55
1 ယွၤစံးဝဲ,
“ဟဲ, ကယဲၢ်ပှၤလၢတၢ်သူအသးလၢထံသ့ၣ်ဧၢ,
ထံအိၣ်ဖဲအံၤလီၤ.
ဟဲ, သုဝဲလၢအကျိၣ်အစ့တအိၣ်တဖၣ်ဧၢ, ပှ့ၤဘုခ့ဒီးအီၣ်အီတက့ၢ်.
ဟဲ, ပှ့ၤစပံးထံဒီးတၢ်နုၢ်ထံတက့ၢ်. လၢသုဂီၢ်န့ၣ်, တၢ်အပှ့ၤတအိၣ်ဝဲနီတမံၤဘၣ်.
2 ဘၣ်မနုၤအဃိသုကဘၣ်မၤလၢာ်ကျိၣ်လၢာ်စ့လၢတၢ်တတံၤ သူၣ်တံၤသးအဂီၢ်န့ၣ်လဲၣ်.
ဘၣ်မနုၤအဃိသုကဘၣ်မၤလၢာ်သုဘူးသုလဲဒီးသူၣ်ဝံၤသၣ်စ့ၤဒံး ဒၣ်တၢ်န့ၣ်လဲၣ်.
ဒိကနၣ်ယၤဒီးမၤတၢ်လၢယစံးဘၣ်သုန့ၣ်တက့ၢ်.
အန့ၣ်ဒီး, သုကမုာ်လၤသးခုလၢတၢ်အီၣ်အဂ့ၤကတၢၢ်လၢ တၢ်အီၣ်ခဲလၢာ်အကျါလီၤ.
3 ဒိကနၣ်ခဲအံၤ, ယပှၤဂီၢ်မုၢ်သ့ၣ်ဧၢ, ဒီးဟဲဆူယအိၣ်တက့ၢ်.
ဟဲဆူယအိၣ်ဒီးသုကန့ၢ်ဘၣ်တၢ်မူလီၤ.
ယကမၤတၢ်အၢၣ်လီၤအီလီၤအထူအယိာ်ဒီးသု
ဒီးဟ့ၣ်သုတၢ်ဆိၣ်ဂ့ၤတဖၣ်လၢယအၢၣ်လီၤတ့ၢ်စီၤဒၤဝံးန့ၣ်လီၤ.
4 ယဒုးကဲထီၣ်အီၤလၢခိၣ်နၢ်တဂၤဒီးပှၤကလုာ်တဖၣ်အသုးခိၣ်ဖးဒိၣ်,
ဒီးခီဖျိအီၤန့ၣ်ယဒုးနဲၣ်အဝဲသ့ၣ်လၢ ယတၢ်စိတၢ်ကမီၤလီၤ.
5 ခဲအံၤ, သုကကိးဖှိၣ်ထံဂုၤကီၢ်ဂၤအပှၤကလုာ်တဖၣ်လီၤ.
တဘျီန့ၣ်, အဝဲသ့ၣ်တသ့ၣ်ညါသုဘၣ်.
ဘၣ်ဆၣ်ဒီးခဲအံၤ, အဝဲသ့ၣ်ကဟဲဃ့ၢ် ပာ်ဖှိၣ်အသးဒီးသုလီၤ.
ယၤ, ယွၤ, သုကစၢ်ယွၤ, အံၣ်စရ့လးအကစၢ်ယွၤစီဆှံ
ကမၤကဲထီၣ်လိၣ်ထီၣ်တၢ်သ့ၣ်တဖၣ်အံၤခဲလၢာ်လီၤ.
ယကဟ့ၣ်လီၤသုလၢတၢ်ဒိးဘၣ်တၢ်ယူးယီၣ် ဒီးတၢ်လၤကပီၤလီၤ.”
6 ဃၣ်သုသးဆူယွၤအအိၣ်ဒီးဖဲအအိၣ်ဘူးအဖၢမုၢ်အံၤန့ၣ်ဘါ ထုကဖၣ်တၢ်ဆူအအိၣ်တက့ၢ်.
7 မ်ပှၤတတီတလိၤတဖၣ်ပာ်တ့ၢ်ကွံာ်အတၢ်အိၣ်မူအကျဲ
ဒီးမ်အလဲလိာ်ကွံာ်အတၢ်ဆိကမိၣ်အကျဲတက့ၢ်.
