36
1 စီၤဘစၤလအ့လး, စီၤအၤဟလံအာ်ဒီးကယဲၢ်ပှၤစုသ့တဖၣ်လၢကစၢ် ယွၤဟ့ၣ်လီၤတၢ်သ့တၢ်ဘၣ်ဒီးတၢ်သ့ၣ်ညါနၢ်ပၢၢ်, လၢအသ့ၣ်ညါတၢ်ကိးမံၤဒဲးဒီးတၢ်အလိၣ်တမံၤလၢ်လၢ်လၢတၢ်သူၣ် ထီၣ်ဒဲစီဆှံအဂီၢ်န့ၣ်ကဘၣ်မၤတၢ်ကိးမံၤဒဲးဒ်ယွၤမၤလိာ်ဝဲအသိးန့ၣ်လီၤ.”
2 စီၤမိၤၡ့ကိးစီၤဘစၤလအ့လး, စီၤအၤဟလံအာ်ဒီးကယဲၢ်ပှၤသ့ ဖံးသ့မၤတၢ်ကိးဂၤလၢယွၤဟ့ၣ်လီၤအီၤတၢ်ကူၣ်တၢ်ဆးဒီးပှၤ လၢအသးအိၣ်မၤစၢၤတၢ်တဖၣ်, ဒီးစံးဘၣ်အဝဲသ့ၣ်လၢကစးထီၣ်မၤတၢ်လီၤ.
3 အဝဲသ့ၣ်ဒိးန့ၢ်ကယဲၢ်တၢ်လုၢ်မၤဘူၣ်လၢပှၤအံၣ်စရ့လးဖိတဖၣ် ဟဲစိာ်ဝဲခဲလၢာ်လၢတၢ်သူၣ်ထီၣ်ဒဲစီဆှံအဂီၢ်လၢစီၤမိၤၡ့အစုပူၤလီၤ. ဘၣ်ဆၣ်ဒီးကီၢ်အံၣ်စရ့လးအပှၤဂီၢ်မုၢ်ဟဲစိာ်ဒံးအတၢ်လုၢ်မၤဘူၣ်တဖၣ်ဆူ စီၤမိၤၡ့အအိၣ်ကိးမုၢ်ဂီၤဒဲးလီၤ.
4 အန့ၣ်တစုပှၤသ့ဖံးသ့မၤတၢ်လၢအမၤတၢ်မၤတဖၣ်န့ၣ်လဲၤဆူ စီၤမိၤၡ့အအိၣ်ဒီးစံးဘၣ်အီၤ,
5 “ပှၤဂီၢ်မုၢ်ဟဲစိာ်တၢ်အါန့ၢ်ဒံးတၢ်လိၣ်ဘၣ်လၢတၢ်မၤအဂီၢ် လၢယွၤမၤလိာ်တ့ၢ်လၢကဘၣ်တၢ်မၤဝံၤအီၤန့ၣ်လီၤ.”
6 မၤသးဒ်န့ၣ်ဒီး, စီၤမိၤၡ့ဟ့ၣ်လီၤတၢ်ကလုၢ်တမံၤဆူပှၤဂီၢ် မုၢ်သူၣ်ဒဲအလီၢ်ခဲလၢာ်လၢပှၤတဘၣ်ဟဲစိာ်အါထီၣ်တၢ်ဟ့ၣ်လၢယွၤ အိၣ်ဝဲဆိးဝဲဒဲစီဆှံအဂီၢ်လၢၤဘၣ်လီၤ. အန့ၣ်ဒီးပှၤဂီၢ်မုၢ်တဟဲစိာ်လၢၤဘၣ်လီၤ.
7 တၢ်လၢဘၣ်တၢ်ဟဲစိာ်တ့ၢ်အီၤတဖၣ်န့ၣ်အါန့ၢ်ဒံးတၢ်လိၣ်ဘၣ်လၢတၢ်ကမၤဝံၤတၢ်မၤ, ခဲလၢာ်အဂီၢ်န့ၣ်လီၤ.
(ဟးထီၣ်.၂၆:၁ - ၃၇)
8 ပှၤသ့မၤတၢ်အသ့ကတၢၢ်တဖၣ်လၢပှၤမၤတဖၣ်အကျါ, ဘှီထီၣ်ယွၤအဒဲစီဆှံန့ၣ်လီၤ. အဝဲသ့ၣ်မၤဝဲလၢတၢ်ကံးယာ် လုၣ်အဂ့ၤအဘ့ၣ်တဆံလၢအထါအသးအိၣ်ဒီးအလွဲၢ်လါအဲး, အလွဲၢ်လုးတကုာ်ဒီးသိဆူၣ်ဂီၤဒီးတၢ်အသးလၢအအိၣ်ဒီးအဒံးဆ့ တဖၣ်အတၢ်ဆးဒဲးကံၣ်ဒဲးဝ့ၤအဂီၤန့ၣ်လီၤ.
