65
1 ယွၤစံးဝဲဒၣ်, “ယအိၣ်ကတဲာ်ကတီၤတ့ၢ်ယသးလၢယကစံးဆၢ ယပှၤဂီၢ်မုၢ်အတၢ်ထုကဖၣ်တဖၣ်, ဘၣ်ဆၣ်အဝဲသ့ၣ်တဃ့ဘါထု ကဖၣ်တၢ်ဘၣ်. ယအိၣ်ကတဲာ်ကတီၤယသးလၢအဝဲသ့ၣ် ကထံၣ်န့ၢ်ယၤအဂီၢ်, ဘၣ်ဆၣ်အဝဲသ့ၣ်တကျဲးစၢးဒၣ်လဲာ်ဘၣ်. ဖဲလၢယအိၣ်ကတဲာ်ကတီၤယသးထီဘိလၢယကစံးဆၢအဝဲသ့ၣ်, ယအိၣ်ဖဲအံၤလီၤ. ယကမၤစၢၤသုလီၤ, ဒၣ်လဲာ်န့ၣ်, ပှၤကလုာ်တဃ့ထုကဖၣ်တၢ်လၢယၤဘၣ်.
2 ယအိၣ်ကတဲာ်ကတီၤယသးထီဘိလၢယကတူၢ်လိာ်မုာ် ယပှၤဂီၢ်မုၢ်လၢအခိၣ်ကိၤလၢအမၤကမၣ်တၢ်ဒီးလဲၤလၢ အဝဲသ့ၣ်အကျဲဒၣ်ဝဲန့ၣ်လီၤ.
3 အဝဲသ့ၣ်မၤသူၣ်ဒိၣ်သးဖျိးယၤတပယူာ်ဃီလၢတၢ်မဲာ်ဆှးတ အိၣ်ဘၣ်အပူၤလီၤ. အဝဲသ့ၣ်လုၢ်ထီၣ်ပှၤတစူၢ်တနာ်ယွၤအတၢ် လုၢ်တၢ်ပာ်တဖၣ်လၢတၤသၣ်လီၢ်စီဆှံတဖၣ်အပူၤ, ဒီးဆိၣ်ကဲၤတၢ်နၢမူလၢပှၤတစူၢ်တနာ်ယွၤအတၢ်လုၢ်လီၢ်တဖၣ် အဖီခိၣ်န့ၣ်လီၤ.
4 လၢမုၢ်နၤခီအဆၢကတီၢ်န့ၣ်အဝဲသ့ၣ်လဲၤဆူလၢၢ်ကအိပူၤတဖၣ် ဒီးတၢ်သွၣ်ခိၣ်ပူၤတဖၣ်ဒ်သိးကဃ့တၢ်ဟ့ၣ်ကူၣ်လၢပှၤသံအကလၤ တဖၣ်အအိၣ်န့ၣ်လီၤ. အဝဲသ့ၣ်အီၣ်ထိးညၣ်, ဒီးအီကသူထံလၢအဘၣ်တၢ်ဖီအီၤလၢ တၢ်ညၣ်လၢအဘၣ်တၢ်လုၢ်ထီၣ်တ့ၢ်အီၤလၢပှၤတစူၢ်တနာ်ယွၤ အတၢ်လုၢ်တၢ်ပာ်တဖၣ်အပူၤန့ၣ်လီၤ.
5 ဝံၤဒီးအဝဲသ့ၣ်စံးဘၣ်ပှၤဂၤတဖၣ်အိၣ်ယံၤဒီးပှၤတက့ၢ်. အဂ့ၢ်ဒ်အံၤ, ပစီဆှံကဲၣ်ဆိးလၢသုကထိးဘၣ်ပှၤအဂီၢ်လီၤ. ပှၤဂီၢ်မုၢ်ဒ်သိးအံၤတဖၣ်ယကွၢ်အီၤတလိၤဘၣ်. ယတၢ်သးဒိၣ်ထီဒါအဝဲသ့ၣ်အံၤလီၤဂာ်ဒ်မ့ၣ်အူ တခါလၢအတလီၤပံာ်နီတစုဘၣ်အသိးန့ၣ်လီၤ.
