34
(သိၣ်သီ.၁၀:၁ - ၅)
1 ယွၤစံးဘၣ်စီၤမိၤၡ့, “ကူးတဲာ်န့ၢ်လၢၢ်ဘ့ၣ်ဘၣ်ခံဘ့ၣ်ဒ်လၢ အခီၣ်ထံးတဖၣ်အသိးဒီးလၢအလိၤန့ၣ်ယကကွဲးလီၤတၢ်ကတိၤတဖၣ်လၢ အဘၣ်တၢ်ကွဲးတ့ၢ်အီၤလၢလၢၢ်ဘ့ၣ်ဘၣ်အခီၣ်ထံးလၢနမၤသဘှံးကွံာ် အီၤအလိၤန့ၣ်လီၤ.
2 ကတဲာ်ကတီၤနသးလၢခဲမုၢ်ဆ့ၣ်ဂီၤခီ, ဒီးဟဲထီၣ်ဆူကစၢၢ်စံၤ နါအဒီခိၣ်လၢနကသဂၢၢ်ယၤဖဲန့ၣ်လၢတၢ်ဒီခိၣ်န့ၣ်တက့ၢ်.
3 ပှၤတဘၣ်ဟဲထီၣ်ဃုာ်ဒီးနၤနီတဂၤဘၣ်. ပှၤသုတဘၣ်တၢ်ထံၣ်အီၤလၢကစၢၢ်အလိၤနီတပူၤနီတဂၤတဂ့ၤ. ဒီးသိမ့ၢ်ဂ့ၤ, ဂီၤဘုၣ်ဂီၤဖံးမ့ၢ်ဂ့ၤတဘၣ်ဒုးအိၣ်အဆၣ်လၢ ကစၢၢ်ခီၣ်ထံးနီတဒုဘၣ်.”
4 မၤသးဒ်န့ၣ်ဒီး, စီၤမိၤၡ့ကူးတဲာ်လၢၢ်ဘ့ၣ်ဘၣ်အဂၤခံဘ့ၣ်ဒီး လၢခံတနံၤမုၢ်ဆ့ၣ်ထီၣ်ဂီၤဂီၤန့ၣ်လဲၤစိာ်ထီၣ်ဝဲဆူကစၢၢ် စံၤနါအလိၤဒ်ယွၤမၤလိာ်တ့ၢ်အီၤအသိးန့ၣ်လီၤ.
5 ယွၤဟဲလီၤဝဲလၢတၢ်အၢၣ်တလိၣ်အပူၤ, ဆၢထၢၣ်ဃုာ်ဒီးအီၤဖဲ န့ၣ်, ဒီးယၢၤထီၣ်အမံၤစီဆှံ, ယွၤန့ၣ်လီၤ.
6 အန့ၣ်ဒီးယွၤလဲၤခီဂာ်လၢအမဲာ်ညါဒီးကိးထီၣ်ဝဲ, “ယၤ, ယွၤ, မ့ၢ်ကစၢ်ယွၤလၢအပှဲၤဒီးတၢ်သူၣ်အိၣ်သးအိၣ်ဒီးတၢ်သးကညီၤ, တသးဒိၣ်ထီၣ်တၢ်ညီကဒၣ်ဘၣ်, ဒီးဒုၣ်နဲၣ်တၢ်အဲၣ်တၢ်ကွံ ဒီးသူၣ်တီသးတီလၢအဒိၣ်ဝဲန့ၣ်လီၤ.
7 ယဟံးဃာ်ယတၢ်အၢၣ်လီၤအီလီၤလၢပှၤအစိၤအကထိတဖၣ်အဂီၢ်, ဒီးပျၢ်တၢ်အၢတၢ်သီဒီးတၢ်ဒဲးဘး, ဘၣ်ဆၣ်ဒီး, ယတလီၤတူာ်လီၤကာ်ဘၣ်လၢယကစံၣ်ညီၣ်ဖိ တဖၣ်ဒီးလံၤတဖၣ်တုၤလၢသၢစိၤတစိၤဒီးလွံၢ်စိၤတစိၤလၢအဝဲသ့ၣ်အမိၢ်အပၢ်တဖၣ် အတၢ်ဒဲးဘးအဃိန့ၣ်ဘၣ်.”
