11
1 တၢ်စူၢ်တၢ်နာ်မ့ၢ်တၢ်လၢအမၤဂၢၢ်မၤကျၢၤတၢ်လၢပမုၢ်လၢ်ပဝဲ တဖၣ်ဒီးဒုးသ့ၣ်ညါလီၤတံၢ်ပှၤတၢ်တဖၣ်လၢပထံၣ်အီၤတသ့ဘၣ် န့ၣ်လီၤ.
2 ခီဖျိတၢ်စူၢ်တၢ်နာ်န့ၣ်ပှၤလၢပျၢၤတဖၣ်ဒိးန့ၢ်ဘၣ်ကစၢ်ယွၤ အတၢ်ဘၣ်သူၣ်ဘၣ်သးန့ၣ်လီၤ.
3 လၢတၢ်စူၢ်တၢ်နာ်န့ၣ်, ပသ့ၣ်ညါနၢ်ပၢၢ်ပဝဲလၢဟီၣ်ခိၣ်အံၤ ဘၣ်တၢ်တ့လီၤအီၤလၢကစၢ်ယွၤအကလုၢ်န့ၣ်လီၤ. မၤသးဒ်န့ၣ်ဒီးတၢ်လၢပထံၣ်အီၤအံၤဘၣ်တၢ်မၤကဲထီၣ်အီၤလၢတၢ် လၢပထံၣ်အီၤတသ့ဘၣ်တဖၣ်န့ၣ်လီၤ.
4 လၢတၢ်စူၢ်တၢ်နာ်န့ၣ်, စီၤဟ့းဘ့းလးလုၢ်ထီၣ်ကစၢ်ယွၤလၢတၢ်လုၢ် လၢအဂ့ၤဒိၣ်န့ၢ်စီၤကၤယံၣ်အတၢ်လုၢ်တက့ၢ်ဒီးလၢတၢ်အံၤ အဃိ, အဝဲဒၣ်ဒိးန့ၢ်ဘၣ်ယွၤအတၢ်ဘၣ်သူၣ်ဘၣ်သးဒ်ပှၤအတီ အလိၤတဂၤအသိး, အဂ့ၢ်မ့ၢ်လၢကစၢ်ယွၤအကစၢ်ဒၣ်ဝဲအုၣ်အသးခီဖျိအတူၢ်လိာ် အဝဲဒၣ်အတၢ်ဟ့ၣ်အဃိန့ၣ်လီၤ. လၢအတၢ်စူၢ်တၢ်နာ်အဃိအဝဲဒၣ်သံဘၣ်ဆၣ်ကတိၤဒံးတၢ်လီၤ.
5 လၢတၢ်စူၢ်တၢ်နာ်န့ၣ်စီၤဃနိာ်ဘၣ်တၢ်ဟံးထီၣ်အီၤ ဒ်သိးအသုတထံၣ်ဘၣ်တၢ်သံတဂ့ၤအဂီၢ်န့ၣ်လီၤ. ပှၤတထံၣ်က့ၤအီၤနီတဂၤဘၣ်. အဂ့ၢ်ဒ်အံၤကစၢ်ယွၤ ဟံးထီၣ်ကွံာ်လံအီၤလံ. တချုးလၢအဘၣ်တၢ်ဟံးထီၣ်ကွံာ် အီၤန့ၣ်, တၢ်အုၣ်အသးလၢအဝဲမၤမုာ်ကစၢ်ယွၤအသးလီၤ.
6 တၢ်စူၢ်တၢ်နာ်တအိၣ်ဘၣ်န့ၣ်တၢ်မၤမုာ်မၤဘၣ်ကစၢ်ယွၤ အသးတသ့ဘၣ်. အဂ့ၢ်ဒ်အံၤ, ပှၤလၢအဟဲဆူကစၢ်ယွၤအအိၣ်န့ၣ်ဘၣ်နာ်လၢကစၢ်ယွၤ အိၣ်ဝဲဒီးလၢအဟ့ၣ်ဘျုးဟ့ၣ်ဖှိၣ်ပှၤလၢအဃုအီၤတဖၣ် န့ၣ်လီၤ.
