32
(သိၣ်သီ.၉:၆ - ၂၉)
1 ဖဲပှၤဂီၢ်မုၢ်ထံၣ်ဝဲလၢစီၤမိၤၡ့တဟဲက့ၤလီၤလၢကစၢၢ်ဒီ ခိၣ်ဘၣ်မ့မ့ၢ်အိၣ်ဝဲဖဲန့ၣ်ယံာ်ဒိၣ်မးန့ၣ်, အဝဲသ့ၣ်ပာ်ဖှိၣ်အသးဝးတရံးစီၤအၤဟရိၣ်ဒီးစံးဘၣ်အီၤ, “တၢ်မၤအသးဒီးစီၤမိၤၡ့လၢအဆှၢထီၣ်ပှၤလၢကီၢ်အဲၤကူပတူး တဂၤဒ်လဲၣ်န့ၣ်ပတသ့ၣ်ညါဘၣ်. လၢတၢ်န့ၣ်အဃိမၤန့ၢ်ပှၤလၢကစၢ်ထူတဂၤလၢကဆှၢပှၤတက့ၢ်.”
2 စီၤအၤဟရိၣ်စံးဘၣ်အဝဲသ့ၣ်, “ဘ့ၣ်လီၤကွံာ်ထူအကွီၤတဖၣ်လၢသုမါတဖၣ်, သုဖိခွါတဖၣ်ဒီးသုဖိမုၣ်တဖၣ်သိးဝဲဒီးဟဲစိာ်ဆူယအိၣ်တက့ၢ်.”
3 မၤသးဒ်န့ၣ်ဒီးပှၤဂီၢ်မုၢ်ခဲလၢာ်ဘ့ၣ်လီၤကွံာ်ထူအကွီၤတဖၣ် ဒီးဟဲစိာ်ဝဲဆူစီၤအၤဟရိၣ်အအိၣ်လီၤ.
4 အဝဲဒၣ်ဟံးန့ၢ်ထူအကွီၤတဖၣ်ဒီးဃ့ၣ်ပှံၢ်လီၤအီၤဒီးလူလီၤ ထူအထံဆူတၢ်ဂီၤသိအသးအတကွီၣ်တခါအပူၤ, ဒီးဒုးကဲထီၣ်ဂီၤ ဖံးထူအဖါတဒုန့ၣ်လီၤ.
ဒီးပှၤဂီၢ်မုၢ်စံးဝဲ, “ကီၢ်အံၣ်စရ့လးဧၢ, အဝဲအံၤမ့ၢ်ပကစၢ်, ပှၤလၢအထူးထီၣ်ကွံာ်ပှၤလၢကီၢ်အဲၤကူပတူး အပူၤန့ၣ်လီၤ.”
5 အန့ၣ်ဒီးစီၤအၤဟရိၣ်ဘှီထီၣ်တၢ်လုၢ်လီၢ်တခါလၢဂီၤဖံးထူ န့ၣ်အမဲာ်ညါဒီးဘိးဘၣ်သ့ၣ်ညါဝဲဒ်အံၤ, “ခဲမုၢ်ဆ့ၣ်န့ၣ်မူးဖးဒိၣ်ကအိၣ်ဝဲတမူးလၢတၢ်မၤလၤကပီၤ ယွၤအဂီၢ်န့ၣ်လီၤ.”
6 လၢခံတနံၤမုၢ်ဆ့ၣ်ထီၣ်ဂီၤဂီၤန့ၣ်အဝဲသ့ၣ်ဟဲစိာ်ဆၣ်ဖိကီၢ် ဖိတနီၤလၢကဘၣ်တၢ်ဆူးကဲၤအီၤဒ်တၢ်လုၢ်တၢ်ပာ်တဖၣ်အသိး, ဒီးအဂၤတနီၤလၢကအီၣ်ဝဲဒ်တၢ်လုၢ်မၤဃူမၤဖိးအတၢ်လုၢ်အသိး န့ၣ်လီၤ. ပှၤဂီၢ်မုၢ်ဆ့ၣ်နီၤမၤမူးဖးဒိၣ်ဒီးကဲထီၣ်ဝဲလၢတၢ်အီၣ်လုၣ် ကိလုၣ်ကပာ်ဒီးတၢ်မုာ်ဖံးမုာ်ညၣ်အတၢ်ကလုာ်ကလိၤန့ၣ်လီၤ.