8 စီၤမိၤၡ့တီၤလီၤချ့ချ့ဆူဟီၣ်ခိၣ်လိၤဒီးဘူၣ်ထီၣ်ဘါထီၣ်တၢ်လီၤ.
9 အဝဲစံးဝဲ, “ယွၤဧၢ, နမ့ၢ်ဘၣ်သူၣ်ဘၣ်သးယၤသပှၢ်တၢၢ်ဒီးယဃ့ နၤဒ်သိးနကလဲၤဃုာ်တၢ်ဒီးပှၤန့ၣ်လီၤ. ပှၤဂီၢ်မုၢ်အံၤအခိၣ်ကိၤဝဲလီၤ. ဘၣ်ဆၣ်ဒီးပျၢ်လၢ်ပတၢ်အၢတၢ် သီဒီးပတၢ်ဒဲးဘးဒီးတူၢ်လိာ်ပှၤဒ်နပှၤဂီၢ်မုၢ်ဒၣ်နဲအသိးန့ၣ်တက့ၢ်.”
(ဟးထီၣ်.၂၃:၁၄ - ၁၉ , သိၣ်သီ.၇:၁ - ၅, ၁၆:၁ - ၁၇)
10 ယွၤစံးဘၣ်စီၤမိၤၡ့, “ခဲအံၤယမၤတၢ်အၢၣ်လီၤအီလီၤတမံၤ ဒီးကီၢ်အံၣ်စရ့လးအပှၤဂီၢ်မုၢ်လီၤ. ယကမၤတၢ်အဒိၣ်အမုၢ်တဖၣ်လၢတမၤတ့ၢ်အသးနီတစုလၢတၢ်လီၢ်နီ တပူၤလၢဟီၣ်ခိၣ်ချၢလၢပှၤနီတကလုာ်အကျါဘၣ်လၢအဝဲသ့ၣ်အမဲာ်ညါလီၤ. ပှၤဂီၢ်မုၢ်ခဲလၢာ်ကထံၣ်ဘၣ်တၢ်မၤဖးဒိၣ်တဖၣ်လၢယၤ, ယွၤ, မၤဝဲသ့န့ၣ်လီၤ. အဂ့ၢ်ဒ်အံၤ, ယကမၤတၢ်လီၤလးလၢသုဂီၢ်လီၤ.
11 စူၢ်တၢ်ဘူၣ်တၢ်ဘါအတၢ်သိၣ်တၢ်သီတဖၣ်လၢယကဟ့ၣ်လီၤသုတနံၤအံၤန့ၣ်တက့ၢ်. ယကဟီထီၣ်ကွံာ်ပှၤအမိၢ်ဖိတဖၣ်, ပှၤကနၤဧၣ်ဖိတဖၣ်, ပှၤဃ့ၤသးဖိတဖၣ်, ပှၤပရးစၤဖိတဖၣ်, ပှၤဃံၤဝံဖိတဖၣ်ဒီးပှၤယဘူၣ်ဖိတဖၣ်ဖဲသုလဲၤထီၣ်ဒုးတၢ်န့ၣ်လီၤ.
12 မၤတၢ်အၢၣ်လီၤအီလီၤဒီးပှၤဂီၢ်မုၢ်လၢသုလဲၤနုာ်ဆူအထံအကီၢ်ပူၤန့ၣ်နီတမံၤတဂ့ၤ. အဂ့ၢ်ဒ်အံၤ, တၢ်န့ၣ်ကဲထီၣ်တၢ်သံအပျံၤသကွီၤလၢသုဂီၢ်သ့ဝဲဒၣ်လီၤ.
13 အခိၣ်တလိာ်, မၤလီၤပှီၢ်ကွံာ်အဝဲသ့ၣ်အတၢ်လုၢ်လီၢ်တဖၣ်, မၤဟးဂီၤကွံာ်အလၢၢ်ထူၣ်စီဆှံတဖၣ်, ဒီးဒီၣ်တဲာ်ကွံာ်အဝဲသ့ၣ်အကစၢ်မုၣ်အၡ့ရၤအတၢ်ပနီၣ်တဖၣ်တက့ၢ်.
