48
1 ကီၢ်အံၣ်စရ့လးအပှၤဂီၢ်မုၢ်, သုဝဲလၢအဟဲလီၤစၢၤလၢ စီၤယူဒၤသ့ၣ်ဧၢ, ဒိကနၣ်တၢ်အံၤတက့ၢ်.
သုဆိၣ်တၢ်လၢယွၤအမံၤ
ဒီးစံးလၢသုကဘူၣ်ထီၣ်ဘါထီၣ် ကီၢ်အံၣ်စရ့လးအကစၢ်ယွၤလီၤ.
ဘၣ်ဆၣ်ဒီးသုတမၤအီၤဒ်သုကတိၤတၢ် အသိးန့ၣ်ဘၣ်.
2 အန့ၣ်ဒၣ်လဲာ်, သုပာ်ကဖၢလၢလီၤသုသးလၢသုကစံး
လၢသုမ့ၢ်ဝ့ၢ်စီဆှံအထံဖိကီၢ်ဖိတဖၣ်
ဒီးလၢသုသန့ၤသုသးလၢ ကီၢ်အံၣ်စရ့လးအကစၢ်ယွၤလၢ
အမံၤမ့ၢ်ဝဲသ့တၢ်လၢာ်အယွၤအဂီၢ်န့ၣ်လီၤ.
3 ယွၤစံးဘၣ်ကီၢ်အံၣ်စရ့လး,
“လၢပျၢၤလံၤလံၤယကတိၤဆိပာ်တ့ၢ် တၢ်လၢကမၤအသး,
ဝံၤဒီးသတူၢ်ကလာ်ယဒုးကဲထီၣ်အီၤလီၤ.
4 ယသ့ၣ်ညါတ့ၢ်လၢသုကမၤသုသးသုခိၣ်ကိၤကနံ ထဲသိးသိးဒီးထး,
ဒီးတဆုးလီၤပိာ်လီၤဘၣ်အသး ဒ်တိၢ်ဘီအသိးဘၣ်န့ၣ်လီၤ.
5 လၢတၢ်န့ၣ်အဃိ, ယကတိၤဆိပာ်တ့ၢ်တၢ်လၢအကမၤအသးဒီးသုတၢ်အိၣ် မူဆူညါ, လၢပျၢၤလံၤလံၤန့ၣ်လီၤ.
ယဘိးဘၣ်သ့ၣ်ညါတၢ်မၤအသးတဖၣ်တချုးလၢအမၤဒံးဘၣ်အသး,
ဒ်သိးကတြီဃာ်သုလၢသုသုတစံးဘၣ်လၢသု တၢ်ဂီၤသိအသးဒီးစိးပျၤအသးတဖၣ်ဒုးကဲထီၣ်လိၣ်ထီၣ်တၢ်တဖၣ် န့ၣ်တဂ့ၤအဂီၢ်လီၤ.
6 ကယဲၢ်တၢ်လၢယတဲဆိပာ်စၢၤတဖၣ်, ခဲအံၤမၤအသးလံ.
သုကဘၣ်အၢၣ်လီၤလၢယတၢ်ကတိၤဆိပာ်စၢၤတဖၣ်မ့ၢ်တၢ်အဘၣ်လီၤ.
ခဲအံၤ, ယကတဲဘၣ်သုတၢ်အသီတဖၣ်လၢအကဟဲ,
တၢ်မၤအသးတဖၣ်, လၢယတလီၣ်ဖျါတ့ၢ်အီၤလၢညါဘၣ်န့ၣ်လီၤ.
7 ယဒုးကဲထီၣ်တၢ်သ့ၣ်တဖၣ်အံၤဖဲတၢ်အကတီၢ်အံၤလီၤ.
တၢ်ဒ်သိးအံၤတမၤတ့ၢ်အသးလၢအပူၤကွံာ်န့ၣ်ဘၣ်.
ယမ့ၢ်မၤတ့ၢ်အီၤဒီး, သုကစံးလၢသုသ့ၣ်ညါတၢ်တဖၣ်အံၤခဲလၢာ်လီၤ.
8 ယသ့ၣ်ညါတ့ၢ်လၢတၢ်နာ်န့ၢ်သုတသ့ဘၣ်.
