10
1 သုဘၣ်တၢ်စံၣ်ညီၣ်ဃါမနၤလီၤ. သုဒုးအိၣ်ထီၣ်တၢ်သိၣ် တၢ်သီတတီတလိၤတဖၣ်လၢအမၤနးမၤဖှီၣ်ယပှၤဂီၢ်မုၢ်လီၤ.
2 အန့ၣ်မ့ၢ်ကျဲလၢသုတြီပှၤဖှီၣ်ဖိယာ်ဖိတဖၣ်လၢကဒိးန့ၢ်ဘၣ် အတၢ်ခွဲးတၢ်ယာ်တဖၣ်ဒီးလၢကဒိးန့ၢ်ဘၣ်တၢ်စံၣ်ညီၣ်တီအဂီၢ်လီၤ. လၢကျဲဒ်န့ၣ်န့ၣ်, သုဟံးန့ၢ်တၢ်စုလီၢ်ခီၣ်ခိၣ်လၢအဘၣ်ဃးဒီးမုၣ် ကမဲဒီးဖိၣ်ဃဲတဖၣ်လီၤ.
3 ယွၤမ့ၢ်စံၣ်ညီၣ်သုဒီးသုကမၤဒ်လဲၣ်. ယွၤမ့ၢ်ဒုးဘၣ်သုလၢတၢ် နးတၢ်ဖှီၣ်ဖးဒိၣ်လၢအဟဲလၢထံကီၢ်လၢအယံၤတဘ့ၣ်ဒီး, သုကမၤဒ်လဲၣ်. လၢတၢ်မၤစၢၤအဂီၢ်, သုကဃ့ၢ်ဆူ လဲၣ်ခီလဲၣ်. သုတၢ်ထူးတၢ်တီၤတဖၣ်, သုကပာ်ခူသူၣ်အီၤဖဲလဲၣ်.
4 သုကဘၣ်တၢ်မၤသံသုလၢတၢ်ဒုးတၢ်ယၤအပူၤ, မ့တမ့ၢ်, တၢ်ကတွံၢ်ထီၣ်ကွံာ်သုဒ်ပှၤဃိာ်ဖိတဖၣ်အသိးလီၤ. အန့ၣ်ဒၣ်လဲာ်, ယွၤအတၢ်သးထီၣ်တဆိကတီၢ်ဝဲဘၣ်. အစုယူာ်ထီၣ်ဒံးအသး လၢကစံၣ်ညီၣ်တၢ်အဂီၢ်လီၤ.
5 ယွၤစံးဝဲဒၣ်, “ကီၢ်အၤၡူၢ်ဧၢ, ယသူကီၢ်အၤၡူၢ်ဒ်နီၣ်တီၢ် တဘိးအသိးလၢယကစံၣ်ညီၣ်ပှၤလၢယသးကဲၤထီၣ် ဘၣ်အီၤတဖၣ်အဂီၢ်လီၤ.”
6 ယမၢလီၤကီၢ်အၤၡူၢ်လၢကဒုးပှၤကလုာ်လၢအတယူးတယီၣ်ယွၤ, ပှၤလၢအမၤသးဒိၣ်ထီၣ်တ့ၢ်ယၤတဖၣ်လီၤ. ယမၢလီၤအဝဲသ့ၣ်လၢကဂုာ်န့ၢ်ဒီးဟုၣ်တၢ်ဒီးယီၢ်တံၢ်ပှၤတဖၣ် န့ၣ်ဒ်ဖၣ်ကမူၣ်လၢကျဲတဖၣ်အပူၤအသိးန့ၣ်လီၤ.
7 ဘၣ်ဆၣ်ဒီး, ကီၢ်အၤၡူၢ်အစီၤပၤဖးဒိၣ်အိၣ်ဒီးအတၢ်ကူၣ် အၢဒၣ်ဝဲလၢအသးပူၤလီၤ. အဝဲပာ်လီၤအသးသပှၢ်တၢၢ်လၢ ကမၤဟးဂီၤပှၤအါကလုာ်လီၤ.
