ပှၤသ့းစၤလနံဖိတဖၣ်အအိၣ်
အခီၣ်ထံးတဘ့ၣ်
THESSALONIANS
စီၤပီလူးအလံာ်ပရၢဆူပှၤသ့းစၤလနံဖိတဖၣ်အအိၣ်အဆိ ကတၢၢ်တဘ့ၣ်ဘၣ်တၢ်ကွဲးအီၤဒ်သိးအကဟ့ၣ်ဆူၣ်ထီၣ် ပှၤခရံာ်ဖိဖဲန့ၣ်တဖၣ်အဂံၢ်အဘါဒီးကတိၤဒုးဂၢၢ်ဒုးကျၢၤထီၣ်က့ၤ အသးလီၤ. အဝဲဒၣ်ပာ်ဖျါထီၣ်အတၢ်စံးဘျုးစံးဖှိၣ်လၢအနၢ်ဟူဘၣ် တၢ်ကစီၣ်ဘၣ်ဃးအဝဲသ့ၣ်အတၢ်စူၢ်တၢ်နာ်ဒီးတၢ်အဲၣ်တၢ်ကွံ အဃိလီၤ. အဝဲဒၣ်ဒုးသ့ၣ်နီၣ်ထီၣ်အဝဲသ့ၣ်ဘၣ်ဃးတၢ်အိၣ်မူလၢ အဝဲဒၣ်အိၣ်မူတ့ၢ်ဝဲဖဲအအိၣ်ဒီးအဝဲသ့ၣ်အဆၢကတီၢ်အဂ့ၢ်ဝံၤ အလီၢ်ခံစံးဆၢဝဲတၢ်သံကွၢ်တဖၣ်လၢအအိၣ်ထီၣ်လၢတၢ်အိၣ်ဖှိၣ် အပူၤဘၣ်ဃးဒီးခရံာ်အတၢ်ဟဲက့ၤအဂ့ၢ်လီၤ. ပှၤစူၢ်က့ၤနာ်က့ၤတၢ်တဂၤလၢအသံဝဲတချုးခရံာ်အတၢ်ဟဲက့ၤ န့ၣ်, ဒိးန့ၢ်ဘၣ်ဃုာ်တၢ်မူအထူအယိာ်လၢအကဘၣ်တၢ်ဒုး အိၣ်ထီၣ်အီၤလၢခရံာ်အတၢ်ဟဲက့ၤန့ၣ်, ကသ့ဒံးဝဲကစီဒီဧါ. ဒီးခရံာ်ကဟဲကဒီးဝဲဖဲဆၢကတီၢ်မတၤလဲၣ်. ဖဲဘျီအဝဲအံၤ, စီၤပီလူးဟံးန့ၢ်အခွဲးအယာ်လၢအကတဲဘၣ်အဝဲသ့ၣ်ဒ်သိး အကဖံးကမၤဒံးတၢ်ဆူညါကစုဒုဖဲအဝဲသ့ၣ်အိၣ်ခိးကွၢ်လၢ် ခရံာ်အတၢ်ဟဲက့ၤလၢတၢ်မုၢ်လၢ်အပူၤအဖၢမုၢ်န့ၣ်လီၤ.
1
1 လၢစီၤပီလူး, စီၤစံလၤဒီးစီၤတံၤမသ့း, ဆူသ့းစၤလနံအတၢ်အိၣ်ဖှိၣ်ဖိတဖၣ်လၢအဘၣ်ဃးဒီးပၢ် ကစၢ်ယွၤဒီးကစၢ်ယ့ၣ်ၡူးခရံာ်အအိၣ်,
မ်တၢ်ဘျုးတၢ်ဖှိၣ်ဒီးတၢ်ဃူတၢ်ဖိးအိၣ်ဒီးသုတက့ၢ်.
2 ထီဘိန့ၣ်, ပစံးဘျုးစံးဖှိၣ်ကစၢ်ယွၤလၢသုဝဲကိးဂၤဒဲး အဃိဒီးပယၢၤထီၣ်ဘၣ်သုလၢပတၢ်ထုကဖၣ်အပူၤတဘိယူၢ်ဃီလီၤ.
3 တဘျီလၢ်လၢ်ဖဲပဃ့ဘါထုကဖၣ်တၢ်ဆူပကစၢ်ယွၤဒီးပပၢ် အအိၣ်န့ၣ်, ပသ့ၣ်နီၣ်ထီၣ်သုအိၣ်မူမၤထွဲသုတၢ်စူၢ်တၢ်နာ် အခံဒ်လဲၣ်, သုဖံးသုမၤတၢ်ဆူၣ်ဆူၣ်လၢတၢ်အဲၣ်အဃိဒ်လဲၣ်, ဒီးသုတၢ်မုၢ်လၢ်လၢပကစၢ်ယ့ၣ်ၡူးခရံာ်အပူၤဂၢၢ်ကျၢၤဒ်လဲၣ် အဂ့ၢ်န့ၣ်လီၤ.