သုဘၣ်တၢ်သ့ၣ်ညါတ့ၢ်သုထီဘိဒ်ပှၤပူထီၣ် တၢ်အသိးလီၤ.
တၢ်န့ၣ်မ့ၢ်လၢသုတနၢ်ဟူတ့ၢ်တၢ်ဂ့ၢ်အံၤနီတဘျီနီတစုဘၣ်အဃိ ဒီး
မ့ၢ်လၢတၢ်ကတိၤတတုၤအိၣ်သုနၢ်တဖၣ်နီတဖျၢၣ်နီတဘျီဘၣ်အဃိ န့ၣ်လီၤ.
9 ဒ်သိးပှၤဂီၢ်မုၢ်ကစံးထီၣ်ပတြၢၤယမံၤ
ဒီးယပၢၤဃာ်ယတၢ်သးထီၣ်လၢတၢ်ပလီၢ်ပဒီသးအပူၤလီၤ.
ယထုးက့ၤအီၤဒီးယတမၤဟးဂီၤသုဘၣ်.
10 ယမၤကွၢ်တ့ၢ်သုလၢတၢ်နးတၢ်ဖှီၣ်အမ့ၣ်အူအပူၤ,
ဒ်စ့ဘၣ်တၢ်ပှံၢ်အီၤလၢမ့ၣ်အူအဖၣ်ကပူၤအသိးလီၤ.
ဘၣ်ဆၣ်ယထံၣ်တ့ၢ်လၢသုလုၢ်သုပှ့ၤတအိၣ်ဘၣ်.
11 တၢ်လၢယမၤအီၤန့ၣ်, ယမၤတ့ၢ်အီၤလၢယကစၢ်ဒၣ်ယဲအဃိလီၤ.
ယတပျဲယမံၤအလၤကပီၤဟးဂီၤမ့ၢ်ဂ့ၤပှၤအဂၤတဂၤဂၤနီၤဟံးန့ၢ် တၢ်လၤကပီၤအဝဲန့ၣ်မ့ၢ်ဂ့ၤဘၣ်.
အဝဲန့ၣ်ကြၢးမ့ၢ်ဒၣ်ယတၢ်, ထဲယၤတဂၤဧိၤအတၢ်န့ၣ်လီၤ.”
12 ယွၤစံးဝဲ,
“ဒိကနၣ်ယၤတက့ၢ်. ကီၢ်အံၣ်စရ့လးဧၢ, ပှၤဂီၢ်မုၢ်လၢယကိးထီၣ်တ့ၢ်အီၤသ့ၣ်ဧၢ,
ယမ့ၢ်ကစၢ်ယွၤ,တၢ်အခီၣ်ထံး, တၢ်အကတၢၢ်ဒီးကစၢ်ယွၤထဲတဂၤဧိၤလီၤ.
13 ယစုတ့ဟီၣ်ခိၣ်အခီၣ်ထံးတဖၣ်ဒီးသလၣ်ထီၣ်မူခိၣ်မူကပိာ်လိၤ လီၤ.
ဖဲယကိးဖှိၣ်မူခိၣ်ဒီးဟီၣ်ခိၣ်န့ၣ်,
အဝဲသ့ၣ်ဟဲတဘျီဃီဒီးဒုးနဲၣ်ဖျါထီၣ်အသးလီၤ.
14 သုဝဲခဲလၢာ်, အိၣ်ဖှိၣ်ရိဖှိၣ်ဒီးဒိကနၣ်တၢ်တက့ၢ်.
ပှၤလၢယဃုထၢတ့ၢ်အီၤတဂၤကဒုးဝ့ၢ်ဘၤဘူၤလိၣ်အဂ့ၢ်န့ၣ်, ကစၢ်အဂၤတဖၣ်ကတိၤဆိပာ်အီၤတသ့နီတဂၤဘၣ်.
အဝဲကမၤတၢ်လၢယသးအိၣ်လၢအဝဲကမၤဝဲန့ၣ်လီၤ.
15 ယမ့ၢ်ပှၤတဂၤလၢအကတိၤတ့ၢ်တၢ်ဒီးကိးတ့ၢ်အီၤလီၤ.
