8
1 ယွၤစံးဘၣ်ယၤ, “ဟံးန့ၢ်တၢ်ဘ့ၣ်ဘၣ်ဖးလဲၢ်တဘ့ၣ်ဒီးကွဲးလီၤတၢ် လၢအပူၤလၢလံာ်မဲာ်ဖျၢၣ်ဖးဒိၣ်တဖၣ်, “မဟၢ်ၡလးဃၤၡဘ,” လၢအခီပညီမ့ၢ်ဝဲ, “ဂုာ်ဆူၣ်ပျီဆူၣ်ချ့ချ့, ဂုာ်မၤဟးဂီၤချ့ချ့,” န့ၣ်တက့ၢ်.
2 မၤန့ၢ်ပှၤခံဂၤလၢပနာ်န့ၢ်အီၤသ့, ပှၤလုၢ်တၢ်အခိၣ်စီၤအူၤ ရံၤယၤဒီးစီၤယဘ့းရ့ကယၤအဖိခွါစီၤစကၤရယါလၢအကကဲထီၣ် ပှၤအုၣ်အသးတဖၣ်တက့ၢ်.”
3 လၢခံတယံာ်ဘၣ်ဒီးယမါဒၢထီၣ်ဝဲလီၤ. ဖဲပဖိခွါအိၣ်ဖျဲၣ်ထီၣ်ဝဲန့ၣ်, ယွၤစံးဘၣ်ယၤ, “ယုၢ်န့ၢ်အမံၤလၢ, မဟၢ်ၡလးဃၤၡဘး, တက့ၢ်.
4 တချုးဖိသၣ်ပိာ်ခွါအံၤသ့ၣ်ညါကိးထီၣ်, မိမိၢ်ဒီး ပါပၢ်ဒံးဘၣ်န့ၣ်, ဝ့ၢ်ဒၤမ့ၤစ့းအတၢ်ထူးတၢ်တီၤခဲလၢာ် ဒီးကီၢ်ၡၤမရံအတၢ်ဂုာ်ဆူၣ်ပျီဆူၣ်ခဲလၢာ်ကဘၣ်တၢ်စိာ်ကွံာ်အီၤ လၢကီၢ်အၤၡူၢ်အစီၤပၤန့ၣ်လီၤ.”
5-6 ယွၤကတိၤကဒီးတၢ်ဒီးယၤလီၤ. အဝဲစံးဝဲ, “မ့ၢ်လၢပှၤသ့ၣ်တဖၣ်အံၤစူးကွံာ် ပဲကွံာ်ထံကျိၡံလိၤလၢအယွၤလီၤမုာ်မုာ်ခုၣ်ခုၣ်, သးခုဝဲလၢစီၤပၤအၤဃးဒီးစီၤပၤပ့ကးအမဲာ်ညါအဃိ,
7 ယၤ, ယွၤအံၤ, ယကမၢလီၤကီၢ်အၤၡူၢ်အစီၤပၤဖးဒိၣ်ဒီးအသုးမုၢ် သံၣ်ဘိခဲလၢာ်လၢကဒုးကီၢ်ယူဒၤလီၤ. အဝဲသ့ၣ်ကလဲၤထီၣ်ဝဲဒ်ထံကျိဖရၤ သးအထံဒိၣ်ခိၣ်ယွၤဒီးလုၣ်ဘၢ ကွံာ်ကယဲၢ်အထံကၢၢ်နံၤခဲလၢာ်အသိးန့ၣ်လီၤ.
8 အဝဲသ့ၣ်ကသုးလီၤအသးချ့ချ့ဒီးခီဂာ်ကီၢ်ယူဒၤဒ်ထံဒိၣ်ခိၣ်ယွၤ လၢအထီၣ်ဘးတုၤဖံဘၣ်ခိၣ်ဒီးလုၣ်ဘၢတၢ်ခဲလၢာ်အသိးန့ၣ်လီၤ.”
ယွၤအိၣ်ဒီးပှၤလီၤ. အဒံးဆ့လၢအယၤထီၣ်အသးတဖၣ်ဒီဒၣ် အိၣ်ပှိၤထံကီၢ်ဒီဘ့ၣ်လီၤ.
