စီၤယိၤဟၣ်
အလံာ်ပရၢခံဘ့ၣ်တဘ့ၣ်
JOHN
စီၤယိၤဟၣ်အလံာ်ပရၢခံဘ့ၣ်တဘ့ၣ်အံၤဘၣ်တၢ်ကွဲးအီၤလၢ ပှၤသးပှၢ်ဆူတူၢ်ဒိၣ်မုၣ်လၢအဘၣ်တၢ်ဃုထၢအီၤဒီးအဖိ အလံၤတဖၣ်အအိၣ်, အခီပညီကမ့ၢ်ဝဲတၢ်အိၣ်ဖှိၣ်တဖုဒီးအတၢ်အိၣ်ဖှိၣ်ဖိ တဖၣ်န့ၣ်လီၤ. တၢ်ကစီၣ်ဖုၣ်ဖုၣ်ဖိအံၤမ့ၢ်တၢ်သကွံၢ်ကညးအဝဲသ့ၣ်လၢ ကအဲၣ်လိာ်ကွံလိာ်အသးတဂၤဒီးတဂၤဒီးတၢ်ဟ့ၣ်ပလီၢ် အဝဲသ့ၣ်လၢသရၣ်အဘျၣ်တဖၣ်ဒီးအတၢ်သိၣ်လိသီလိ တဖၣ်န့ၣ်လီၤ.
1
1 လၢပှၤသးပှၢ်,
ဆူတူၢ်ဒိၣ်မုၣ်လၢအဘၣ်တၢ်ဃုထၢအီၤဒီးအဖိအလံၤတဖၣ် အအိၣ်, ပှၤလၢယအဲၣ်အီၤလၢတၢ်အဲၣ်နီၢ်နီၢ်ဒီးတမ့ၢ်ထဲ ယၤတဂၤဧိၤဘၣ်, မ့မ့ၢ်ပှၤခဲလၢာ်လၢအသ့ၣ်ညါတၢ်မ့ၢ် တၢ်တီန့ၣ်အဲၣ်ဘၣ်နၤ,
2 မ့ၢ်လၢတၢ်မ့ၢ်တၢ်တီအိၣ်ဆိးလၢပပူၤဒီးကအိၣ်ဒီးပှၤလီၤ ထူလီၤယိာ်အဃိန့ၣ်လီၤ.
3 မ်ပၢ်ကစၢ်ယွၤဒီးယ့ၣ်ၡူးခရံာ်လၢအမ့ၢ်ပၢ်အဖိခွါဟ့ၣ်လီၤ ပှၤတၢ်ဘျုးတၢ်ဖှိၣ်, တၢ်သူၣ်ကညီၤသးကညီၤ, ဒီးတၢ်ဃူတၢ်ဖိးတက့ၢ်. မ်တၢ်သ့ၣ်တဖၣ်အံၤကကဲထီၣ် ဒၣ်ဝဲပတၢ်လၢတၢ်မ့ၢ်တၢ်တီဒီးတၢ်အဲၣ်တၢ်ကွံအပူၤန့ၣ် တက့ၢ်.
4 ယသးခုယဲဒိၣ်မးလၢယထံၣ်ဘၣ်နဖိနလံၤတနီၤအိၣ်မူ ဝဲဒၣ်လၢတၢ်မ့ၢ်တၢ်တီအပူၤဒ်ပၢ်မၤလိာ်တ့ၢ်ပှၤအသိး အဃိန့ၣ်လီၤ.
5 ဒီးခဲကနံၣ်အံၤယဃ့ကညးနၤ, တူၢ်ဒိၣ်မုၣ်သးဘိဧၢ, မ်ပဝဲခဲလၢာ်ပအဲၣ်လိာ်ကွံလိာ်ပသးတဂၤဒီးတဂၤတက့ၢ်. ယကွဲးန့ၢ်သုတၢ်အံၤတမ့ၢ်တၢ်မၤလိာ်အသီဘၣ်. မ့ၢ်တၢ်မၤလိာ်လၢပဒိးန့ၢ်ဘၣ်တ့ၢ်လၢတၢ်အခီၣ်ထံး လံၤလံၤန့ၣ်လီၤ.
