ပှၤကလၤတံဖိတဖၣ်အအိၣ်
GALATIANS
ဖဲတၢ်သးခုကစီၣ်ဘၣ်ဃးယ့ၣ်ၡူးဘၣ်တၢ်စးထီၣ်စံၣ်တဲၤတဲ လီၤအီၤဒီးဘၣ်တၢ်တူၢ်လိာ်မုာ်အီၤလၢပှၤဂီၢ်မုၢ်လၢ အတမ့ၢ်ပှၤယူဒၤဖိတဖၣ်အသိးအကျါန့ၣ်တၢ်သံကွၢ် အိၣ်ထီၣ်ဝဲဒၣ်လၢပှၤတဂၤဒ်သိးအကမ့ၢ်ပှၤခရံာ်ဖိနီၢ်နီၢ် တဂၤန့ၣ်, မ့ၢ်အကဘၣ်ပိာ်ထွဲစီၤမိၤၡ့အတၢ်သိၣ်တၢ်သီ ဧါန့ၣ်လီၤ. စီၤပီလူးဂ့ၢ်လိာ်ဘှီလိာ်တ့ၢ်ဝဲလၢတၢ်တမံၤအံၤ အလီၢ်တအိၣ်ဘၣ်ဒီးအနီၢ်နီၢ်န့ၣ်, တၢ်အိၣ်မူလၢခရံာ် အပူၤအခီၣ်ထံးခီၣ်ဘိလၢအဂ့ၤအိၣ်န့ၣ်, မ့ၢ်ဒၣ်ထဲတၢ်စူၢ်တၢ်နာ်တမံၤဧိၤလၢပှၤကိးဂၤဒဲး ဘၣ်တၢ်ပာ်တီပာ်လိၤအီၤလၢကစၢ်ယွၤအမဲာ်ညါ ခီဖျိအီၤန့ၣ်လီၤ. ဘၣ်ဆၣ်ဒီးလၢဝ့ၢ်ကလၤတံ (ရိမ့ၤတၢ်ပၢအကီၢ်ဖိတဘ့ၣ်ဖဲကီၢ်အၤစံမံနၤ) အတၢ်အိၣ်ဖှိၣ်တဖၣ်အသိးအကျါန့ၣ်, ပှၤအိၣ်ထီၣ်ဝဲဒၣ် တနီၤလၢအထီဒါစီၤပီလူးဒီးစံးဝဲဒၣ်လၢဒ်သိးပှၤတဂၤ တီဝဲလိၤဝဲလၢကစၢ်ယွၤအမဲာ်ညါကသ့အဂီၢ်ကဘၣ်ဒိ ကနၣ်ပိာ်ထွဲစ့ၢ်ကီးစီၤမိၤၡ့အတၢ်သိၣ်တၢ်သီန့ၣ်လီၤ.
စီၤပီလူးအလံာ်ပရၢဆူပှၤကလၤတံဖိတဖၣ်အအိၣ် န့ၣ်, ဘၣ်တၢ်ကွဲးအီၤဒ်သိးအကဆှၢက့ၤပှၤတဖၣ်လၢ အဘၣ်တၢ်ဆှၢကမၣ်တ့ၢ်အီၤလၢတၢ်သိၣ်လိကမၣ်တမံၤ အံၤဆူတၢ်နာ်ဒီးတၢ်အိၣ်မူအမ့ၢ်အတီအဂီၢ်န့ၣ်လီၤ. စီၤပီလူးစးထီၣ်ဝဲဒၣ်, ခီဖျိအကတိၤကဟုကယာ်လီၤက့ၤအနီၢ်ကစၢ်အခွဲး အယာ်လၢအကဘၣ်တၢ်ကိးအီၤလၢယ့ၣ်ၡူးခရံာ်အတၢ် မၢဖိန့ၣ်လီၤ. အဝဲစံးသပှၢ်ပှၢ်လၢတၢ်ကိးအီၤဒ်သိး အကကဲထီၣ်ပှၤတၢ်မၢဖိတဂၤန့ၣ်, ဟဲလၢကစၢ်ယွၤ အအိၣ်, ဒီးတမ့ၢ်လၢပှၤကညီအတၢ်စိကမီၤတမံၤမံၤ ဘၣ်. ဒီးအဝဲအတၢ်ဖံးတၢ်မၤမ့ၢ်ဝဲလီၤဆီဒၣ်တၢ် လၢပှၤတမ့ၢ်ပှၤယူဒၤဖိတဖၣ်အဂီၢ်န့ၣ်လီၤ. အန့ၣ် ဝံၤဒီး, အဝဲတဲအါထီၣ်အတၢ်ဂ့ၢ်လိာ်ဘှီလိာ်ဘၣ် ဃး ပှၤကညီဘၣ်တၢ်ပာ်တီပာ်လိၤအီၤလၢယွၤ အမဲာ်ညါခီဖျိထဲလၢတၢ်နာ်တမံၤဧိၤအဂ့ၢ်န့ၣ်လီၤ. ဖဲအဆၢဒိၣ်အကတၢၢ်တဖၣ်န့ၣ်စီၤပီလူးဒုးနဲၣ်ဝဲ ဒၣ်လၢပှၤခရံာ်ဖိအတၢ်အိၣ်မူသကဲာ်ပဝးပိာ်ထီၣ်ညီ နုၢ်တၢ်အဲၣ်လၢအအိၣ်ထီၣ်ခီဖျိတၢ်နာ်လၢခရံာ်အပူၤ တမံၤန့ၣ်အခံလီၤ.