9 ပှၤကလုာ်ခဲလၢာ်သ့ၣ်ဧၢ, ပာ်ဖှိၣ်သကိးသုသးလၢတၢ်ပျံၤတၢ် ဖုးအပူၤတက့ၢ်. ဒိကနၣ်တၢ်တက့ၢ်, သုဝဲလၢအအိၣ်လၢဟီၣ် ခိၣ်တၢ်လီၢ်အယံၤတဖၣ်သ့ၣ်ဧၢ, အိၣ်ကတဲာ်ကတီၤသုသးလၢ သုကဒုးတၢ်, ဘၣ်ဆၣ်ဒီးပျံၤတၢ်တက့ၢ်. မ့ၢ်လံ, ကတဲာ်ကတီၤသုသး, ဘၣ်ဆၣ်ဒီးပျံၤတၢ်တက့ၢ်.
10 မၤသုတၢ်ကူၣ်ထီၣ်ဖးလီၤတဖၣ်တက့ၢ်. ဘၣ်ဆၣ်ဒီးကဲထီၣ်လိၣ်ထီၣ်တသ့နီတစုဘၣ်. ဖဲသုသးအိၣ်ကတိၤတၢ်န့ၣ်, ကတိၤတက့ၢ်. ဘၣ်ဆၣ်ဒီးတၢ်န့ၣ်မ့ၢ်တၢ်ကလီကလီခဲလၢာ်လီၤ. အဂ့ၢ်ဒ်အံၤ, ယွၤအိၣ်ဒီးပှၤလီၤ.
11 လၢအတၢ်စိကမီၤဖးဒိၣ်အပူၤန့ၣ်, ယွၤဟ့ၣ်ပလီၢ်တ့ၢ်ယၤလၢယသုတပိာ်ကျဲလၢပှၤဂီၢ် မုၢ်ပိာ်တ့ၢ်ဝဲတဂ့ၤန့ၣ်လီၤ. အဝဲစံးဝဲဒၣ်,
12 “မၤဃုာ်မၤသကိးတၢ်ဒီးပှၤဂီၢ်မုၢ်အတၢ်ကူၣ်တဖၣ်န့ၣ်တဂ့ၤ, ဒီးပျံၤတၢ်တဖၣ်လၢအဝဲသ့ၣ်ပျံၤဝဲန့ၣ်တဂ့ၤ.
13 သ့ၣ်နီၣ်ထီၣ်က့ၤလၢယၤ, ယွၤသ့တၢ်လၢာ်ကစၢ်အံၤစီဆှံဝဲန့ၣ်တက့ၢ်. ယမ့ၢ်ပှၤတဂၤလၢနကဘၣ်ပျံၤအီၤန့ၣ်လီၤ.
14 မ့ၢ်လၢယတၢ်စီဆှံအတၢ်ကဟုကညီၢ်လီၤလးအဃိ, ယလီၤဂာ်ဒီးလၢၢ် တဖျၢၣ်လၢပှၤအခီၣ်ဘၣ်တိၢ်လီၤ. ယလီၤဂာ်ဒီးထုလၢကဖီၣ်န့ၢ် ကီၢ်ယူဒၤဒီးကီၢ်အံၣ်စရ့လးအပှၤဘီဖိမုၢ်ဖိတဖၣ်ဒီးဝ့ၢ်ယရူၤၡ လ့ၣ်အပှၤဂီၢ်မုၢ်တဖၣ်စ့ၢ်ကီးလီၤ.
15 ပှၤအါဂၤကဘၣ်တိၢ်ဘၣ်ထံး, ကလီၤဃံၤဝဲဒီးကဘၣ်တၢ်မၤ ကၢ်မၤလီၤကလဲအီၤလီၤ. အဝဲသ့ၣ်ကဘၣ်တၢ်ဖီၣ်န့ၢ်အီၤလၢ ထုအပူၤလီၤ.”
