တၢ်အကဆှီဒီးတၢ်ဘူၣ်တၢ် ဘါနီၢ်နီၢ်န့ၣ်မ့ၢ်ဝဲ, တၢ်အံးက့ၤကွၢ်က့ၤဖိၣ်ဃဲဒီးမုၣ်ကမဲတဖၣ်လၢ အတၢ်နးတၢ်ဖှီၣ်အပူၤဒီးတၢ်ပၢၤလီၤက့ၤပသးဒ်သိးပသုတဘၣ် တၢ်မၤဘၣ်အၢပှၤလၢဟီၣ်ခိၣ်အဃံၣ်အမူးတဖၣ်တဂ့ၤအဂီၢ် န့ၣ်လီၤ.