7 ယွၤစံးဘၣ်စီၤမိၤၡ့, “က့ၤလီၤကဒါက့ၤတဘျီဃီတက့ၢ်. အဂ့ၢ်ဒ်အံၤ, နပှၤဂီၢ်မုၢ်လၢနဆှၢထီၣ်အီၤလၢကီၢ်အဲၤကူပတူး န့ၣ်မၤလံတၢ်ဒဲးဘးဒီးညိကွံာ်ယၤလံ.
8 အဝဲသ့ၣ်ပာ်တ့ၢ်ကွံာ်လံကျဲလၢယမၤလိာ်တ့ၢ်အီၤဒ်သိးအကပိာ်ဝဲ အဂီၢ်န့ၣ်လီၤ. အဝဲသ့ၣ်မၤထီၣ်ဂီၤဖံးဖါဖိသိအသးလၢထူတဒုဒီး ဘူၣ်ထီၣ်ဘါထီၣ်အီၤဒီးလုၢ်ထီၣ်ပာ်ထီၣ်တၢ်လုၢ်တၢ်ပာ်တဖၣ်ဆူအအိၣ်လီၤ. အဝဲသ့ၣ်စံးလၢတၢ်အံၤမ့ၢ်အကစၢ်လၢအထုးထီၣ်အီၤလၢကီၢ်အဲၤကူပတူးအပူၤန့ၣ်လီၤ.
9 ပှၤဂီၢ်မုၢ်အံၤအခိၣ်ကိၤထဲလဲၣ်န့ၣ်ယသ့ၣ်ညါယဲလီၤ.
10 ခဲအံၤ, ကျဲးစၢးလၢနကတြီယၤအဂီၢ်တဂ့ၤ. ယသးဒိၣ်ထီၣ်ဘၣ်အဝဲသ့ၣ်လံဒီးယကမၤဟးဂီၤအဝဲသ့ၣ်န့ၣ်လီၤ. ဒီးယကဒုးကဲထီၣ်နၤဒီးနစၢၤနသွဲၣ်တဖၣ်လၢပှၤကလုာ်ဖးဒိၣ်တကလုာ်န့ၣ်လီၤ.”
11 ဘၣ်ဆၣ်ဒီး, စီၤမိၤၡ့ဃ့ကညးဝဲယွၤ, အကစၢ်ယွၤဒီးစံး, “ယွၤဧၢ, ဘၣ်မနုၤလၢနဘၣ်သးထီၣ်ဘၣ်နပှၤဂီၢ်မုၢ်လၢနအုၣ်က့ၤ ခီၣ်က့ၤအီၤလၢကီၢ်အဲၤကူပတူးအပူၤလၢတၢ်ဂံၢ်တၢ်ဘါဒီးတၢ် စိကမီၤဖးဒိၣ်န့ၣ်အပူၤလဲၣ်.
12 ဘၣ်မနုၤလၢပှၤအဲၤကူပတူးဖိတဖၣ်စံးဝဲကသ့လၢနဆှၢထီၣ်နပှၤ ဂီၢ်မုၢ်လၢကီၢ်အဲၤကူပတူးဒီးကူၣ်ထီၣ်လၢနကမၤသံကွံာ်အီၤ လၢကစၢၢ်တဖၣ်အကျါဒီးမၤဟးဂီၤကွံာ်အီၤလၢာ်လၢာ်ဆ့ဆ့ အဂီၢ်န့ၣ်လဲၣ်. ဆိကတီၢ်တၢ်သးထီၣ်တက့ၢ်. လဲလိာ်ကွံာ်နတၢ်ပာ်လီၤသးဒီးဒုးလီၤဘၣ်တၢ်တတၢးတနါအံၤလၢ နပှၤဂီၢ်မုၢ်အလိၤတဂ့ၤ.
