30
(ဟးထီၣ်.၃၇:၂၅ - ၂၈)
1 ဘှီထီၣ်မၤတၢ်လုၢ်လီၢ်တခါလၢသ့ၣ်ဖှ့ၡံးတၤလၢတၢ်ဆိၣ်ကဲၤတၢ်နၢမူအဂီၢ်တက့ၢ်.
2 အထီကဘၣ်အိၣ်တပျၢ်, အဒီၣ်တူာ်ကဘၣ်အိၣ်တပျၢ်, အကစီၤထီၣ်ခံပျၢ်ဒီးအကပၤလွံၢ်ကပၤကဘၣ်တုၤသိးလိာ်အသးလီၤ. ဒီးအနၢၤလွံၢ်နၢၤလၢအအိၣ်လၢအနၢၣ်လွံၢ်နၢၣ်န့ၣ်ကဘၣ်မ့ၢ်တၢ် တခါဃီဒီးအီၤန့ၣ်လီၤ.
3 ကးဘၢအဖီခိၣ်အကပၤလွံၢ်ခီဒီးအနၢၤတဖၣ်လၢထူစီဒီးမၤအခိၣ် ဒူဝးတရံးလၢထူတက့ၢ်.
4 မၤထီၣ်တၢ်စိာ်ထီၣ်စိာ်လီၤအီၤအဂီၢ်ကွီၤထူခံကွီၤဒီးထီ ထီၣ်အီၤဖဲအခိၣ်ဒူအဖီလာ်လၢအကပၤခံကပၤဒ်သိးကဟံးဃာ်နီၣ် ယိးဘိတဖၣ်လၢတၢ်ကစိာ်ထီၣ်စိာ်လီၤအီၤအဂီၢ်န့ၣ်တက့ၢ်.
5 မၤနိၣ်ယိးဘိတဖၣ်န့ၣ်လၢသ့ၣ်ဖှ့ၡံးတၤ ဒီးကးဘၢအီၤလၢထူတက့ၢ်.
6 ပာ်လီၤတၢ်လုၢ်လီၢ်အံၤဖဲယၣ်ဘျးသဒၢလၢအဘၣ်တၢ်ဘျးလီၤအီၤဖဲ တၢ်အၢၣ်လီၤအီလီၤအတလါစီဆှံအချၢန့ၣ်တက့ၢ်. တၢ်လီၢ်န့ၣ်မ့ၢ်ဖဲယကသဂၢၢ်လိာ်ယသးဒီးသု အလီၢ်န့ၣ်လီၤ.
7 ကိးမုၢ်ဂီၤဒဲးဖဲစီၤအၤဟရိၣ်ဟဲလၢကကတဲာ်ကတီၤမ့ၣ်အူဒၢတဖၣ်န့ၣ်, အဝဲကဘၣ်ဆိၣ်ကဲၤတၢ်နၢမူလၢတၢ်လုၢ်လီၢ်အံၤအဖီခိၣ်လီၤ.
8 အဝဲကဘၣ်မၤဝဲဒ်န့ၣ်အသိးဖဲအဒွဲၣ်ကပီၤထီၣ်မ့ၣ်အူဒၢတဖၣ်လၢမုၢ်ဟါလီၤအကတီၢ်န့ၣ်လီၤ. တၢ်လုၢ်ထီၣ်တၢ်နၢမူအံၤကဘၣ်တၢ်မၤထွဲအီၤတဘိယူၢ်ဃီဒီးတၢ် မၤတံာ်တာ်အီၤတဘၣ်အိၣ်ဝဲနီတစုဘၣ်န့ၣ်လီၤ.
9 လုၢ်ထီၣ်တၢ်နၢမူလၢအဘၣ်တၢ်တြီအီၤတဖၣ်မ့ၢ်ဂ့ၤ, ဆၣ်ဖိကီၢ်ဖိတဒုဒုမ့ၢ်ဂ့ၤ, တၢ်မၤဘူၣ်ကိၣ်တမံၤမံၤမ့ၢ်ဂ့ၤ, လၢတၢ်လုၢ်လီၢ်အံၤအဖီခိၣ်တဂ့ၤ. ဒီးလူလီၤစပံးထံအတၢ်လုၢ်လၢအဖီခိၣ်နီတမံၤတဂ့ၤ.