6 ဒီးတၢ်အဲၣ်အံၤအခီပညီမ့ၢ်ဝဲ, ပကအိၣ်မူလၢတၢ်စူၢ်ကစၢ်ယွၤအတၢ်မၤလိာ်တဖၣ်အပူၤ န့ၣ်လီၤ. တၢ်မၤလိာ်, ဒ်သုဝဲခဲလၢာ်သုနၢ်ဟူတ့ၢ်လၢ တၢ်အခီၣ်ထံးလံၤလံၤမ့ၢ်အအံၤ, သုဝဲခဲလၢာ်သုကဘၣ်အိၣ်မူလၢတၢ်အဲၣ်တၢ်ကွံအပူၤ န့ၣ်လီၤ.
7 ပှၤလီတၢ်ဝ့ၤတၢ်အါဂၤအိၣ်ထီၣ်ဝဲလၢဟီၣ်ခိၣ်ချၢလီၤ. အဝဲသ့ၣ်မ့ၢ်ပှၤတဖၣ်လၢအတအၢၣ်လီၤအီလီၤဝဲလၢ ယ့ၣ်ၡူးခရံာ်ဟဲဝဲလၢတၢ်ဖံးတၢ်ညၣ်အပူၤဘၣ်. ပှၤဒ်န့ၣ်သိးတဂၤ, မ့ၢ်ပှၤလီတၢ်ဒီးမ့ၢ်ခရံာ်အဒုၣ်အဒါ န့ၣ်လီၤ.
8 လၢတၢ်န့ၣ်အဃိ, ပလီၢ်သုသးဒ်သိးတၢ်လၢသုမၤန့ၢ်တ့ၢ်တဖၣ် အသုတလီၤမၢ်ကွံာ်န့ၢ်သုတဂ့ၤ, ဒီးဒ်သိးသုကဒိးန့ၢ်ဘၣ်သုခိၣ်ဖး လၢလၢပှဲၤပှဲၤအဂီၢ်န့ၣ်တက့ၢ်.
9 ပှၤတဂၤဂ့ၤတဂၤဂ့ၤလၢအတအိၣ်ဆိးဘၣ်လၢခရံာ်အတၢ် သိၣ်လိသီလိအပူၤ, ဒီးလဲၤခါပတာ်ကွံာ်အီၤန့ၣ်, ကစၢ်ယွၤတအိၣ်ဒီးအီၤဘၣ်. မတၤတဂၤဂ့ၤတဂၤဂ့ၤလၢအအိၣ်ဆိးဒီးအတၢ်သိၣ်လိသီလိန့ၣ်, ပၢ်ဒီးဖိခံဂၤလၢာ်အိၣ်ဒီးအီၤလီၤ.
10 လၢတၢ်န့ၣ်အဃိ, ပှၤတဂၤဂၤမ့ၢ်ဟဲဆူသုအိၣ်ဒီး တဟဲစိာ်ဘၣ်တၢ်သိၣ်လိသီလိအံၤန့ၣ်, တဘၣ်တူၢ်လိာ် အီၤလၢသုဟံၣ်ပူၤတဂ့ၤ. တဘၣ်စံးဒၣ်လဲာ် “မ်တၢ်ဃူတၢ်ဖိးအိၣ်ဒီးနၤ” တဂ့ၤ.
11 အဂ့ၢ်ဒ်လဲၣ်န့ၣ်, ပှၤတဂၤဂၤလၢအဆၢဂ့ၤဆၢဝါဘၣ်အီၤ န့ၣ်, ကဲထီၣ်အဝဲအပှၤမၤသကိးတၢ်လၢအတၢ်မၤအအၢအသီ တဖၣ်အပူၤန့ၣ်လီၤ.
12 ယအိၣ်ဒီးတၢ်အါမးလၢယသးအိၣ်စံးဘၣ်တဲဘၣ်သု, ဘၣ်ဆၣ်ယတသးအိၣ်ကွဲးအီၤလၢစးခိဒီးမဲၣ်ထံန့ၣ်ဘၣ်. မ့မ့ၢ်, ယမုၢ်လၢ်လၢယကလဲၤဆူသုအိၣ်ဒီးကတိၤ တၢ်ဒီးသုလၢမဲာ်သကိးမဲာ်, ဒ်သိးပကအိၣ်ဒီးတၢ်သးခု အလၢအပှဲၤအဂီၢ်န့ၣ်လီၤ.
13 သုဒီပုၢ်ဝဲၢ်မုၣ်လၢအဘၣ်တၢ်ဃုထၢအီၤအဖိအလံၤ တဖၣ်ဆှၢန့ၢ်သုအဝဲသ့ၣ်အတၢ်ဆၢဂ့ၤဆၢဝါတဖၣ် န့ၣ်လီၤ.