6 ယပာ်လီၤတ့ၢ်တၢ်စံၣ်ညီၣ်လၢအဝဲသ့ၣ်အဂီၢ်, ဒီးအဝဲသ့ၣ် အတၢ်စံၣ်ညီၣ်အဂ့ၢ်ဘၣ်တၢ်ကွဲးလီၤအီၤလံလီၤ. ယတကွၢ်ကပာ်ကွံာ်တၢ်လၢအဝဲသ့ၣ်မၤတ့ၢ်ဝဲဘၣ်, မ့မ့ၢ်ယကဟ့ၣ်ကၣ်အဝဲသ့ၣ်,
7 လၢအဝဲသ့ၣ်အတၢ်ဒဲးဘးတဖၣ်အဂီၢ်ဒီးအမိၢ်ပၢ်ဖံဖုလၢပျၢၤ တဖၣ်အတၢ်ဒဲးဘးအဂီၢ်လီၤ. အဝဲသ့ၣ်ဆိၣ်ကဲၤတၢ်နၢမူ လၢပှၤတစူၢ်တနာ်ယွၤအတၢ်လုၢ်လီၢ်စီဆှံတဖၣ်ဒီးကတိၤ အၢကတိၤသီယၤလီၤ. လၢတၢ်န့ၣ်အဃိယကစံၣ်ညီၣ်အ ဝဲသ့ၣ်ဒ်အကြၢးဒီးအဝဲသ့ၣ်အတၢ်မၤလၢအပူၤကွံာ်တဖၣ် အသိးန့ၣ်လီၤ.”
8 ယွၤစံးဝဲဒၣ်, “စပံးသၣ်လၢအဂ့ၤတဖၣ်န့ၣ်ပှၤ တမၤဟးဂီၤကွံာ်နီတဂၤဘၣ်. အခိၣ်တလိာ်, အဝဲသ့ၣ်ဒုးကဲထီၣ်စပံးထံလၢစပံးသၣ်တဖၣ်အံၤလီၤ. ဒ်န့ၣ်အသိးယတမၤဟးဂီၤယပှၤဂီၢ်မုၢ်ခဲလၢာ်ဘၣ်, ယကအုၣ်က့ၤခီၣ်က့ၤပှၤသ့ၣ်တဖၣ်လၢအမၤန့ၢ်ယၤ လၢတၢ်ခ့တၢ်ပှၤအတၢ်မၤန့ၣ်လီၤ.
9 ယကဆိၣ်ဂ့ၤပှၤအံၣ်စရ့လးဖိတဖၣ်လၢအဘၣ်ဃးဒီးယူဒၤ အဒူၣ်, ဒီးအဝဲသ့ၣ်အစၢၤအသွဲၣ်တဖၣ်ကန့ၢ်သါဘၣ် ယကီၢ်လၢအပှဲၤဒီးကစၢၢ်ကလိတဖၣ်လီၤ. ယပှၤဂီၢ်မုၢ်လၢယဃုထၢအီၤလၢအမၤယတၢ်ခ့တၢ်ပှၤ အတၢ်မၤတဖၣ်ကအိၣ်ကဆိးဖဲန့ၣ်န့ၣ်လီၤ.
10 အဝဲသ့ၣ်ကဘူၣ်ထီၣ်ဘါထီၣ်ယၤဒီးကဆှၢအသိဒီးဂီၤ ဘုၣ်ဂီၤဖံးတဖၣ်ဆူတၢ်အီၣ်ဆၣ်အလီၢ်လါဟ့ဖဲၡၤရိၣ် အပျီလၢမုၢ်နုာ်တခီဒီးဆူတၢ်ကီတၢ်ခဲအတြီၤလၢမုၢ် ထီၣ်တခီအပူၤန့ၣ်လီၤ.
11 မ့မ့ၢ်သုဝဲလၢအလဲၤသဒၣ်ယၤ, ပှၤလၢအတပာ်ကဲဘၣ် ယကစၢၢ်စီဆှံစံယိၣ်, ဒီးဘူၣ်ထီၣ်ဘါထီၣ်ကးဒီးမနံး, ကစၢ်တဖၣ်လၢအဟဲစိာ်တၢ်ဘူၣ်ဂ့ၤတီၢ်ဘၣ်ဒီးတၢ်ဟဲဝံဟဲစိာ်န့ၣ်, ကမ့ၢ်တၢ်လီၤဆီလၢအဂီၢ်လီၤ.