1
1 လၢ, ပှၤလၢတၢ်ကိးအီၤလၢအကကဲထီၣ်တၢ်မၢဖိလၢ အတမ့ၢ်တၢ်ဟဲလၢပှၤကညီမ့တမ့ၢ်ခီဖျိပှၤကညီအဃိ ဘၣ်, မ့မ့ၢ်ဟဲလၢယ့ၣ်ၡူးခရံာ်ဒီးပၢ်ကစၢ်ယွၤလၢအဒုး ဂဲၤဆၢထၢၣ်က့ၤအီၤလၢတၢ်သံ ယၤ, စီၤပီလူးဒီး,
2 ဒီပုၢ်ဝဲၢ်ခဲလၢာ်လၢအအိၣ်ဒီးယၤဖဲအံၤဆှၢလီၤအတၢ်ဆၢ ဂ့ၤဆၢဝါတဖၣ်ဆူတၢ်အိၣ်ဖှိၣ်တဖၣ်လၢကီၢ်ကလၤတံ အအိၣ်န့ၣ်လီၤ.
3 မ်ပပၢ်ကစၢ်ယွၤ, ဒီးကစၢ်ယ့ၣ်ၡူးခရံာ်ဟ့ၣ်သုတၢ်ဘျုးတၢ်ဖှိၣ်ဒီး တၢ်ဃူတၢ်ဖိးတက့ၢ်.
4 ခရံာ်ဟ့ၣ်လီၤကွံာ်အသးလၢပတၢ်ဒဲးဘးတဖၣ်အဂီၢ်ဒ်သိး ကဒုးထူၣ်ဖျဲးထီၣ်ကွံာ်ပှၤလၢဆၢကတီၢ်အအၢအသီတကတီၢ် အံၤန့ၣ်လီၤ. မၤဝဲလၢတၢ်ဒိကနၣ်ပပၢ်ယွၤအတၢ်ဘၣ်အသး အပူၤန့ၣ်လီၤ.
5 မ်တၢ်လၤကပီၤဘၣ်ကစၢ်ယွၤလီၤထူလီၤယိာ်တက့ၢ်. အၤမ့ၣ်.
6 ယကမၢကမၣ်လၢသုဃိလီၤ. လၢတစိၢ်ဖိအတီၢ်ပူၤသုညိကွံာ် ကစၢ်ယွၤလၢအကိးတ့ၢ်သုခီဖျိခရံာ်အဘျုးအဖှိၣ်, ဒီးတူၢ်လိာ်တၢ်သးခုကစီၣ်အဂၤတခါအဃိန့ၣ်လီၤ.
7 နီၢ်နီၢ်န့ၣ် “တၢ်သးခုကစီၣ်အဂၤ” တအိၣ်နီတခါဘၣ်. မ့မ့ၢ်ယစံးတၢ်အံၤန့ၣ်, မ့ၢ်လၢပှၤအိၣ်ဝဲဒၣ်တနီၤလၢအမၤကဒံကဒါသုသးဒီးဂုာ်ကျဲး စၢးလဲလိာ်တၢ်သးခုကစီၣ်ဘၣ်ဃးခရံာ်အဃိန့ၣ်လီၤ.
