8
1 တၢ်လၢပစံးကတိၤခဲလၢာ်အဂ့ၢ်မိၢ်ပှၢ်မ့ၢ်တၢ်အံၤလီၤ. ပအိၣ်ဒီးပှၤလုၢ်တၢ်အခိၣ်အဒိၣ်ကတၢၢ်ဒ်သိးအံၤလၢအဆ့ၣ်နီၤဝဲ လၢယွၤလၢအလီၤကဟုကညီၢ်တဂၤအလီၢ်ပစိာ်အစုထွဲလၢ မူခိၣ်န့ၣ်လီၤ.
2 အဝဲဒၣ်မၤတၢ်အခ့အပှၤအတၢ်မၤလၢတၢ်လီၢ်စီဆှံကတၢၢ်ဒီး လၢဒဲစီဆှံနီၢ်နီၢ်လၢအဘၣ်တၢ်သူၣ်ထီၣ်အီၤလၢကစၢ်ဒီး တမ့ၢ်ဘၣ်လၢပှၤကညီဘၣ်အပူၤန့ၣ်လီၤ.
3 ပှၤလုၢ်တၢ်အခိၣ်အဒိၣ်ကတၢၢ်ကိးဂၤဒဲးဘၣ်တၢ်ဃုထၢပာ် လီၤအီၤလၢအကလုၢ်ထီၣ်တၢ်မၤဘူၣ်ဒီးတၢ်လုၢ်တၢ်ပာ်တဖၣ် အဂီၢ်န့ၣ်လီၤ. လၢတၢ်န့ၣ်အဃိ, အလီၢ်အိၣ်ဝဲလၢပှၤလုၢ်တၢ်အခိၣ်အဒိၣ်ကတၢၢ်အံၤစ့ၢ် ကီးကအိၣ်ဒီးတၢ်လၢအကလုၢ်ထီၣ်ဝဲတမံၤမံၤန့ၣ်လီၤ.
4 အခဲအံၤအဝဲမ့ၢ်အိၣ်လၢဟီၣ်ခိၣ်ချၢန့ၣ်အဝဲတကဲဘၣ် ပှၤလုၢ်တၢ်အခိၣ်လ့ၤတက့ၤဘၣ်. အဂ့ၢ်ဒ်လဲၣ်န့ၣ်, ပှၤလုၢ်တၢ်အခိၣ်လၢအလုၢ်ထီၣ်ပာ်ထီၣ်တၢ်ဒ်ပှၤယူဒၤ ဖိအတၢ်သိၣ်တၢ်သီအသိးတဖၣ်အိၣ်ဝဲဒၣ်လံန့ၣ်လီၤ.
5 အဝဲသ့ၣ်မၤတၢ်အခ့အပှၤအတၢ်မၤဒ်ပှၤလုၢ်တၢ်အခိၣ်တဖၣ် အသိးန့ၣ်, နီၢ်နီၢ်တခီမ့ၢ်ဒၣ်တၢ်လၢအမၤအသးလၢမူခိၣ်တၢ်လီၢ် စီဆှံအဒိဒီးအကဒုန့ၣ်လီၤ. တၢ်အဝဲအံၤဒ်သိးဒၣ်ဒီးတၢ်လၢအမၤအသးဒီးစီၤမိၤၡ့လီၤ. ဖဲစီၤမိၤၡ့ကဘှီထီၣ်တၢ်အၢၣ်လီၤအီလီၤအဒဲစီဆှံန့ၣ်ကစၢ်ယွၤ စံးဘၣ်အီၤဒီးစံးဝဲ, “ပလီၢ်နသးလၢနကသူၣ်ထီၣ်ဘှီထီၣ်တၢ်ခဲလၢာ်ဒ်တၢ်အဒိ လၢနဘၣ်တၢ်ဒုးနဲၣ်နၤလၢကစၢၢ်ဒီခိၣ်အသိးန့ၣ်တက့ၢ်.”
6 ဘၣ်ဆၣ်ဒီးခဲအံၤယ့ၣ်ၡူးဘၣ်တၢ်ဟ့ၣ်လီၤအီၤလၢပှၤလုၢ် တၢ်အခိၣ်အတၢ်ဖံးတၢ်မၤလၢအဂ့ၤဒိၣ်န့ၢ်အဝဲသ့ၣ်အတၢ်မၤ တက့ၢ်, ဒ်သိးဒၣ်တၢ်အၢၣ်လီၤအီလီၤလၢအဝဲဒုးအိၣ်ထီၣ်ဝဲလၢ ကစၢ်ယွၤဒီးအပှၤဂီၢ်မုၢ်အဘၢၣ်စၢၤမ့ၢ်တၢ်လၢအဂ့ၤဒိၣ်ဒၣ် တၢ်တက့ၢ်, မ့ၢ်လၢအသူၣ်လီၤအသးလၢတၢ်စံးပာ်တဖၣ်လၢ အဘၣ်ဃးဒီးတၢ်ဂ့ၤဒိၣ်ဒၣ်တၢ်တဖၣ်အဖီခိၣ်အဃိန့ၣ်လီၤ.