8 အဝဲကတိၤဒိၣ်ကတိၤသွါတၢ်ဒီးစံးဝဲ, “ယသုးခိၣ်ကိးဂၤဒဲး စုာ်စုာ်န့ၣ်, မ့ၢ်စီၤပၤတဂၤလီၤ.
9 ယမၤန့ၢ်မၤနၢၤဝ့ၢ်ကးလနိၤဒီးဝ့ၢ်ကၢ်ကမံၣ်တဖၣ်, ဝ့ၢ်ဃမါသးဒီးဝ့ၢ်အၢ်ပးတဖၣ်လီၤ. ယမၤန့ၢ်မၤနၢၤဝ့ၢ်ၡၤမရံ ဒီးဝ့ၢ်ဒၤမ့ၤစ့းလီၤ.
10 ယယူာ်ထီၣ်ယစုလၢယကစံၣ်ညီၣ်ဘီမုၢ်တဖၣ်လၢ အဘူၣ်ထီၣ်ဘါထီၣ်တၢ်ဂီၤတၢ်ဖီၣ်တဖၣ်, တၢ်ဂီၤတၢ်ဖီၣ်တဖၣ်လၢအအါန့ၢ်ဒံးလၢဝ့ၢ်ယရူၤၡလ့ၣ်ဒီးဝ့ၢ်ၡၤမရံအ တၢ်ဂီၤတၢ်ဖီၣ်တဖၣ်န့ၣ်လီၤ.
11 ယမၤဟးဂီၤတ့ၢ်ဝ့ၢ်ၡၤမရံဒီးအတၢ်ဂီၤတၢ်ဖီၣ်ခဲလၢာ်လီၤ. ဒ်န့ၣ်အသိး, ယကမၤဟးဂီၤစ့ၢ်ကီးဝ့ၢ်ယရူၤၡလ့ၣ်ဒီးတၢ်ဂီၤတၢ် ဖီၣ်တဖၣ်လၢအဘၣ်တၢ်ဘူၣ်ထီၣ်ဘါထီၣ်အီၤဖဲန့ၣ်လီၤ.”
12 ဒီးယွၤစံးဝဲဒၣ်, “ဖဲယမၤတၢ်လၢယကမၤအီၤလၢ ကစၢၢ်စံယိၣ်ဒီးလၢဝ့ၢ်ယရူၤၡလ့ၣ်အပူၤဝံၤလံန့ၣ်, ယကစံၣ်ညီၣ်ကီၢ်အၤၡူၢ်အစီၤပၤဖးဒိၣ်လၢအတၢ်ကတိၤဒိၣ်ကတိၤသွါ တၢ်ဒီးလၢအတၢ်ပာ်ထီၣ်ထီသးအဃိလီၤ.”
13 ကီၢ်အၤၡူၢ်အစီၤပၤဖးဒိၣ်ကတိၤဒိၣ်ကတိၤသွါတၢ်ဒီးစံးဝဲ, “ယမၤတ့ၢ်တၢ်ခဲလၢာ်န့ၣ်လၢယကစၢ်ဒၣ်ယဲလီၤ. ယဂံၢ်ဆူၣ်ဘါဆူၣ်, ယကူၣ်တၢ်သ့ဒီးယသ့ယဘၣ်လီၤ. ယတြူာ်ကွံာ်ထံဆၢကီၢ်ဆၢတဖၣ်လၢပှၤကလုာ်တကလုာ်ဒီး တကလုာ်အဘၢၣ်စၢၤ, ဒီးဟံးန့ၢ်တၢ်လုၢ်ဒိၣ်ပှ့ၤဒိၣ်လၢအပာ် ဖှိၣ်ပာ်တံၤဝဲတဖၣ်လီၤ. ဒ်ဂီၤဖံးဖါတဒုအသိး, ယယီၢ်တံၢ်ပှၤ တဖၣ်လၢအအိၣ်ဖဲန့ၣ်န့ၣ်လီၤ.
