10
1 တၢ်ဘှံးယသးလၢယတၢ်အိၣ်မူန့ၣ်လီၤ. ဒိကနၣ်လၢ်ယတၢ် ကအုကစွါလၢတၢ်နးတၢ်ဖှီၣ်အပူၤန့ၣ်တက့ၢ်.
2 ကစၢ်ယွၤဧၢ, စံၣ်ညီၣ်လၢ်ယၤတဂ့ၤ. စံးဘၣ်ယၤ, တၢ်ကမၣ်လၢအဘၣ်တၢ်ပာ်လီၤထီဒါယၤန့ၣ်မ့ၢ်
မနုၤလဲၣ်န့ၣ်တက့ၢ်.
3 လၢနကသးဘၣ်အၢတၢ်လၢ နကစၢ်ဒၣ်နဲတ့လီၤ အီၤဒီးနံၤလၢပှၤအၢပှၤသီတဖၣ် အတၢ်ကူၣ်ကျဲၤအဂီၢ်န့ၣ်,
ကတီဝဲလိၤဝဲလၢ နဂီၢ်တုၤလၢနကအၢကသီထဲ
န့ၣ်ကစီဒီဧါ.
4 မ့ၢ်နထံၣ်တၢ်ဒီးနၢ်ပၢၢ်တၢ်ဒ်ပှၤကညီအသိးန့ၣ်ဧါ.
5 မ့ၢ်နမုၢ်နံၤမုၢ်သီတဖၣ်လီၤဂာ်ဒီး ပှၤကညီလၢအသံသ့, မ့တမ့ၢ်နနံၣ်နလါတဖၣ်လီၤဂာ်ဒီးပှၤကညီတဂၤ,
6 လၢနကဘၣ်ဃုထံၣ်ယတၢ်ကမၣ်တဖၣ်ဒီး ဃုကွၢ်လီၤတံၢ်ယတၢ်ဒဲးဘးတဖၣ်န့ၣ်ဧါ.
7 နသ့ၣ်ညါလၢယတမ့ၢ်ဘၣ်ပှၤအိၣ်ဒီးတၢ်ကမၣ်ဒီးပှၤမၤပူၤဖျဲး ယၤလၢနစုပူၤသ့တအိၣ်နီတဂၤဘၣ်.
8 နစုတ့ယၤဒီးသိယၤလီၤ. ဒီးခဲကနံၣ် နစုဒၣ်နဲမၤဟးဂီၤ ကွံာ်ယၤလီၤ.
9 သ့ၣ်နီၣ်ထီၣ်က့ၤလၢ်လၢနတ့ယၤလၢကပံာ်ဒီးမ့ၢ်နကဒုးကဲထီၣ် ကဒီးက့ၤယၤလၢဟီၣ်ခိၣ်အကမူၣ်န့ၣ်ဧါ.
10 နဟ့ၣ်ယပၢ်တၢ်ဂံၢ်တၢ်ဘါလၢကဒုးထီၣ်ဖိယၤ, နဒုးဒိၣ်ထီၣ် ယၤလၢယမိၢ်အဒၢလီၢ်အပူၤန့ၣ်လီၤ.
11 နတ့ယနီၢ်ခိနီၢ်ခီလၢတၢ်ဃံဒီးတၢ်အထူၣ်အပျၢ်, ဒီးနမၤဘၢတၢ် ဃံလၢပညၣ်ထူၣ်တဖၣ်ဒီးပဖံးန့ၣ်လီၤ.
12 နဟ့ၣ်လီၤလံယၤလၢတၢ်မူဒီးတၢ်အဲၣ်ဂၢၢ်ကျၢၤ, ဒီးနတၢ် ကဟုဘံၣ်ကယာ်ဘၢအံးက့ၤကွၢ်က့ၤယသးလီၤ.
13 ဘၣ်ဆၣ်ခဲကနံၣ်အံၤယသ့ၣ်ညါလၢထီဘိတထံၣ်ဃီန့ၣ် နကူၣ်ခူသူၣ်လၢနကမၤဆါယၤလီၤ.