8 ဘၣ်ဆၣ်ဒီးပဝဲဒၣ်မ့ၢ်ဂ့ၤ, ကလူးလၢမူခိၣ်မ့ၢ်ဂ့ၤ, မ့ၢ်စံၣ်တဲၤတဲလီၤတၢ်သးခုကစီၣ်တခါလၢအလီၤ ဆီဒီးတၢ်လၢပစံၣ်တဲၤတဲလီၤတ့ၢ်န့ၣ်, မ်အဘၣ် တၢ်ဆိၣ်အၢတက့ၢ်.
9 ပစံးတ့ၢ်လံလၢအပူၤကွံာ်, ဒီးခဲအံၤယစံးကဒီးလီၤ. ပှၤတဂၤဂၤန့ၣ်မ့ၢ်စံၣ်တဲၤတဲလီၤန့ၢ်သုတၢ်သးခုကစီၣ် တခါလၢအလီၤဆီဒီးတၢ်သးခုကစီၣ်လၢသုတူၢ်လိာ်လံ အီၤန့ၣ်, မ်အဘၣ်တၢ်ဆိၣ်အၢတက့ၢ်.
10 တၢ်အဝဲအံၤ, မ့ၢ်အသီၣ်မၤအသးဒ်သိးယဂုာ်ကျဲးစၢးမၤန့ၢ် ပှၤကညီအတၢ်ဘၣ်သူၣ်ဘၣ်သးဧါ. တမ့ၢ်လ့ၤတက့ၤဘၣ်. တၢ်လၢယအဲၣ်ဒိးန့ၣ်, မ့ၢ်ကစၢ်ယွၤအတၢ်ဘၣ်သူၣ်ဘၣ်သး န့ၣ်လီၤ. မ့ၢ်ယဂုာ်ကျဲးစၢးဒိးန့ၢ်ပှၤကညီအတၢ်ဘၣ်သူၣ်ဘၣ် သးယၤဧါ. ယမ့ၢ်မၤဒံးဒၣ်ဒ်န့ၣ်ဒီး, ယတမ့ၢ်ခရံာ်အခ့အပှၤ တဂၤဘၣ်.
11 ယဒီပုၢ်ဝဲၢ်သ့ၣ်ဧၢ, ပျဲယစံးဘၣ်တဲဘၣ်သုတက့ၢ်. တၢ်သးခုကစီၣ်လၢယစံၣ်တဲၤတဲလီၤအံၤန့ၣ်တမ့ၢ် တၢ်ဒုးအိၣ်ထီၣ်အီၤလၢပှၤကညီဘၣ်.
12 ယတဒိးန့ၢ်ဘၣ်အီၤလၢပှၤကညီနီတဂၤအအိၣ်ဘၣ်. ဒီးပှၤတသိၣ်လိယၤနီတဂၤစ့ၢ်ကီးဘၣ်. ပှၤလၢအလီၣ်ဖျါထီၣ်န့ၢ်ယၤမ့ၢ်ဝဲယ့ၣ်ၡူးခရံာ်အကစၢ်ဒၣ်ဝဲလီၤ.
13 သုနၢ်ဟူဘၣ်တ့ၢ်လံလၢဖဲယဟ့ၣ်လီၤယသးဆူယူဒၤအတၢ် ဘူၣ်တၢ်ဘါအဂီၢ်အဆၢကတီၢ်န့ၣ်ယအိၣ်မူယဲဒ်လဲၣ်, လၢတၢ်တအိၣ်ဒီးတၢ်သးကညီၤအပူၤယမၤအၢမၤနးကစၢ်ယွၤ အတၢ်အိၣ်ဖှိၣ်ဒ်လဲၣ်, ဒီးယဂုာ်ကျဲးစၢးလၢာ်သးလၢယကမၤဟးဂီၤကွံာ်တၢ်အိၣ်ဖှိၣ်ဒ် လဲၣ်အဂ့ၢ်န့ၣ်လီၤ.
14 လၢယတၢ်ဘူၣ်ထီၣ်ဘါထီၣ်ယွၤဒ်ပှၤယူဒၤဖိအလုၢ်အလၢ်အိၣ်ဝဲ အသိးအပူၤန့ၣ်, ယလဲၤလၢပှၤယူဒၤဖိတကျဲကျဲဒီးယၤတဖၣ် အမဲာ်ညါဒီးယဟ့ၣ်လီၤယသးဒိၣ်န့ၢ်အဝဲသ့ၣ်ဖဲလၢအဘၣ် ဃးဒီးတၢ်လူၤထွဲပိာ်ထွဲပမိၢ်ပၢ်ဖံဖုလၢပျၢၤအလုၢ်လၢ်လီၤစၢၤတဖၣ် န့ၣ်လီၤ.