10 ဒီးစီၤအၤဟရိၣ်ကဘၣ်မၤကဆှီထီၣ်တၢ်လုၢ်လီၢ်အံၤအလုၢ်အလၢ်ခီ ဖျိပာ်ဆၣ်ဖိကီၢ်ဖိလၢတၢ်လုၢ်အီၤလၢတၢ်ပျၢ်တၢ်ဒဲးဘးအဂီၢ် အသွံၣ်လၢတၢ်လုၢ်လီၢ်အံၤအနၢၤလွံၢ်နၢၤအဖီခိၣ်လီၤ. တၢ်အံၤကဘၣ်တၢ်မၤအီၤတနံၣ်တဘျီကိးနံၣ်ဒဲးတဘိယူၢ်ဃီ န့ၣ်လီၤ. တၢ်လုၢ်လီၢ်အံၤကဘၣ်စီဆှံဝဲလၢလၢပှဲၤပှဲၤဒီးကဘၣ် တၢ်ပာ်စီဆှံအီၤဆူယၤ, ယွၤအအိၣ်န့ၣ်လီၤ.”
11-12 ယွၤစံးဘၣ်စီၤမိၤၡ့, “တုၤနထၢပှၤအံၣ်စရ့လးဖိတဖၣ်အနီၣ်ဂံၢ်အတၢ်ကွဲးနီၣ်တမံၤဒီး, ပှၤတဂၤစုာ်စုာ်န့ၣ်ကဘၣ်ဟ့ၣ်ယၤတၢ်အပှ့ၤလၢအသးသမူအဂီၢ်, ဒ်သိးဖဲတၢ်ထၢဖှိၣ်အနီၣ်ဂံၢ်အတၢ်ကွဲးနီၣ်အကတီၢ်န့ၣ်တၢ်တတၢးတနါအသုတဘၣ်အီၤနီတမံၤ အဂီၢ်န့ၣ်လီၤ.
13 ပှၤကိးဂၤဒဲးလၢဘၣ်တၢ်ဂံၢ်ဃုာ်အီၤလၢတၢ်ထၢဖှိၣ်နီၣ်ဂံၢ်အတၢ် ကွဲးနီၣ်အပူၤန့ၣ်ကဘၣ်ဟ့ၣ်စ့ဒ်တၢ်လီၤဘၣ်အီၤအသိးဒ်တၢ်လုၢ် ဟံၣ်အခိၣ်အနၢ်တဖၣ်ပာ်လီၤဝဲအနီၣ်ထိၣ်အသိးန့ၣ်လီၤ. ပှၤကိးဂၤဒဲးကဘၣ်ဟ့ၣ်စ့အဝဲအံၤဒ်တၢ်လုၢ်မၤဘူၣ်ဆူယအိၣ်န့ၣ်လီၤ.
14 ပှၤကိးဂၤဒဲးလၢအဘၣ်တၢ်ဂံၢ်ဃုာ်အီၤလၢတၢ်ထၢဖှိၣ်နီၣ်ဂံၢ် အတၢ်ကွဲးနီၣ်အပူၤ, ဒ်ပစံးတၢ်အသိး, ပှၤပိာ်ခွါကိးဂၤဒဲးလၢအသးအိၣ်အနံၣ်ခံဆံ ဒီးပှၢ်န့ၢ်အနံၣ်ခံဆံတဖၣ်န့ၣ်ကဘၣ်ဟ့ၣ်တၢ်အပှ့ၤပှဲၤအံၤဆူယအိၣ်န့ၣ်လီၤ.
15 ဖဲပှၤဟ့ၣ်တၢ်အပှ့ၤလၢအသးသမူအဂီၢ်အံၤ, ပှၤကဲဒိၣ်တဖၣ်တဘၣ်ဟ့ၣ် အါဝဲ, ဒီးပှၤဖှီၣ်ဖိတဖၣ်စ့ၢ်ကီးတဘၣ်ဟ့ၣ်စှၤဝဲဘၣ်လီၤ.
16 ထၢဖှိၣ်စ့တဖၣ်အံၤလၢကီၢ်အံၣ်စရ့လးအပှၤဂီၢ်မုၢ်အအိၣ်ဒီးသူ အီၤလၢတၢ်ကွၢ်ထွဲဒဲစီဆှံလၢယအိၣ်ယဆိးန့ၣ်အဂီၢ်တက့ၢ်. တၢ်အခိအသွဲအံၤကဘၣ်မ့ၢ်တၢ်ဟ့ၣ်တၢ်အပှ့ၤလၢအဝဲသ့ၣ်အသးသမူအဂီၢ်, ဒီးယကသ့ၣ်နီၣ်ထီၣ်လၢယကဒီဒၣ်အိၣ်ပှိၤအဝဲသ့ၣ်အဂီၢ်န့ၣ်လီၤ.”
