2
1 ဒီးယွၤအကလူးလဲၤတၢ်လၢဝ့ၢ်ကံးလကၤလးဆူဝ့ၢ်ဘိးကံၣ်ဒီး စံးဘၣ်ပှၤအံၣ်စရ့လးဖိတဖၣ်, “ယထုးထီၣ်သုလၢကီၢ်အဲၤကူပတူးအပူၤဒီးဆှၢသုဆူကီၢ်တဘ့ၣ် လၢယအၢၣ်လီၤအီလီၤတ့ၢ်ဒီးသုမိၢ်ပၢ်ဖံဖုလၢပျၢၤတဖၣ်လီၤ. ဒီးယစံး, ယတမၤဟးဂီၤယတၢ်အၢၣ်လီၤအီလီၤဒီးသုနီတစုဘၣ်.
2 သုတဘၣ်မၤတၢ်အၢၣ်လီၤအီလီၤဒီးပှၤဂီၢ်မုၢ်အိၣ်လၢကီၢ်အံၤ အပူၤဘၣ်. သုကဘၣ်မၤလီၤပှီၢ်ကွံာ်အတၢ်လုၢ်လီၢ်တဖၣ်လီၤ. ဘၣ်ဆၣ်ဒီးသုတမၤဒ်ယစံးတ့ၢ်သုအသိးဘၣ်. သုမၤတၢ်လၢ အထီဒါယၤတခီလီၤ.
3 မၤသးဒ်န့ၣ်ဒီးယစံးဘၣ်သုခဲအံၤလၢယတဟီထီၣ်ကွံာ်ဘၣ်ပှၤ ကလုာ်တဖၣ်အံၤလၢသုမဲာ်ညါဘၣ်. အဝဲသ့ၣ်ကကဲထီၣ်သုဒုၣ် သုဒါန့ၣ်လီၤ. ဒီးတၢ်ဘူၣ်ထီၣ်ဘါထီၣ်အဝဲသ့ၣ် အကစၢ်တဖၣ်န့ၣ်ကကဲထီၣ်ပျံၤသကွီၤလၢသုဂီၢ်လီၤ.”
4 ဖဲယွၤအကလူးစံးတၢ်အံၤဝံၤဒီး, အံၣ်စရ့လးအပှၤဂီၢ်မုၢ်ခဲလၢာ်န့ၣ်ဟီၣ်ဝဲယၢၤဝဲ န့ၣ်လီၤ.
5 ဒီးတၢ်လီၢ်န့ၣ်ဘၣ်တၢ်ကိးအီၤလၢဘိးကံၣ်န့ၣ်လီၤ. ဒီးအဝဲသ့ၣ်လုၢ်ထီၣ်တၢ်ဆူယွၤအအိၣ်ဖဲန့ၣ်လီၤ.
6 ဒီးစီၤယိၤၡူပျၢ်အံၣ်စရ့လးအပှၤဂီၢ်မုၢ်လၢအကျဲဒၣ်ဝဲလဲၤ ဒ်သိးကဟံးန့ၢ်အတၢ်န့ၢ်သါဘၣ်ဃးဒီးဟီၣ်ခိၣ်ကဝီၤလၢတၢ်နီၤဖးန့ၢ်လၢအဂီၢ်စုာ်စုာ်န့ၣ်လီၤ.
7 ဖဲစီၤယိၤၡူအိၣ်မူဒံးဝဲအဆၢကတီၢ်န့ၣ်ကီၢ်အံၣ်စရ့လးအပှၤ ဂီၢ်မုၢ်မၤယွၤအတၢ်မၤ, ဒီးဖဲအဝဲသံဝံၤအလီၢ်ခံန့ၣ်, အဝဲသ့ၣ်မၤထွဲဒံးဝဲဒ်န့ၣ်ဖဲပှၤခိၣ်ပှၤနၢ်တဖၣ်လၢအထံၣ်ဘၣ် ကယဲၢ်တၢ်အဒိၣ်အမုၢ်တဖၣ်လၢယွၤမၤတ့ၢ်လၢကီၢ်အံၣ်စရ့လးအဂီၢ်, လၢအမဲာ်ဒၣ်ဝဲအိၣ်မူဝဲအခါန့ၣ်လီၤ.
8 ဒီးယွၤအခ့အပှၤစီၤနိၣ်အဖိခွါစီၤယိၤၡူသံဝဲဖဲအသးအိၣ် အနံၣ်တကယၤတဆံန့ၣ်လီၤ.