14 ဟီၣ်ခိၣ်အပှၤကလုာ်တဖၣ်လီၤဂာ်ဒ်ထိၣ်တဘ့ၣ်အသွံအသိး, ဒီးယထၢဖှိၣ်အတၢ်ထူးတၢ်တီၤညီကဒၣ်ဖိဒ်တၢ်ထၢဖှိၣ်ထိၣ် အဒံၣ်တဖၣ်အသိးလီၤ. ထိၣ်အဒံးတခီတတပျုာ်အသး လၢကမၤပျံၤမၤဖုးကွံာ်ယၤအဂီၢ်ဘၣ်. ထိၣ်အနိးတအိးထီၣ် အသးနီတဘီလၢကကဲးကလူကဲးကလီထီဒါယၤဘၣ်.”
15 ဘၣ်ဆၣ်ဒီးယွၤစံးဝဲဒၣ်, “ကွါတဘ့ၣ်စံးလီၤအသးလၢအ ဒိၣ်န့ၣ်ဒံးပှၤလၢအသူအီၤတဂၤန့ၣ်ကသ့ဧါ. ထးဘူးတဲာ်မ့ၢ် အကါဒိၣ်န့ၣ်ဒံးပှၤလၢအဘူးတဲာ်တၢ်လၢအီၤတဂၤန့ၣ်ဧါ. နီၣ်တီၢ်တယၤထီၣ်ပှၤကညီတဂၤန့ၣ်ဘၣ်. မ့မ့ၢ်, ပှၤကညီယၤထီၣ်နီၣ်တီၢ်တခီန့ၣ်လီၤ.”
16 ယွၤ, သ့တၢ်လၢာ်ကစၢ်ကမၢလီၤတၢ်ဆူးတၢ်ဆါလၢကစံၣ်ညီၣ် ပှၤတဖၣ်လၢအခဲအံၤအီၣ်ကုးအီပှဲၤန့ၣ်လီၤ. လၢအဝဲသ့ၣ်အနီၢ်ခိတဖၣ်အပူၤန့ၣ်, မ့ၣ်အူကအိၣ်ဝဲလၢအအီၣ် ဝံၤအီၣ်က့ၤတၢ်တနဲးနဲးလီၤ.
17 ကစၢ်ယွၤ, အံၣ်စရ့လးအတၢ်ကပီၤ, ကကဲထီၣ်မ့ၣ်အူတမံၤလီၤ. အံၣ်စရ့လးအကစၢ်ယွၤစီဆှံကကဲထီၣ်မ့ၣ်အူလၣ်တမံၤ, ဒီးလၢတနံၤဃီအတီၢ်ပူၤန့ၣ်ကအီၣ်ကွံာ်တၢ်ခဲလၢာ်, တုၤဒၣ်လဲာ်လၢတၤဆှုၣ်တၤမဲတဖၣ်လီၤ.
18 သ့ၣ်ဒိၣ်ပှၢ်ဂ့ၤဒီးစံာ်လီၢ်လၢဟီၣ်ခိၣ်ညၣ်ထ့ၣ်ဂ့ၤတဖၣ်ကဘၣ်တၢ် မၤဟးဂီၤကွံာ်အီၤလၢာ်လၢာ်ဆ့ဆ့, ဒ်တၢ်ဆါလၢအမၤသံ တၢ်သ့တမံၤမၤဟးဂီၤကွံာ်ပှၤကညီတဂၤသ့ဝဲအသိးန့ၣ်လီၤ.
19 သ့ၣ်ကအိၣ်တီၢ်ဒၣ်ထဲစှၤထူၣ်ဒီးဖိသၣ်တဂၤဒၣ်လဲာ်ဂံၢ်အီၤ ကသ့န့ၣ်လီၤ.