13 သ့ၣ်နီၣ်ထီၣ်က့ၤနခ့နပှၤစီၤအၤဘြၤဟၣ်, စီၤအံၤစဲး, ဒီးစီၤယၤကိာ်တက့ၢ်. သ့ၣ်နီၣ်ထီၣ်က့ၤတၢ်အၢၣ်လီၤအီလီၤ သမှံၤသပှၢ်လၢနမၤဒီးအဝဲသ့ၣ်, လၢနကဟ့ၣ်လီၤအဝဲသ့ၣ်လၢအစၢၤအသွဲၣ်အါထဲသိးသိးဒီးဆၣ်ဧိၤ ဖီဧိၤလၢမူကပိာ်လိၤဒီးဟ့ၣ်လီၤအစၢၤအသွဲၣ်တဖၣ်လၢကီၢ်တဘ့ၣ် လၢနအၢၣ်လီၤအီလီၤတ့ၢ်လၢကကဲထီၣ်အတၢ်န့ၢ်သါအထူအယိာ်န့ၣ်တက့ၢ်.”
14 မၤသးဒ်န့ၣ်ဒီးယွၤလဲလိာ်ကွံာ်အတၢ်ပာ်လီၤသးဒီးတဒုးလီၤဘၣ် တၢ်တတၢးတနါလၢအပှၤဂီၢ်မုၢ်အလိၤလၢကမၤပျံၤမၤဖုးအဝဲ သ့ၣ်လၢၤဘၣ်.
15 စီၤမိၤၡ့က့ၤလီၤကဒါက့ၤလၢကစၢၢ်လိၤ, စိာ်ဃုာ်ဝဲဒီးလၢၢ် ဘ့ၣ်ဘၣ်ခံဘ့ၣ်လၢတၢ်မၤလိာ်တဖၣ်အိၣ်ကွဲးအသးလၢအလိၤခံကပၤလိာ်န့ၣ်လီၤ.
16 ကစၢ်ယွၤအနီၢ်ကစၢ်ဒၣ်ဝဲမၤလၢၢ်ဘ့ၣ်ဘၣ်တဖၣ်အံၤဒီးစိးပျၤတၢ် မၤလိာ်တဖၣ်လၢအလိၤန့ၣ်လီၤ.
17 စီၤယိၤၡူနၢ်ဟူပှၤဂီၢ်မုၢ်ကိးပသူဒီးစံးဘၣ်စီၤမိၤၡ့, “ယနၢ်ဟူတၢ်ဒုးတၢ်ယၤအတၢ်ကိးပသူလၢသူၣ်ဒဲအလီၢ်ပူၤန့ၣ်လီၤ.”
18 စီၤမိၤၡ့စံးဝဲဒၣ်, “တၢ်န့ၣ်သီၣ်တလီၤဂာ်ဒီးတၢ်မၤနၢၤ အတၢ်ကိးမ့ၢ်ဂ့ၤတၢ်ဃၣ်ကွံာ်အတၢ်ကိးမ့ၢ်ဂ့ၤဘၣ်. မ့ၢ်တၢ်သးဝံၣ်အသီၣ်လီၤ.”
19 ဖဲစီၤမိၤၡ့ဟဲဘူးထီၣ်ဆူသူၣ်ဒဲအလီၢ်တုၤအထံၣ်ဃီၤဂီၤဖံး ဖါဖိဒီးပှၤဂီၢ်မုၢ်ဂဲၤကလံာ်ဝဲန့ၣ်, အသးကဲၤထီၣ်ဝဲဒၣ်လီၤ. ဖဲန့ၣ်လၢကစၢၢ်ခီၣ်ထံးန့ၣ်, အဝဲကွံာ်လီၤတဲာ်လၢၢ်ဘ့ၣ်ဘၣ်တဖၣ်လၢအစိာ်ဝဲဒီးမၤကၢ်ကွံာ်ဝဲန့ၣ်လီၤ.
20 အဝဲဟံးထီၣ်ဂီၤဖံးဖါဖိလၢအဝဲသ့ၣ်မၤဝဲ, ဒီးဃ့ၣ်ပှံၢ်လီၤဒီးတိၢ်ကမူၣ်ဝဲဒီးဃါဃုာ်အီၤလၢထံလီၤ. ဝံၤဒီးအဝဲမၢအံၣ်စရ့လးအပှၤဂီၢ်မုၢ်အိအီၤန့ၣ်လီၤ.
