15
1 တၢ်န့ၣ်တဖၣ်အလီၢ်ခံစီၤအၤဘြၣ်ဒိးန့ၢ်ဘၣ်တၢ်ထံၣ်လၢညါခီ တမံၤဒီးနၢ်ဟူယွၤစံးဘၣ်အီၤ, “စီၤအၤဘြၣ်ဧၢ, ပျံၤတၢ်တဂ့ၤ, ယကခိးတြီကွံာ်တၢ်အၢလၢနၤဒီးဟ့ၣ်လီၤနၤတၢ်ဘျုးတၢ်ဖှိၣ်ဖး ဒိၣ်တမံၤန့ၣ်လီၤ.”
2 ဘၣ်ဆၣ်စီၤအၤဘြၣ်စံးဆၢဝဲဒၣ်, “ယွၤပၢဘၣ်တၢ်ခဲလၢာ်ကစၢ်ဧၢ, နတၢ်ဟ့ၣ်ဘျုးကမၤဂ့ၤယၤမနုၤတမံၤလဲၣ်. အဂ့ၢ်ဒ်အံၤ, ယဖိတအိၣ်နီတဂၤဘၣ်. ပှၤလၢကန့ၢ်သါတၢ်ဘၣ်ဃးဒီး ယၤန့ၣ်မ့ၢ်ဒၣ်ပှၤဝ့ၢ်ဒၤမ့ၤစ့းဖိစီၤအလံၤဧ့စ့ၢ်တဂၤဧိၤ န့ၣ်လီၤ.
3 နတဟ့ၣ်လီၤတ့ၢ်ယၤဖိနီတဂၤဘၣ်. ဒီးပှၤလၢကန့ၢ်သါယတၢ်စုလီၢ် ခီၣ်ခိၣ်န့ၣ်မ့ၢ်ဒၣ်ယကုၢ်တဖၣ်အကျါတဂၤလီၤ.”
4 တုၤနုၤတစု, အဝဲနၢ်ဟူယွၤစံးဘၣ်ကဒီးအီၤ, “နကုၢ်စီၤအလံၤ ဧ့စ့ၢ်အံၤတန့ၢ်သါဘၣ်နတၢ်စုလီၤခီၣ်ခိၣ်ဘၣ်. နဖိခွါဒၣ်နဲကမ့ၢ်ပှၤန့ၢ်သါတၢ်လီၤ.”
5 ယွၤကိးထီၣ်အီၤဆူတၢ်ချၢဒီးစံးဝဲဒၣ်, “ကွၢ်ထီၣ်ဆူမူခိၣ် ဒီးဂံၢ်ကွၢ်ဆၣ်ဧိၤဖီဧိၤန့ၣ်တက့ၢ်. နကအိၣ်ဒီးနစၢၤနသွဲၣ်အါအါဂီၢ်ဂီၢ်ဒ်န့ၣ်အသိးလီၤ.”
6 စီၤအၤဘြၣ်နာ်ယွၤဒီးမ့ၢ်လၢတၢ်အံၤအဃိယွၤဘၣ်သူၣ်ဘၣ်သးအီၤ ဒီးတူၢ်လိာ်အီၤန့ၣ်လီၤ.
7 ဒီးယွၤစံးဘၣ်အီၤ, “ယမ့ၢ်ယွၤလၢအဒုးဟးထီၣ်နၤလၢဝ့ၢ်အူၢ် လၢကီၢ်ဘၤဘူၤလိၣ်အပူၤဒ်သိးယကဟ့ၣ်လီၤနၤထံကီၢ်အံၤလၢနတၢ် ဒၣ်နဲအဂီၢ်န့ၣ်လီၤ.”
8 ဘၣ်ဆၣ်ဒီး, စီၤအၤဘြၣ်သံကွၢ်ထီၣ်ဝဲဒၣ်, “ယွၤပၢဘၣ်တၢ်ခဲလၢာ် ကစၢ်ဧၢ, တၢ်အံၤကမ့ၢ်ယတၢ်န့ၣ်ယသ့ၣ်ညါကသ့ဒ်လဲၣ်.”
9 ဒီးယွၤစံးဆၢအီၤ, “ဟဲစိာ်န့ၢ်ယၤလၢဂီၤဖံးမိၢ်တဒု, မဲာ်တဲးလဲးတဒုဒီးသိဖါတဒုလၢအသးအိၣ်သၢနံၣ်စုာ်စုာ်ဒီး ထိၣ်လွံၢ်တဘ့ၣ်ဒီးထိၣ်ကးက့ၣ်ဖိတဘ့ၣ်တက့ၢ်.”
10 ဒီးစီၤအၤဘြၣ်ဟဲစိာ်ဆၣ်ဖိကီၢ်ဖိသ့ၣ်တဖၣ်အံၤဆူယွၤအအိၣ်, ဒီးဒီၣ်တဲာ်ဝဲခံခီပှဲၤသိးသိးန့ၣ်လီၤ. ဒီးပာ်လီၤဝဲတၢ်အခီတဖၣ်တခီပၤသဃီၤလိာ်အသးခံကျိၤန့ၣ် လီၤ. မ့မ့ၢ်ထိၣ်တဖၣ်န့ၣ်တကူးတဲာ်ဝဲဒၣ်ဘၣ်.