4 ယဒီပုၢ်ဝဲၢ်သ့ၣ်ဧၢ, ပသ့ၣ်ညါလၢကစၢ်ယွၤအဲၣ်သု, ဒီးဃုထၢထီၣ်တ့ၢ်လံသုဒ်သိးသုကကဲထီၣ်အတၢ်ဒၣ်ဝဲ န့ၣ်လီၤ.
5 အဂ့ၢ်ဒ်အံၤ, ပဟဲစိာ်န့ၢ်သုတၢ်သးခုကစီၣ်တမ့ၢ်ထဲလၢတၢ် ကတိၤဧိၤန့ၣ်ဘၣ်. မ့မ့ၢ်အိၣ်စ့ၢ်ကီးဒီးတၢ်စိတၢ်ကမီၤ, သးစီဆှံ, ဒီးတၢ်စူၢ်ဂၢၢ်နာ်ကျၢၤလၢတၢ်သးခုကစီၣ်အံၤမ့ၢ်ဝဲတီဝဲအဂ့ၢ်န့ၣ်လီၤ. ဖဲပအိၣ်ဒီးသုအဖၢမုၢ်ပအိၣ်မူဒ်လဲၣ်န့ၣ်သုသ့ၣ်ညါသုဝဲလီၤ. တၢ်သ့ၣ်တဖၣ်အံၤခဲလၢာ်န့ၣ်, မ့ၢ်ဒၣ်လၢသုဂီၢ်လီၤ.
6 သုတူၢ်ဘၣ်တၢ်မၤအၢမၤနးသုအဒိၣ်အမုၢ်နာ်သက့, သုတူၢ်လိာ်တၢ်သးခုအကစီၣ်လၢတၢ်သးခုလၢ သုဒိးန့ၢ်ဘၣ်လၢသးစီဆှံအအိၣ်သတးဒီး, သုကဲထီၣ်ပှၤကွၢ်လိမၤဒိးပှၤဒီးကစၢ်န့ၣ်လီၤ.
7 လၢတၢ်န့ၣ်အဃိ, သုကဲထီၣ်တၢ်ဒိတၢ်တဲာ်လၢပှၤစူၢ်က့ၤနာ်က့ၤ ခရံာ်ခဲလၢာ်ဖဲကီၢ်မၤက့းဒနံဒီးကီၢ်အဃါယၤတဖၣ်အဂီၢ်န့ၣ်လီၤ.
8 အဂ့ၢ်ဒ်အံၤ, တမ့ၢ်ထဲလၢတၢ်ကစီၣ်လၢသုရၤလီၤအီၤဘၣ်ဃးဒီး ကစၢ်န့ၣ်လဲၤတုၤကီၢ်မၤက့းဒနံဒီးကီၢ်အဃါယၤဒီကီၢ်န့ၣ်ဘၣ်. မ့မ့ၢ်, တၢ်ကစီၣ်ဘၣ်ဃးဒီးသုတၢ်စူၢ်တၢ်နာ်ကစၢ်ယွၤန့ၣ်လဲၤတုၤ လၢတၢ်လီၢ်ကိးပူၤဒဲးလီၤ. လၢတၢ်န့ၣ်အဃိ, ပစံးတၢ်အလီၢ် တအိၣ်နီတမံၤဘၣ်.
9 ပှၤခဲလၢာ်န့ၣ်စံးကတိၤတၢ်ဘၣ်ဃးသုတၢ်တူၢ်လိာ်မုာ်ပှၤဖဲ ပလဲၤအိၣ်သကိးသုအဆၢကတီၢ်, ဒီးဘၣ်ဃးသုတၢ်ဃၣ်ကွံာ်သုသးလၢတၢ်ဂီၤတၢ်ဖီၣ်ဒီးသုတၢ်ဃၣ် ကဒါက့ၤသုသးဆူကစၢ်ယွၤအအိၣ်, ဒ်သိးသုကမၤကစၢ်ယွၤလၢအတီဒီးမူဝဲတဂၤအတၢ်,
10 ဒီးအိၣ်ခိးအဖိခွါအတၢ်ဟဲလီၤလၢမူခိၣ်, အဖိခွါယ့ၣ်ၡူးလၢအဝဲဒၣ်ဒုးဂဲၤဆၢထၢၣ်က့ၤအီၤလၢတၢ်သံတ ဂၤလၢအဒုးပူၤဖျဲးထီၣ်ပှၤလၢကစၢ်ယွၤအတၢ်သးဒိၣ်လၢ အကဟဲန့ၣ်လီၤ.