29
1 ဒီးစီၤယၤကိာ်လဲၤဆူညါကွ့ၢ်ကွ့ၢ်ဒီးလဲၤဝဲလိၤလိၤဆူကီၢ် လၢမုၢ်ထီၣ်န့ၣ်လီၤ.
2 သတူၢ်ကလာ်အဝဲဟဲတုၤဝဲဆူထံပူၤတပူၤလၢအအိၣ်လၢစံာ်ပျီတဖၣ် အပူၤ, အိၣ်ဒီးသိအဖုသၢဖုကိာ်လီၤဝးတရံးအီၤန့ၣ်လီၤ. ထံပူၤအံၤမ့ၢ်တၢ်လီၢ်လၢသိအဖုအဂီၢ်တဖၣ်ဘၣ်တၢ်ဒုးအီအီၤထံ အလီၢ်, ဒီးလၢၢ်ဖးဒိၣ်အိၣ်ဝဲတဖျၢၣ်လၢထံပူၤအံၤအခိၣ်ထိးန့ၣ်လီၤ.
3 ဒီးဖဲလၢသိအဖုအဂီၢ်ခဲလၢာ်ဟဲတုၤဖှိၣ်ဖဲန့ၣ်တဘျီဂ့ၤ တဘျီဂ့ၤန့ၣ်ပှၤကွၢ်သိတဖၣ်တလ့ၣ်ကွံာ်လၢၢ်န့ၣ်ဒီးဒုးအီသိ တဖၣ်လၢထံန့ၣ်လီၤ. အန့ၣ်ဝံၤဒီး, တလ့ၣ်ကဒါက့ၤလၢၢ်လၢအလီၢ်ဒၣ်ဝဲ န့ၣ်လီၤ.
4 စီၤယၤကိာ်သံကွၢ်ပှၤကွၢ်သိတဖၣ်, “ယတံၤသကိးသ့ၣ်ဧၢ, သုဟဲလၢလဲၣ်”.
ဒီးအဝဲသ့ၣ်စံးဆၢဝဲ, “လၢဝ့ၢ်ဟၤရၣ်န့ၣ်လီၤ.”
5 အဝဲသံကွၢ်ဝဲ, “မ့ၢ်သုသ့ၣ်ညါစီၤနၤဃိၢ်အဖိခွါစီၤလၤဘၣ် န့ၣ်ဧါ.”
ဒီးအဝဲသ့ၣ်စံးဆၢဝဲ, “မ့ၢ်ပသ့ၣ်ညါလီၤ.”
6 အဝဲသံကွၢ်ဝဲ, “မ့ၢ်အအိၣ်မုာ်ကစီဒီဧါ.”
ဒီးအဝဲသ့ၣ်စံးဆၢဝဲ , “အိၣ်မုာ်ဝဲလီၤ. ကွၢ်, အဖိမုၣ်နီၢ်ရၤဃ့လးဟဲလၢန့ၣ်ဃုာ်ဒီးအသိအဖုအဂီၢ်န့ၣ် တက့ၢ်.”
7 ဒီးစီၤယၤကိာ်စံးဝဲဒၣ်, “မုၢ်တၢ်ကပီၤအိၣ်ဒံးဝဲဖးထီ ဒီးတမ့ၢ်ဘၣ်အဆၢကတီၢ်လၢတၢ်ဝီနုာ်က့ၤသိအဖုအဂီၢ်တဖၣ်ဒံးဘၣ် န့ၣ်, ဘၣ်မနုၤလၢသုတဒုးအီအီၤလၢထံဒီးဆှၢကဒါက့ၤဆူတၢ်အီၣ် အဆၣ်အလီၢ်ဘၣ်န့ၣ်လဲၣ်.”
8 ဒီးအဝဲသ့ၣ်စံးဆၢဝဲ, “တချုးလၢကယဲၢ်သိအဖုအဂီၢ်တဖၣ်ဟဲတုၤဖှိၣ် ဖဲအံၤဒီးတချုးပှၤတလ့ၣ်ကွံာ်လၢၢ်လၢထံပူၤအခိၣ်ထိး ဘၣ်န့ၣ်ပမၤတသ့ဘၣ်. သိအဖုအဂီၢ်မ့ၢ်ဟဲတုၤဖှိၣ်ဒီး, ပကဒုးအီအဝဲသ့ၣ်လၢထံလီၤ.”
