19
1 ကီၢ်အံၣ်စရ့လးအပှၤဂီၢ်မုၢ်ဟးထီၣ်ကွံာ်လၢတၢ်လီၢ်ရၤဖံၤဒံၣ် လီၤ. ဒီးဖဲအဝဲသ့ၣ်ဟးထီၣ်ကွံာ်လၢကီၢ်အဲၤကူပတူးအလီၢ်ခံလါသၢ လါတလါအခီၣ်ထံးကတၢၢ်တသီန့ၣ်အဝဲသ့ၣ်ဟဲတုၤဃီၤဆူပှၢ်မုၢ် ကနၢစံၤနါန့ၣ်လီၤ.
2-3 ဒီးအဝဲသ့ၣ်သူၣ်ထီၣ်အဒဲဖဲကစၢၢ်စံၤနါအခီၣ်ထံးန့ၣ်လီၤ. ဒီးစီၤမိၤၡ့လဲၤထီၣ်ဆူကစၢၢ်လိၤဒ်သိးကလဲၤသဂၢၢ်ကစၢ်ယွၤန့ၣ်လီၤ.
ယွၤကိးထီၣ်အီၤလၢကစၢၢ်အလိၤဒီးတဲဘၣ်အီၤလၢကစံးဘၣ်ပှၤအံၣ်စရ့လးဖိ, စီၤယၤကိာ်အစၢၤအသွဲၣ်တဖၣ်ဒ်အံၤ,
4 “သုထံၣ်လံယၤ, ယွၤအံၤမၤတ့ၢ်ပှၤအဲၤကူပတူးဖိတဖၣ်ဒ်လဲၣ် ဒီးယစိာ်ထီၣ်တ့ၢ်သုဒ်သိးလံာ်ကြီကြာ်အမိၢ်တဘ့ၣ်စိာ်အဖိလၢ အဒံးဆ့တဖၣ်အလိၤဒီးဟဲစိာ်သုဆူယအိၣ်ဖဲအံၤဒ်လဲၣ်န့ၣ်လီၤ.
5 ခဲကနံၣ်အံၤ, သုမ့ၢ်စူၢ်ယၤဒီးတိၢ်န့ၢ်ဖံးဃာ်ယတၢ်အၢၣ်လီၤအီ လီၤန့ၣ်သုကကဲထီၣ်ယပှၤဂီၢ်မုၢ်ဒၣ်ယဲလီၤ. ဟီၣ်ခိၣ်ဒီဘ့ၣ်န့ၣ်မ့ၢ်ယတၢ်လီၤ. ဘၣ်ဆၣ်ဒီးသုကမ့ၢ်ယပှၤဃုထၢဖိတဖၣ်,
6 ပှၤဂီၢ်မုၢ်တဖုလၢတၢ်ပာ်စီဆှံအီၤထဲဒၣ်ဆူယၤတဂၤဧိၤအအိၣ်, ဒီးသုကမၤတၢ်ခ့တၢ်ပှၤအတၢ်မၤလၢယဂီၢ်ဒ်ပှၤလုၢ်တၢ်အခိၣ်တဖၣ် အသိးန့ၣ်လီၤ.”
7 မၤသးဒ်န့ၣ်ဒီးစီၤမိၤၡ့ဟဲက့ၤစံၣ်လီၤဒီးကိးဖှိၣ်ပှၤဂီၢ် မုၢ်အခိၣ်အနၢ်တဖၣ်ဒီးတဲအဝဲသ့ၣ်တၢ်ကိးမံၤဒဲးလၢယွၤမၤလိာ် တ့ၢ်အီၤန့ၣ်လီၤ.
8 အန့ၣ်ဒီးပှၤဂီၢ်မုၢ်ခဲလၢာ်စံးဆၢသကိးဝဲ, “ပကမၤတၢ်ကိးမံၤလၢယွၤစံးဝဲလီၤ.” ဒီးစီၤမိၤၡ့ပာ် ဖျါထီၣ်က့ၤတၢ်ဂ့ၢ်အံၤဆူယွၤအအိၣ်လီၤ.
9 ဒီးယွၤစံးဘၣ်စီၤမိၤၡ့, “ယကဟဲဆူနအိၣ်လၢတၢ်အၢၣ်လၢအတီၣ် တလိၣ်အပူၤဒ်သိးပှၤဂီၢ်မုၢ်ကနၢ်ဟူဘၣ်ယကတိၤတၢ်ဒီးနၤဒီးကနာ် နၤစးထီၣ်ခဲအံၤဒီးဆူညါန့ၣ်လီၤ.”
ဒီးစီၤမိၤၡ့တဲဘၣ်ယွၤတၢ်လၢပှၤဂီၢ်မုၢ်စံးဆၢဝဲန့ၣ်လီၤ.
10 ဒီးယွၤစံးဘၣ်အီၤ, “လဲၤဆူပှၤဂီၢ်မုၢ်အအိၣ်ဒီးတဲဘၣ်အဝဲ သ့ၣ်ဒ်သိးကမၤကဆှီအသးလၢမုၢ်တနံၤအံၤဒီးခဲမုၢ်ဆ့ၣ်တနံၤ လၢတၢ်ဘူၣ်ထီၣ်ဘါထီၣ်အဂီၢ်တက့ၢ်. အဝဲသ့ၣ်ကဘၣ်ဆှုၣ် အတၢ်ကူတၢ်သိးတဖၣ်လီၤ.
