လံာ်တၢ်ကဲထီၣ်အခီၣ်ထံး
GENESIS
လံာ်တၢ်ကဲထီၣ်အခီၣ်ထံးအခီပညီမ့ၢ်ဝဲ “တၢ်အခီၣ်ထံးခီၣ်ဘိ” န့ၣ်လီၤ. လံာ်အံၤတဲတၢ်ဘၣ်ဃးတၢ်တ့လီၤမူခိၣ်ဟီၣ်ခိၣ်, ပှၤကညီ အိၣ်ထီၣ်အဂံၢ်ထံး, တၢ်ဒဲးဘးဒီးတၢ်တူၢ်ဘၣ်ခီၣ်ဘၣ်လၢ ဟီၣ်ခိၣ်အတၢ်စးထီၣ်အသး, ဒီးတၢ်ဂ့ၢ်ဘၣ်ဃးကစၢ်ယွၤ အကျဲ, ဒီးကစၢ်ယွၤအတၢ်ဘၣ်ထွဲလိာ်အသးဒီးပှၤကညီ အဂ့ၢ်န့ၣ်လီၤ. လံာ်တၢ်ကဲထီၣ်အခီၣ်ထံးဘၣ်တၢ်နီၤဖးအီၤဆူတၢ်ဂ့ၢ်ဖးဒိၣ်ခံမံၤသ့ဝဲဒၣ် န့ၣ်လီၤ. ၁. အဆၢဒိၣ် ၁-၁၁. မ့ၢ်ဝဲတၢ်တ့လီၤပာ်လီၤဟီၣ်ခိၣ်ဒီးတၢ်စံၣ်စိၤတဲစိၤ အဂံၢ်ခိၣ်လၢအဘၣ်ထွဲဒီးပှၤကညီဟီၣ်ခိၣ်ဖိန့ၣ်လီၤ. ဖဲအံၤတၢ်ဂ့ၢ်တၢ်ကျိၤလၢအဘၣ်ဃးဒီးစီၤအၤဒၣ်ဒီးနီၢ်အံၣ်အု, စီၤကၤယံၣ်ဒီးစီၤဟ့းဘ့းလး, စီၤနိအၤဒီးထံလုၣ်ဘၢတၢ်, ဒီးဘၤဘူၤလိၣ်အတၢးထီၣ်ထီတဖၣ်ဘၣ်တၢ်ကွဲးနီၣ်အီၤန့ၣ်လီၤ. ၂. အဆၢဒိၣ် ၁၂-၅၀. မ့ၢ်ဝဲပှၤအံၣ်စရ့လးဖိအမိၢ်အပၢ်အဖံအဖုလၢပျၢၤတဖၣ်အတၢ်စံၣ်စိၤတဲစိၤအဂ့ၢ် န့ၣ်လီၤ. ပှၤအခီၣ်ထံးတဂၤန့ၣ်မ့ၢ်ဝဲစီၤအၤဘြၣ်ဟၣ်, ပှၤလၢအဘၣ်တၢ်သ့ၣ်ညါအီၤလီၤဆီဒၣ်တၢ်လၢအတၢ်စူၢ်တၢ်နာ်ဒီး အတၢ်စူၢ်ကစၢ်ယွၤအကလုၢ်အဃိန့ၣ်လီၤ. ပိာ်ထွဲထီၣ်အခံမ့ၢ်တၢ်တဲတဖၣ်လၢအဘၣ်ထွဲဒီးအဖိခွါစီၤအံၤစဲး, အလံၤစီၤယၤကိာ် (လၢအဘၣ်တၢ်ကိးစ့ၢ်ကီးအီၤလၢစီၤအံၣ်စရ့လး), ဒီးစီၤယၤကိာ်အဖိခွါတဆံခံဂၤလၢအမ့ၢ်ပှၤလၢအဒုးအိၣ်ထီၣ် ပှၤအံၣ်စရ့လးဖိတဆံခံဒူၣ်န့ၣ်လီၤ. တၢ်ဂ့ၢ်လီၤဆီလၢအဘၣ်တၢ်ပာ်ဖျါအီၤန့ၣ်မ့ၢ်ဝဲအဖိခွါအကျါ တဂၤလၢအမ့ၢ်စီၤယိၤသး, ဒီးတၢ်မၤအသးတဖၣ်လၢအဟဲစိာ်ဃီၤစီၤယၤကိာ်ဒီးအဖိခွါအဂၤတဖၣ် ဒီးအဒူၣ်ဖိထၢဖိသ့ၣ်တဖၣ်ဒ်သိးကဟဲ အိၣ်ဟဲဆိးလၢကီၢ်အဲၤကူပတူးအပူၤအဂ့ၢ်န့ၣ်လီၤ.