9 ဖဲစီၤယၤကိာ်ကတိၤဒံးတၢ်ဒီးအဝဲသ့ၣ်အဖၢမုၢ်န့ၣ်နီၢ်ရၤဃ့လး ဟဲတုၤဒီးအသိအဖုအဂီၢ်န့ၣ်လီၤ.
10 တုၤစီၤယၤကိာ်ထံၣ်နီၢ်ရၤဃ့လးဃုာ်ဒီးအဖါတံၢ်စီၤလၤဘၣ် အသိတဖၣ်န့ၣ်လဲၤဝဲဆူထံပူၤဒီးတလ့ၣ်ကွံာ်လၢၢ်ဝံၤဒုးအီသိ တဖၣ်လၢထံန့ၣ်လီၤ.
11 ဒီးနၢမူဝဲနီၢ်ရၤဃ့လးဒီးကိးထီၣ်ဝဲလၢတၢ်သူၣ်ခုသးခု အဃိလီၤ.
12 စီၤယၤကိာ်စံးဘၣ်အီၤ, “ယမ့ၢ်နပၢ်အဘူးအတံၢ်နီၢ်ရံးဘကၤအဖိ ခွါလီၤ.”
နီၢ်ရၤဃ့လးဃ့ၢ်ဝဲဒ်သိးကတဲဘၣ်အပၢ်န့ၣ်လီၤ.
13 ဒီးတုၤစီၤလၤဘၣ်နၢ်ဟူအဖိဒိၣ်ခွါစီၤယၤကိာ်အကစီၣ်န့ၣ်လဲၤ ဃ့ၢ်ဝဲလၢကထံၣ်လိာ်အီၤဒီးဖိးဃုဃာ်အီၤဒီးနၢမူအီၤ, ဒီးဟဲက့ၤကိးအီၤဆူအဟံၣ်ပူၤန့ၣ်လီၤ. တုၤစီၤယၤကိာ်တဲစီၤလၤဘၣ်လၢကယဲၢ်တၢ်ခဲလၢာ်လၢအမၤတ့ၢ်အသး ဝံၤဒီး,
14 စီၤလၤဘၣ်စံးဘၣ်အီၤ, “နမ့ၢ်ယသွံၣ်ဒီးယညၣ်နီၢ်နီၢ်လီၤ.” ဒီးစီၤယၤကိာ်အိၣ်ဖဲန့ၣ်ဒီတလါန့ၣ်လီၤ.
15 ဒီးစီၤလၤဘၣ်စံးဘၣ်စီၤယၤကိာ်, “မ့ၢ်လၢနမ့ၢ်ယဘူးယတံၢ်အ ဃိနတကြၢးမၤတၢ်လၢယဂီၢ်ကလီကလီဘၣ်. နသးလီတၢ်အဘူးအလဲဆံးအါလဲၣ်.”
16 စီၤလၤဘၣ်အိၣ်ဒီးအဖိမုၣ်ခံဂၤန့ၣ်လီၤ. အဒိၣ်တဂၤန့ၣ်အမံၤမ့ၢ်ဝဲနီၢ်လ့ၤအၤဒီးအဆံးတဂၤမ့ၢ်ဝဲ နီၢ်ရၤဃ့လးန့ၣ်လီၤ.
17 ဒီးနီၢ်လ့ၤအၤန့ၣ်အမဲာ်ချံတဖၣ်ဘံယုၤဝဲဒီးနီၢ်ရၤဃ့လး န့ၣ်အက့ၢ်အဂီၤဂ့ၤဝဲဒီးဃံလၤဝဲလီၤ.
18 စီၤယၤကိာ်အဲၣ်ဝဲနီၢ်ရၤဃ့လးအဃိဒီးစံးဝဲ, “နမ့ၢ်ပျဲယဖျီဃုာ်ယသးဒီးနီၢ်ရၤဃ့လၤန့ၣ်ယကမၤတၢ်လၢနဂီၢ် နွံနံၣ်လီၤ.”