11 လီတာ်တဖၣ်ဟဲလီၤလၢတၢ်စိၣ်တဖၣ်အလိၤဒီးစီၤအၤဘြၣ်နီၣ်ကွံာ် ဃါကွံာ်အီၤလီၤ.
12 ဒီးဖဲမုၢ်လီၤနုာ်အကတီၢ်န့ၣ်စီၤအၤဘြၣ်မံဘၣ်အသးတုၤအနၢ် လီၤယိာ်ဝဲဒီးတၢ်ပျံၤတၢ်ဖုးဖးဒိၣ်လီၤဘၣ်လၢအလိၤန့ၣ်လီၤ.
13 ယွၤစံးဘၣ်အီၤ, “နစၢၤနသွဲၣ်တဖၣ်ကကဲထီၣ်ပှၤသမှံၤလၢပှၤတခီ ဘီမုၢ်အကီၢ်တဘ့ၣ်အပူၤလီၤ. အဝဲသ့ၣ်ကကဲထီၣ်ကုၢ်တဖၣ်ဖဲန့ၣ်ဒီးကဘၣ်တၢ်မၤအီၤအၢအၢသီသီ အနံၣ်လွံၢ်ကယၤန့ၣ်လီၤ.
14 ဘၣ်ဆၣ်ဒီး, ယကစံၣ်ညီၣ်ပှၤတကလုာ်လၢအမၢကဲကုၢ်အဝဲသ့ၣ်, ဒီးတုၤအဝဲသ့ၣ်ဟးထီၣ်ကွံာ်လၢပှၤထံပှၤကီၢ်န့ၣ်အဝဲသ့ၣ်ကစိာ် ဃုာ်တၢ်ထူးတၢ်တီၤအါအါဂီၢ်ဂီၢ်န့ၣ်လီၤ.
15 နနီၢ်ကစၢ်ဒၣ်နဲနကအိၣ်ကၢအိၣ်ခိးတုၤနသးပှၢ်တုာ်, နကသံဘၣ်မုာ်မုာ်ခုၣ်ခုၣ်ဒီးနကဘၣ်တၢ်ခူၣ်လီၤကွံာ်နၤန့ၣ်လီၤ.
16 တချုးလၢနစၢၤနသွဲၣ်တဖၣ်ဟဲက့ၤဆူအံၤန့ၣ်ကအိၣ်ဝဲလွံၢ်စိၤ လီၤ. အဂ့ၢ်ဒ်အံၤ, ယတနီၣ်ထီၣ်ဟီထီၣ်ကွံာ်ပှၤအမိၢ်ဖိတဖၣ်တချုးဒံး ဘၣ်လၢအဝဲသ့ၣ်အၢထီၣ်သီထီၣ်ဒိၣ်ဒိၣ်ကလဲာ်တုၤအကဘၣ်တၢ်စံၣ်ညီၣ် အီၤန့ၣ်ဘၣ်.
17 ဒီးတုၤမုၢ်လီၤနုာ်တ့ၢ်လံဒီးတၢ်ခံးလီၤယုၢ်ကလာ်န့ၣ်မ့ၣ်အူ လုၢ်အသပၢၤတဖျၢၣ်ဒီးဆှီကဲၤကပျီၤတဘိအိၣ်ဖျါထီၣ်သတူၢ်ကလာ် ခီဂာ်တ့ၢ်ဖဲဆၣ်ဖိကီၢ်ဖိအကူာ်တဖၣ်အဘၢၣ်စၢၤန့ၣ်လီၤ.
18 တုၤနုၤတစု, ယွၤမၤတၢ်အၢၣ်လီၤအီလီၤဒီးစီၤအၤဘြၣ်ဖဲန့ၣ် လီၤ. ဒီးယွၤစံးဘၣ်စီၤအၤဘြၣ်, “ယအၢၣ်လီၤလၢယကဟ့ၣ်လီၤနစၢၤနသွဲၣ် တဖၣ်လၢထံကီၢ်ဒီဘ့ၣ်အံၤစးထီၣ်လၢကီၢ်အဲၤကူပတူးအဆၢဒီး တုၤလီၤဆူထံကျိဖရၤသး,
19 ဃုာ်ဒီးပှၤက့ၣ်ဖိ, ပှၤကနးဖိ, ပှၤကးမိၣ်ဖိ,
20 ပှၤဃ့ၤသးဖိ, ပှၤပရးစးဖိ, ပှၤရၤဖၤဖိ,
21 ပှၤအမိၢ်ဖိ, ပှၤကနၤဧၣ်ဖိ, ပှၤကံၢ်ကၣ်ဖိဒီးပှၤယဘူၣ်ဖိအထံအကီၢ်တဖၣ်န့ၣ်လီၤ.