9 တၢ်ကံးယာ်တဘ့ၣ်ဒီးတဘ့ၣ်န့ၣ်အနီၣ်ထိၣ်ထဲသိးလိာ်အသးဒီးအိၣ် ဝဲအထီ ခံဆံပျၢ်, အဒီၣ်လွံၢ်ပျၢ်န့ၣ်လီၤ.
10 အဝဲသ့ၣ်ဆးစဲထီဝဲတၢ်ကံးယာ်ယဲၢ်ဘ့ၣ်တကရူၢ်ဒီးမၤဝဲဒ်န့ၣ် အသိးလၢအဂၤယဲၢ်ဘ့ၣ်အဂီၢ်န့ၣ်လီၤ.
11 အဝဲသ့ၣ်ထီထီၣ်ကွီၤအလါအဲးဖိတဖၣ်လၢတၢ်ကံးယာ်တကရူၢ်အကနူၤ စုာ်စုာ်လၢအချၢတခီလီၤ.
12 အဝဲသ့ၣ်ထီထီၣ်ကွီၤအခါယဲၢ်ဆံလၢတၢ်ကံးယာ်အခီၣ်ထံးတကရူၢ် လၢအခီၣ်ထံးတဘ့ၣ်အလိၤဝံၤ, ဆးဝဲကွီၤအခါယဲၢ်ဆံလၢလီၤဂာ်လိာ်အသးလၢခံကရူၢ်တကရူၢ် အကတၢၢ်တဘ့ၣ်အလိၤန့ၣ်လီၤ.
13 အဝဲသ့ၣ်မၤထးဘျးလၢထူအခါယဲၢ်ဆံလၢကဘျးစဲတၢ်ကံးယာ်ခံ ကရူၢ်ဒ်သိးကကဲထီၣ်ဝဲယၣ်ဘျးသဒၢတဘ့ၣ်ဃီအဂီၢ်လီၤ.
14 အန့ၣ်ဝံၤဒီးအဝဲသ့ၣ်မၤတၢ်အခိၣ်ဒုးတခါလၢဒဲစီဆှံအဂီၢ်လၢ တၢ်ကံးယာ်တဆံတဘ့ၣ်လၢဘၣ်တၢ်မၤအီၤလၢမဲာ်တဲးလဲးအဆူၣ်န့ၣ်လီၤ.
15 အဝဲသ့ၣ်မၤတၢ်ကံးယာ်ခဲလၢာ်အနီၣ်ထိၣ်ထဲသိးသိးဒီးအထီ အိၣ်အပျၢ်သၢဆံဒီးအလဲၢ်အိၣ်လွံၢ်ပျၢ်လီိၤ.
16 အဝဲသ့ၣ်ဆးတၢ်ကံးယာ်ယဲၢ်ဘ့ၣ်တကရူၢ်ဒီးလၢအဂၤဃုဘ့ၣ်န့ၣ် တကရူၢ်လီၤ.
17 အဝဲသ့ၣ်ထီထီၣ်ကွီၤအခါယဲၢ်ဆံလၢတၢ်ကံးယာ်တကရူၢ်အက တၢၢ်တဘ့ၣ်အကနူၤ, ဒီးကွီၤအဂၤယဲၢ်ဆံလၢတၢ်ကံးယာ်အဂၤတကရူၢ် အကနူၤအလိၤန့ၣ်လီၤ.
18 အဝဲသ့ၣ်မၤထးဘျးလၢတိၢ်ဘီအခါယဲၢ်ဆံလၢကဘျးစဲတၢ်ကံးယာ် ခံကရူၢ်န့ၣ်ဒ်သိးကကဲထီၣ်တၢ်အခိၣ်ဒုးတဘ့ၣ်လီၤ.
19 အဝဲသ့ၣ်မၤအါထီၣ်တၢ်အခိၣ်ဒုးခံခါ, တခါန့ၣ်လၢသိဖါအဖံး စုၣ်ဂီၤအသး, ဒီးအဂၤတခါန့ၣ်လၢတၢ်ဖံးအဂ့ၤဒ်သိးကကဲ ထီၣ်တၢ်အခိၣ်ဒုးလၢအဖီခိၣ်ကတၢၢ်အဂီၢ်န့ၣ်လီၤ.