7 လၢတၢ်စူၢ်တၢ်နာ်န့ၣ်စီၤနိအၤနၢ်ဟူကစၢ်ယွၤအတၢ်ဟ့ၣ် ပလီၢ်အီၤဘၣ်ဃးဒီးတၢ်ကမၤအသးလၢအတထံၣ်ဘၣ်ဒံးဝဲ တဖၣ်န့ၣ်လီၤ. အဝဲဒၣ်စူၢ်ကစၢ်ယွၤဒီးဘှီထီၣ်ကဘီတဘ့ၣ်လၢ အဝဲဒၣ်အပှၤဟံၣ်ဖိအတၢ်ပူၤဖျဲးအဂီၢ်န့ၣ်လီၤ. လၢတၢ်အံၤအဃိဟီၣ်ခိၣ်ဘၣ်တၢ်စံၢ်ၣ်ညီၣ်အီၤ, ဒီးစီၤနိအၤဒိးန့ၢ်ဘၣ်ကစၢ်ယွၤအတၢ်တီတၢ်လိၤလၢ အတၢ်စူၢ်တၢ်နာ်အီၤအဃိန့ၣ်လီၤ.
8 တၢ်စူၢ်တၢ်နာ်န့ၣ် ဒုးစူၢ်စီၤအၤဘြၤဟၣ်အတၢ်ဖဲကစၢ်ယွၤကိးထီၣ် အီၤဒ်သိးအကလဲၤဆူကီၢ်လၢကစၢ်ယွၤအၢၣ်လီၤတ့ၢ်အီၤလၢ ကဟ့ၣ်အီၤန့ၣ်လီၤ. အဝဲဟးထီၣ်လၢ အထံအကီၢ်ဒၣ်ဝဲအပူၤဒီးကလဲၤဖဲလဲၣ်ဖဲလဲၣ်န့ၣ် တသ့ၣ်ညါဝဲဘၣ်.
9 လၢတၢ်စူၢ်တၢ်နာ်န့ၣ်, စီၤအၤဘြၤဟၣ်အိၣ်ဝဲဆိးဝဲလၢကီၢ် တၢ်စံးပာ်တဘ့ၣ်အပူၤဒ်ပှၤသမှံၤတဂၤအသိး ဒီးအိၣ်ဝဲဆိးဝဲလၢဒဲအပူၤဒ်စီၤအံၤစဲးဒီးစီၤယၤကိာ်, ပှၤလၢအကန့ၢ်သါဃုာ်တၢ်စံးပာ်တမံၤဃီဒီးအီၤတဖၣ် အသိးန့ၣ်လီၤ.
10 အဂ့ၢ်ဒ်အံၤ, အဝဲဒၣ်အိၣ်ခိးကွၢ်လၢ်ဝ့ၢ်တဖျၢၣ်လၢ အအိၣ်ဒီးအခီၣ်ထံးအဂၢၢ်အကျၢၤ, ဝ့ၢ်လၢပှၤတ့အီၤဒီးပှၤသူၣ်ထီၣ်အီၤမ့ၢ်ကစၢ်ယွၤန့ၣ်လီၤ.
11 စီၤအၤဘြၤဟၣ်အသးမ့ၢ်ပှၢ်သဃဲးတ့ၢ်မးဒီးနီၢ်စၤရါ မ့ၢ်ပှၤတူာ်ဖိသနာ်က့, လၢတၢ်စူၢ်တၢ်နာ်အပူၤစီၤအၤဘြၤဟၣ်ကဲထီၣ်ဘၣ်ပၢ်တဂၤလီၤ. အဝဲဒၣ်နာ်ဝဲလၢကစၢ်ယွၤကတီဒီးအတၢ်စံးပာ်လီၤ.
12 အဂ့ၢ်ဒ်အံၤ, လၢပှၤတဂၤလၢအမၤအသးဒ်ပှၤလၢအသံတ့ၢ်ဝဲ အသိးန့ၣ်, ပှၤလၢအအါဝဲထဲသိးဒီးဆၣ်တဖၣ်လၢမူခိၣ်ဒီးမဲး အဖျၢၣ်ဖိလၢပီၣ်လဲၣ်နံၤလၢပဂံၢ်တသ့ဘၣ်န့ၣ်, လီၤစၢၤဝဲဒၣ်လီၤ.
