21
1 ဖဲပှၤအံၣ်စရ့လးဖိတဖၣ်ပာ်ဖှိၣ်ထီၣ်အသးဖဲမံးစပၤန့ၣ် အဝဲသ့ၣ်မၤတၢ်အၢၣ်လီၤအီလီၤဒီးယွၤ, “ပတပျဲပှၤဘံၣ်ယၤမံၣ်ဖိ ကထီၣ်ပှၢ်ဒီးပဖိမုၣ်, နီတဂၤဘၣ်.”
2 ဒီးပှၤအံၣ်စရ့လးဖိတဖၣ်လဲၤဆူဘ့ၤသ့လးဒီးဆ့ၣ်နီၤဖဲန့ၣ် လၢကစၢ်ယွၤအမဲာ်ညါတုၤလၢမုၢ်ဟါလီၤတစုန့ၣ်လီၤ. ဒီးဟီၣ်ဝဲယၢၤဝဲဒိၣ်ဒိၣ်ကလဲာ်လီၤ.
3 “ယွၤ, အံၣ်စရ့လးအကစၢ်ဧၢ, ဘၣ်မနုၤလၢတၢ်အံၤဘၣ်မၤအသးန့ၣ်လဲၣ်. ဘၣ်မနုၤဘံၣ်ယၤမံၣ်အဒူၣ်ဘူးတ့ၢ်အကဟါမၢ်ကွံာ်လၢအံၣ်စရ့လး အပူၤလဲၣ်.”
4 မုၢ်ဆ့ၣ်ထီၣ်တနံၤဂီၤဂီၤန့ၣ်, ပှၤဂီၢ်မုၢ်သူၣ်ထီၣ်တၢ်လုၢ်လီၢ်တခါဖဲန့ၣ်ဒီး လုၢ်တၢ်လုၢ်မၤဃူမၤဖိးဒီးတၢ်လုၢ်မ့ၣ်အူန့ၣ်လီၤ.
5 အဝဲသ့ၣ်သံကွၢ်ဝဲ, “မ့ၢ်ပှၤတဖုဖုလၢအံၣ်စရ့လးအဒူၣ်အကျါ လၢအတလဲၤဘၣ်ဆူတၢ်ပာ်ဖှိၣ်ထီၣ်အသးအလီၢ်လၢယွၤ အမဲာ်ညါဖဲမံးစပၤန့ၣ်အိၣ်ဧါ.” (အဝဲသ့ၣ်ဆိၣ်တၢ်လၢပှၤတဂၤလၢ်လၢ်လၢအတလဲၤဘၣ်ဆူမံးစပၤန့ၣ် ကဘၣ်တၢ်မၤသံကွံာ်အီၤန့ၣ်လီၤ.)
6 ပှၤအံၣ်စရ့လးတဖၣ်သူၣ်အုးသးအုးဝဲလၢအဒီပုၢ်ဝဲၢ်ပှၤဘံၣ်ယၤ မံၣ်ဖိတဖၣ်အဂီၢ်ဒီးစံး, “တနံၤအံၤအံၣ်စရ့လးအဒူၣ်တဒူၣ်လီၤမၢ်ကွံာ်လံ.
7 လၢပကဃုန့ၢ်မါလၢဘံၣ်ယၤမံၣ်ဖိအိၣ်လီၤတဲာ်တဖၣ်အဂီၢ်န့ၣ် ပကမၤဒ်လဲၣ်. ပအၢၣ်လီၤတ့ၢ်တၢ်ဒီးယွၤလၢပကဟ့ၣ်အဝဲသ့ၣ်လၢပဖိမုၣ်နီတဂၤဘၣ်.”
8 ဖဲအဝဲသ့ၣ်သံကွၢ်ဝဲလၢမ့ၢ်ပှၤတဖုဖုလၢအံၣ်စရ့လးအဒူၣ် အကျါအိၣ်ဝဲလၢအတလဲၤဘၣ်ဆူတၢ်ပာ်ဖှိၣ်အလီၢ်ဖဲမံးစပၤဧါန့ၣ် အဝဲသ့ၣ်ထံၣ်ဝဲလၢပှၤအိၣ်လၢယၤဘ့ၣ်ဘၣ်ဃးဒီးကံးလဧးအပူၤ န့ၣ်လဲၤတတုၤဖဲန့ၣ်နီတဂၤဘၣ်.
9 ဖဲတၢ်ကိးထီၣ်သုးမုၢ်အနီၣ်ဂံၢ်န့ၣ်ပှၤလၢယၤဘ့ၣ်တစံးဆၢတၢ် နီတဂၤဘၣ်.