20 အဝဲသ့ၣ်မၤသ့ၣ်ဘ့ၣ်ဘၣ်ပိာ်ဆၢထၢၣ်အသးလၢသ့ၣ်ဖှ့ၡံးတၤလၢဒဲ စီဆှံအဂီၢ်န့ၣ်လီၤ.
21 သ့ၣ်ဘ့ၣ်ဘၣ်တဘ့ၣ်န့ၣ်ထီဝဲအပျၢ်တဆံဒီးလဲၢ်ဝဲတပျၢ်တထါ,
22 အိၣ်ဃုာ်ဒီးအနီၣ်ပျၤခံခီယၢ်ခီသဃဲၤလိာ်သးလၢဘျးစဲလိာ် သးကသ့အဂီၢ်န့ၣ်လီၤ. သ့ၣ်ဘ့ၣ်ဘၣ်ကိးဘ့ၣ်ဒဲးအိၣ်ဒီးအနီၣ်ပျၤတဖၣ်န့ၣ်လီၤ.
23 အဝဲသ့ၣ်မၤသ့ၣ်ဘ့ၣ်ဘၣ်အဘ့ၣ်ခံဆံလၢဒဲအကလံၤစိးတကပၤအဂီၢ်,
24 ဒီးမၤတၢ်အခီၣ်ထံးအဖျီၣ်အခါလွံၢ်ဆံလၢစ့ဒ်သိးကအိၣ်လၢအဖီလာ်, ဒီးသ့ၣ်ဘၣ်တဘ့ၣ်အိၣ်ဒီးတၢ်အခီၣ်ထံးအဖျီၣ်ခံခါစုာ်စုာ်လၢကဟံးဃာ်အနီၣ်ပျၤခံခါအဂီၢ်န့ၣ်လီၤ.
25 အဝဲသ့ၣ်မၤသ့ၣ်ဘ့ၣ်ဘၣ်အဘ့ၣ်ခံဆံလၢဒဲအကလံၤစိးတကပၤအဂီၢ်,
26 ဒီးမၤတၢ်အခီၣ်ထံးအဖျီၣ်အခါလွံၢ်ဆံလၢစ့ဒီးသ့ၣ်ဘ့ၣ်ဘၣ် တဘ့ၣ်အိၣ်ဒီးတၢ်အခီၣ်ထံးအဖျီၣ်ခံခါစုာ်စုာ်န့ၣ်လီၤ.
27 လၢဒဲစီဆှံအချၢတကပၤအဂီၢ်လၢမုၢ်နုာ်တကပၤန့ၣ်အဝဲသ့ၣ်မၤသ့ၣ်ဘ့ၣ်ဘၣ်ဃုဘ့ၣ်,
28 ဒီးသ့ၣ်ဘ့ၣ်ဘၣ်ခံဘ့ၣ်လၢတၢ်သနၢၣ်တဖၣ်အဂီၢ်လီၤ.
29 သ့ၣ်ဘ့ၣ်ဘၣ်ခံဘ့ၣ်လၢတၢ်သနၢၣ်အဂီၢ်အံၤန့ၣ်ဘၣ်တၢ်စဲတံၢ်အီၤ စးထီၣ်လၢအခီၣ်ထံးတုၤလၢအခိၣ်ထိးန့ၣ်လီၤ. သ့ၣ်ဘ့ၣ်ဘၣ်ခံဘ့ၣ်လၢအဘၣ်တၢ်ဒုးကဲထီၣ်တၢ် အသနၢၣ်တဖၣ်န့ၣ်ဘၣ်တၢ်မၤအီၤဒ်အံၤအသိးန့ၣ်လီၤ.
30 မၤသးဒ်န့ၣ်ဒီးတၢ်အသနၢၣ်ခဲလၢာ်န့ၣ်, သ့ၣ်ဘ့ၣ်ဘၣ်အိၣ်ဝဲ ဃိးဘ့ၣ်ဒီးတၢ်အခီၣ်ထံးအဖျီၣ်လၢဘၣ်တၢ်မၤအီၤလၢစ့အိၣ်တဆံ ဃုခါ, ဒီးသ့ၣ်ဘ့ၣ်ဘၣ်တဘ့ၣ်အဖီလာ်န့ၣ်တၢ်အခီၣ်ထံးအဖျီၣ်အိၣ်ခံခါစုာ်စုာ်လီၤ.