20 တၢ်ဆၢကတီၢ်လၢပှၤအံၣ်စရ့လးဖိလၢအအိၣ်မူတ့ၢ်တဖၣ် တသန့ၤလၢၤဘၣ်အသးလၢပှၤကလုာ်လၢဘူးတ့ၢ်မးအကမၤ ဟးဂီၤကွံာ်အဝဲသ့ၣ်န့ၣ်, ဟဲလံဝဲလံ. အဝဲသ့ၣ်ကနာ်ယွၤလၢာ်လၢာ်ဆ့ဆ့, အံၣ်စရ့လးအကစၢ်ယွၤစီဆှံန့ၣ်လီၤ.
21 ပှၤအံၣ်စရ့လးဖိစှၤဂၤကဟဲက့ၤကဒါက့ၤဆူအဝဲသ့ၣ်အကစၢ် ယွၤလၢအစိဒိၣ်ကမီၤဒိၣ်အအိၣ်န့ၣ်လီၤ.
22 ခဲအံၤ, ပှၤအံၣ်စရ့လးဖိမ့ၢ်အါဝဲဒ်မဲးဧိၤဟီၣ်ဧိၤလၢပီၣ်လဲၣ် အနံၤသနာ်က့, ကဟဲက့ၤကဒါက့ၤဒၣ်ထဲစှၤဂၤလီၤ. တၢ်မၤဟးဂီၤန့ၣ်အိၣ်ပာ်ပာ်စၢၤ လၢပှၤဂီၢ်မုၢ်အဂီၢ်ဒီးမ့ၢ်တၢ်လၢ အကြၢးအဘၣ်လၢအဝဲသ့ၣ်အ ဂီၢ်လၢလၢပှဲၤပှဲၤလီၤ.
23 မ့ၢ်ဝဲလီၤ. လၢထံကီၢ်ဒီဘ့ၣ်အပူၤန့ၣ်ယွၤ, ပၢဘၣ်တၢ်ခဲလၢာ်, သ့တၢ်လၢာ်ကစၢ်က ဒုးလီၤဘၣ်တၢ်မၤဟးဂီၤတၢ်, ဒ်အစံးတ့ၢ် ဝဲလၢအကမၤဝဲအသိးန့ၣ်လီၤ.
24 ယွၤ, ပၢဘၣ်တၢ်ခဲလၢာ်, သ့တၢ်လၢာ်ကစၢ်စံးဘၣ်အပှၤဂီၢ်မုၢ် လၢအအိၣ်လၢစံယိၣ်, “ပျံၤဘၣ်ပှၤအၤၡူၢ်ဖိတဖၣ်တဂ့ၤ. အဝဲသ့ၣ်မ့ၢ်မၤအၢမၤနးသုဒ်ပှၤအဲၤကူပတူးဖိမၤညီနုၢ်တ့ၢ်ဝဲ အသိးဒၣ်လဲာ်န့ၣ်ပျံၤတဂ့ၤ.
25 လၢတစိၢ်ဖိအတီၢ်ပူၤန့ၣ်, ယကမၤဝံၤယတၢ်စံၣ်ညီၣ်သု, ဝံၤဒီးယကမၤဟးဂီၤအဝဲသ့ၣ်လီၤ.
26 ယၤ, ယွၤသ့တၢ်လၢာ်ကစၢ်အံၤ, ယကတီၢ်အဝဲသ့ၣ်လၢ ယနီၣ်ဖျ့ဒ်ယတီၢ်ပှၤမံးဒယၣ်ဖိတဖၣ်ဖဲလၢၢ်ဧိရ့ာ်အသိးန့ၣ်လီၤ. ယကစံၣ်ညီၣ်ကီၢ်အၤၡူၢ်ဒ်ယစံၣ်ညီၣ်ကီၢ်အဲၤကူပတူးအသိးလီၤ.
27 ဖဲတၢ်ဆၢကတီၢ်အဝဲန့ၣ်ဟဲတုၤဒီး, ယကမၤထူၣ်ဖျဲးထီၣ်နၤလၢ ကီၢ်အၤၡူၢ်အစိအကမီၤအဖီလာ်, ဒီးအဝဲသ့ၣ်အနီၣ်ယိးဘိ တမ့ၢ်တၢ်ဝံတၢ်ယိးလၢသုဖံဘၣ်ခိၣ်တဖၣ်အလိၤလၢၤဘၣ်.”