19 ဒီးစီၤလၤဘၣ်စံးဆၢအီၤ, “ယသးအိၣ်ဟ့ၣ်အီၤလၢနၤဒိၣ်န့ၢ် ယကဟ့ၣ်ပှၤအဂၤတဂၤလီၤ.အိၣ်ဖဲအံၤတက့ၢ်.”
20 စီၤယၤကိာ်မၤတ့ၢ်တၢ်နွံနံၣ်ဒ်သိးကဒိးန့ၢ်ဘၣ်နီၢ်ရၤဃ့လး အဂီၢ်လီၤ. တၢ်ဆၢကတီၢ်မၤအသးဒ်စှၤနံၤစှၤသီအသိးလၢအဂီၢ်လီၤ. အဂ့ၢ်ဒ်အံၤ, အဝဲအဲၣ်ဘၣ်ပိာ်မုၣ်န့ၣ်လီၤ.
21 ဒီးစီၤယၤကိာ်စံးဘၣ်စီၤလၤဘၣ်, “တၢ်ဆၢကတီၢ်ထီၣ်ဘးလံ. ပျဲယဖျီဃုာ်ယသးဒီးနဖိမုၣ်တက့ၢ်.”
22 ဒီးစီၤလၤဘၣ်မၤတၢ်ဖျီအမူးဒီးကွဲပှၤကိးဂၤဒဲးန့ၣ်လီၤ.
23 ဘၣ်ဆၣ်ဒီးလၢနၤအဝဲန့ၣ်, အဝဲလဲၤဆှၢနီၢ်လ့ၤအၤလၢနီၢ်ရၤဃ့ လးအလီၢ်, ဆူစီၤယၤကိာ်အအိၣ်ဒီးစီၤယၤကိာ်မံဃုာ်ဂဲၤဃုာ်ဒီးနီၢ်လ့ၤ အၤန့ၣ်လီၤ.
24 (ဒီးစီၤလၤဘၣ်ဟ့ၣ်လီၤဝဲအကုၢ်ပိာ်မုၣ်ဖိနီၢ်စံၤလပၤဆူအဖိ မုၣ်နီၢ်လ့ၤအၤဒ်အခ့အပှၤပိာ်မုၣ်အသိးန့ၣ်လီၤ.)
25 ဒီးလၢမုၢ်ဆ့ၣ်ထီၣ်လၢခံတနံၤဖဲစီၤယၤကိာ်သ့ၣ်ညါဝဲလၢ အမ့ၢ်နီၢ်လ့ၤအၤန့ၣ်, ဒီးစီၤယၤကိာ်လဲၤဝဲဆူစီၤလၤဘၣ်အအိၣ်ဒီးစံးဝဲ, “ဘၣ်မနုၤအဃိ, နမၤတၢ်ဒ်အံၤလၢယၤန့ၣ်လဲၣ်. ယမၤတၢ်လၢယကန့ၢ်ဘၣ်နီၢ်ရၤဃ့လးအဂီၢ်လီၤ. ဘၣ်မနုၤလၢနလီယၤန့ၣ်လဲၣ်.”
26 စီၤလၤဘၣ်စံးဆၢဝဲဒၣ်, “တၢ်ဟ့ၣ်လီၤဆိဖိမုၣ်အဆံးလၢအဒိၣ် အမဲာ်ညါန့ၣ်တမ့ၢ်တၢ်လီၢ်ဖဲအံၤအလုၢ်အလၢ်ဘၣ်.
27 အိၣ်ခိးတုၤတၢ်တ့တၢ်ဖျီအမူးအကတီၢ်တနွံဝံၤတက့ၢ်. ဒီးယကဟ့ၣ်နၤလၢနီၢ်ရၤဃ့လးဖဲနမၤတၢ်လၢယဂီၢ်ဆူညါနွံနံၣ် န့ၣ်လီၤ.”
28 စီၤယၤကိာ်ဘၣ်သူၣ်ဘၣ်သးဝဲဒီးဖဲတၢ်တ့တၢ်ဖျီအမူးတနွံဝံၤ အလီၢ်ခံစီၤလၤဘၣ်ဟ့ၣ်အီၤလၢအဖိမုၣ်နီၢ်ရၤဃ့လးဒ်အမါအသိး န့ၣ်လီၤ.