31 အဝဲသ့ၣ်မၤနီၣ်ဘိတဆံယဲၢ်ဘိလၢသ့ၣ်ဖှ့ၡံးတၤ, ယဲၢ်ဘိလၢသ့ၣ်ဘ့ၣ်ဘၣ်တဖၣ်လၢဒဲစီဆှံအတကပၤအဂီၢ်,
32 ဒီးယဲၢ်ဘိလၢသ့ၣ်ဘ့ၣ်ဘၣ်လၢအဂၤတကပၤအဂီၢ်, ဒီးယဲၢ်ဘိလၢသ့ၣ်ဘ့ၣ်ဘၣ်လၢမုၢ်နုာ်တကပၤ, လၢအလီၢ်ခံအဂီၢ်န့ၣ်လီၤ.
33 နီၣ်ဘိလၢအခၢၣ်သးတဘိန့ၣ်ဘၣ်တၢ်ပာ်အီၤလၢသ့ၣ်ဘ့ၣ်ဘၣ် တဖၣ်အဖးဖီလိၤလိၤစးထီၣ်လၢဒဲစီဆှံအအံၤတခီတုၤလၢ အကတၢၢ်လၢန့ၣ်တခီန့ၣ်လီၤ.
34 အဝဲသ့ၣ်မၤဘၢသ့ၣ်ဘၣ်တဖၣ်လၢထူဒီးထီထီၣ်ဝဲထူကွီၤတဖၣ်ဒ် သိးကဟံးဃာ်နီၣ်ဘိတဖၣ်လၢအဘၣ်တၢ်မၤဘၢအီၤဒီးထူန့ၣ်လီၤ.
35 အဝဲသ့ၣ်မၤယၣ်ဘျးသဒၢတၢ်တဘ့ၣ်လၢတၢ်ကံးယာ်အဂ့ၤ, ဘၣ်တၢ်ထါအီၤအိၣ်ဒီးအလွဲၢ်လါအဲး, အလွဲၢ်လုးတကုာ်ဒီးသိဆူၣ် ဂီၤ, ဆးဒဲးကံၣ်ဒဲးဝ့ၤအီၤဒီးတၢ်အသးလၢအအိၣ်ဒီးအဒံးဆ့တဖၣ်လီၤ.
36 အဝဲသ့ၣ်မၤထီၣ်ထူၣ်လွံၢ်ထူၣ်လၢသ့ၣ်ဖှံၡံးတၤလၢကဟံးဃာ်ယၣ်ဘျးသဒၢအဂီၢ်, ဒီးပီၤအီၤလၢထူဒီးထီထီၣ်အီၤဒီးထးဘျးထူတဖၣ်လီၤ. အန့ၣ်ဝံၤဒီးမၤထီၣ်ဝဲတၢ်အခီၣ်ထံးအဖျီၣ်စ့လွံၢ်ခါလၢကဆီလီၤထူၣ်လွံၢ်ထူၣ်အဂီၢ်န့ၣ်လီၤ.
37 လၢဒဲစီဆှံအကျဲစၢၤအဂီၢ်န့ၣ်အဝဲသ့ၣ်မၤယၣ်ဘျးသဒၢတဘ့ၣ်လၢ ဘၣ်တၢ်ထါအီၤလၢတၢ်ကံးယာ်လုၣ်အဂ့ၤအိၣ်ဒီးအလွဲၢ်လါအဲး, အလွဲၢ်လုးတကုာ်, ဒီးသိဆူၣ်ဂီၤဒီးဘၣ်တၢ်ကယၢကယဲထီၣ်အီၤလၢ တၢ်ဆးဒဲးကံၣ်ဒဲးဝ့ၤန့ၣ်လီၤ.
38 လၢယၣ်ဘျးသဒၢအံၤအဂီၢ်န့ၣ်အဝဲသ့ၣ်မၤထူၣ်ယဲၢ်ထူၣ်လၢတၢ်ထီ ထီၣ်အီၤဒီးထးဘျးတဖၣ်ဒီးပီၤတၢ်အထူၣ်အခိၣ်ထိးတဖၣ်ဒီးအဘိ တဖၣ်န့ၣ်လၢထူဒီးမၤန့ၢ်ဝဲတၢ်အခီၣ်ထံးအဖျီၣ်တိၢ်ဘီယဲၢ်ခါလၢထူၣ်တဖၣ်အံၤအဂီၢ်န့ၣ်လီၤ.