16 သုဝဲ, ယပျဲၢ်ယဘီၣ်တဖၣ်သုကဘၣ်အံးထွဲကွၢ်ထွဲဒီးပၢၤဃး တၢ်ကစီၣ်တဖၣ်လၢကစၢ်ယွၤဟ့ၣ်လီၤတ့ၢ်ယၤလီၤ.
17 ယွၤပာ်ခူသူၣ်ကွံာ်အသးလၢအပှၤဂီၢ်မုၢ်လီၤ. ဘၣ်ဆၣ်ဒီးယနာ်အီၤဒီးပာ်ယတၢ်မုၢ်လၢ်လၢအဝဲအပူၤလီၤ.
18 ကွၢ်ကွၢ်, ယအိၣ်ဒီးဖိတဖၣ်လၢယွၤဟ့ၣ်လီၤတ့ၢ်ယၤလီၤ. ယွၤ, သ့တၢ်လၢာ်ကစၢ်, လၢအလီၢ်ပစိာ်အိၣ်လၢကစၢၢ်စံ ယိၣ်အလိၤ, ဆှၢလီၤတ့ၢ်န့ၢ်ပှၤတၢ်ကစီၣ်အမူတဖၣ်ဆူအံၣ်စရ့လး အပှၤဂီၢ်မုၢ်အအိၣ်လီၤ.
19 ဘၣ်ဆၣ်ဒီး, ပှၤကစံးဘၣ်သုလၢသုကဃ့န့ၢ်တၢ်ကစီၣ်တဖၣ်လၢ ပှၤဖးတၢ်ဟဲဝံဟဲစိာ်တဖၣ်အအိၣ်, ပှၤကွဲပှၤသံအကလၤတဖၣ် အအိၣ်လၢအကတိၤတၢ်ပံးပံးပးပးဒီးကတိၤတၢ်ကတူၢ်ကတူၢ် တဖၣ်န့ၣ်လီၤ. အဝဲသ့ၣ်ကစံးဝဲ, “ဂ့ၤတက့ၢ်လၢပှၤဂီၢ်မုၢ်ဃ့ န့ၢ်တၢ်ကစီၣ်တဖၣ်လၢသးတဖၣ်ဒီးသံကွၢ်သံဒိးပှၤအသံလၢ ပှၤအမူအခၢၣ်စးန့ၣ်လီၤ.”
20 သုကဘၣ်စံးဆၢက့ၤအဝဲသ့ၣ်, “ဒိကနၣ်တၢ်လၢယွၤသိၣ်လိ သီလိသုတက့ၢ်. ဒိကနၣ်ပှၤကွဲပှၤသံအကလၤတဖၣ်တဂ့ၤ. တၢ်လၢအစံးဘၣ်သုန့ၣ်တမၤဂ့ၤသုနီတမံၤဘၣ်.”
21 ပှၤဂီၢ်မုၢ်ကဟးဝ့ၤဝီၤလၢထံကီၢ်အပူၤအိၣ်ဒီးတၢ်သးဟးဂီၤဒီး တၢ်သူၣ်ဝံၤသၣ်စ့ၤလီၤ. လၢအတၢ်သးထီၣ်ဒီးအတၢ်သၣ်ဝံၤ သၣ်စ့ၤအပူၤန့ၣ်, အဝဲသ့ၣ်ကဆိၣ်အၢအစီၤပၤဒီးအကစၢ်ယွၤလီၤ. အဝဲသ့ၣ်ကကွၢ်ထီၣ်တၢ်ဆူမူခိၣ်,
22 မ့တမ့ၢ်, ကကွၢ်စူၢ်ဟီၣ်ခိၣ်, ဘၣ်ဆၣ်ဒီးတထံၣ်တၢ်နီတမံၤဘၣ်. ကထံၣ်ဒၣ်ထဲတၢ်ကီတၢ်ခဲဒီးတၢ်ခံးတၢ်နၤ, လၢတၢ်ခံးတၢ်နၤလီၤ ပျံၤလီၤဖုးတခါအဝဲသ့ၣ်ဘၣ်တၢ်နီၣ်နုာ်အီၤဆူအပူၤန့ၣ်လီၤ.