29 (ဒီးစီၤလၤဘၣ်ဟ့ၣ်အကုၢ်ပိာ်မုၣ်ဖိနီၢ်ဘံၤလဟၤဆူအဖိမုၣ် နီၢ်ရၤဃ့လးဒ်အခ့အပှၤပိာ်မုၣ်အသိးန့ၣ်လီၤ.)
30 ဒီးစီၤယၤကိာ်မံဃုာ်ဂဲၤဃုာ်စ့ၢ်ကီးဒီးနီၢ်ရၤဃ့လး, ဒီးအဲၣ်ဝဲနီၢ်ရၤဃ့လးအါန့ၢ်နီၢ်လ့ၤအၤန့ၣ်လီၤ. ဒီးမၤကဒီးတၢ်လၢစီၤလၤဘၣ်အဂီၢ်ဆူညါနွံနံၣ်န့ၣ်လီၤ.
31 ဒီးတုၤယွၤထံၣ်ဝဲဒၣ်လၢနီၢ်လ့ၤအၤဘၣ်တၢ်အဲၣ်အီၤစှၤန့ၢ် နီၢ်ရၤဃ့လးန့ၣ်မၤဝဲဒ်သိးနီၢ်လ့ၤအၤအိၣ်ဒီးအဖိကသ့ဝဲ အဂီၢ်န့ၣ်လီၤ. မ့မ့ၢ်, နီၢ်ရၤဃ့လးအိၣ်ဒံးဝဲဒ်ပှၤတူာ်ဖိအသိးန့ၣ်လီၤ.
32 ဒီးနီၢ်လ့ၤအၤဒၢထီၣ်ဒီးဆံးစၢ်န့ၣ်အဖိခွါတဂၤလီၤ. ဒီးစံးဝဲ, “ယွၤထံၣ်တ့ၢ်လံယတၢ်ကီတၢ်ခဲလံ, ဒီးခဲကနံၣ်အံၤယဝၤကအဲၣ်ယၤလီၤ.” ဒီးယုၢ်န့ၢ်အမံၤလၢစီၤရူၤဘ့ၣ်လီၤ.
33 နီၢ်လ့ၤအၤဒၢထီၣ်ကဒီးဝဲဒီးဆံးစၢ်ထီၣ်အဖိခွါလၢခံတဂၤ န့ၣ်လီၤ. ဒီးစံးဝဲ, “ယွၤဟ့ၣ်လံယၤယဖိခွါအံၤစ့ၢ်ကီးလီၤ. အဂ့ၢ်ဒ်အံၤ, ယွၤနၢ်ဟူတ့ၢ်လၢယတဘၣ်တၢ်အဲၣ်ယၤအဃိန့ၣ်လီၤ.” ဒီးယုၢ်အမံၤလၢစီၤစူၤမ့းအိၣ်လီၤ.
34 ဒီးဒၢထီၣ်ကဒီးဝဲဒီးဆံးစၢ်ထီၣ်အဖိခွါတဂၤန့ၣ်လီၤ. ဒီးစံးဝဲ, “ဒီးခဲကနံၣ်အံၤ, ယဝၤကဘျုးအသးအါထီၣ်ဒီးယၤ လီၤ. အဂ့ၢ်ဒ်အံၤ, ယဆံးစၢ်န့ၢ်အဖိခွါသၢဂၤအဃိလီၤ.” ဒီးယုၢ်အမံၤလၢစီၤလ့ၤဝံလီၤ.
35 ဒီးဒၢထီၣ်ကဒီးဝဲဒီးဆံးစၢ်န့ၢ်အဖိခွါအဂၤတဂၤစ့ၢ်ကီး လီၤ. ဒီးစံးဝဲ, “အအံၤတဘျီယကစံးထီၣ်ပတြၢၤယွၤလီၤ.” ဒီးယုၢ်န့ၢ်အမံၤလၢစီၤယူဒၤလီၤ. ဒီးပိာ်မုၣ်န့ၣ်ဆိတ့ၢ်ဝဲ တၢ်အိၣ်ဒံၣ်အိၣ်ဖိန့ၣ်လီၤ.