14 ဘါထီၣ်ကစၢ်အဂုၤအဂၤနီတဂၤတဂ့ၤ. အဂ့ၢ်ဒ်အံၤ, ယၤ, ယွၤအံၤယဝံသးစူၤပှၤလၢထိၣ်အသးထဲသိးဒီးယၤတဖၣ်တကဲဘၣ်.
15 မၤတၢ်အၢၣ်လီၤအီလီၤဒီးပှၤဂီၢ်မုၢ်လၢသုလဲၤနုာ်လီၤဆူအထံ အကီၢ်န့ၣ်နီတမံၤတဂ့ၤ. အဂ့ၢ်ဒ်အံၤ, ဖဲအဝဲသ့ၣ်ဘါထီၣ်အပှၤ တစူၢ်တနာ်တၢ်အယွၤတဖၣ်ဒီးလုၢ်တၢ်ပာ်တၢ်ဆူအအိၣ်န့ၣ်, ကကွဲသုလၢသုကမၤဃုာ်သကိးတၢ်ဒီးအီၤ, ဒီးသုကဘၣ်တၢ်လ့ပစီလၢသုကအီၣ်တၢ်အီၣ်တဖၣ်လၢအလုၢ် ထီၣ်ဝဲဆူအကစၢ်တဖၣ်အအိၣ်န့ၣ်လီၤ.
16 ဒီးသုဖိခွါတဖၣ်ကဖျီဃုာ်အသးဒီးပှၤတခီဘီမုၢ်ဖိပိာ်မုၣ် တဖၣ်လၢအကမၢန့ၢ်ဆီၣ်ထွဲအဝဲသ့ၣ်ဆူတၢ်သူၣ်တတီသး တလိၤဒီးယၤဒီးဘူၣ်ထီၣ်ဘါထီၣ်အဝဲသ့ၣ်အပှၤတစူၢ် တနာ်တၢ်အယွၤတဖၣ်န့ၣ်လီၤ.
17 တ့ထီၣ်ယွၤတဖၣ်တဖၣ်လၢတိၢ်ဧိၤထးဧိၤဒီးဘါထီၣ်အီၤတဂ့ၤ.
18 တိၢ်န့ၣ်ဘူၣ်ကိၣ်တအိၣ်ဘၣ်ဒီးကိၣ်မံၣ်အမူးတက့ၢ်. ဒ်ယမၤလိာ်တ့ၢ်သုအသိးန့ၣ်အီၣ်ကိၣ်လၢတအိၣ်ဘၣ်ဒီးကိၣ်မံၣ်လၢ နွံသီအတီၢ်ပူၤဖဲလါအၤဘံာ်အပူၤန့ၣ်တက့ၢ်. အဂ့ၢ်ဒ်အံၤ, အဝဲန့ၣ်မ့ၢ်လါတလါလၢသုဟးထီၣ်လၢကီၢ်အဲၤကူပတူးအပူၤန့ၣ်လီၤ.
19 ကယဲၢ်ဖိဝဲၢ်ကိအပိာ်ခွါဒီးဆၣ်ဖိကီၢ်ဖိလၢသုဘုၣ်အီၤအဖါ ဝဲၢ်ကိန့ၣ်ဘၣ်ဃးဒီးယၤလီၤ.
20 မ့မ့ၢ်ကသ့ၣ်ယီၤအဖါဝဲၢ်ကိကိးဒုဒဲးန့ၣ်သုကဘၣ်ပှ့ၤက့ၤအီၤ ခီဖျိတၢ်လုၢ်ထီၣ်သိဖိတဒုလၢအလီၢ်န့ၣ်လီၤ. သုမ့ၢ်တပှ့ၤက့ၤအီၤဘၣ်ဒီးဘိးကၢ်ကွံာ်အကိာ်တက့ၢ်. ပှ့ၤကဒါက့ၤကယဲၢ်ဖိခွါဝဲၢ်ကိကိးဂၤဒဲးတက့ၢ်.