14 နကွၢ်ဟုၣ်ကွၢ်စုးယၤလၢ မ့ၢ်ယကမၤတၢ်ဒဲးဘးတၢ်ဧါ, ဒ်သိးနဂ့ၢ်လိာ်လၢနပျၢ် ယတၢ်ဒဲးဘးကသ့န့ၣ်လီၤ.
15 ယမ့မ့ၢ်ပှၤလၢအတၢ်ကမၣ်အိၣ်ဒီးယဘၣ်အဖှီၣ်လီၤ. ယတၢ်ကမၣ်မ့ၢ်တအိၣ်ဒၣ်လဲာ်, ယမိာ်ထီၣ်ယခိၣ်တသ့ဘၣ်. အဂ့ၢ်ဒ်အံၤယပှဲၤဒီးတၢ်မဲာ်ဆှးဒီးယဘၣ်တၢ်လုၣ်ဘၢယၤလၢ ယတၢ်နးတၢ်ဖှီၣ်လီၤ.
16 ယမ့ၢ်အိၣ်ဒီးတၢ်မၤနၢၤတမံၤမံၤန့ၣ်ဒီးနခိးခးယၤဒ်ခ့ယုၢ် တဒုသိး, ဒီးလၢနကခိးခးယၤအဂီၢ်နမၤတၢ်လီၤလးတဖၣ်ဒၣ်လဲာ်
န့ၣ်လီၤ.
17 နအိၣ်ဒီးပှၤအုၣ်အသးထီဒါယၤထီဘိ, နတၢ်သးထီၣ်ယၤဒိၣ် ထီၣ်ဒီးနကူၣ်ထီဒါယၤထီဘိန့ၣ်လီၤ.
18 ကစၢ်ယွၤဧၢ, ဘၣ်မနုၤအဃိနပျဲယဟဲအိၣ်ဖျဲၣ်ထီၣ်န့ၣ်လဲၣ်. ယကြၢးသံဖဲတချူးပှၤထံၣ်ယၤနီတဂၤဒံးဘၣ်န့ၣ်လီၤ.
19 ယမ့ၢ်ဘၣ်တၢ်စိာ်ထီၣ်ကွံာ်ယၤလၢ ယမိၢ်အဒၢလီၢ်အပူၤ ဆူတၢ်သွၣ်ခိၣ်န့ၣ် ကမ့ၢ်မးတၢ်ဂ့ၤဒ်သိး ယတအိၣ်ဖျဲၣ်
ထီၣ်တ့ၢ်ဘၣ်န့ၣ်လီၤ.
20 မ့ၢ်ယတၢ်အိၣ်မူတလၢာ်ဒံးဘၣ်ဧါ. ပျဲယအိၣ်ထဲတဂၤဧိၤတက့ၢ်. မ်ယကမုာ်လၤလၢတၢ်ဆၢကတီၢ်လၢအအိၣ်လီၤတဲာ်တ့ၢ်ဒီးယၤ
န့ၣ်တက့ၢ်.
21 တယံာ်ဘၣ်ဒီးယကလဲၤတၢ်ဒီးတဟဲက့ၤနီတဘျီလၢၤဘၣ် န့ၣ်လီၤ. ယကလဲၤဆူတၢ်လီၢ်လၢတၢ်ခံးတၢ်နၤဒီးတၢ်သး
ဟးဂူာ်ဟးဂီၤအလီၢ်,
22 ကီၢ်တဘ့ၣ်လၢအပှဲၤဒီးတၢ်ခံးသူ, တၢ်အကဒုတဖၣ်ဒီးတၢ်သဘံၣ်ဘုၣ်, ဖဲတၢ်ကပီၤဒၣ်လဲာ်မ့ၢ်ဒ်တၢ်ခံးတၢ်နၤအသိးန့ၣ်လီၤ.