ဖဲလံာ်အံၤတဲတၢ်တဲတဖၣ်ဘၣ်ဃးဒီးပှၤဂီၢ်မုၢ်အဂ့ၢ်န့ၣ်, အခီၣ်ထံးဒီးအဆိကတၢၢ်မ့ၢ်တၢ်ဂ့ၢ်ဘၣ်ထွဲဒီးတၢ်လၢကစၢ်ယွၤမၤ တ့ၢ်ဝဲသ့ၣ်တဖၣ်န့ၣ်လီၤ. တၢ်ဂ့ၢ်စးထီၣ်အသးဒီးတၢ်သ့ၣ်ညါအၢၣ်လီၤနီၢ်နီၢ်လၢကစၢ်ယွၤ တ့လီၤပာ်လီၤမူခိၣ်ဟီၣ်ခိၣ်ဒီးကတၢၢ်ဝဲဒီးတၢ်အၢၣ်လီၤတမံၤ လၢကစၢ်ယွၤကပာ်ဖျါထွဲဒံးအတၢ်သးအိၣ်ဘၣ်အပှၤဂီၢ်မုၢ်န့ၣ် လီၤ. လၢလံာ်ဒီဘ့ၣ်အပူၤကစၢ်ယွၤမ့ၢ်တၢ်ဂ့ၢ်အမိၢ်ပှၢ်, ပှၤလၢအစံၣ်ညီၣ်ဒီးသိၣ်ဃီၣ်ပှၤလၢအမၤကမၣ်တၢ်တဖၣ်, ပၢဆှၢဒီးမၤစၢၤအပှၤဂီၢ်မုၢ်ဒီးသိန့ၢ်အဝဲသ့ၣ်အတၢ်စံၣ်စိၤတဲစိၤန့ၣ်လီၤ. လံာ်လၢပျၢၤတဘ့ၣ်အံၤဘၣ်တၢ်ကွဲးတ့ၢ်အီၤလၢကကွဲးနီၣ်ကွဲးဃါ တၢ်တဲဘၣ်ဃးဒီးပှၤဂီၢ်မုၢ်အတၢ်စူၢ်တၢ်နာ်ဒီးကမၤစၢၤအဝဲသ့ၣ် ဒ်သိးကဟံးဃာ်ဒုးမူဒံးတၢ်နာ်န့ၣ်လီၤ.
1
1 လၢထံးလၢသီဖဲကစၢ်ယွၤတ့လီၤပာ်လီၤတ့ၢ်မူခိၣ်ဒီးဟီၣ်ခိၣ်န့ၣ်,
2 ဟီၣ်ခိၣ်အက့ၢ်အဂီၤတအိၣ်ဘၣ်,ဒီးအိၣ်ကလီအိၣ်လီၤပျီဝဲလီၤ. ဒီးတၢ်ခံးသူအိၣ်ဝဲလၢပီၣ်လဲၣ်လၢအကးဘၢတၢ်ခဲလၢာ်အထံ ဖံးခိၣ်, ဒီးကစၢ်ယွၤအသးစီဆှံဟူးဂဲၤဝဲလၢထံဖံးခိၣ်န့ၣ်လီၤ.
3 ဒီးကစၢ်ယွၤခါလီၤအကလုၢ်,“မ်တၢ်ကပီၤအိၣ်ထီၣ်တက့ၢ်.” ဒီးတၢ်ကပီၤကဲထီၣ်ဝဲဒၣ်န့ၣ်လီၤ.