13 ပှၤသ့ၣ်တဖၣ်အံၤခဲလၢာ်သံဝဲလၢတၢ်စူၢ်တၢ်နာ်အပူၤလီၤ. အဝဲသ့ၣ်တဒိးန့ၢ်ဘၣ်ကစၢ်ယွၤအတၢ်စံးပာ်နာ်သက့, အဝဲသ့ၣ်ထံၣ်စိဝဲလၢအယံၤဒီးတူၢ်လိာ်မုာ်တ့ၢ်လံဝဲဒီး အၢၣ်လီၤဝဲလၢအဝဲသ့ၣ်မ့ၢ်ပှၤသမှံၤဒီးပှၤတခီဘီမုၢ်ဖိ လၢဟီၣ်ခိၣ်ချၢလီၤ.
14 ပှၤလၢအစံးတၢ်ဒ်သိးအံၤတဖၣ်ပာ်ဖျါထီၣ်အသး လၢအမ့ၢ်ပှၤလၢအဃုအထံအကီၢ်န့ၣ်လီၤ.
15 အဝဲသ့ၣ်အတၢ်ဆိကမိၣ်မ့ၢ်ဘၣ်ဃးဒီးအထံအကီၢ်လၢ အဟးထီၣ်တ့ၢ်လံဝဲလၢအပူၤန့ၣ်ဒီး, အကတီၢ်ဒီးတၢ်ခွဲးတၢ်ယာ်လၢအကက့ၤက့ၤဝဲန့ၣ်ကအိၣ် တ့ၢ်လံဝဲန့ၣ်လီၤ.
16 မ့မ့ၢ်ခဲကနံၣ်အံၤ, အဝဲသ့ၣ်ဆၢန့ၢ်ဘၣ်ထံကီၢ်လၢအဂ့ၤန့ၢ် အန့ၣ်တက့ၢ်, ဒ်ပစံးတၢ်အသိးလၢအဘၣ်ဃးဒီးမူခိၣ်န့ၣ် လီၤ. မၤသးဒ်န့ၣ်ဒီးကစၢ်ယွၤအမဲာ်တဆှးဘၣ်လၢပှၤကကိး အီၤလၢအဝဲသ့ၣ်အကစၢ်န့ၣ်ဘၣ်. အဂ့ၢ်မ့ၢ်လၢအကတဲာ်ကတီၤတ့ၢ်လံဝ့ၢ်တဖျၢၣ်လၢအဝဲသ့ၣ် အဂီၢ်အဃိန့ၣ်လီၤ.
17 လၢတၢ်စူၢ်တၢ်နာ်စီၤအၤဘြၤဟၣ်ဖဲအဘၣ်တၢ်မၤကွၢ်အီၤန့ၣ်, လုၢ်ထီၣ်အဖိခွါစီၤအံၤစဲးန့ၣ်လီၤ. စီၤအၤဘြၤဟၣ်ဒိးန့ၢ်ဘၣ်တၢ်စံးပာ်လၢကစၢ်ယွၤဘၣ်ဆၣ်ဒီး အဝဲအိၣ်ကတဲာ်ကတီၤအသးလၢအကလုၢ်ထီၣ်အဖိခွါအိၣ်ထဲ တဂၤဃီအံၤန့ၣ်လီၤ.
18 ကစၢ်ယွၤကတိၤတ့ၢ်တၢ်ဒီးအီၤဒီးစံး, “နဖိနလံၤနစၢၤနသွဲၣ်တဖၣ်ကဟဲလီၤစၢၤလၢစီၤအံၤစဲး န့ၣ်လီၤ.”
19 အဝဲဆိကမိၣ်ပာ်စၢၤဝဲလၢအသးကံၢ်ပူၤလၢကစၢ်ယွၤ မၤမူထီၣ်က့ၤစီၤအံၤစဲးလၢတၢ်သံန့ၣ်သ့ဝဲဒီးဒ်န့ၣ်အသိး မၤအသးဒ်စီၤအၤဘြၤဟၣ်ဒိးန့ၢ်က့ၤစီၤအံၤစဲးလၢတၢ်သံ အပူၤန့ၣ်လီၤ.