9 အဝဲဘၣ်တၢ်ခူၣ်လီၤအီၤလၢအဟီၣ်ခိၣ်ကဝီၤဒၣ်ဝဲအပူၤဖဲ ဝ့ၢ်တံမနးဃ့ရ့းလၢအ့ဖရဲၣ်အကစၢၢ်ကလိ, အိၣ်လၢကစၢၢ်ကၤဧၣ်အကလံၤစိး တခီန့ၣ်လီၤ.
10 ပှၤဒီတစိၤညါန့ၣ်သံဝဲဒီးပှၤလၢခံတစိၤသးပ့ၤနီၣ်ယွၤဒီး တၢ်လၢအမၤဝဲလၢပှၤအံၣ်စရ့လးဖိအဂီၢ်န့ၣ်လီၤ.
11 တုၤနုၤတစုကီၢ်အံၣ်စရ့လးအပှၤဂီၢ်မုၢ်မၤတၢ်ဒဲးဘးထီဒါ ယွၤဒီးစးထီၣ်မၤဘဧၤလးအတၢ်န့ၣ်လီၤ.
12 အဝဲသ့ၣ်ဆိတ့ၢ်ဘူၣ်ထီၣ်ဘါထီၣ်ယွၤ, လၢအမ့ၢ်အဝဲသ့ၣ် အမိၢ်ပၢ်ဖံဖုလၢပျၢၤတဖၣ်အကစၢ်ယွၤလၢအထုးထီၣ်အဝဲသ့ၣ် လၢကီၢ်အဲၤကူပတူးအပူၤ, ဒီးအဝဲသ့ၣ်စးထီၣ်ဘူၣ်ထီၣ်ဘါထီၣ်ကစၢ်အဂၤတဖၣ်, လၢအမ့ၢ်ပှၤဂီၢ်မုၢ်လၢအခိၣ်အဃၢၤတဖၣ်အကစၢ်တဖၣ်န့ၣ်လီၤ. အဝဲသ့ၣ်တီၤလီၤလၢကစၢ်တဖၣ်န့ၣ်အမဲာ်ညါဒီးမၤသးဒိၣ်ထီၣ် ကစၢ်ယွၤန့ၣ်လီၤ.
13 ဒီးအဝဲသ့ၣ်ဆိကတီၢ်ဘူၣ်ထီၣ်ဘါထီၣ်ယွၤ, ဒီးမၤဘဧၤလးဒီးဧၡတြိးတဖၣ်အတၢ်န့ၣ်လီၤ.
14 လၢတၢ်န့ၣ်အဃိယွၤအသးကဲၤထီၣ်ဘၣ်ပှၤအံၣ်စရ့လးဖိဒီးပျဲပှၤ ဂုာ်ဆူၣ်ပျီဆူၣ်တၢ် တဖၣ်ဒုးအီၤဒီးဂုာ်ဆူၣ်န့ၢ်အတၢ်လီၤ. ဒီးယွၤပျဲဒုၣ်ဒါအိၣ်ဝးတရံးတဖၣ်ဒိၣ်စိလၢအဝဲသ့ၣ်အဖီခိၣ် န့ၣ်လီၤ. ဒီးပှၤအံၣ်စရ့လးဖိတဖၣ်ဒီဒၣ်အိၣ်ပှိၤလီၤက့ၤအသးတန့ၢ်လၢၤဘၣ် န့ၣ်လီၤ.
15 ဖဲအဝဲသ့ၣ်လဲၤဒုးတၢ်တဘျီဘျီလၢ်လၢ်န့ၣ်, ယွၤထီဒါအဝဲသ့ၣ်, ဒ်အစံးတ့ၢ်ဝဲအသိးန့ၣ်လီၤ. ဒီးအဝဲသ့ၣ်အိၣ်လၢတၢ်သးဟးဂီၤဖးဒိၣ်အပူၤန့ၣ်လီၤ.
16 တုၤနုၤတစုယွၤဟ့ၣ်လီၤပှၤအံၣ်စရ့လးဖိတဖၣ်လၢခိၣ်နၢ်တဖၣ် လၢကအုၣ်က့ၤခီၣ်က့ၤအဝဲသ့ၣ်လၢပှၤဂုာ်ဆူၣ်ပျိဆူၣ်တၢ်တဖၣ်အစုပူၤန့ၣ်လီၤ.