4 ကစၢ်ယွၤအသးခုသးမုာ်ဝဲလၢတၢ်လၢအထံၣ်ဝဲအဃိလီၤ. ဒီးအဝဲနီၤဖးကွံာ်တၢ်ကပီၤလၢတၢ်ခံး,
5 ဒီးတၢ်ကပီၤန့ၣ်ယုၢ်ဝဲအမံၤလၢမုၢ်နံၤ, ဒီးတၢ်ခံးန့ၣ်ယုၢ်ဝဲအမံၤလၢမုၢ်နၤန့ၣ်လီၤ. မုၢ်ဟါပူၤကွံာ်ဝဲ ဒီးမုၢ်ဂီၤဟဲဝဲ,တၢ်န့ၣ်မ့ၢ်မုၢ်နံၤအခီၣ်ထံးကတၢၢ်တနံၤလီၤ.
6 ဒီးကစၢ်ယွၤခါလီၤအကလုၢ်,“မ်မူကပိာ်လိၤကဲထီၣ်လၢကနီၤဖး ထံဒီးပာ်လီၤဖးအီၤလၢတၢ်လီၢ်ခံတီၤတက့ၢ်,”ဒီးတၢ်မၤအသးဒ်န့ၣ်လီၤ.
7 မၤသးဒ်န့ၣ်ဒီး,ကစၢ်ယွၤဒုးကဲထီၣ်မူကပိာ်လိၤ, ဒီးမူကပိာ်လိၤန့ၣ်နီၤဖးကွံာ်ဝဲထံလၢအဖီလာ်လၢထံလၢအဖီခိၣ်န့ၣ်လီၤ.
8 ကစၢ်ယွၤယုၢ်ဝဲမူကပိာ်လိၤအမံၤလၢ “မူခိၣ်” လီၤ. မုၢ်ဟါပူၤကွံာ်ဝဲဒီးမုၢ်ဂီၤဟဲဝဲဒီးတၢ်န့ၣ်မ့ၢ်မုၢ်ခံ နံၤတနံၤန့ၣ်လီၤ.
9 ဒီးကစၢ်ယွၤခါလီၤအကလုၢ်,“မ်ထံလၢမူခိၣ်အဖီလာ်ပာ်ဖှိၣ် အသးလၢအလီၢ်တပူၤဃီဒ်သိးခိကအိၣ်ဖျါတက့ၢ်.” ဒီးတၢ်မၤအသးဒ်န့ၣ်လီၤ.
10 ဒီးခိန့ၣ်ကစၢ်ယွၤယုၢ်ဝဲအမံၤလၢဟီၣ်ခိၣ်, ဒီးထံလၢအပာ်ဖှိၣ်ထီၣ်အသးတပူၤဃီန့ၣ်ယုၢ်ဝဲအမံၤလၢပီၣ်လဲၣ်န့ၣ်လီၤ. ဒီးကစၢ်ယွၤအသးခုသးမုာ်ဝဲလၢတၢ်လၢအထံၣ်ဘၣ်ဝဲအဃိလီၤ.
11 ဒီးအဝဲခါလီၤအကလုၢ်,“မ်ဟီၣ်ခိၣ်ဒုးမဲထီၣ်ကယဲၢ်တၢ်မုၢ်တၢ် ဘိအကလုာ်ကလုာ်လၢအဟ့ၣ်ထီၣ်ဘုဧိၤဟုဧိၤဒီးတၤသူတၤသၣ်န့ၣ်တက့ၢ်.” ဒီးတၢ်မၤအသးဒ်န့ၣ်လီၤ.
12 မၤသးဒ်န့ၣ်ဒီးဟီၣ်ခိၣ်ဒုးအိၣ်ထီၣ်ကယဲၢ်တၢ်မုၢ်တၢ်ဘိအကလုာ်ကလုာ်, ဒီးကစၢ်ယွၤအသးမုာ်သးခုဝဲလၢတၢ်လၢအထံၣ်ဘၣ်ဝဲအဃိလီၤ.
13 မုၢ်ဟါပူၤကွံာ်ဝဲဒီးမုၢ်ဂီၤဟဲဝဲ,ဒီးတၢ်န့ၣ်မ့ၢ်မုၢ်သၢနံၤတနံၤန့ၣ်လီၤ.
14 ဒီးကစၢ်ယွၤခါလီၤအကလုၢ်,“မ်တၢ်ကပီၤတဖၣ်ဟဲအိၣ်ဖျါထီၣ် လၢမူခိၣ်ဒ်သိးကနီၤဖးမုၢ်နံၤလၢမုၢ်နၤ,ဒီးကဲထီၣ်တၢ်ပနီၣ်တဖၣ် လၢမုၢ်နံၤမုၢ်သီတဖၣ်,နံၣ်ဧိၤလါဧိၤတဖၣ်ဒီးတၢ်ဆၢကတီၢ်တဖၣ်အဂီၢ်တက့ၢ်.