20 လၢတၢ်စူၢ်တၢ်နာ်န့ၣ်, စီၤအံၤစဲးဆိၣ်ဂ့ၤဆိၣ်ဝါစီၤယၤကိာ်ဒီး စီၤဧ့ၡီၤလၢခါဆူညါအတၢ်ဆိၣ်ဂ့ၤတဖၣ်လီၤ.
21 လၢတၢ်စူၢ်တၢ်နာ်ဖဲစီၤယၤကိာ်ဘူးထီၣ်လၢအကသံန့ၣ်, ဆိၣ်ဂ့ၤဆိၣ်ဝါစီၤယိၤသးအဖိခွါခံဂၤလိာ်လီၤ. အဝဲအိၣ်သန့ၤအသးလၢအနီၣ်ထိးဘိအလိၤဒီးဘူၣ်ထီၣ်ဘါထီၣ် ကစၢ်ယွၤလီၤ.
22 လၢတၢ်စူၢ်တၢ်နာ်ဖဲစီၤယိၤသးဘူးထီၣ်လၢအကသံန့ၣ်, ကတိၤတၢ်ဘၣ်ဃးပှၤအံၣ်စရ့လးဖိအတၢ်ကဟးထီၣ်လၢကီၢ် အဲၤကူပတူးအဂ့ၢ်, ဒီးမၤလိာ်တ့ၢ်တၢ်ဘၣ်ဃးဒီးအဃံအဂ့ၢ်န့ၣ်လီၤ.
23 လၢတၢ်စူၢ်တၢ်နာ်န့ၣ်, စီၤမိၤၡ့အိၣ်ဖျဲၣ်ထီၣ်ဝံၤအလီၢ်ခံအမိၢ် အပၢ်တဖၣ်ပာ်ခူသူၣ်အီၤသၢလါလီၤ. အဂ့ၢ်မ့ၢ်လၢ အထံၣ်ဝဲလၢဖိသၣ်အံၤအက့ၢ်အဂီၤဂ့ၤဒီးဃံလၤဝဲသတး ဒီးအဝဲသ့ၣ်တပျံၤဘၣ်စီၤပၤအတၢ်မၤလိာ်ဘၣ်.
24 လၢတၢ်စူၢ်တၢ်နာ်စီၤမိၤၡ့တုၤအဒိၣ်ထီၣ်န့ၣ်, တဒိးကိးလီၤအသးလၢစီၤပၤအဖိမုၣ်န့ၣ်အဖိခွါဘၣ်.
25 အဝဲဃုထၢဝဲလၢအကတူၢ်သကိးတၢ်မၤအၢမၤနးဃုာ်ဒီး ကစၢ်ယွၤအပှၤဂီၢ်မုၢ်အါန့ၢ်အကမုာ်လၤတၢ်လၢတၢ်ဒဲးဘး အတၢ်မုာ်တၢ်လၤတစိၢ်တလီၢ်အပူၤတက့ၢ်လီၤ.
26 အဝဲဆိကမိၣ်ဒီးပာ်လုၢ်ပာ်ပှ့ၤတၢ်တူၢ်တၢ်ဒုၣ်ဒွဲၣ်လၢခရံာ် အဂီၢ်အါန့ၢ်ဒိၣ်န့ၢ်အဲၤကူပတူးအတၢ်ထူးတၢ်တီၤတဖၣ် တက့ၢ်, အဂ့ၢ်မ့ၢ်လၢအဝဲကွၢ်ဒၣ်တၢ်ဆူခိၣ်ဖးလၢအအိၣ်လၢ အမဲာ်ညါအဃိန့ၣ်လီၤ.
27 လၢတၢ်စူၢ်တၢ်နာ်န့ၣ် စီၤမိၤၡ့ဟးထီၣ်ကွံာ်လၢအဲၤကူပတူး အပူၤဒီးတပျံၤဘၣ်စီၤပၤအတၢ်သးဒိၣ်ထီၣ်န့ၣ်ဘၣ်. အဝဲအိၣ်ဂၢၢ်ဆိးကျၢၤဒီးတက့ၤကဒါက့ၤဝဲဘၣ်န့ၣ်, မၤအသးဒ်အထံၣ်ဘၣ်ကစၢ်ယွၤလၢတၢ်ထံၣ်အီၤတသ့ဘၣ် တဂၤအသိးန့ၣ်လီၤ.
