လံာ်ယိၤအ့လး
JOEL
ဝံယိၤအ့လးအဂ့ၢ်န့ၣ်ဘၣ်တၢ်သ့ၣ်ညါဒၣ်အီၤထဲတဆံးတက့ၢ်, ဒီးအဝဲအိၣ်မူဖဲအဆၢကတီၢ်မတၤလဲၣ်န့ၣ်တၢ်တသ့ၣ်ညါ အီၤလီၤတံၢ်လီၤဆဲးဘၣ်. ဘၣ်ဆၣ်ဒီးဖျါလီၤဂာ်ဝဲဒၣ်လၢလံာ်ယိၤအ့လးန့ၣ်အိၣ်ထီၣ်ဝဲ ဖဲချခန နံၣ်ကယၤလွံၢ်ဘျီတဘျီမ့တမ့ၢ်ယဲၢ်ဘျီတဘျီ, ဖဲပှၤပၤရၣ်ဖိအဘီအမုၢ်ဒိၣ်စိအဆၢကတီၢ်န့ၣ်လီၤ. ဝံယိၤအ့လးတဲဖျါဒွဲၣ်ဧိၤတြၤဧိၤအတၢ်မၤဟးဂူာ်ဟးဂီၤတၢ် ဒီးတၢ်ယီၤဃ့လၢအမၤအသးလၢကီၢ်ပၤလၤစတဲၣ်အပူၤန့ၣ်လီၤ. လၢတၢ်မၤအသးတဖၣ်အံၤအပူၤန့ၣ်, အဝဲထံၣ်ဝဲဒၣ်တၢ်ပနီၣ်တမံၤလၢအဘၣ်ထွဲဒီးကစၢ် အမုၢ်တနံၤလၢအကဟဲဝဲ, တၢ်ဆၢကတီၢ်လၢကစၢ်ကစံၣ်ညီၣ်ပှၤလၢအထီ ဒါတၢ်ဘၣ်သးလၢအတီဝဲလိၤဝဲန့ၣ်လီၤ. ဝံဒုးသ့ၣ်ညါပှၤဂီၢ်မုၢ်လၢယွၤအတၢ်ကိးလၢကပီၢ်ယၢ်လီၤက့ၤအ သး, ဒီးအတၢ်အၢၣ်လီၤလၢတၢ်ကဟဲက့ၤဘှီထီၣ်က့ၤတၢ်ဒီးတၢ်ဆိၣ်ဂ့ၤ လၢအပှၤဂီၢ်မုၢ်အဂီၢ်န့ၣ်လီၤ. တၢ်လၢအလီၤတိၢ်န့ၢ်ဖံးဃးဘၣ်ထွဲဒီးတၢ်အံၤမ့ၢ်ကစၢ်ယွၤက ဟ့ၣ်လီၤအသးစီဆှံဆူပှၤဂီၢ်မုၢ်ခဲလၢာ်, ပိာ်ခွါဒီးပိာ် မုၣ်, သးစၢ်ဒီးသးပှၢ်အလိၤန့ၣ်လီၤ.
1
1 တၢ်အံၤမ့ၢ်ယွၤအတၢ်ကစီၣ်ဆူစီၤပသူၤအ့လးအဖိခွါစီၤယိၤ အ့လးန့ၣ်လီၤ.
2 ပှၤသူၣ်က့သးပှၢ်သ့ၣ်ဧၢ, ကနၣ်တၢ်အံၤ, ဒီးပှၤတဂၤလၢ်လၢ်လၢကီၢ် ယူဒၤဧၢ, ဒိကနၣ်တက့ၢ်.
မ့ၢ်တၢ်ဒ်သိးအံၤမၤအသးတဘျီဘျီလၢသုဆၢသုကတီၢ်မ့ၢ်ဂ့ၤ, သုပၢ်တဖၣ်အဆၢကတီၢ်မ့ၢ်ဂ့ၤန့ၣ်ဧါ.
3 ဒီးတဲဘၣ်သုဖိသုလံၤ,
ဒီးသုဖိသုလံၤကတဲဘၣ်အဖိအလံၤ,
ဒီးအဝဲသ့ၣ်အဖိအလံၤကတဲဘၣ်ကဒီး အဖိအလံၤန့ၣ်လီၤ.
4 ဒွဲၣ်ဧိၤတြၤဧိၤတဖုဝံၤတဖုဟဲထီၣ်ဒီးမၤဟးဂီၤကွံာ်တၢ်မုၢ်တၢ်ဘိတဖၣ်လီၤ.