တၢ်လုၢ်တမံၤမ့ၢ်တအိၣ်ဘၣ်ဒီးမ်ပှၤသုတအိၣ်ဖျါလၢယမဲာ်ညါနီတဂၤတဂ့ၤ.
21 သုအိၣ်ဒီးမုၢ်နံၤဃုနံၤဃုသီလၢသုကမၤသုတၢ်မၤအဂီၢ်လီၤ. ဘၣ်ဆၣ်ဒီးဖဲထူစံာ်မ့ၢ်ဂ့ၤကူးဘုမ့ၢ်ဂ့ၤအကတီၢ်ဒၣ်လဲာ်န့ၣ် မၤတၢ်လၢနွံသီတသီန့ၣ်တဂ့ၤ.
22 တိၢ်န့ၢ်ဖံးဃာ်တၢ်ကူးဘုကတီၢ်အမူးဖဲသုစးထီၣ်ကူးဘုကၠူၣ် အဆိကတၢၢ်ဒီးတိၢ်န့ၢ်ဖံးဃာ်ဘူၣ်ဒဲဖဲသုပာ်ဖှိၣ်သုတၤသၣ် တဖၣ်လၢတၢ်ကိၢ်အကတီၢ်န့ၣ်တက့ၢ်.
23 သုပှၤပိာ်ခွါတဖၣ်ကဘၣ်ဟဲဘူၣ်ထီၣ်ဘါထီၣ်ယၤ, ယွၤ, ကီၢ်အံၣ်စရ့လးအကစၢ်ယွၤ, တနံၣ်သၢဘျီန့ၣ်လီၤ.
24 ဖဲယဟီထီၣ်ကွံာ်ပှၤကလုာ်တဖၣ်လၢသုမဲာ်ညါဒီးမၤလဲၢ်ထီၣ်သု တၢ်လီၢ်တၢ်ကျဲဝံၤအလီၢ်ခံန့ၣ်, ပှၤတဂုာ်မၤနၢၤသုကီၢ်ဖဲမူးသၢမူးအကတီၢ်အံၤနီတဂၤဘၣ်.
25 ဖဲသုလုၢ်ထီၣ်ဆၣ်ဖိကီၢ်ဖိတဒုဆူယအိၣ်န့ၣ်လုၢ်ထီၣ်ကိၣ်လၢအအိၣ်ဒီးကိၣ်မံၤတဂ့ၤ. ဆၣ်ဖိကီၢ်ဖိလၢဘၣ်တၢ်မၤသံအီၤဖဲဘူၣ်လဲၤကပာ်အနံၤန့ၣ်ပာ် ဃးအဖံးအညၣ်တုၤမုၢ်ဆ့ၣ်ထီၣ်တနံၤနီတမံၤတဂ့ၤ.
26 ဟဲစိာ်ထီၣ်တၤသၣ်ဆိလၢသုကူးအီၤန့ၣ်ဆူယွၤအဟံၣ်, ကိးနံၣ်ဒဲးတက့ၢ်.
သိဖိမ့ၢ်ဂ့ၤမဲာ်တဲးလဲးဖိမ့ၢ်ဂ့ၤဖဲအအီအမိၢ်အနုၢ်ထံအကတီၢ်န့ၣ်ဖီအီၣ်အညၣ်တဂ့ၤ.”
27 ယွၤစံးဘၣ်စီၤမိၤၡ့, “ကွဲးလီၤတၢ်ကတိၤတဖၣ်အံၤတက့ၢ်. အဂ့ၢ်ဒ်အံၤ, ယမၤတၢ်အၢၣ်လီၤအီလီၤတမံၤဒီးနၤဒီးကီၢ် အံၣ်စရ့လးန့ၣ်, သန့ၤထီၣ်အသးလၢတၢ်ကတိၤတဖၣ်အံၤအဖီခိၣ်လီၤ.”
28 စီၤမိၤၡ့အိၣ်ဖဲန့ၣ်ဒီးယွၤ, အနံၤလွံၢ်ဆံဒီးအနၤလွံၢ်ဆံလီၤ. တအီၣ်တအိတၢ်နီတမံၤဘၣ်. အဝဲကွဲးလီၤတၢ်အၢၣ်လီၤအီလီၤအတၢ်ကတိၤတဖၣ်လၢလၢၢ်ဘ့ၣ်ဘၣ်တဖၣ်အလိၤ, လၢအမ့ၢ်တၢ်မၤလိာ်အထံၣ်တဆံန့ၣ်လီၤ.