10 ဒီးပှၤဂီၢ်မုၢ်အတၢ်အိၣ်ဖှိၣ်န့ၣ်ဆှၢလီၤပှၤအဒူအဃိၤကတၢၢ်အဂၤ တကလးခံကထိဃုာ်ဒီးတၢ်ကလုၢ်, “လဲၤဒီးမၤသံကွံာ်ပှၤကိးဂၤဒဲးလၢယၤဘ့ၣ်, ဃုာ်ဒီးပိာ်မုၣ်ပိာ်မၢၤဖိဒံဖိသၣ်တဖၣ်တက့ၢ်.
11 မၤသံကွံာ်ပိာ်ခွါခဲလၢာ်ဒီးပိာ်မုၣ်လၢအတမ့ၢ်ဘၣ်မုၣ်ကနီၤ တဖၣ်န့ၣ်တက့ၢ်.”
12 အဝဲသ့ၣ်ထံၣ်မုၣ်ကနီၤအဂၤလွံၢ်ကယၤလၢယၤဘ့ၣ်အပူၤဒီး, ဟဲက့ၤစိာ်ပိာ်မုၣ်တဖၣ်န့ၣ်ဆူသူၣ်ဒဲအလီၢ်ဖဲၡံလိၣ်လၢအအိၣ် လၢကီၢ်ကနၤဧၣ်အပူၤန့ၣ်လီၤ.
13 တုၤနုၤတစု, ပှၤဂီၢ်မုၢ်အတၢ်အိၣ်ဖှိၣ်ဒီဖုန့ၣ်ဆှၢလီၤတၢ်ကစီၣ်ဆူ ပှၤဘံၣ်ယၤမံၣ်ဖိအိၣ်လၢလ့ရံးမိၣ်လၢတၢ်ဆိကတီၢ်ကွံာ်တၢ်ဒုးတၢ်ယၤအဂီၢ်လီၤ.
14 ပှၤဘံၣ်ယၤမံၣ်ဖိတဖၣ်ဟဲက့ၤဒီးပှၤအံၣ်စရ့လးဖိအဂၤတဖၣ်ဟ့ၣ် လီၤအဝဲသ့ၣ်လၢပိာ်မုၣ်ဖိတဖၣ်လၢတၢ်တမၤသံဘၣ်အီၤဖဲယၤဘ့ၣ် အပူၤန့ၣ်လီၤ. ဘၣ်ဆၣ်ဒီးတလၢ, လၢအဝဲသ့ၣ်အဂီၢ်ဘၣ်.
15 ဒီးပှၤဂီၢ်မုၢ်သူၣ်အုးသးအုးလၢပှၤဘံၣ်ယၤမံၣ်ဖိတဖၣ်အဂီၢ် မ့ၢ်လၢယွၤမၤဟးဂီၤတၢ်ဃူတၢ်ဖိးလၢအံၣ်စရ့လးအဒူၣ်တဖၣ် အကျါအဃိန့ၣ်လီၤ.
16 ဒီးပှၤခိၣ်ပှၤနၢ်တဖၣ်လၢတၢ်ပာ်ဖှိၣ်ထီၣ်သးအလီၢ်န့ၣ်စံးဝဲ, “ပိာ်မုၣ်လၢဘံၣ်ယၤမံၣ်အဒူၣ်အကျါတအိၣ်လၢၤဘၣ်. ပကဃုန့ၢ်မါလၢပိာ်ခွါအိၣ်လီၤတဲာ်တဖၣ်အဂီၢ်ဒ်လဲၣ်.
17 အံၣ်စရ့လးတဘၣ်ပျဲပှၤတဆံခံဒူၣ်လီၤမၢ်နီတဒူၣ်ဘၣ်. ပကဘၣ်ဃုကျဲလၢဘံၣ်ယၤမံၣ်အဒူၣ်ကမူဝဲအဂီၢ်လီၤ.
18 ဘၣ်ဆၣ်ဒီးပပျဲအဝဲသ့ၣ်ထီၣ်ပှၢ်ဒီးပဖိမုၣ်တဖၣ်တသ့ဘၣ်. အဂ့ၢ်ဒ်အံၤ, ပပာ်တၢ်ဆိၣ်အၢလၢပှၤတဂၤလၢ်လၢ်အလိၤလၢအပျဲပှၤဘံၣ်ယၤမံၣ်ဖိထီၣ်ပှၢ်ဒီး ပဖိမုၣ်တဂၤဂၤန့ၣ်လီၤ.”
