40
1 “မၤမုာ်ယပှၤဂီၢ်မုၢ်တက့ၢ်.” ပကစၢ်ယွၤစံးဝဲဒၣ်, “မၤမုာ်အဝဲသ့ၣ်တက့ၢ်.”
2 “ဟ့ၣ်ဆူၣ်ထီၣ်ပှၤလၢဝ့ၢ်ယရူၤၡလ့ၣ်တဖၣ်အသးတက့ၢ်.
စံးဘၣ်တဲဘၣ်အဝဲသ့ၣ်လၢအတူၢ်ဘၣ်တၢ်ယံာ်တ့ၢ်မးလံ ဒီးအဝဲသ့ၣ်အတၢ်ဒဲးဘးတဖၣ်ခဲအံၤဘၣ်တၢ်ပျၢ်ကွံာ်အီၤလံ.
လၢအဝဲသ့ၣ်အတၢ်ဒဲးဘးတဖၣ်အဃိ, ယစံၣ်ညီၣ်တ့ၢ်အဝဲ သ့ၣ်လၢလၢပှဲၤပှဲၤလီၤ.”
3 တၢ်အကလုၢ်ကိးထီၣ်ဝဲ,
“ကတဲာ်ကတီၤကျဲလၢယွၤအဂီၢ်လၢပှၢ်မုၢ်ကနၢပူၤ န့ၣ်တက့ၢ်.
မၤပျီကျဲလၢမဲးမုၢ်ခိၣ်လၢပကစၢ်ယွၤအဂီၢ်တက့ၢ်.
4 မၤပှဲၤတၢ်တြီၤခဲလၢာ်
ဒီးမၤပၢၤကစၢၢ်ခဲလၢာ်တက့ၢ်.
တၢ်လူၢ်တဖၣ်ကကဲထီၣ်ပျီတဘ့ၣ်
ဒီးထံကီၢ်လၢအထီၣ်ကူလီၤယၢၣ်အံၤကဘၣ်တၢ်မၤဘျ့ မၤပၢၤအီၤန့ၣ်လီၤ.
5 အန့ၣ်ဒီး, ယွၤအလၤကပီၤကဘၣ်တၢ်လီၣ်ဖျါထီၣ်အီၤ,
ဒီးကယဲၢ်ပှၤဟီၣ်ခိၣ်ဖိခဲလၢာ်ကထံၣ်ဘၣ်အီၤလီၤ.
ယွၤအနီၢ်ကစၢ်ဒၣ်ဝဲအၢၣ်လီၤတ့ၢ်တၢ်အံၤလီၤ.”
6 တၢ်အကလုၢ်ကိးထီၣ်ဝဲ, “တဲဖျါတၢ်ကစီၣ်တမံၤတက့ၢ်.”
ယသံကွၢ်, “ယကဘၣ်တဲဖျါတၢ်ကစီၣ်မနုၤလဲၣ်.”
“တဲဖျါလၢပှၤဟီၣ်ခိၣ်ဖိခဲလၢာ်လီၤဂာ်ဒီးနီၣ်ဧိၤမံၤဧိၤလီၤ.
တခီၣ်ယံာ်ထဲသိးဒီးဖီအမံၤတဖၣ်ဒၣ်လဲာ်ဘၣ်လီၤ.
7 နီၣ်ဧိၤမံၤဧိၤဃ့ထီကွံာ်ဝဲဒီးဖီတဖၣ်လီၤညွံးလီၤဘီဝဲ
ဲဖဲယွၤဆှၢလီၤကလံၤအူတၢ်လၢအဝဲသ့ၣ်အဖီခိၣ်န့ၣ်လီၤ.
ပှၤဂီၢ်မုၢ်တအိၣ်ကၢအိၣ်ခိးအါန့ၢ်နီၣ်ဧိၤမံၤဧိၤဘၣ်.
8 မ့ၢ်လီၤ. နီၣ်ဧိၤမံၤဧိၤဃ့ထီကွံာ်ဝဲဒီးဖီတဖၣ်လီၤညွံး လီၤဘဲဝဲလီၤ.
မ့မ့ၢ်ပကစၢ်ယွၤအကလုၢ်အိၣ်ဂၢၢ်ဆိးကျၢၤဝဲလီၤထူလီၤယိာ် လီၤ.”