17 ယွၤစံးဘၣ်စီၤမိၤၡ့,
18 “မၤထီၣ်သရာ်တိၢ်ဘီတခါအိၣ်ဒီးတိၢ်ဘီအခံဟံးဃာ်တက့ၢ်. ပာ်လီၤအီၤဖဲယွၤအဒဲစီဆှံဒီးတၢ်လုၢ်လီၢ်အဘၢၣ်စၢၤဒီးဒၢနုာ်ထံလၢအအိပူၤတက့ၢ်.
19 စီၤအၤဟရိၣ်ဒီးအဖိခွါတဖၣ်ကဘၣ်သူထံအံၤလၢကသ့စီအစုတဖၣ် ဒီးအခီၣ်တဖၣ်အဂီၢ်,
20 တချုးလၢအဝဲသ့ၣ်လဲၤနုာ်ဆူယွၤအဒဲစီဆှံအပူၤမ့ၢ်ဂ့ၤ, သုးဘူးအသးဆူတၢ်လုၢ်လီၢ်ဒ်သိးအကလုၢ်ထီၣ်တၢ်အီၣ်တၢ်အီ အတၢ်လုၢ်အဂီၢ်မ့ၢ်ဂ့ၤ, န့ၣ်လီၤ.
21 အဝဲသ့ၣ်ကဘၣ်သ့အစုတဖၣ်ဒီးအခီၣ်တဖၣ်ဒ်သိးအသုတသံ တဂ့ၤလီၤ. အအံၤမ့ၢ်တၢ်သိၣ်တၢ်ဘျၢတထံၣ်လၢအဝဲသ့ၣ်ဒီး အစၢၤအသွဲၣ်တဖၣ်ကဘၣ်တိၢ်န့ၢ်မၤထွဲဝဲတဘိယူၢ်ဃီန့ၣ်လီၤ.”
22-23 ယွၤစံးဘၣ်စီၤမိၤၡ့, “ဟံးန့ၢ်တၢ်နၢမူအထံအဂ့ၤကတၢၢ်လၢအမ့ၢ်မူရၣ်လီၤတယၢၢ်ၡက့ လးယဲၢ်ကယၤ, တၢ်နၢမူကဒါရါလၢအဂ့ၤမးၡက့လးခံကယၤယဲၢ်ဆံဒီးတၢ်နၢမူ လီၢ်ဟ့ၣ်ၡက့လးခံကယၤယဲၢ်ဆံ,
24 ဒီးတၢ်နၢမူကဒါနါအဖံးၡကၤလးယဲၢ်ကယၤ (ခဲလၢာ်အံၤအတယၢၢ် မ့ၢ်ဒ်တၢ်လုၢ်ဟံၣ်အခိၣ်အနၢ်တဖၣ်ပာ်လီၤဝဲအနီၣ်ထိၣ်အသိး), ဒီးပာ်ဖှိၣ်အါထီၣ်သ့ၣ်စၤယံးအသိတဟံၣ်,
25 ဒီးဃါဃုာ်အီၤဒ်ထံနၢမူအသိးဒီးဒုးကဲထီၣ်သိဖှူတၢ်အသိစီဆှံတက့ၢ်.
26 သူအီၤလၢတၢ်ဖှူယအိၣ်ယဆိးအဒဲစီဆှံ, တၢ်အၢၣ်လီၤအီလီၤအတလါစီဆှံ,
27 စီၢ်နီၤခိၣ်ဒီးအတၢ်ပီးတၢ်လီတဖၣ်, တၢ်ပာ်မ့ၣ်အူဒၢအလီၢ်ဒီး အတၢ်ပီးတၢ်လီတဖၣ်, တၢ်လုၢ်လီၢ်လၢတၢ်ဆူးကဲၤတၢ်နၢမူအဂီၢ်.
28 တၢ်လုၢ်လီၢ်လၢတၢ်လုၢ်မ့ၣ်အူအဂီၢ်ဃုာ်ဒီးအတၢ်ပီးတၢ်လီခဲလၢာ်, ဒီးသရာ်တိၢ်ဘီလၢတၢ်သ့စီသးအဂီၢ်ဃုာ်ဒီးအခံဟံးဃာ်အဂီၢ်တက့ၢ်.
29 ပာ်စီဆှံတၢ်တဖၣ်အံၤလၢကျဲဒ်အံၤဒီး, အဝဲသ့ၣ်ကကဲထီၣ်တၢ်စီဆှံလၢလၢပှဲၤပှဲၤဒီးကယဲၢ်ပှၤတဂၤလၢ်လၢ်မ့တမ့ၢ်, တၢ်တမံၤလၢ်လၢ်လၢအထိးဘၣ်အီၤခဲလၢာ်န့ၣ်ကဘၣ်တၢ်မၤဘၣ်ဒိအီၤ လၢတၢ်စီဆှံအံၤအစိကမီၤန့ၣ်လီၤ.