15 ဒီးကကပီၤထီၣ်လၢမူခိၣ်ဒ်သိးကဟ့ၣ်ထီၣ်တၢ်ကပီၤဆူဟီၣ်ခိၣ် န့ၣ်လီၤ.” ဒီးတၢ်မၤအသးဒ်န့ၣ်လီၤ.
16 ဒီးကစၢ်ယွၤတ့လီၤတၢ်ကပီၤအဒိၣ်ခံဖျၢၣ်လီၤ. မုၢ်န့ၣ်ဒ်သိးကပၢမုၢ်နံၤဒီးလါန့ၣ်ဒ်သိးကပၢမုၢ်နၤ, ဒီးတ့လီၤဆၣ်ဧိၤဖီဧိၤစ့ၢ်ကီးန့ၣ်လီၤ.
17 အဝဲပာ်လီၤဝဲတၢ်ကပီၤတဖၣ်လၢမူခိၣ်ဒ်သိးကကပီၤထီၣ်ဆူ ဟီၣ်ခိၣ်,
18 လၢကပၢမုၢ်နံၤဒီးမုၢ်နၤဒီးဒ်သိးအကနီၤဖးတၢ်ကပီၤလၢတၢ် ခံးတၢ်နၤန့ၣ်လီၤ. ဒီးကစၢ်ယွၤအသးမုာ်သးခုဝဲလၢတၢ်လၢအထံၣ်ဘၣ်ဝဲအဃိလီၤ.
19 မုၢ်ဟါပူၤကွံာ်ဝဲဒီးမုၢ်ဂီၤဟဲဝဲ, ဒီးတၢ်န့ၣ်မ့ၢ်မုၢ်လွံၢ်နံၤတနံၤန့ၣ်လီၤ.
20 ဒီးကစၢ်ယွၤခါလီၤအကလုၢ်, “မ်ထံဘၣ်တၢ်မၤပှဲၤအီၤဒီးတၢ်ဘၣ်တ့ လၢအမူဟူးဂဲၤလၢထံကျါသ့အကလုာ်ကလုာ်ဒီးမူကပိာ်လိၤ ဘၣ်တၢ်မၤပှဲၤအီၤဒီးထိၣ်ဧိၤလံာ်ဧိၤတဖၣ်တက့ၢ်.”
21 မၤသးဒ်န့ၣ်ဒီးကစၢ်ယွၤတ့လီၤပီၣ်လဲၣ်အတၢ်မုၢ်ဃၢ်ဖးဒိၣ်တဖၣ်, ကယဲၢ်တၢ်ဘၣ်တ့လၢအအိၣ်လၢထံကျါဒီးကယဲၢ်ထိၣ်ဧိၤလံာ်ဧိၤတဖၣ် န့ၣ်လီၤ. ဒီးကစၢ်ယွၤအသးမုာ်သးခုဝဲလၢတၢ်လၢအထံၣ်ဝဲဘၣ်ဝဲအဃိလီၤ.
22 ဒီးကစၢ်ယွၤဆိၣ်ဂ့ၤအဝဲသ့ၣ်ခဲလၢာ်ဒီးတဲဘၣ်တၢ်ဘၣ်တ့တဖၣ်လၢအမူဟူးဂဲၤ လၢထံကျါဒ်သိးကဖှံလီၤဖးထီၣ်အါထီၣ်လၢကမၤပှဲၤပီၣ်လဲၣ်, ဒီးတဲဘၣ်ထိၣ်ဧိၤလံာ်ဧိၤလၢကအါထီၣ်လၢအနီၣ်ဂံၢ်အဂီၢ်န့ၣ်လီၤ.
23 မုၢ်ဟါပူၤကွံာ်ဝဲဒီးမုၢ်ဂီၤဟဲဝဲ,ဒီးတၢ်န့ၣ်မ့ၢ်မုၢ်ယဲၢ်နံၤတနံၤန့ၣ်လီၤ.