12 တၢ်သံဆူၣ်သံစိးကမ့ၢ်သုတၢ်ဘူၣ်တၢ်တီၢ်, မ့ၢ်လၢဖဲယကိး ထီၣ်တ့ၢ်သုန့ၣ်သုတစံးဆၢယၤမ့ၢ်ဂ့ၤ, ဖဲယကတိၤတၢ်န့ၣ် သုတဒိကနၣ်ဘၣ်မ့ၢ်ဂ့ၤအဃိလီၤ. သုဃုထၢတ့ၢ်တၢ်တစူၢ်ယၤဒီးမၤ တၢ်အၢတၢ်သီလီၤ.
13 လၢတၢ်န့ၣ်အဃိ, ယစံးဘၣ်တဲဘၣ်သုလၢပှၤလၢအဘူၣ်ထီၣ် ဘါထီၣ်ဒီးစူၢ်ယၤန့ၣ်ကအိၣ်ဒီးတၢ်အီၣ်ကုးအီပှဲၤ, မ့မ့ၢ်, သုဝဲသုကသၣ်ဝံၤလီၤဒိန့ၣ်လီၤ. အဝဲသ့ၣ်ကသူၣ်ဖှံ သးညီဝဲ, မ့မ့ၢ်သုဝဲသုကဘၣ်တၢ်မၤမဲာ်ဆှးကွံာ်သုလီၤ.
14 အဝဲသ့ၣ်ကသးဝံၣ်တၢ်လၢတၢ်သးခုအဃိ, မ့မ့ၢ်သုဝဲ သုကဟီၣ်လၢတၢ်သူၣ်ကၢ်သးလီၤအပူၤလီၤ.
15 ပှၤဂီၢ်မုၢ်လၢယဃုထၢအီၤကသူသုမံၤဒ်တၢ်ဘၣ်ဆိၣ်အၢတမံၤ အသိးလီၤ. ယၤ, ယွၤပၢဘၣ်တၢ်ခဲလၢာ်ကစၢ်ကမၤသံသုလီၤ. ဘၣ်ဆၣ်ဒီးယကဟ့ၣ်မံၤအသီတဖျၢၣ်လၢပှၤလၢအစူၢ်ယၤ တဖၣ်အဂီၢ်န့ၣ်လီၤ.
16 ပှၤတဂၤဂ့ၤတဂၤဂ့ၤလၢထံကီၢ်ပူၤ, လၢအဃ့တၢ်ဆိၣ်ဂ့ၤတမံၤ န့ၣ်, ကဃ့ဝဲဒ်သိးတၢ်သူၣ်တီသးရၤအကစၢ်ယွၤကဆိၣ်ဂ့ၤအီၤအဂီၢ် န့ၣ်လီၤ. ပှၤတဂၤလၢ်လၢ်လၢအမၤတၢ်ဆိၣ်တမံၤန့ၣ်, ကဆိၣ်လီၤအသးလၢတၢ်သူၣ်တီသးရၤအကစၢ်ယွၤအမံၤ အပူၤန့ၣ်လီၤ. တၢ်ကီတၢ်ခဲလၢအပူၤကွံာ်တဖၣ် ကလၢာ်ကွံာ်ဒီးကဘၣ်တၢ်သးပ့ၤနီၣ်ကွံာ်အီၤန့ၣ်လီၤ.”
17 ယွၤစံးဝဲ, “ယတ့လီၤဟီၣ်ခိၣ်အသီဒီးမူခိၣ်အသီလီၤ. တၢ်လၢအမၤတ့ၢ်အသးလၢအပူၤကွံာ်တဖၣ်ကဘၣ်တၢ်သး ပ့ၤနီၣ်ကွံာ်အီၤလၢာ်လၢာ်ဆ့ဆ့န့ၣ်လီၤ.
18 သူၣ်ခုသးခုဒီးသူၣ်ဖှံသးညီလီၤစိၤလီၤထီလၢတၢ်လၢယတ့လီၤ ပာ်လီၤအပူၤန့ၣ်တက့ၢ်. ဝ့ၢ်ယရူၤၡလ့ၣ်အသီလၢယတ့လီၤ အီၤအံၤကပှဲၤဒီးတၢ်သးခုဒီးအပှၤဂီၢ်မုၢ်ကသူၣ်ဖှံသးညီဝဲလီၤ.