15 ဘၣ်ဆၣ်ဒီး, လၢအဘျုးအဖှိၣ်အပူၤကစၢ်ယွၤဃုထၢပာ်လီၤ ဆီယၤတချုးလၢယအိၣ်ဖျဲၣ်ထီၣ်ဒံးဒၣ်လဲာ်, ဒီးကိးယၤဒ်သိးယကမၤအတၢ်န့ၣ်လီၤ. ဒီးဖဲအဝဲဒၣ်ပာ်လီၤအသး
16 လၢအကလီၣ်ဖျါထီၣ်အဖိခွါလၢယၤ, ဒ်သိးယကစံၣ်တဲၤတဲလီၤ တၢ်သးခုကစီၣ်ဘၣ်ဃးဒီးအီၤဆူပှၤကလုာ်ဂၤတဖၣ်န့ၣ်, ယတဃ့ပှၤကညီအတၢ်ဟ့ၣ်ကူၣ်ဟ့ၣ်ဖးနီတဂၤဘၣ်.
17 ယတလဲၤစ့ၢ်ကီးဆူဝ့ၢ်ယရူၤၡလ့ၣ်ဒ်သိးယကထံၣ်ဘၣ်ပှၤလၢ အကဲဆိတၢ်မၢဖိလၢယမဲာ်ညါတဖၣ်အဂီၢ်န့ၣ်ဘၣ်. မ့မ့ၢ်ယလဲၤယဲတဘျီဃီဆူကီၢ်ဧ့ရ့း, အန့ၣ်ဝံၤယဟဲက့ၤကဒါက့ၤဆူဝ့ၢ်ဒၤမ့ၤစ့းလီၤ.
18 သၢနံၣ်ဝံၤအလီၢ်ခံယလဲၤဆူဝ့ၢ်ယရူၤၡလ့ၣ်ဒ်သိးယကမၤန့ၢ်တၢ် ကစီၣ်လၢစီၤပ့းတရူးအအိၣ်ဒီးယအိၣ်ဒီးအီၤခံနွံလီၤ.
19 ယတထံၣ်ပှၤတၢ်မၢဖိအဂၤနီတဂၤဘၣ်. ယထံၣ်ထဲ စီၤယၤကိာ်, လၢအမ့ၢ်ပကစၢ်ယ့ၣ်ၡူးခရံာ်အဒီပုၢ်ဝဲၢ်န့ၣ်လီၤ.
20 တၢ်လၢယကွဲးတဖၣ်အံၤမ့ၢ်ဝဲတီဝဲလီၤ. ယတလီတၢ်န့ၣ် ကစၢ်ယွၤသ့ၣ်ညါဝဲလီၤ.
21 တၢ်န့ၣ်ဝံၤအလီၢ်ခံယလဲၤဆူတၢ်လီၢ်တဖၣ်လၢကီၢ်စူၤရံဒီးကီၢ် ကံၤလံၤကံအပူၤန့ၣ်လီၤ.
22 ဖဲအဆၢကတီၢ်အဝဲန့ၣ်တၢ်အိၣ်ဖှိၣ်ဖိတဖၣ်ဖဲကီၢ်ယူဒၤအတၢ်အိၣ် ဖှိၣ်တဖၣ်အပူၤ, တသ့ၣ်ညါယၤလၢအနီၢ်ကစၢ်ဒၣ်ဝဲဒံးဘၣ်.
23 အဝဲသ့ၣ်, သ့ၣ်ညါထဲဒၣ်တၢ်လၢပှၤဂၤတဖၣ်စံးဝဲ, “ပှၤလၢအမၤအၢမၤနးတ့ၢ်ပှၤတဂၤန့ၣ်, ခဲကနံၣ်အံၤစံၣ်တဲၤတဲလီၤတၢ်ဘၣ်ဃးတၢ်စူၢ်တၢ်နာ်ခရံာ် လၢအဝဲဒၣ်ဂုာ်ကျဲးစၢးမၤဟးဂီၤကွံာ်တ့ၢ်လံဝဲတဘျီန့ၣ် လီၤ.”
24 မၤသးဒ်န့ၣ်ဒီး, အဝဲသ့ၣ်စံးထီၣ်ပတြၢၤယွၤလၢယဃိန့ၣ်လီၤ.