24 ဒီးကစၢ်ယွၤခါလီၤအကလုၢ်, “မ်ဟီၣ်ခိၣ်ဒုးအိၣ်ထီၣ်ကယဲၢ်ဆၣ်ဖိကီၢ်ဖိ အကလုာ်ကလုာ်, အဒၢဒီးအမံၤ, အဒိၣ်ဒီးအဆံးတက့ၢ်.” ဒီးတၢ်မၤအသးဒ်န့ၣ်လီၤ.
25 မၤသးဒ်န့ၣ်ဒီးကစၢ်ယွၤတ့လီၤအဝဲသ့ၣ်ခဲလၢာ်ဒီးအဝဲအသးခု သးမုာ်လၢတၢ်လၢအထံၣ်ဘၣ်ဝဲအဃိန့ၣ်လီၤ.
26 ဒီးကစၢ်ယွၤစံးဝဲဒၣ်,“ဒီးခဲကနံၣ်အံၤပကတ့လီၤပာ်လီၤပှၤကညီတဖၣ်, လၢအကလီၤဂာ်ဒီးပှၤဒီးဒ်သိးသိးလိာ်အသးဒီးပှၤလီၤ. အဝဲသ့ၣ်ကအိၣ်ဒီးတၢ်စိတၢ်ကမီၤလၢဒ့ၣ်ဧိၤညၣ်ဧိၤ, ထိၣ်ဧိၤလံာ်ဧိၤဒီးကယဲၢ်ဆၣ်ဖိကီၢ်ဖိခဲလၢာ်, အဒၢဒီးအမံၤ, အဒိၣ်ဒီးအဆံးသ့ၣ်တဖၣ်အဖီခိၣ်န့ၣ်လီၤ.”
27 ဒီးကစၢ်ယွၤတ့လီၤပာ်လီၤပှၤကညီတဖၣ်,တ့အဝဲသ့ၣ်လီၤဂာ်ဒ် သိးသိးအကစၢ်ဒၣ်ဝဲလီၤ. အဝဲတ့လီၤပာ်လီၤအဝဲသ့ၣ်,ပိာ်ခွါဒီးပိာ်မုၣ်,
28 ဆိိၣ်ဂ့ၤအဝဲသ့ၣ်, ဒီးစံးဝဲဒၣ်, “မ်သုထီၣ်ဖိအါအါဂီၢ်ဂီၢ်,ဒ်သိးသုစၢၤသုသွဲၣ်တဖၣ်ကအိၣ်မူလၢဟီၣ်ခိၣ်ဒီဖျၢၣ်ညါအချၢဒီးပၢဘၣ်အီၤတက့ၢ်. ယပာ်သုဒ်ပှၤလၢအကပၢဘၣ်ဒ့ၣ်ဧိၤညၣ်ဧိၤ, ထိၣ်ဧိၤလံာ်ဧိၤဒီးဆၣ်ဖိကီၢ်ဖိအမံၤခဲလၢာ်န့ၣ်လီၤ.
29 ယလုၢ်အီၣ်တ့ၢ်သုလၢဘုဧိၤဟုဧိၤအကလုာ်ကလုာ်ဒီး တၤသူတၤသၣ်အကလုာ်ကလုာ်လၢသုကအီၣ်ဘၣ်အီဘၣ်အဂီၢ်လီၤ.
30 မ့မ့ၢ်, လၢကယဲၢ်ဆၣ်ဖိကီၢ်ဖိအမံၤတဖၣ်ဒီးကယဲၢ်ထိၣ်ဧိၤလံာ်ဧိၤတဖၣ်အဂီၢ်န့ၣ်, ယဟ့ၣ်အီၤလၢနီၣ်ဧိၤမံၤဧိၤဒီးတပံၢ်တမါအကလုာ် ကလုာ်လၢတၢ်အီၣ်အဂီၢ်လီၤ.” ဒီးတၢ်မၤအသးဒ်န့ၣ်လီၤ.
31 ကစၢ်ယွၤကွၢ်တၢ်လၢအမၤတ့ၢ်ဝဲခဲလၢာ်ဒီးအဝဲအသးခုသးမုာ်ဒိၣ်မးလီၤ. မုၢ်ဟါပူၤကွံာ်ဒီးမုၢ်ဂီၤဟဲဝဲ,ဒီးတၢ်န့ၣ်မ့ၢ်မုၢ်ဃုနံၤတနံၤန့ၣ်လီၤ.