21 အဝဲစံးဘၣ်စီၤအၤဟရိၣ်, “ဒ်သိးနကမၤတုၤပှၤဂီၢ်မုၢ်မၤတၢ် ဒဲးဘးလီၤပျံၤလီၤဖုးတမံၤအံၤအဂီၢ်န့ၣ်အဝဲသ့ၣ်မၤနၤမနုၤ တမံၤလဲၣ်.”
22 စီၤအၤဟရိၣ်စံးဆၢဝဲ, “သးဒိၣ်တၢ်တဂ့ၤ, နသ့ၣ်ညါနဲလၢပှၤဂီၢ်မုၢ်အံၤပာ်လီၤအသးကျၢၤမုဆှ လၢကမၤတၢ်အၢဒ်လဲၣ်န့ၣ်လီၤ.
23 အဝဲသ့ၣ်စံးဘၣ်ယၤ, တၢ်မၤတ့ၢ်အသးဒီးစီၤမိၤၡ့ပှၤတဂၤလၢ အထုးထီၣ်ပှၤလၢကီၢ်အဲၤကူပတူးအပူၤဒ်လဲၣ်န့ၣ်ပတသ့ၣ်ညါဘၣ်. လၢတၢ်န့ၣ်အဃိဒီးမၤန့ၢ်ပှၤလၢကစၢ်တဂၤလၢအကဆှၢပှၤတက့ၢ်.
24 ယမၤလိာ်အဝဲသ့ၣ်လၢကဟဲစိာ်န့ၢ်ယၤအတၢ်ကယၢကယဲထူတဖၣ်, ဒီးပှၤလၢတၢ်အိၣ်ဒီးအီၤတနီၤနီၤန့ၣ်ဘ့ၣ်လီၤဝဲ ဒီးဟ့ၣ်လီၤယၤလီၤ. ယကွံာ်လီၤတၢ်ကယၢကယဲတဖၣ်န့ၣ်ဆူ မ့ၣ်အူပူၤဒီးဂီၤဖံးဖါဖိတဒုအံၤကဲထီၣ်ဝဲဒၣ်လီၤ.”
25 စီၤမိၤၡ့ထံၣ်ဝဲလၢစီၤအၤဟရိၣ်ပျဲပှၤဂီၢ်မုၢ်လူၤဘၣ်အသး ဒီးမၤဟးဂီၤလီၤအသးဒၣ်ဝဲလၢအဒုၣ်အဒါတဖၣ်အမဲာ်ညါလီၤ.
26 လၢတၢ်န့ၣ်အဃိအဝဲဆၢထၢၣ်ဖဲတၢ်သူၣ်ဒဲအလီၢ်အကျဲစၢၤန့ၣ်ဒီး ကိးထီၣ်ဝဲ, “ပှၤတဂၤလၢ်လၢ်လၢအအိၣ်လၢယွၤအအိၣ်တခီန့ၣ်မ်အကဟဲဆူအံၤတ က့ၢ်.” မၤသးဒ်န့ၣ်ဒီးပှၤလ့ၤဝံဖိတဖၣ်ပာ်ဖှိၣ်အသးဝးတရံးအီၤန့ၣ်လီၤ.
27 ဒီးအဝဲစံးဘၣ်အဝဲသ့ၣ်, “ယွၤ, ကီၢ်အံၣ်စရ့လးအကစၢ်ယွၤမၤ လိာ်သုဝဲကိးဂၤဒဲးလၢသုကဟံးထီၣ်သုနး, ဒီးလဲၤခီဂာ်တၢ်သူၣ်ဒဲအလီၢ်စးထီၣ်လၢကျဲစၢၤအံၤတုၤဆူ ကျဲစၢၤဘးခီတတီၤန့ၣ်ဒီးမၤသံကွံာ်သုဒီပုၢ်ဝဲၢ်ခွါတ ဖၣ်, သုတံၤသကိးတဖၣ်, ဒီးပှၤအိၣ်လၢသုဃၢၤတဖၣ်န့ၣ်လီၤ.”