တၢ်လၢဒွဲၣ်တဖုပာ်လီၤတဲာ်တ့ၢ်ဝဲန့ၣ်, အဂၤတဖုမၤဟးဂီၤကွံာ်ဝဲလီၤ.
5 ဖုးသံနီၣ်ပှၤအီမူၤအသးသ့ၣ်ဧၢ, ဒီးဟီၣ်တက့ၢ်. ဒီးပှၤလၢအအီစပံးထံသ့ၣ်ဧၢ,
ဟီၣ်ပသူထီၣ်လၢစပံးထံအသီ လၢအဘၣ်တၢ်မၤဟးဂီၤအီၤအဃိန့ၣ်တက့ၢ်.
6 ဒွဲၣ်ဧိၤတြၤဧိၤတဖၣ်ဟဲထီဒါပထံပကီၢ်လီၤ.
အဝဲသ့ၣ်အဂံၢ်အဘါဆူၣ်ဝဲဒီးအါဝဲဂီၢ်ဝဲလၢပကဂံၢ်အီၤအဂီၢ်န့ၣ်လီၤ.
အဝဲသ့ၣ်အမဲအ့ၣ်ဒ်သိးခ့ယုၢ်အမဲအသိးန့ၣ်လီၤ.
7 အဝဲသ့ၣ်မၤဟးဂီၤကွံာ်ပစပံးမုၢ် တဖၣ်ဒီးအ့ၣ်ကွံာ်ပချၢၣ်ဒၢအထူၣ်တဖၣ်လီၤ.
အဝဲသ့ၣ်အီးကွံာ်ပချၢၣ်ဒၢအထူၣ်တဖၣ်အဖံးဒီးကွံာ်ကွံာ်ဝဲ, ဒီးအဒ့တဖၣ်အိၣ်တ့ၢ်ဝါဝဲဒၣ်န့ၣ်လီၤ.
8 ပှၤဂီၢ်မုၢ်သ့ၣ်ဧၢ, ဟီၣ်ဒ်မုၣ်ကနီၤတဂၤလၢအသူၣ်အုးသးအုး
လၢပိာ်ခွါလၢအဝဲကဒိးတ့ဒိးဖျီအသး ဒီးအီၤတဂၤအတၢ်သံအဃိန့ၣ်တက့ၢ်.
9 ဘုဧိၤဟုဧိၤမ့ၢ်ဂ့ၤ, စပံးထံမ့ၢ်ဂ့ၤတအိၣ်ဝဲဒၣ်လၢတၢ်ကလုၢ်ထီၣ်အီၤလၢတၢ်လုၢ်ဟံၣ် အပူၤန့ၣ်ဘၣ်.
ပှၤလုၢ်တၢ်အခိၣ်တဖၣ်သူၣ်အုးသးအုးဝဲဒၣ်လၢတအိၣ်ဘၣ်ဒီးတၢ် လုၢ်တၢ်ပာ်နီတမံၤလၢကလုၢ်ထီၣ်ဝဲလၢကစၢ်အဂီၢ်ဘၣ်အဃိလီၤ.
10 စံာ်ဧိၤပျီဧိၤတဖၣ်ဘၣ်တၢ်မၤဟးဂီၤကွံာ်အီၤ,
ဟီၣ်ခိၣ်ဃ့ထီကွံာ်ဝဲ,
မ့ၢ်လၢဘုဧိၤဟုဧိၤဘၣ်တၢ်မၤဟးဂီၤကွံာ်အီၤ, စပံးထံဃ့ထီကွံာ်ဝဲ, ဒီးသ့ၣ်စၤယံးအထံးတဖၣ်လီၤညွံးလီၤဘဲကွံာ်ဝဲဒၣ်အဃိန့ၣ်လီၤ.
11 ပှၤထူစံာ်ဖိသ့ၣ်ဧၢ, သူၣ်အုးသးအုးတက့ၢ်.
ပှၤလၢအအံးထွဲကွၢ်ထွဲစပံးလီၢ်သ့ၣ်ဧၢ, ဟီၣ်တၢ်ယၢၤတၢ်တက့ၢ်.
အဂ့ၢ်ဒ်အံၤ, ဘုကၠူၣ်, ဘုမုယီၤ, ဒီးတၢ်မုၢ်တၢ်ဘိခဲလၢာ်န့ၣ် ဘၣ်တၢ်မၤဟးဂီၤကွံာ်အီၤလံ.
12 စပံးမုၢ်ဒီးချၢၣ်ဒၢအထူၣ်တဖၣ်လီၤညွံးလီၤဘဲကွံာ်လံ.
ကယဲၢ်တၤသူတၤသၣ်အမုၢ်ခဲလၢာ်လီၤဘီဒီးသံကွံာ်လံ.