29 ဖဲစီၤမိၤၡ့က့ၤလီၤလၢကစၢၢ်စံၤနါအလိၤ, စိာ်ဃုာ်ဒီးတၢ်မၤလိာ်အထံၣ်တဆံန့ၣ်, အမဲာ်သၣ်ကပြုၢ်ကပြီၤဝဲ လၢတၢ်ကတိၤတ့ၢ်တၢ်ဒီးယွၤအဃိလီၤ. ဘၣ်ဆၣ်ဒီးတၢ်န့ၣ်အဝဲတသ့ၣ်ညါဝဲဘၣ်.
30 စီၤအၤဟရိၣ်ဒီးပှၤဂီၢ်မုၢ်ခဲလၢာ်ကွၢ်ထီၣ်စီၤမိၤၡ့ဒီးထံၣ် ဘၣ်ဝဲလၢအမဲာ်သၣ်ကပြုၢ်ကပြီၤအဃိကလဲၤဘူးဃီၤဆူအအိၣ်န့ၣ်ပျံၤတၢ်လီၤ.
31 ဘၣ်ဆၣ်စီၤမိၤၡ့ကိးအဝဲသ့ၣ်, ဒီးစီၤအၤဟရိၣ်ဒီးဒူၣ်ထၢ အခိၣ်ခဲလၢာ်လဲၤဆူအအိၣ်ဒီးစီၤမိၤၡ့ကတိၤတၢ်ဒီးအဝဲသ့ၣ်လီၤ.
32 အန့ၣ်ဝံၤဒီး, ကယဲၢ်ပှၤဂီၢ်မုၢ်ခဲလၢာ်ပာ်ဖှိၣ်ထီၣ်အသးဝးတရံး အီၤ, ဒီးစီၤမိၤၡ့ဟ့ၣ်လီၤကယဲၢ်တၢ်ဘူၣ်တၢ်ဘါအတၢ်သိၣ်တၢ်သီတဖၣ် လၢယွၤဟ့ၣ်လီၤအီၤလၢကစၢၢ်စံၤနါအလိၤန့ၣ်လီၤ.
33 ဖဲစီၤမိၤၡ့ကတိၤတၢ်ဒီးအဝဲသ့ၣ်ဝံၤဝဲန့ၣ်, အဝဲမၤဘၢအမဲာ်လၢနီၣ်ကျၢၢ်ဘၢမဲာ်တဘ့ၣ်လီၤ.
34 တဘျီလၢ်လၢ်ဖဲစီၤမိၤၡ့လဲၤနုာ်ဆူယွၤအိၣ်ဝဲဆိးဝဲအဒဲစီဆှံအပူၤလၢကကတိၤ တၢ်ဒီးယွၤအဂီၢ်န့ၣ်, အဝဲသုးကွံာ်နီၣ်ကျၢၢ်ဘၢမဲာ်န့ၣ်လီၤ. ဖဲအဟဲက့ၤထီၣ်ဝဲန့ၣ်, တဲဘၣ်အံၣ်စရ့လးအပှၤဂီၢ်မုၢ်လၢကယဲၢ်တၢ်လၢယွၤမၤလိာ်အီၤလၢအကတဲဝဲတဖၣ်လီၤ.
35 ဒီးအဝဲသ့ၣ်ကထံၣ်ဘၣ်စီၤမိၤၡ့လၢအမဲာ်သၣ်ကပြုၢ်ကပြီၤဝဲလီၤ. မၤသးဒ်န့ၣ်ဒီးအဝဲကကးဘၢအမဲာ်လၢနီၣ်ကျၢၢ်ဘၢမဲာ်တုၤတၢ်ဆၢ ကတီၢ်လၢအကလဲၤကဒီးဝဲလၢကကတိၤတၢ်ဒီးယွၤလၢခံတဘျီန့ၣ်လီၤ.