52
1 ဝ့ၢ်ယရူၤၡလ့ၣ်ဧၢ, ဂံၢ်ဆူၣ်ဘါဆူၣ်ဒီး ဒိၣ်ကဒီးက့ၤနဲတက့ၢ်.
ကစၢ်ယွၤအဝ့ၢ်စီဆှံဧၢ, ကူသိးထီၣ်နဲတၢ်ဃံဒိၣ်လၤဒိၣ်တ က့ၢ်.
ပှၤတသ့ၣ်ညါယွၤတဟဲနုာ်ဘၣ်ကဒီး လၢနတြဲၤတဖၣ်အပူၤနီတစုဘၣ်.
2 ဝ့ၢ်ယရူၤၡလ့ၣ်ဧၢ, တြုၤလီၤကွံာ်နဖၣ်ကမူၣ်ဖၣ်ဆါတဖၣ်,
ဂဲၤဆၢထၢၣ်ဒီးဆ့ၣ်နီၤလၢနလီၢ်ပစိာ်န့ၣ်တက့ၢ်.
ဃ့ၣ်လီၤကွံာ်ပျံၤထးတဖၣ်လၢအစၢဃာ်သု, သုဝဲဝ့ၢ်စံယိၣ် အပှၤဂီၢ်မုၢ်လၢအဘၣ်တၢ်မၢကဲကုၢ်အီၤသ့ၣ်ဧၢ.
3 ယွၤပၢဘၣ်တၢ်ခဲလၢာ်အကစၢ်စံးဘၣ်အပှၤဂီၢ်မုၢ်, “ဖဲသုကဲထီၣ်ကုၢ်တဖၣ်န့ၣ်, တၢ်တပှ့ၤန့ၢ်သုလၢစ့နီတဘ့ၣ်ဘၣ်. ဒ်န့ၣ်အသိး, တလိၣ်တၢ်ဟ့ၣ်တၢ်နီတမံၤလၢသုကထူၣ်ဖျဲးထီၣ် အဂီၢ်န့ၣ်ဘၣ်.
4 ဖဲသုလဲၤတၢ်ဒ်သိးသုကအိၣ်ကဆိးလၢကီၢ်အဲၤကူပတူး အပူၤဒ်ပှၤတခီဘီမုၢ်တဖၣ်အသိးန့ၣ်, သုလဲၤဒၣ်တၢ်လၢသုတၢ်ဘၣ် သုသးဒၣ်ဝဲအပူၤလီၤ. နာ်သက့, ကီၢ်အၤၡူၢ်စိာ်ထီၣ်ကွံာ်သုလၢ တၢ်စုဆူၣ်ခီၣ်တကးအပူၤဒီးတဟ့ၣ်တၢ်အပှ့ၤလၢသုဂီၢ်နီတမံၤဘၣ်.
5 ဒီးခဲအံၤလၢကီၢ်ဘၤဘူၤလိၣ်န့ၣ်တၢ်တမံၤဃီမၤတ့ၢ်အသးလီၤ. သုဘၣ်တၢ်စိာ်မၢကဲကုၢ်သုဒီးတၢ်တဟ့ၣ်တၢ်အပှ့ၤနီ တမံၤလၢသုဂီၢ်ဘၣ်. ပှၤတဖၣ်လၢအပၢသုန့ၣ်ပာ်ထီၣ်ထီ ကတိၤဒိၣ်လီၤအသးဒီးဒုးနဲၣ်အတၢ်သူၣ်က့ၣ်သးကါဘၣ်ယၤ တထံၣ်ဃီလီၤ.
6 ဖဲတၢ်ဆၢကတီၢ်လၢကဟဲတုၤဃီၤဝဲန့ၣ်, သုကသ့ၣ်ညါအၢၣ်လီၤလၢယမ့ၢ်ကစၢ် ယွၤဒီးယကတိၤတ့ၢ်လံတၢ်ဒီးသုန့ၣ်လီၤ.”
7 တၢ်ထံၣ်ဘၣ်ပှၤစိာ်တၢ်ကစီၣ်တဂၤဟဲခီဂာ်ကစၢၢ်ကလိတဖၣ်,
ဟဲစိာ်ဃုာ်ဝဲတၢ်သးခုဒီးတၢ်ဃူတၢ်ဖိးအကစီၣ်န့ၣ်, မ့ၢ်မးတၢ်လီၤလးဆံးဒိၣ်လဲၣ်.