ပှၤဂီၢ်မုၢ်အတၢ်သူၣ်ခုသးခုလီၤမၢ်ကွံာ်လံ.
13 ပှၤလုၢ်တၢ်အခိၣ်လၢအမၤတၢ်လၢတၢ်လုၢ်လီၢ်သ့ၣ်ဧၢ, ကူထီၣ်သိးထီၣ်တၢ်သူၣ်အုးသးအုးအဆ့ကၤဒီးဟီၣ်တက့ၢ်.
လဲၤနုာ်ဆူယွၤအတၢ်လုၢ်ဟံၣ်ပူၤဒီးသူၣ်အုးသးအုးသီတနၤ ကျၢၤတက့ၢ်.
ဘုဧိၤဟုဧိၤမ့ၢ်ဂ့ၤ, စပံးထံမ့ၢ်ဂ့ၤတအိၣ်ဝဲဒၣ်လၢတၢ်ကလုၢ်ထီၣ်အီၤ ဆူသုကစၢ်ယွၤအအိၣ်န့ၣ်ဘၣ်.
14 ဘိးဘၣ်သ့ၣ်ညါလၢတၢ်ဒုၣ်တၢ်အီၣ်တၢ်အီအဂီၢ်,
ကိးတၢ်အိၣ်ဖှိၣ်ရိဖှိၣ်,
ကိးဖှိၣ်ပှၤခိၣ်ပှၤနၢ်တဖၣ်
ဒီးယူဒၤအပှၤဂီၢ်မုၢ်ခဲလၢာ်
ဆူယွၤအတၢ်လုၢ်ဟံၣ်အပူၤဒီးကိးထီၣ်ဆူ ယွၤအအိၣ်တက့ၢ်.
15 ကစၢ်အမုၢ်နံၤ,
မုၢ်တနံၤလၢသ့တၢ်လၢာ်ကစၢ်ကဟဲမၤဟးဂူာ်ဟးဂီၤတၢ်န့ၣ်ဘူး ထီၣ်လံ.
မုၢ်နံၤအဝဲန့ၣ်မ့ၢ်တၢ်လီၤပျံၤလီၤဖုးအမုၢ်နံၤလီၤ.
16 ပကွၢ်တၢ်ဒ်ပှၤလၢတၢ်မၤစၢၤအီၤတအိၣ်ဘၣ်မ့ၢ်လၢ ပတၢ်မုၢ်တၢ်ဘိတဖၣ်ဘၣ်တၢ်မၤဟးဂီၤကွံာ်အီၤအဃိန့ၣ်လီၤ.
ဒီးတၢ်သူၣ်ဖှံသးညီန့ၣ်တအိၣ်ဝဲဒၣ်လၢပကစၢ်ယွၤ အတၢ်လုၢ်ဟံၣ်အပူၤန့ၣ်ဘၣ်.
17 တၢ်ချံတဖၣ်သံလၢဟီၣ်ခိၣ်ဃ့အဃိလီၤ.
ဘုချံလၢတၢ်ကပာ်ဖှိၣ်အီၤအဂီၢ်တအိၣ်ဘၣ်,
ဒီးဘုဖီတဖၣ်ဟးဂီၤကွံာ်ဝဲဒၣ်န့ၣ်လီၤ.
18 ဂီၤဘုၣ်ဂီၤဖံးတဖၣ်သူၣ်ကိၢ်သးဂီၤလၢအီၣ်ဆၣ် အလီၢ်တအိၣ်လၢအဝဲသ့ၣ်အဂီၢ်နီတပူၤအဃိန့ၣ်လီၤ.
သိတဖၣ်တူၢ်ဘၣ်ခီၣ်ဘၣ်တၢ်စ့ၢ်ကီးန့ၣ်လီၤ.
19 ယွၤဧၢ, ယကိးထီၣ်နၤလီၤ.
အဂ့ၢ်ဒ်အံၤ, အီၣ်ဆၣ်အလီၢ်လါဟ့ဒီးသ့ၣ်တဖၣ်ဃ့ထီကွံာ်
မၤအသးဒ်မ့ၣ်အူအီၣ်ကွံာ်အီၤအသိးန့ၣ်လီၤ.
20 ဆၣ်ဖိကီၢ်ဖိလၢပှၢ်လၢ်ကျါဒၣ်လဲာ်ကိးထီၣ်ဆူနအိၣ်လီၤ.
အဂ့ၢ်ဒ်အံၤ, ထံဖိကျိတဖၣ်လီၤသံးကွံာ်ဝဲလံန့ၣ်လီၤ.