9 ဝ့ၢ်ယရူၤၡလ့ၣ်ဧၢ, လဲၤထီၣ်ဆူကစၢၢ်ထီၣ်ထီတဖျၢၣ်အလိၤ
ဒီးတဲဖျါတၢ်သးခုကစီၣ်တက့ၢ်.
ကိးထီၣ်လၢနကလုၢ်ဖးဒိၣ်တက့ၢ်. စံယိၣ်ဧၢ, ဘိးဘၣ်သ့ၣ်ညါတၢ်သးခုကစီၣ်တက့ၢ်.
ကတိၤထီၣ်တၢ်ဒီးပျံၤတၢ်တဂ့ၤ.
တဲဘၣ်ကီၢ်ယူဒၤအဝ့ၢ်တဖၣ်
10 ယွၤပၢဘၣ်တၢ်ခဲလၢာ်ကစၢ်ဟဲဝဲလၢကပၢတၢ်ဒီး အစိကမီၤ,
ဒီးကဟဲကိးဃုာ်ဒီးအီၤပှၤဂီၢ်မုၢ်လၢအမၤပူၤဖျဲးတ့ၢ်ဝဲတဖၣ်လီၤ.
11 အဝဲကဟုကယာ်အသိတဖုဒ်ပှၤကွၢ်သိတဂၤ အသိးလီၤ.
ကပာ်ဖှိၣ်သိဖိတဖၣ်တပူၤဃီ
ဒီးစိာ်ထီၣ်အီၤလၢအစုဒုၣ်စုတီၤအလိၤ
ဒီးကဆှၢအသိအမိၢ်တဖၣ်ကယီကယီလီၤ.
12 မ့ၢ်ပှၤထိၣ်ပီၣ်လဲၣ်လၢအစုညါသးတဖၣ်အပူၤ သ့တဂၤဂၤဧါ,
မ့တမ့ၢ်ဘၣ်ဒီးထိၣ်မူခိၣ်လၢအစုတဖၣ်သ့တဂၤဂၤဧါ.
မ့ၢ်ပှၤစိာ်ဟီၣ်ခိၣ်ဒီဘ့ၣ်အကမူၣ်လၢလီခီတဖျၢၣ်အပူၤ မ့ၢ်ဂ့ၤ, စီၤဝဲကစၢၢ်တဖၣ်ဒီးတၢ်လူၢ်တဖၣ်လၢစီၤပီၢ်ပူၤမ့ၢ်ဂ့ၤ သ့တဂၤဂၤဧါ.
13 တၢ်လၢယွၤကဘၣ်မၤဒ်အံၤဒ်နုၤန့ၣ်မ့ၢ်မတၤတဂၤ တဲအီၤသ့န့ၣ်လဲၣ်.
မ့ၢ်မတၤသိၣ်လိအီၤမ့ၢ်ဂ့ၤ, ဟ့ၣ်ကူၣ်ဟ့ၣ်ဖးအီၤမ့ၢ်ဂ့ၤသ့ဝဲ တဂၤလဲၣ်.
14 ဒ်သိးအဝဲကသ့ၣ်ညါ, ကနၢၢ်ပၢၢ်,
ဒီးကမၤလိန့ၢ်တၢ်လၢကဘၣ်မၤတၢ်ဒ်လဲၣ်ဒ်လဲၣ်အဂီၢ်န့ၣ်မ့ၢ်ကစၢ် ယွၤကူၣ်လိာ်တၢ်ဒီးမတၤတဂၤလဲၣ်.
15 လၢယွၤအဂီၢ်န့ၣ်ပှၤကလုာ်တဖၣ်တမ့ၢ်တၢ်နီတမံၤဘၣ်.
တအါန့ၣ်ထံဖိတလီၤစီၤဘၣ်.
ကီးလၢအယံၤတဖၣ်န့ၣ်အတ ယၢၢ်ဖှံဝဲဒၣ်ထဲသိးသိးဒီးဟီၣ်ခိၣ်ကမူၣ်န့ၣ်လီၤ.
