ပှၤသ့းစၤလနံဖိတဖၣ်အအိၣ်
ခံဘ့ၣ်တဘ့ၣ်
THESSALONIANS
တၢ်သဘံၣ်ဘုၣ်ဘၣ်ဃးတၢ်မုၢ်လၢ်လၢခရံာ်ကဟဲက့ၤန့ၣ်, ဒုးအိၣ်ထီၣ်ဒံးတၢ်တံာ်တာ်ဖဲဝ့ၢ်သ့းစၤလနံအတၢ်အိၣ်ဖှိၣ် န့ၣ်လီၤ. စီၤပီလူးအလံာ်ပရၢဆူပှၤသ့းစၤလနံဖိအအိၣ်ခံဘ့ၣ်တဘ့ၣ် ဘၣ်ထွဲဝဲဒီးတၢ်စူၢ်တၢ်နာ်လၢကစၢ်အတၢ်ဟဲက့ၤအမုၢ်နံၤတုၤ ဃီၤလံဝဲအဂ့ၢ်န့ၣ်လီၤ. စီၤပီလူးဘှီက့ၤတၢ်ဆိကမိၣ်တမံၤအံၤ, ဒီးပာ်ဖျါထီၣ်ဝဲလၢတချုးခရံာ်ဟဲက့ၤန့ၣ်, တၢ်အၢတၢ်သီကအါထီၣ်တုၤအလၢာ်ကတၢၢ်ဖဲပှၤလၢပနၢ်ပၢၢ် အဂ့ၢ်တသ့ဘၣ်တဂၤအတၢ်ပၢဆှၢအကတီၢ်န့ၣ်လီၤ. ပှၤအံၤဘၣ်တၢ်ကိးအီၤလၢတၢ်အၢတၢ်သီတဂၤဒီး ကထီဒါခရံာ်န့ၣ်လီၤ.
စီၤပီလူးပာ်ဖျါလီၤဆီဒၣ်တၢ်လၢ, ပှၤဖးလံာ်ပရၢအံၤကိးဂၤဒဲးကအိၣ်ဂၢၢ်ဆိးကျၢၤလၢ အတၢ်စူၢ်တၢ်နာ်အပူၤလၢတၢ်ကီတၢ်ခဲဒီးတၢ်တူၢ်တၢ် အပူၤဒၣ်လဲာ်, ဒီးလၢကဖံးကမၤတၢ်လၢတၢ်လုၢ်အီၣ်အသး သမူအဂီၢ်ဒ်စီၤပီလူးဒီးပှၤမၤသကိးတၢ်ဒီးအီၤတဖၣ် အသိး, ဒီးကမၤဂ့ၤဒံးတၢ်လၢတၢ်သူၣ်စူၤသးစူၤအပူၤန့ၣ်လီၤ.
1
1 လၢစီၤပီလူး, စီၤစံလၤ, ဒီးစီၤတံၤမသ့း, ဆူသ့းစၤလနံအတၢ်အိၣ်ဖှိၣ်ဖိတဖၣ်လၢအဘၣ်ဃးဒီး ပပၢ်ကစၢ်ယွၤဒီးကစၢ်ယ့ၣ်ၡူးခရံာ်အအိၣ်,
2 မ်ကစၢ်ယွၤလၢအမ့ၢ်ပပၢ်, ဒီးကစၢ်ယ့ၣ်ၡူးခရံာ်ဟ့ၣ်သုတၢ်ဘျုးတၢ်ဖှိၣ်ဒီးတၢ်ဃူတၢ်ဖိးတက့ၢ်.
3 ဒီပုၢ်ဝဲၢ်သ့ၣ်ဧၢ, ပဘၣ်စံးဘျုးကစၢ်ယွၤကိးဆၢကိးကတီၢ် ဒဲးလၢသုဃိလီၤ. မ့ၢ်တၢ်အကြၢးအဘၣ်တမံၤလၢပဂ့ၤမၤ အီၤလီၤ. အဂ့ၢ်ဒ်အံၤသုတၢ်စူၢ်တၢ်နာ်ဒိၣ်ထီၣ်ဝဲအဒိၣ်အအါ, ဒီးသုတၢ်အဲၣ်လိာ်ကွံလိာ်သုသးဒိၣ်ထီၣ်အါထီၣ်ဝဲဒၣ်လီၤ.
4 လၢတၢ်န့ၣ်အဃိ, ပနီၢ်ကစၢ်ဒၣ်ပဝဲပကတိၤတၢ်လၢသုဂ့ၢ် အိၣ်ဒီးတၢ်ပာ်ကဖၢလၢပသးလၢသုဃိ, လၢကစၢ်ယွၤ အတၢ်အိၣ်ဖှိၣ်တဖၣ်အပူၤ, ဘၣ်ဃးသုတၢ်အိၣ်ဂၢၢ်အိၣ်ကျၢၤဒီးသုတၢ်နာ်ဖဲသုလဲၤခီဖျိ ကယဲၢ်တၢ်မၤအၢမၤနးဒီးတၢ်နးတၢ်ဖှီၣ်တဖၣ်န့ၣ်လီၤ.