အဝဲဘိးဘၣ်သ့ၣ်ညါတၢ်မၤနၢၤဒီးစံးဘၣ်ဝ့ၢ်စံယိၣ်, နကစၢ်ယွၤမ့ၢ်စီၤပၤလီၤ.
8 ပှၤတဖၣ်လၢအခိးဒီးပၢၤဝ့ၢ်ကိးထီၣ်ဝဲ, ကိးထီၣ်သကိးဝဲလၢတၢ်သးခုအဂ့ၢ်လီၤ.
ယွၤအတၢ်ဟဲက့ၤကဒါက့ၤဆူဝ့ၢ်စံယိၣ် န့ၣ်အဝဲသ့ၣ်ထံၣ်ဘၣ်ဝဲလၢအမဲာ်ချံဒၣ်ဝဲသ့လီၤ.
9 ကိးသတြီထီၣ်လၢတၢ်သးခု အတၢ်ကိးထီၣ်တဖၣ်တက့ၢ်,
သုဝဲဝ့ၢ်ယရူၤၡလ့ၣ်အတၢ်ဟးဂီၤတဖၣ်ဧၢ.
ယွၤကမၤပူၤဖျဲးအဝ့ၢ်ဒၣ်ဝဲဒီးမၤမုာ်မၤခုၣ်အပှၤဂီၢ်မုၢ်လီၤ.
10 ယွၤကသူအစိကမီၤစီဆှံဒၣ်ဝဲ,
ကအုၣ်က့ၤခီၣ်က့ၤအပှၤဂီၢ်မုၢ်,
ဒီးဟီၣ်ခိၣ်ဒီဘ့ၣ်ကထံၣ်ဘၣ်တၢ်န့ၣ်လီၤ.
11 ဟးထီၣ်ကွံာ်သပှၢ်ကတၢၢ်လၢကီၢ်ဘၤဘူၤလိၣ်,
သုဝဲလၢအဝံစိာ်တၢ်လုၢ်ဟံၣ်အပီးအလီသ့ၣ်ဧၢ,
တၢ်လၢတၢ်တြီအီၤတဖၣ်န့ၣ်ထိးအီၤနီတမံၤတဂ့ၤ.
ပာ်စီပာ်ဆှံသုသးဒီးဟးထီၣ်တက့ၢ်.
12 တဘျီညါအံၤသုတဟးထီၣ်ဘၣ် လၢတၢ်ချ့ဒံးချ့ဒူးအပူၤဘၣ်.
တမ့ၢ်သုကကျဲးစၢးဃ့ၢ်ပူၤဖျဲးကွံာ်န့ၣ်ဘၣ်.
ယွၤသုကစၢ်ယွၤကဆှၢသုဒီးဒီဒၣ်အိၣ်ပှိၤသုလၢတၢ်ကိးကပၤ ဒဲးလီၤ.
13 ယွၤစံးဝဲ,
“ယခ့ယပှၤကမၤန့ၢ်မၤနၢၤတၢ်လၢအတၢ်မၤအပူၤ, ဒီးအဝဲဒၣ်ကဘၣ်တၢ်မၤလၤကပီၤအီၤဒိၣ်ဒိၣ်ကလဲာ်ဒီးပာ်အီၤလၢ တၢ်စိတၢ်ကမီၤကိးမံၤဒဲးအဖီခိၣ်လီၤ.
14 ပှၤအါဂၤကဖုးသံပျီၢ်ဂီၤဖဲအထံၣ်ဘၣ်အီၤအဆၢကတီၢ်န့ၣ်လီၤ.
အဝဲဒၣ်အက့ၢ်အဂီၤဘၣ်ဒိဘၣ်ထံးလီၤသဘှံးတုၤဒၣ်လဲာ် နကွၢ်အီၤတလီၤဂာ်ဒီးပှၤကညီတဂၤလၢၤဘၣ်န့ၣ်လီၤ.
15 ဘၣ်ဆၣ်ဒီးအခဲအံၤ, ပှၤကလုာ်တဖၣ်ကကမၢကမၣ်ဝဲလၢအဃိ,
ဒီးစီၤပၤတဖၣ်အသးကလီၤကတုၤ, တုၤဒၣ်လဲာ်အဲးထီၣ်အထး ခိၣ်တန့ၢ်ဘၣ်လီၤ.
တၢ်တမံၤလၢအဝဲသ့ၣ်တနၢ်ပၢၢ်တ့ၢ်ဝဲနီတစုန့ၣ်, ကထံၣ်ဒီးသ့ၣ်ညါနၢ်ပၢၢ်ထီၣ်ဝဲလီၤ.”