16 ကယဲၢ်ဆၣ်ဖိကီၢ်ဖိခဲလၢာ်လၢလဘၤနိၣ်အသ့ၣ်ဒိၣ်ပှၢ်တီၢ်တဖၣ်အ ပူၤ
တလၢတလီၣ်ဝဲလၢတၢ်ကလုၢ်ထီၣ်တၢ်ဆူပကစၢ်ယွၤအ အိၣ်အဂီၢ်ဘၣ်
ဒီးအသ့ၣ်တဖၣ်စှၤကဲၣ်ဆိးလၢတၢ်ဆိၣ်ကဲၤထီၣ်မ့ၣ်အူအဂီၢ်လီၤ.
17 လၢအဝဲအဂီၢ်, ပှၤကလုာ်တဖၣ်တမ့ၢ်တၢ်နီတမံၤဘၣ်.
18 တၢ်ထိၣ်သတြီၤကစၢ်ယွၤဒီးမတၤကသ့လဲၣ်.
အဝဲလီၤဂာ်ဒီးမတၤလဲၣ်န့ၣ်, နတဲလၢအဂ့ၢ်ကသ့ဒ်လဲၣ်.
19 အဝဲတလီၤဂာ်ဒီးတၢ်ဂီၤတၢ်ဖီၣ်လၢပှၤမၤတၢ်ဖိတ့ဝဲ,
ဒီးပှၤပိာ်စ့, တိၢ်, ထးတဖၣ်ကးဘၢအီၤလၢထူ,
ဒီးဆီလီၤအီၤလၢတၢ်ခီၣ်ထံးစ့တခါအပူၤန့ၣ်ဘၣ်.
20 ပှၤလၢအပှ့ၤစ့, ထူ, တန့ၢ်န့ၣ်, ဃုထၢဒၣ်သ့ၣ်လၢအကျၣ်တသ့န့ၣ် လီၤ.
အဝဲဃုထံၣ်န့ၢ်ပှၤစုသ့လၢအကူၣ်သ့တဂၤလၢအကမၤန့ၢ်အီၤတၢ် ဂီၤလၢအတလီၤဃံၤဘၣ်န့ၣ်လီၤ.
21 မ့ၢ်နတသ့ၣ်ညါဘၣ်ဧါ.
မ့ၢ်တၢ်တစံးဘၣ်တဲဘၣ်တ့ၢ်နၤလၢအခီၣ်ထံးလံၤလံၤန့ၣ်ဘၣ်ဧါ.
မ့ၢ်နတနၢ်ဟူတ့ၢ်ဟီၣ်ခိၣ်အိၣ်ထီၣ်ဝဲဒ်လဲၣ်န့ၣ်ဘၣ်ဧါ.
22 တၢ်န့ၣ်ဘၣ်တၢ်ဒုးကဲထီၣ်အီၤလၢပှၤတဂၤလၢအဆ့ၣ်နီၤလၢအလီၢ် ပစိာ်အဖီခိၣ်,
လၢဟီၣ်ခိၣ်အဖီခိၣ်ဒီးပျံကွံာ်မူခိၣ်န့ၣ်လီၤ.
ပှၤလၢလာ်တဖၣ်ဖျါဆံးဒ်တၢၢ်ဧိၤတြၤဧိၤအသိးန့ၣ်လီၤ.
အဝဲသလၣ်လီၤမူခိၣ်ဒ်ယၣ်ဘျးသဒၢအသိးလီၤဂာ်ဒ်ဒဲလၢတၢ်ကအိၣ် လၢအပူၤအဂီၢ်အသိးန့ၣ်လီၤ.
23 အဝဲပာ်လီၤကွံာ်ပှၤပၢတၢ်လၢအဒိၣ်စိဒိၣ်ကမီၤတဖၣ်
ဒီးဆီၣ်လီၤအီၤဆူတၢ်ကလီကလီအပူၤန့ၣ်လီၤ.
24 အဝဲသ့ၣ်လီၤဂာ်ဒီးတၢ်မုၢ်တၢ်ဘိအစၢ်တဖၣ်လၢအဘၣ်တၢ်သူၣ်လီၤသီ အီၤဒီးအဂံၢ်တစဲၤလီၤအသးဒံးဘၣ်အသိးန့ၣ်လီၤ.
ဖဲယွၤမၢလီၤကလံၤအူတၢ်ဒီး,
အဝဲသ့ၣ်ဃ့ထီကွံာ်ဝဲဒီးဒံကွံာ်ဝဲဒ်ဘုလီၢ် အသိးန့ၣ်လီၤ.