5 တၢ်သ့ၣ်တဖၣ်အံၤခဲလၢာ်အုၣ်အသးလၢကစၢ်ယွၤ အတၢ်စံၣ်ညီၣ်တီဝဲလိၤဝဲ, ဒီးလၢတၢ်န့ၣ်အဃိသုကကြၢးကဘၣ်ဒီးကစၢ်ယွၤအဘီ အမုၢ်လၢသုတူၢ်ဘၣ်တၢ်လၢအဃိန့ၣ်လီၤ.
6 ကစၢ်ယွၤကမၤတၢ်လၢအကြၢးဝဲဘၣ်ဝဲဒ်သိးပှၤလၢအမၤ နးမၤဖှီၣ်သုတဖၣ်ကတူၢ်ဘၣ်က့ၤတၢ်နးတၢ်ဖှီၣ်န့ၣ်လီၤ.
7 အဝဲဒၣ်ကမၤမုာ်ထီၣ်က့ၤသုဝဲလၢအတူၢ်ဘၣ်တၢ်နး တၢ်ဖှီၣ်, ဒီးပဝဲဒၣ်စ့ၢ်ကီးလီၤ. အဝဲဒၣ်ကမၤတၢ်အံၤဖဲကစၢ်ယ့ၣ်ၡူးအိၣ်ဖျါထီၣ်လၢမူခိၣ်ဃုာ် ဒီးအကလူးလၢအအိၣ်ဒီးအစိအကမီၤတဖၣ်,
8 ဒီးဟဲလီၤလၢမ့ၣ်အူလၣ်အပူၤ, ဒ်သိးအကစံၣ်ညီၣ်ပှၤတဖၣ်လၢအတအၢၣ်လီၤအီလီၤ ကစၢ်ယွၤဒီးတတူၢ်လိာ်တၢ်သးခုကစီၣ်ဘၣ်ဃးပကစၢ် ယ့ၣ်ၡူးန့ၣ်လီၤ.
9 အဝဲသ့ၣ်ကတူၢ်ဘၣ်တၢ်စံၣ်ညီၣ်လၢအမ့ၢ်တၢ်ဟးဂီၤအထူ အယိာ်, ဒီးကဘၣ်တၢ်ထုးဖးကွံာ်အီၤလၢကစၢ်အမဲာ်ညါ ဒီးအလၤကပီၤဘၣ်ဃးဒီးအစိအကမီၤန့ၣ်လီၤ.
10 တၢ်သ့ၣ်တဖၣ်အံၤခဲလၢာ်ကမၤအသးဖဲနံၤအဝဲန့ၣ် ဖဲအဝဲဒၣ်ဟဲဝဲဒ်သိးအကဒိးန့ၢ်တၢ်လၤကပီၤလၢအပှၤ ဂီၢ်မုၢ်ခဲလၢာ်အအိၣ်, ဒီးတၢ်မၤလၤမၤကပီၤလၢပှၤလၢအစူၢ်က့ၤနာ်က့ၤအီၤခဲလၢာ် အအိၣ်န့ၣ်လီၤ. သုဝဲသ့ၣ်စ့ၢ်ကီးသုကအိၣ်လၢအဝဲသ့ၣ်အသိး အကျါအဂ့ၢ်မ့ၢ်လၢသုနာ်တၢ်ကစီၣ်လၢပစံးဘၣ်တဲဘၣ်သု အဃိန့ၣ်လီၤ.
11 လၢတၢ်န့ၣ်အဃိ, ထီဘိန့ၣ်ပဃ့ဘါထုကဖၣ်တၢ်လၢသုဂီၢ်ဒ်သိးပကစၢ် ယွၤကဒုးကြၢးဒုးဘၣ်သုဒီးတၢ်အိၣ်မူလၢအဝဲဒၣ်ကိးဃီၤ သုလၢသုကအိၣ်မူအီၤန့ၣ်လီၤ. ဒီးခီဖျိအစိအကမီၤန့ၣ်, မ်ကစၢ်ယွၤမၤစၢၤသုလၢသုကမၤတၢ်အဂ့ၤတမံၤလၢ်လၢ်လၢ သုသးအိၣ်မၤအီၤ, ဒီးမၤလၢမၤပှဲၤတၢ်ဖံးတၢ်မၤလၢ သုမၤတ့ၢ်လံအီၤခီဖျိတၢ်စူၢ်တၢ်နာ်န့ၣ်တက့ၢ်.
12 လၢကျဲဒ်အံၤအပူၤန့ၣ် ပကစၢ်ယ့ၣ်ၡူးအမံၤကဒိးန့ၢ်တၢ်လၤ ကပီၤလၢသုအိၣ်ဒီးသုကဒိးန့ၢ်တၢ်လၤကပီၤလၢအဝဲဒၣ် အအိၣ်, ခီဖျိပကစၢ်ယွၤဒီးကစၢ်ယ့ၣ်ၡူးခရံာ်အဘျုးအဖှိၣ်န့ၣ်လီၤ.