28 ဒုၣ်ဒါအသုးမုၢ်မၤန့ၢ်မၤနၢၤတ့ၢ်ဝ့ၢ်ဂဲလံန့ၣ်လီၤ. အဝဲသ့ၣ်လဲၤခီဖျိတ့ၢ်မံးကြိၣ်လံ. အဝဲသ့ၣ်ပာ်တီၢ်အတၢ်ဖိတၢ် လံၤတဖၣ်ဖဲဝ့ၢ်မံးကမၣ်န့ၣ်လီၤ.
29 အဝဲသ့ၣ်လဲၤခီဖျိတ့ၢ်လံတၢ်ကဆူးဒီးမံဝဲဖဲဝ့ၢ်က့ဘၤလီၤ. ပှၤတဖၣ်လၢဝ့ၢ်ရၤမါအပူၤပျံၤတၢ်ဖုးတၢ်ဒီးပှၤလၢစီၤပၤစီၤ စီလူးအဝ့ၢ်ကံးဘဧၤအပူၤတဖၣ်ထွးထီၣ်ဃ့ၢ်တ့ၢ်လံဝဲလီၤ.
30 ပှၤအိၣ်လၢသဝီကးလံၣ်သ့ၣ်ဧၢ, ကိးထီၣ်တက့ၢ်. ပှၤအိၣ်လၢသဝီလ့ၡ့ၣ်သ့ၣ်ဧၢ, ဒိကနၣ်တၢ်တက့ၢ်. ဝ့ၢ်ဧၤနသိးအပှၤဂီၢ်မုၢ်သ့ၣ်ဧၢ, စံးဆၢတၢ်တက့ၢ်.
31 ပှၤလၢဝ့ၢ်မၤဒမ့ၤနၤဒီးသဝီက့ဘံၣ်တဖၣ်ဃ့ၢ်ကွံာ်ဝဲလၢအသး သမူအဂီၢ်လီၤ.
32 တနံၤအံၤ, ဒုၣ်ဒါတဖၣ်အိၣ်ဝဲလၢဝ့ၢ်နိၤဘးအပူၤ, ဒီးအဝဲသ့ၣ် တြုၤအစုခိၣ်တဖၣ်လၢကစၢၢ်စံယိၣ်, ဖဲဝ့ၢ်ယရူၤၡလ့ၣ်န့ၣ်လီၤ.
33 ယွၤ, သ့တၢ်လၢာ်ကစၢ်ကမၤလီၤပှီၢ်အဝဲသ့ၣ်ဒ်သ့ၣ်ဒ့တဖၣ် ဘၣ်တၢ်ကျီၤလီၤတဲာ်ကွံာ်အီၤလၢသ့ၣ်ထူၣ်အလိၤသီၣ်ဝဲ အသိးလီၤ. ပှၤလၢအပာ်ထီၣ်ထီအသးနးနးကလဲာ်ဒီးပှၤ အိၣ်လၢလီၢ်ထီကတၢၢ်လၢအဝဲသ့ၣ်အကျါတဖၣ်ကဘၣ် တၢ်ကျီတဲာ်အီၤဒီးမၤမဲာ်ဆှးအီၤလီၤ.
34 ယွၤကကျီလီၤကွံာ်အီၤဒ်သ့ၣ်တဖၣ်လၢသ့ၣ်ပှၢ်အသးကံၢ်ပူၤ ဘၣ်တၢ်ကူာ်လီၤအီၤလၢကွါအသိး, ဒီးကမၤအသးဒၣ်လဲာ်ဒ်လဘၤနိၣ် အသ့ၣ်အဂ့ၤကတၢၢ်တဖၣ်လီၤတကူၢ်ဝဲအသိးန့ၣ်လီၤ.