25 တၢ်ထိၣ်သတြီၤကစၢ်ယွၤစီဆှံတဂၤအံၤဒီးမတၤကသ့န့ၣ်လဲၣ်.
မ့ၢ်ပှၤလၢအလီၤဂာ်ဒီးအီၤအိၣ်ဒံးတဂၤဂၤဧါ.
26 ကွၢ်ထီၣ်တၢ်ဆူမူခိၣ်တက့ၢ်.
ဆၣ်လၢနထံၣ်တဖၣ်န့ၣ်မတၤတ့လီၤပာ်လီၤအီၤလဲၣ်.
မ့ၢ်ဒၣ်ပှၤတဂၤလၢအဆှၢထီၣ်အဝဲသ့ၣ်ဒ်သုးမုၢ်တဖုအသိးန့ၣ် လီၤ.
ဆၣ်အိၣ်ပှဲၤဖျၢၣ်န့ၣ်အဝဲသ့ၣ်ညါဝဲ
ဒီးကိးအီၤလၢအမံၤစုာ်စုာ်လီၤ.
အစိအကမီၤဒိၣ်ဝဲတုၤဒၣ်လဲာ်
လၢအကျါထဲတဖျၢၣ်ဧိၤန့ၣ်လီၤမၢ်တစုစုဧါ.
27 ကီၢ်အံၣ်စရ့လးဧၢ, နကဒူးကဒ့ၣ်တၢ်လၢယွၤတသ့ၣ်ညါနတၢ်ကီတၢ်ခဲ တဖၣ်မ့ၢ်ဂ့ၤ, တကဟုကယာ်နၤဖဲနတူၢ်ဘၣ်တၢ်စံၣ်ညီၣ်တတီမ့ၢ်ဂ့ၤန့ၣ်ဘၣ်မနုၤ အဃိလဲၣ်.
28 မ့ၢ်နတသ့ၣ်ညါဘၣ်ဧါ. မ့ၢ်နတနၢ်ဟူတ့ၢ်ဘၣ်ဧါ.
ယွၤမ့ၢ်ကစၢ်ယွၤအထူအယိာ်ဒီးတ့လီၤပာ်လီၤဟီၣ်ခိၣ်ခဲလၢာ် လီၤ.
အဝဲတလီၤဘှံးလီၤတီၤဘၣ်ဒီးအသးတလီၤစၢ်လီၤဘှါနီတစုဘၣ်.
အတၢ်ဆိကမိၣ်တဖၣ်န့ၣ်ပှၤတနၢ်ပၢၢ်အီၤနီတဂၤဘၣ်.
29 ပှၤလၢအဂံၢ်စၢ်ဘါစၢ်တဖၣ်ဒီးပှၤလၢတၢ်ဘှံးအသးတဖၣ်န့ၣ်အဝဲ ဟ့ၣ်ဆူၣ်ထီၣ်အဂံၢ်အဘါလီၤ.
30 ပှၤလၢအသးစၢ်တဖၣ်ဒၣ်လဲာ်အဂံၢ်အဘါလီၤစၢ်ဝဲလီၤ.
ပှၤပိာ်ခွါသးစၢ်တဖၣ်အဂံၢ်အဘါလၢာ်ကွံာ်ဝဲသ့လီၤ.
31 မ့မ့ၢ်ပှၤလၢအနာ်ယွၤ, လၢတၢ်မၤစၢၤအဂီၢ်တဖၣ်န့ၣ်ကထံၣ်ဝဲလၢ အတၢ်ဂံၢ်တၢ်ဘါဘၣ်တၢ်မၤသီထီၣ်က့ၤအီၤန့ၣ်လီၤ.
ကယူာ်ထီၣ်အဒံးဆ့တဖၣ်ဒ်လံာ်ဧိၤတြၤဧိၤအသိးလီၤ.
ကဃ့ၢ်ဝဲဒီးအသးတလီၤစၢ်လီၤဘှါဘၣ်.
အဝဲသ့ၣ်ကလဲၤတၢ်ဒီးအဂံၢ်အဘါတလီၤစၢ်ဝဲဘၣ်.