မ်အဝဲသ့ၣ်ဃၣ်အသးဆူယွၤ, ပကစၢ်ယွၤအအိၣ်တက့ၢ်. အဝဲဒၣ်လၢပှဲၤဒီးတၢ်သူၣ်ကညီၤသးကညီၤဒီး ပျၢ်တၢ်ကမၣ်အါအါကလဲာ်လီၤ.
8 ယွၤစံးဝဲဒၣ်, “ယတၢ်ဆိကမိၣ်တဖၣ်တဒ်သိး သုတၢ်ဆိကမိၣ်တဖၣ်ဘၣ်.
ဒီးယကျဲတဖၣ်လီၤဆီလိာ်အသးဒီးသုကျဲတဖၣ်လီၤ.
9 အဂ့ၢ်ဒ်အံၤ, ဒ်မူခိၣ်မူကပိာ်လိၤထီန့ၢ်ဟီၣ်ခိၣ်အသိး,
ယကျဲဒီးယတၢ်ဆိကမိၣ်တဖၣ်ထီန့ၢ်သုကျဲဒီး သုတၢ်ဆိကမိၣ်တဖၣ်စၢၢ်တလၢၢ်လီၤ.
10 ယကလုၢ်ကထါအံၤလီၤဂာ်ဒ်မူခိၣ်ဖီဒီးတၢ်စူၤထံလၢ အဟဲလီၤလၢမူခိၣ်အသိး,
လၢကမၤဘၣ်စီၣ်ဟီၣ်ခိၣ်အဂီၢ်န့ၣ်လီၤ.
အဝဲသ့ၣ်ဒုးမဲထီၣ်ဒိၣ်ထီၣ်တၢ်မုၢ်တၢ်ဘိတဖၣ်
ဒီးဟ့ၣ်ထီၣ်တၢ်ချံလၢဖှံတၢ်အဂီၢ် ဒီးတၢ်အီၣ်လၢပှၤကအီၣ်ဘၣ်အီဘၣ်အဂီၢ်လီၤ.
11 ယကလုၢ်ကထါလၢယကတိၤအီၤအံၤကမ့ၢ်တၢ်ဒ်န့ၣ် အသိးစ့ၢ်ကီးလီၤ.
တလီၤတူာ်လီၤကာ်လၢကမၤ တၢ်ဒ်ယကူၣ်ကျဲၤပာ်အီၤအဂီၢ်န့ၣ်ဘၣ်.
ဒီးကမၤတၢ်တမံၤလၢ်လၢ်လၢယမၢအမၤအီၤန့ၣ်လီၤ.
12 သုကဟးထီၣ်လၢဝ့ၢ်ဘၤဘူၤလိၣ်အိၣ်ဒီး တၢ်သူၣ်ခုသးခုလီၤ.
သုကဘၣ်တၢ်ဆှၢထီၣ်သုလၢဝ့ၢ်အပူၤ မုာ်မုာ်ခုၣ်ခုၣ်လီၤ.
ကစၢၢ်ဒီးတၢ်လူၢ်တဖၣ်ကပိၢ်ဖးထီၣ်လၢ တၢ်သူၣ်ဝံၣ်သးဆၢ
ဒီးသ့ၣ်ထူၣ်တဖၣ်ကကိးပသူထီၣ်လၢ တၢ်သူၣ်ခုသးခုအပူၤလီၤ.
13 ဖဲတၤဆှုၣ်တၤမဲအိၣ်ဝဲအလီၢ်ခဲအံၤ, သ့ၣ်ဆှိတဖၣ်ကမဲထီၣ်ဝဲ,
ဒီးလၢတၤဆှုၣ်အလီၢ်န့ၣ်သမ့ၤဟဒးကဟဲမဲထီၣ်ဝဲလီၤ.
အဝဲအံၤကမ့ၢ်တၢ်ပနီၣ်တမံၤလၢကအိၣ်လီၤထူလီၤယိာ်
ဒီးတၢ်ဒုးသ့ၣ်နီၣ်ထီၣ်တမံၤလၢယၤ, ယွၤ, မၤတ့ၢ်ဝဲန့ၣ်လီၤ.”