30 အန့ၣ်ဝံၤဒီးဖှူစီၤအၤဟရိၣ်ဒီးအဖိခွါတဖၣ်, ဒီးပာ်စီဆှံအီၤဒ်ပှၤလုၢ်တၢ်အခိၣ်တဖၣ်အသိးလၢယတၢ်မၤအဂီၢ်တက့ၢ်.
31 စံးဘၣ်ကီၢ်အံၣ်စရ့လးအပှၤဂီၢ်မုၢ်လၢ, သိဖှူတၢ်စီဆှံအံၤကဘၣ်တၢ်သူ အီၤလၢယတၢ်မၤအပူၤတဘိယူၢ်ဃီအစိၤစိၤအဃၣ်ဃၣ်လီၤ.
32 သိစီဆှံအံၤတဘၣ်တၢ်လူလီၤအီၤလၢပှၤပိာ်ခွါပတီၢ်မုၢ်တဖၣ်အလိၤမ့ၢ်ဂ့ၤ, သုတဘၣ်သူအနီၣ်ထိၣ်တမံၤဃီအံၤလၢသုကဃါဃုာ်တၢ်အဂၤဒ်အံၤမ့ၢ်ဂ့ၤဘၣ်. တၢ်အံၤစီဆှံဝဲဒီးသုကဘၣ်ပာ်အီၤဒ်တၢ်စီဆှံအသိးလီၤ.
33 ပှၤတဂၤလၢ်လၢ်လၢအမၤဒိးအီၤမ့ၢ်ဂ့ၤ, သူအီၤတနီၤနီၤလၢပှၤ လၢတမ့ၢ်ဘၣ်ပှၤလုၢ်တၢ်အခိၣ်အဖီခိၣ်မ့ၢ်ဂ့ၤဒီး, ကဘၣ်တၢ်ပာ်အီၤဒ်အတမ့ၢ်လၢၤဘၣ်ပှၤတဂၤလၢယပှၤဂီၢ်မုၢ်အကျါဘၣ်န့ၣ်လီၤ.”
34 ယွၤစံးဘၣ်စီၤမိၤၡ့, “ဟံးန့ၢ်တၢ်နၢမူပှဲၤသိးသိးလၢ သ့ၣ်နၢမူတဖၣ်လၢအမ့ၢ်သ့ၣ်နၤတဖၣ်အထုး, သ့ၣ်ၡဃ့လးအထုး, သ့ၣ်သံခိၣ်ဝါအထုး, ဒီးလီၢ်ဘၣ်အကဆှီတဖၣ်န့ၣ်တက့ၢ်.
35 သူအီၤလၢနကမၤကဲထီၣ်တၢ်နၢမူ, ဃါဃုာ်အသးဒ်ဒီးသိနၢမူ အသိးန့ၣ်တက့ၢ်. ဒၢနုာ်ဃုာ်အံသၣ်လၢတၢ်ပာ်ကဆှီဒီးပာ်စီဆှံအီၤအဂီၢ်တက့ၢ်.
36 တိၢ်ကမူၣ်အီၤတနီၤတုၤအလီၤကမူၣ်ဂ့ၤဂ့ၤ, လဲၤစိာ်အီၤဆူ ယအိၣ်ယဆိးအဒဲစီဆှံအပူၤဒီးဖှံအီၤလၢတၢ်အၢၣ်လီၤအီလီၤ အတလါစီဆှံအမဲာ်ညါတက့ၢ်. ပာ်ကဲတၢ်နၢမူအံၤဒ်တၢ်စီဆှံအလၢအပှဲၤတက့ၢ်.
37 သူတၢ်ဃါဃုာ်အကျဲတမံၤဃီအံၤလၢတၢ်ကမၤတၢ်နၢမူလၢသုဂီၢ်တဂ့ၤ. ပာ်ကဲအီၤဒ်တၢ်စီဆှံတမံၤလၢတၢ်ပာ်စီဆှံအီၤဆူယအိၣ်တက့ၢ်.
38 ပှၤတဂၤမ့ၢ်မၤဒိးတၢ်အံၤတမံၤမံၤလၢကသူဝဲဒ်သိနၢမူအသိးဒီး, အဝဲတဘၣ်တၢ်ပာ်လၢၤအီၤဒ်ပှၤလၢယပှၤဂီၢ်မုၢ်အကျါတဂၤအသိးလၢၤဘၣ်န့ၣ်လီၤ.”