17 ဘၣ်ဆၣ်ဒီးပှၤအံၣ်စရ့လးဖိတဖၣ်တကနၣ်ဃုာ်အခိၣ်အနၢ်တဖၣ်ဘၣ်. ကီၢ်အံၣ်စရ့လးဖိအသးတတီဒီးယွၤဘၣ်ဒီးဘူၣ်ထီၣ်ဘါထီၣ်ကစၢ်အဂၤတဖၣ်န့ၣ်လီၤ. အဝဲသ့ၣ်အပၢ်တဖၣ်ဒိကနၣ်ယွၤအတၢ်မၤလိာ်တဖၣ်ဘၣ်ဆၣ်ဒီး ပှၤအသီတစိၤအံၤတမၤဘၣ်ဝဲဒ်န့ၣ်ဘၣ်လီၤ.
18 ဖဲယွၤဟ့ၣ်လီၤပှၤအံၣ်စရ့လးဖိလၢခိၣ်နၢ်တဘျီလၢ်လၢ်န့ၣ်, ယွၤမၤစၢၤအီၤဒီးအုၣ်က့ၤခီၣ်က့ၤပှၤဂီၢ်မုၢ်လၢအဒုၣ်အဒါတဖၣ်အစုပူၤဖဲခိၣ်နၢ်တဂၤန့ၣ်အိၣ်မူဒံးဝဲအဆၢကတီၢ်န့ၣ်လီၤ. ယွၤသးကညီၤအဝဲသ့ၣ်မ့ၢ်လၢအဝဲသ့ၣ်ကအုကစွါဝဲလၢ အတၢ်နးတၢ်ဖှီၣ်ဒီးတၢ်မၤအၢမၤနးအပူၤအဃိန့ၣ်လီၤ.
19 ဘၣ်ဆၣ်တုၤခိၣ်နၢ်တဂၤသံန့ၣ်, ပှၤဂီၢ်မုၢ်က့ၤကဒါက့ၤဆူ အကျဲလီၢ်လံၤတဖၣ်ဒီးမၤအသးအၢန့ၢ်ဒံးပှၤလၢအပူၤကွံာ် တစိၤန့ၣ်လီၤ. အဝဲသ့ၣ်မၤကစၢ်အဂၤတဖၣ်အတၢ်ဒီးဘူၣ်ထီၣ်ဘါထီၣ်အီၤန့ၣ်လီၤ. ဒီးအဝဲသ့ၣ်တဆိကတီၢ်လၢအကျဲအၢကျဲသီတဖၣ်န့ၣ်ဘၣ်လီၤ.
20 အန့ၣ်တစုယွၤအသးကဲၤထီၣ်ဘၣ်ပှၤအံၣ်စရ့လးဖိစံးဝဲဒၣ်, “ပှၤတကလုာ်အံၤမၤဟးဂီၤကွံာ်တၢ်အၢၣ်လီၤအီလီၤလၢယမၤလိာ်တ့ၢ်အဝဲသ့ၣ် အမိၢ်ပၢ်ဖံဖုလၢပျၢၤတဖၣ်ဒ်သိးအကတိၢ်န့ၢ်ဝဲဒၣ်န့ၣ်လီၤ.
21 မ့ၢ်လၢအဝဲသ့ၣ်တဒိကနၣ်ယကလုၢ်အဃိဒီးယတနီၣ်ထီၣ်ကွံာ်လၢၤဘၣ် ပှၤကလုာ်တဖၣ်လၢအအိၣ်လီၤတဲာ်ဒံးဝဲလၢကီၢ်ပူၤဖဲစီၤယိၤၡူသံအခါန့ၣ်ဘၣ်.
22 ယကသူပှၤကလုာ်တဖၣ်ဒ်သိးယကသ့ၣ်ညါလၢမ့ၢ်ပှၤအံၣ်စရ့လးဖိတဖၣ်အံၤ ကပိာ်ယကျဲဒ်အမိၢ်ပၢ်ဖံဖုလၢပျၢၤတဖၣ်မၤတ့ၢ်ဝဲအသိး, မ့တမ့ၢ်တပိာ်ဘၣ်ဝဲအဂ့ၢ်န့ၣ်လီၤ.”
23 လၢတၢ်န့ၣ်အဃိယွၤပျဲပှၤကလုာ်တဖၣ်လၢကအိၣ်ဒံးလၢကီၢ် အပူၤန့ၣ်လီၤ. ယွၤတပျဲစီၤယိၤၡူမၤနၢၤအဝဲသ့ၣ်မ့ၢ်ဂ့ၤ, နီၣ်ထီၣ်ကွံာ်အဝဲသ့ၣ်ဖဲစီၤယိၤၡူသံဝံၤအလီၢ်ခံတဘျီဃီ မ့ၢ်ဂ့ၤဘၣ်န့ၣ်လီၤ.