28 ပှၤလ့ၤဝံဖိတဖၣ်စူၢ်အကလုၢ်ဒီးမၤသံကွံာ်ပှၤပိာ်ခွါအဂၤသၢကထိလၢမုၢ်နံၤအဝဲန့ၣ်လီၤ.
29 ဒီးစီၤမိၤၡ့စံးဘၣ်ပှၤလ့ၤဝံဖိတဖၣ်, “တနံၤအံၤသုပာ် စီဆှံသုသးဒ်ပှၤလုၢ်တၢ်အခိၣ်တဖၣ်အသိးလၢယွၤအတၢ်မၤအပူၤခီဖျိ တၢ်မၤသံကွံာ်သုဖိခွါတဖၣ်ဒီးသုဒီပုၢ်ဝဲၢ်ခွါတဖၣ်လီၤ. မၤသးဒ်န့ၣ်ဒီးယွၤဟ့ၣ်လီၤသုလၢအတၢ်ဆိၣ်ဂ့ၤန့ၣ်လီၤ.”
30 လၢခံတနံၤန့ၣ်စီၤမိၤၡ့စံးဘၣ်ပှၤဂီၢ်မုၢ်, “သုမၤတ့ၢ်တၢ်ဒဲးဘးအၢအၢသီသီတမံၤလီၤ. ဘၣ်ဆၣ်ဒီးခဲအံၤယကလဲၤထီၣ်ကဒီးဆူကစၢၢ်ဒီခိၣ်ဆူယွၤအအိၣ်လီၤ. ဘၣ်သ့ၣ်သ့ၣ်ယမၤန့ၢ်တၢ်ပျၢ်တၢ်ဒဲးဘးလၢသုဂီၢ်ကသ့ဝဲလီၤ.”
31 အန့ၣ်ဝံၤဒီးစီၤမိၤၡ့က့ၤကဒါက့ၤဆူယွၤအအိၣ်ဒီးစံး, “ပှၤဂီၢ်မုၢ်အံၤမၤတ့ၢ်တၢ်ဒဲးဘးအၢအၢသီသီလီၤ. အဝဲသ့ၣ်မၤအိၣ်ထီၣ်ကစၢ်တဂၤလၢထူဒီးဘါထီၣ်ဝဲလီၤ.
32 ဝံသးစူၤပျၢ်လၢ်အတၢ်ကမၣ်တက့ၢ်. ဘၣ်ဆၣ်ဒီးနမ့ၢ်တပျၢ်ဘၣ်န့ၣ် တြူာ်ကွံာ်ယမံၤလၢလံာ်လၢနကွဲးတ့ၢ်နပှၤဂီၢ်မုၢ်အမံၤတဖၣ်အပူၤန့ၣ်တက့ၢ်.”
33 ယွၤစံးဆၢအီၤ, “ယကတြူာ်ကွံာ်ပှၤတဖၣ်လၢအမၤတၢ်ဒဲးဘးထီ ဒါယၤအမံၤလၢယလံာ်အပူၤလီၤ.
34 ခဲအံၤလဲၤဒီးဆှၢပှၤဂီၢ်မုၢ်ဆူတၢ်လီၢ်လၢယတဲတ့ၢ်နၤလၢ အဂ့ၢ်န့ၣ်တက့ၢ်. သ့ၣ်နီၣ်ထီၣ်လၢယကလူးကနဲၣ်နၤကျဲ, ဘၣ်ဆၣ်ဒီးတၢ်ဆၢကတီၢ်လၢယကစံၣ်ညီၣ်ပှၤဂီၢ်မုၢ်အံၤလၢအတၢ်ဒဲး ဘးအဃိန့ၣ်ဟဲဝဲလံ.”
35 မၤသးဒ်န့ၣ်ဒီးယွၤဆှၢလီၤတၢ်ဆါတမံၤလၢပှၤဂီၢ်မုၢ်အလိၤမ့ၢ် လၢအမၢဆူၣ်စီၤအၤဟရိၣ်ဒ်သိးကမၤထီၣ်ဂီၤဖံးဖါထူတဒုန့ၣ်အဃိလီၤ.