ယဆှၢထီၣ်တ့ၢ်အီၤဒီးဟ့ၣ်တ့ၢ်အီၤတၢ်မၤနၢၤလီၤ.
16 ခဲအံၤ, ဟဲဘူးဒီးယၤဒီးဒိကနၣ်တၢ်လၢယစံးတက့ၢ်.
လၢထံးလၢသီလံၤလံၤ, ယကတိၤတ့ၢ်တၢ်ဖျိဖျိဖျါဖျါ
ဒီးမၤတီယကလုၢ်ထီဘိလီၤ.” (ခဲအံၤ, ယွၤပၢဘၣ်တၢ်ခဲလၢာ်ကစၢ်ဟ့ၣ်တ့ၢ်ယၤအတၢ်စိ တၢ်ကမီၤဒီးမၢလီၤယၤလီၤ.)
17 ကီၢ်အံၣ်စရ့လးအကစၢ်ယွၤစီဆှံ,
ယွၤလၢအအုၣ်က့ၤခီၣ်က့ၤသုစံးဝဲ,
“ယမ့ၢ်ယွၤ, သုကစၢ်ယွၤ,
ပှၤတဂၤလၢအသးအိၣ်သိၣ်လိသုလၢ အတၢ်ဂ့ၤဒၣ်ဝဲအဂီၢ်
ဒီးနဲၣ်သုဆှၢသုလၢကျဲတဘိလၢသုကြၢးလဲၤန့ၣ်လီၤ.
18 သုမ့ၢ်ဒိကနၣ်တ့ၢ်ယတၢ်မၤလိာ်တဖၣ်ဒီး,
တၢ်ဆိၣ်ဂ့ၤတဖၣ်ကယွၤလီၤဝဲလၢသုဂီၢ်,
ဒ်ထံကျိဖိတဘိလၢအတလီၤသံးနီတစုအသိးန့ၣ်လီၤ.
တၢ်မၤနၢၤကဟဲတုၤအိၣ်သု
ဒ်လပီတဖၣ်တလ့ၣ်ထီၣ်အသးလၢပီၣ်လဲၣ်ကၢၢ်နံၤအသိးန့ၣ်လီၤ.
19 သုစၢၤသုသွဲၣ်တဖၣ်ကအါဝဲဂီၢ်ဝဲဒ် မဲးအဖျၢၣ်တဖၣ်အသိး,
ဒီးယကမၤလီၤတံၢ်တၢ်ဒ်သိးအဝဲသ့ၣ်အသုတဘၣ်တၢ်မၤဟးဂီၤအီၤ နီတစုတဂ့ၤအဂီၢ်န့ၣ်လီၤ.
20 ဟးထီၣ်လၢဝ့ၢ်ဘၤဘူၤလိၣ်တက့ၢ်. ဟးထီၣ်လၢတၢ်သဘျ့ အပူၤတက့ၢ်.
ကိးပသူထီၣ်တၢ်ကစီၣ်လၢတၢ်သးခုအပူၤဒီးဘိးဘၣ်သ့ၣ်ညါအီၤ လၢတၢ်လီၢ်ကိးပူၤဒဲးတက့ၢ်.
“ယွၤအုၣ်က့ၤခီၣ်က့ၤတ့ၢ်အခ့အပှၤအံၣ်စရ့လးလံ.”
21 ဖဲယွၤဆှၢခီဖျိအပှၤဂီၢ်မုၢ်လၢမဲးမုၢ်ခိၣ်တတီၤလၢအကိၢ် ဒီးအဃ့ထီအခါန့ၣ်,
အဝဲသ့ၣ်တတူၢ်ဘၣ်တၢ်သူအသးလၢထံဘၣ်.
ဒုးယွၤလီၤထံလၢလၢၢ်တဖျၢၣ်အပူၤ လၢအဝဲသ့ၣ်အဂီၢ်လီၤ.
အဝဲဒိသ့ၣ်ဖးလၢၢ်ဒီးထံပုာ်ထီၣ်ယွၤလီၤဝဲလီၤ.
22 “လၢပှၤတတီတလိၤတဖၣ်အဂီၢ်န့ၣ်တၢ်ဃူတၢ်ဖိးတအိၣ်ဘၣ်.” ယွၤစံးဝဲဒၣ်လီၤ.