7 အဂ့ၢ်ဒ်အံၤ, တၢ်အၢၣ်လီၤအီလီၤအခီၣ်ထံးတခါမ့ၢ်ဂ့ၤဝဲဒီး တၢ်ကမၤတၢ်အၢၣ်လီၤအီလီၤခံခါတခါအလီၢ်တအိၣ်လၢၤ ဘၣ်.
8 ယွၤပာ်တၢ်ကမၣ်လၢအဝဲသ့ၣ်အလိၤဖဲအစံးဝဲ,
“မုၢ်နံၤတဖၣ်ကဟဲဝဲ, ယွၤစံးဝဲဒၣ်,
ဖဲယကဒုးအိၣ်ထီၣ်တၢ်အၢၣ်လီၤအီလီၤအသီဒီးအံၣ်စရ့လး အပှၤဂီၢ်မုၢ်ဒီးလၢယူဒၤအပှၤဂီၢ်မုၢ်,
9 တမ့ၢ်ဘၣ်ဒ်တၢ်အၢၣ်လီၤအီလီၤလၢယမၤတ့ၢ်ဒီး
အဝဲသ့ၣ်အပၢ်တဖၣ်
ဖဲမုၢ်နံၤလၢယဟံးအဝဲသ့ၣ်အစုဒီးထုးထီၣ်အဝဲသ့ၣ်
လၢကီၢ်အဲၤကူပတူးအပူၤန့ၣ်ဘၣ်.
အဂ့ၢ်ဒ်အံၤ, အဝဲသ့ၣ်တဟံးဃာ်
ယတၢ်အၢၣ်လီၤအီလီၤဘၣ်.
ဒီးမ့ၢ်လၢတၢ်န့ၣ်အဃိ
ယတကနၣ်ဃုာ်အဝဲသ့ၣ်ဘၣ်, ကစၢ်စံးဝဲဒၣ်.
10 အအံၤမ့ၢ်တၢ်အၢၣ်လီၤအီလီၤလၢ
ယကမၤဒီးအံၣ်စရ့လးအပှၤဂီၢ်မုၢ်
လၢမုၢ်နံၤတဖၣ်န့ၣ်အလီၢ်ခံ, ကစၢ်စံးဝဲဒၣ်,
ယကတ့ၢ်နုာ်ယတၢ်သိၣ်တၢ်သီတဖၣ်လၢ
အဝဲသ့ၣ်အတၢ်ဆိကမိၣ်အပူၤ
ယကကွဲးလီၤအီၤလၢအဝဲသ့ၣ်အသးအလိၤ,
ဒီးယကမ့ၢ်အဝဲသ့ၣ်အကစၢ်ယွၤ,
ဒီးအဝဲသ့ၣ်ကမ့ၢ်ယပှၤဂီၢ်မုၢ်လီၤ.
11 ဒီးအဝဲသ့ၣ်တသိၣ်လိဘၣ်လၢၤအပှၤခူဖိဝ့ၢ်ဖိမ့ၢ်ဂ့ၤ,
အပှၤထံဖိကီၢ်ဖိဒၣ်ဝဲမ့ၢ်ဂ့ၤ, ဒီးစံး
‘သ့ၣ်ညါကစၢ်ယွၤတက့ၢ်’ န့ၣ်ဘၣ်.
အဂ့ၢ်ဒ်အံၤ, အဝဲသ့ၣ်ခဲလၢာ်ကသ့ၣ်ညါယၤ
စးထီၣ်လၢပှၤအဆံးကတၢၢ်
ပၢၢ်လၢပှၤအဒိၣ်ကတၢၢ်န့ၣ်လီၤ.
12 ယကသူၣ်ကညီၤသးကညီၤအတၢ်မၤကမၣ်တၢ်တဖၣ်
ဒီးယတသ့ၣ်နီၣ်ထီၣ်အဝဲသ့ၣ်
အတၢ်ဒဲးဘးတဖၣ်လၢၤဘၣ်.”
13 ခီဖျိအကတိၤတၢ်ဘၣ်ဃးဒီးအတၢ်အၢၣ်လီၤအီလီၤအသီ န့ၣ်ကစၢ်ယွၤဒုးကဲတၢ်အၢၣ်လီၤအခီၣ်ထံးတခါလၢတၢ်လၢ အလီၢ်လံၤကွံာ်လံန့ၣ်လီၤ. ဒီးတၢ်လၢအလီၢ်လံၤကွံာ်ဒီးပှၢ်ထီၣ်လံန့ၣ်, ဘူးထီၣ်လၢကလီၤမၢ်ကွံာ်ဝဲန့ၣ်လီၤ.