19 တုၤနုၤတစု, အဝဲသ့ၣ်ဆိကမိၣ်ထီၣ်ဝဲ, “ယွၤအဘူၣ်တနံၣ်တဘျီဖဲ ၡံလိၣ်ကဘၣ်ဘူးထီၣ်လံ.” (ၡံလိၣ်န့ၣ်အိၣ်လၢဘ့ၤသ့လးအကလံၤစိး, လဘိနၤအကလံၤထံးဒီးကျဲမုၢ်လၢဘ့ၤသ့လးဒီးၡက့ၣ်အဘၢၣ်စၢၤအမုၢ်ထီၣ်န့ၣ်လီၤ.)
20 အဝဲသ့ၣ်စံးဘၣ်ပှၤဘံၣ်ယၤမံၣ်ဖိတဖၣ်, “လဲၤဒီးပာ်ခူသူၣ်သုသးလၢ စပံးလီၢ်တဖၣ်အပူၤ, ဒီးခိးကွၢ်တက့ၢ်.
21 ဖဲပိာ်မုၣ်ဖိလၢၡံလိၣ်တဖၣ်မ့ၢ်ဟဲထီၣ်ဒ်သိးကဂဲၤကလံာ်ဖဲ မူးအဆၢကတီၢ်န့ၣ်, ဟဲထီၣ်လၢစပံးလီၢ်တဖၣ်အပူၤတက့ၢ်. သုဝဲတဂၤစုာ်စုာ်ဟံးန့ၢ်ဆူၣ်သုမါလၢပိာ်မုၣ်ဖိသၣ်တဖၣ်အကျါ ဒီးစိာ်အီၤဆူဘံၣ်ယၤမံၣ်အပူၤဃုာ်ဒီးသုတက့ၢ်.
22 အပၢ်ဒီးအဒီပုၢ်ဝဲၢ်ခွါတဖၣ်မ့ၢ်ဟဲဆူသုအိၣ်ဒီးတြီတၢ်န့ၣ်, သုစံးသ့ဝဲလၢ, ပျဲပဟံးဃာ်အဝဲသ့ၣ်တက့ၢ်. အဂ့ၢ်ဒ်အံၤ, ပတဟံးန့ၢ်အဝဲသ့ၣ်လၢသုအိၣ်လၢတၢ်ဒုးတၢ်ယၤအပူၤ ဒ်သိးကကဲထီၣ်ပမါဘၣ်. ဒီးတမ့ၢ်ဘၣ်လၢသုဟ့ၣ်ပှၤအဃိဒီးသုတၢ်ကမၣ်ဘၣ်ဃးဒီးတၢ်မၤဟးဂီၤ သုတၢ်အၢၣ်လီၤအီလီၤအိၣ်ဝဲန့ၣ်ဘၣ်.”
23 ပှၤဘံၣ်ယၤမံၣ်ဖိတဖၣ်မၤတၢ်ဒ်အံၤန့ၣ်လီၤပှၤတဂၤစုာ်စုာ် ဃုထၢအမါလၢပိာ်မုၣ်ဖိတဖၣ်အကျါလၢအဂဲၤကလံာ်ဖဲၡံလိၣ်ဒီးစိာ်ကွံာ်အီၤန့ၣ်လီၤ. တုၤနုၤတစု, အဝဲသ့ၣ်က့ၤကဒါက့ၤဆူအကီၢ်ဒၣ်ဝဲ, သူၣ်ထီၣ်အဝ့ၢ်တဖၣ်ဒီးအိၣ်ဆိးဝဲဖဲန့ၣ်လီၤ.
24 တကတီၢ်ဃီန့ၣ်, ပှၤအံၣ်စရ့လးဖိအဂၤတဖၣ်ဟးထီၣ်ကွံာ်ဝဲ, ဒီးပှၤကိးဂၤဒဲးက့ၤကဒါက့ၤဆူအဒူၣ်ဒၣ်ဝဲဒီး အဟံၣ်ဖိဃီဖိဒၣ်ဝဲဒီးဆူအတၢ်စုလီၢ်ခီၣ်ခိၣ်ဒၣ်ဝဲန့ၣ်လီၤ.
25 ဒီးအကတီၢ်ဖဲန့ၣ်, စီၤပၤတအိၣ်ဘၣ်နီတဂၤဘၣ်လၢအံၣ်စရ့လးအပူၤဘၣ်. ပှၤကိးဂၤဒဲးမၤဒ်တၢ်ဘၣ်အသးဒၣ်ဝဲအသိးန့ၣ်လီၤ.