28 လၢတၢ်စူၢ်တၢ်နာ်အဝဲဒုးအိၣ်ထီၣ်ဘူၣ်လဲၤကပာ်ဒီးဟ့ၣ် လီၤအကလုၢ်လၢပှၤကဘၣ်ဖှံတြဲၤအထူၣ်တဖၣ်လၢတၢ် သွံၣ်, ဒ်သိးတၢ်သံအကလူးအသုတမၤသံဘၣ်အံၣ်စရ့လး အဖိဝဲၢ်ကိတဖၣ်တဂ့ၤအဂီၢ်န့ၣ်လီၤ.
29 လၢတၢ်စူၢ်တၢ်နာ်န့ၣ်ပှၤအံၣ်စရ့လးဖိခီဂာ်ပီၣ်လဲၣ်ဂီၤလၢ ခိသူခိၣ်လီၤ. ဘၣ်ဆၣ်ဒီးဖဲပှၤအဲၤကူပတူးဖိတဖၣ်ခီကွၢ်ဝဲန့ၣ်အဝဲသ့ၣ်လီၤ အုးသံကွံာ်ဝဲလီၤ.
30 လၢတၢ်စူၢ်တၢ်နာ်န့ၣ်, ဝ့ၢ်ယရံၤဃိအခိၣ်ဒူလီၤပှီၢ်ကွံာ်ဝဲ ဖဲပှၤအံၣ်စရ့လးဖိလဲၤတရံးအီၤပှဲၤထီၣ်နွံသီတသီအခါ န့ၣ်လီၤ.
31 လၢတၢ်စူၢ်တၢ်နာ်န့ၣ်, ပှၤဃဲသဲမုၣ်နီၢ်ရၤဃးတဘၣ်တၢ်မၤသံ အီၤဃုာ်ဒီးပှၤလၢအတစူၢ်ယွၤအကလုၢ်တဖၣ်န့ၣ်ဘၣ်. အဂ့ၢ်မ့ၢ်လၢအဝဲတူၢ်လိာ်မုာ်ပှၤအံၣ်စရ့လးဖိအပှၤကွၢ် ဟုၣ်ကွၢ်စုာ်တၢ်တဖၣ်ဒ်တံၤသကိးအသိးအဃိန့ၣ်လီၤ.
32 ယကဘၣ်စံးအါထီၣ်ဒံးတၢ်မနုၤလဲၣ်. အဂ့ၢ်ဒ်အံၤယမ့ၢ်စံး ကတိၤလၢစီၤကံးဒဧိၣ်, စီၤဘါရး, စီၤၡံၣ်ၡိၣ်, စီၤယံးဖသၤ, စီၤဒၤဝံး, စီၤၡမူၤအ့လးဒီးဝံတဖၣ်အဂ့ၢ်န့ၣ်တၢ်ဆၢကတီၢ် တမ့ၢ်ကလၢလၢယဂီၢ်ဘၣ်.
33 လၢတၢ်စူၢ်တၢ်နာ်န့ၣ်အဝဲသ့ၣ်မၤနၢၤဘီမုၢ်တဖၣ်, မၤတၢ်တီတၢ်လိၤ, ဒိးန့ၢ်တၢ်လၢအဘၣ်တၢ်စံးပာ်အီၤတဖၣ်, ပအၢဃာ်ခ့ယုၢ် အထးခိၣ်,
34 မၤလီၤပံာ်ကွံာ်မ့ၣ်အူလၢအအီၣ်တၢ်ဆူၣ်ဆူၣ်ကလဲာ်, ပူၤဖျဲးထီၣ်လၢနးအကနၣ်န့ၣ်လီၤ. လၢတၢ်ဂံၢ်စၢ်ဘါစၢ်အပူၤန့ၣ်အဂံၢ်အဘါဆူၣ်ထီၣ်ဝဲ, ကဲထီၣ်လၢပှၤဂံၢ်ဆူၣ်ဘါဆူၣ်လၢတၢ်ဒုးတၢ်ယၤ အပူၤဒီးမၤနၢၤမၤဃၣ်ကွံာ်ပှၤတခီဘီမုၢ်ဖိအသုးမုၢ်သံၣ်ဘိ တဖၣ်လီၤ.