19 ယကစၢ်ဒၣ်ယဲယကပှဲၤဒီးတၢ်သးခုလၢဝ့ၢ်ယရူၤၡလ့ၣ်ဒီးအပှၤဂီၢ် မုၢ်အဃိလီၤ. ဖဲန့ၣ်တၢ်ဟီၣ်တၢ်ယၢၤ, တၢ်ကိးထီၣ်ဃ့ထီၣ်တၢ် မၤစၢၤတအိၣ်ဝဲဘၣ်.
20 ဖိသၣ်ဆံးဖိတဖၣ်တသံလၢၤဖဲအနီၢ်ဆံးဒံးအခါဘၣ်, ဒီးပှၤဂီၢ်မုၢ်ခဲလၢာ်ကအိၣ်မူတုၤလၢအဝဲသ့ၣ်အတၢ်အိၣ်မူ မုၢ်နံၤအနီၣ်ထိၣ်လီၤ. ပှၤတဖၣ်လၢအအိၣ်မူတုၤအနံၣ်တကယၤ န့ၣ်ကဘၣ်တၢ်ပာ်ကဲအီၤဒ်ပှၤသးစၢ်အသိးလီၤ. တၢ်သံဆိန့ၢ်တၢ်န့ၣ်, ကမ့ၢ်တၢ်ပနီၣ်တမံၤလၢယစံၣ်ညီၣ်တ့ၢ်အဝဲသ့ၣ်န့ၣ်လီၤ.
21 ပှၤဂီၢ်မုၢ်ကဘှီထီၣ်ဟံၣ်ဃီတဖၣ်ဒီးအကစၢ်ဒၣ်ဝဲကအိၣ်လၢ အပူၤ, ဟံၣ်ဃီတဖၣ်န့ၣ်တဘၣ်တၢ်သူအီၤလၢပှၤအဂၤတဖၣ်ဘၣ်. အဝဲသ့ၣ်ကသူၣ်လီၤဖျးလီၤစပံးလီၢ်တဖၣ်ဒီးမုာ်လၤသးခုလၢ အစပံးထံအပူၤ, ပှၤအဂၤတဖၣ်တအီဘၣ်စပံးထံန့ၣ်ဘၣ်.
22 ယပှၤဂီၢ်မုၢ်ကအိၣ်မူတၢ်အိၣ်မူအိၣ်ကၢအိၣ်ခိးဒ်သ့ၣ်ထူၣ်တဖၣ် အသိးန့ၣ်လီၤ. အဝဲသ့ၣ်ကမုာ်လၤသးခုဘၣ်လၢလၢပှဲၤပှဲၤ လၢတၢ်လၢအဝဲသ့ၣ်မၤတ့ၢ်ဝဲတဖၣ်အဃိလီၤ.
23 တၢ်မၤလၢအမၤဝဲန့ၣ်ကကဲထီၣ်လိၣ်ထီၣ်ဝဲဒီးအဝဲသ့ၣ်အဖိတဖၣ် တကွၢ်ဆၢၣ်မဲာ်ဘၣ်တၢ်တတၢးတနါဘၣ်. ယကဆိၣ်ဂ့ၤအဝဲသ့ၣ်ဒီး အစၢၤအသွဲၣ်တဖၣ်လၢတၢ်ဆၢကတီၢ်လၢကဟဲဝဲကိးအကတီၢ် ဒဲးန့ၣ်လီၤ.
24 တချုးဒံးဒၣ်လဲာ်လၢအဝဲသ့ၣ်ဘါထုကဖၣ်ဆူယအိၣ် ကတၢၢ်ဒံးဘၣ်န့ၣ်, ယကစံးဆၢအဝဲသ့ၣ်အတၢ်ထုက ဖၣ်တဖၣ်န့ၣ်လီၤ.
25 ထွံၣ်မံၤတဖၣ်ဒီးသိဖိတဖၣ်ကအီၣ်အဆၣ်တပူၤဃီ, ခ့ယုၢ်တဖၣ်ကအီၣ်လီၢ်ဧိၤဒံးဧိၤ, ဒ်ဂီၤဘုၣ်ဂီၤဖံးအသိး, ဒီးဂုၢ်သ့ၣ်တဖၣ်တလီၤပျံၤလီၤဖုးလၢၤဘၣ်. လၢယကစၢၢ်စီဆှံစံယိၣ်အလိၤန့ၣ်, တၢ်မၤဆူးမၤဆါမ့ၢ်ဂ့ၤ, တၢ်မၤအၢမၤသီမ့ၢ်ဂ့ၤ, တအိၣ်နီတမံၤလၢၤဘၣ်.”