35 လၢတၢ်စူၢ်တၢ်နာ်န့ၣ်ပိာ်မုၣ်တဖၣ်န့ၢ်ဘၣ်က့ၤအဘူး အတံၢ်လၢအသံတ့ၢ်ဝဲတဖၣ်ခီဖျိတၢ်ဂဲၤဆၢထၢၣ်သမူ ထီၣ်က့ၤန့ၣ်လီၤ.
ပှၤအဂၤတဖၣ်လၢအတတူၢ်လိာ်ဘၣ်တၢ်ပျၢ်ထူၣ်ဖျဲးထီၣ်အီၤ ဘၣ်န့ၣ်သံဝဲလၢတၢ်မၤအၢမၤနးအဃိဒ်သိးအကဘၣ် တၢ်ဒုးဂဲၤဆၢထၢၣ်က့ၤအီၤဆူတၢ်မူလၢအဂ့ၤဒၣ်တၢ် တက့ၢ်န့ၣ်လီၤ.
36 ပှၤတနီၤဘၣ်တၢ်ဒုၣ်ဒွဲၣ်ပယွဲအီၤဒီးဘၣ်တၢ်တီၢ်အီၤ, ဒီးအဂၤတနီၤဘၣ်တၢ်စၢဃာ်အီၤလၢထးသွဲဒီးလီၤဘၣ်ဒၣ် လဲာ်လၢဃိာ်ပူၤလီၤ.
37 အဝဲသ့ၣ်ဘၣ်တၢ်ကွံာ်အီၤလၢလၢၢ်, ဘၣ်တၢ်ဘူးတဲာ်အီၤခံကူာ်ဒီးဘၣ်တၢ်မၤသံအီၤလၢနးလီၤ. အဝဲသ့ၣ်ဟးဝ့ၤဝီၤကူသိးဝဲလၢသိဒီးမဲာ်တဲးလဲးအဖံး, ဘၣ်ဖှီၣ်ဘၣ်ယာ်, ဘၣ်တၢ်မၤနးမၤဖှီၣ်အီၤဒီးဘၣ်တၢ်မၤ အၢမၤနးအီၤလီၤ.
38 ဟီၣ်ခိၣ်တကြၢးတဘၣ်ဘၣ်ဒီးအဝဲသ့ၣ်ဘၣ်. အဝဲသ့ၣ်ဟးဝ့ၤဝီၤလၢမဲးမုၢ်ခိၣ်ဒီးလၢကစၢၢ်ခိၣ်ကလိကျါ ဒီးအိၣ်ဝဲဆိးဝဲလၢလၢၢ်ဒီးလ့အအိပူၤဒီးလၢဟီၣ်ခိၣ် အအိပူၤလီၤ.
39 တၢ်အံၤမ့ၢ်မးတၢ်ကွဲးနီၣ်တမံၤလၢအဘၣ်ဃးဒီးကယဲၢ် ပှၤတဖၣ်လၢအမၤနၢၤတၢ်န့ၣ်လီၤ. အန့ၣ်ဒၣ်လဲာ်အဝဲသ့ၣ် တဒိးန့ၢ်တၢ်လၢကစၢ်ယွၤအၢၣ်လီၤတ့ၢ်ဝဲန့ၣ်ဘၣ်.
40 အဂ့ၢ်မ့ၢ်လၢကစၢ်ယွၤတိာ်ပာ်တ့ၢ်ဝဲလၢအကသုးကျဲၤတၢ်ဂ့ၤ ဒိၣ်ဒၣ်တၢ်တက့ၢ်လၢပဂီၢ်အဃိလီၤ. မ့တမ့ၢ်လၢပဝဲဒၣ်ဘၣ်ဒီးအဝဲသ့ၣ်တဘၣ်တၢ်မၤလၢထီၣ် ပှဲၤထီၣ်အီၤဘၣ်န့ၣ်လီၤ.