11 ဒီးကဘၣ်အိၣ်ကတဲာ်ကတီၤအသးလၢခဲတဆ့ၣ်အနံၤန့ၣ်လီၤ. လၢနံၤအဝဲန့ၣ်ယကဟဲလီၤလၢကစၢၢ်စံၤနါအလိၤဖဲပှၤကိးဂၤဒဲး ထံၣ်ဘၣ်ယၤကသ့အလီၢ်န့ၣ်လီၤ.
12 မၤနီၣ်တၢ်အဆၢဝးတရံးကစၢၢ်ဒ်သိးပှၤဂီၢ်မုၢ်သုတလဲၤခီဂာ် အီၤတဂ့ၤ, ဒီးတဲဘၣ်အဝဲသ့ၣ်ဒ်သိးအသုတလဲၤထီၣ်ဆူကစၢၢ်ဖီခိၣ်မ့ၢ်ဂ့ၤ, အသုတလဲၤဘူးဒၣ်လဲာ်ဆူအဃၢၤမ့ၢ်ဂ့ၤတဂ့ၤ. ပှၤတဂၤလၢ်လၢ်မ့ၢ်ယီၢ်လီၤလၢအလိၤဒီးအဝဲဒၣ်န့ၣ်ကဘၣ်တၢ်မၤသံ ကွံာ်အီၤန့ၣ်လီၤ.
13 အဝဲကဘၣ်တၢ်ကွံာ်သံအီၤလၢလၢၢ်မ့တမ့ၢ်ကဘၣ်တၢ်ခးသံအီၤလၢ ပျၢ်ဒီးပှၤတဘၣ်ထိးဘၣ်အီၤနီတဂၤဘၣ်လီၤ. တၢ်အံၤကမ့ၢ်တမံၤဃီလၢပှၤကညီဒီးဆၣ်ဖိ ကီၢ်ဖိတဖၣ်အဂီၢ်န့ၣ်လီၤ. အဝဲသ့ၣ်ကဘၣ်တၢ်မၤသံအီၤလီၤ. ဘၣ်ဆၣ်ဒီးဖဲကွဲၤဘၣ်တၢ်အူသီၣ်ထီၣ်အီၤန့ၣ်ပှၤဂီၢ်မုၢ်ကဘၣ် လဲၤထီၣ်ဆူကစၢၢ်ဒီခိၣ်န့ၣ်လီၤ.”
14 အန့ၣ်ဝံၤဒီး, စီၤမိၤၡ့ဟဲက့ၤလီၤလၢကစၢၢ်လိၤဒီးတဲဘၣ်ပှၤ ဂီၢ်မုၢ်လၢကကတဲာ်ကတီၤအသးလၢတၢ်ဘူၣ်ထီၣ်ဘါထီၣ်အဂီၢ်န့ၣ်လီၤ. လၢတၢ်န့ၣ်အဃိအဝဲသ့ၣ်ဆှုၣ် အတၢ်ကူတၢ်သိးတဖၣ်န့ၣ်လီၤ.
15 ဒီးစီၤမိၤၡ့တဲဘၣ်အဝဲသ့ၣ်, “အိၣ်ကတဲာ်ကတီၤသုသးလၢခဲ တဆ့ၣ်တနံၤအဂီၢ်, ဒီးလၢအကတီၢ်အပူၤအံၤဟးဆှဲးတၢ်အိၣ်ဃုာ်မံဃုာ်န့ၣ်တက့ၢ်.”
16 ဒီးလၢသၢသီတသီဂီၤခီန့ၣ်လီသီၣ်လီသဲဒီးလီဝၢ်ဒံး, ဒီးတၢ်အၢၣ်ဖးတီၣ်တလိၣ်အိၣ်ဖျါဝဲလၢကစၢၢ်ဒီခိၣ်န့ၣ်လီၤ. ဒီးကွဲၤသီၣ်ဖးဒိၣ်သတူၢ်ကလာ်ဟူထီၣ်ဝဲလီၤ. ကယဲၢ်ပှၤဂီၢ်မုၢ်ခဲလၢာ်လၢသူၣ်ဒဲအလီၢ်ကနိးကစုာ်ဝဲလၢတၢ် ပျံၤတၢ်ဖုးအဃိန့ၣ်လီၤ.
17 စီၤမိၤၡ့ဒုးဟဲထီၣ်ပှၤဂီၢ်မုၢ်လၢဒဲပူၤဒ်သိးကလဲၤသဂၢၢ် ကစၢ်ယွၤအဂီၢ်န့ၣ်လီၤ. ဒီးအဝဲသ့ၣ်လဲၤဆၢထၢၣ်ဖဲကစၢၢ်အခီၣ်ထံးန့ၣ်လီၤ.
18 ကစၢၢ်စံၤနါဒီဖျၢၣ်ညါဘၣ်တၢ်ကးဘၢအီၤလၢမ့ၣ်အူလုၣ်န့ၣ် လီၤ. အဂ့ၢ်ဒ်အံၤယွၤဟဲလီၤလၢအဒီခိၣ်လၢမ့ၣ်အူအပူၤန့ၣ်လီၤ. မ့ၣ်အူလုၣ်ခုၣ်ထီၣ်ဝဲဒ်မ့ၣ်အူလုၣ်လၢဖၣ်ကပူၤအသိးဒီးပှၤဂီၢ် မုၢ်ကနိးကစုာ်ဒိၣ်ဒိၣ်ကလဲာ်လီၤ.
19 ကွဲၤအကလုၢ်သီၣ်ဒိၣ်ထီၣ်ကွ့ၢ်ကွ့ၢ်လီၤ. ဒီးစီၤမိၤၡ့ကတိၤတၢ်ဒီးယွၤစံးဆၢအီၤလၢလီသီၣ်န့ၣ်လီၤ.
20 ယွၤဟဲလီၤဝဲလၢကစၢၢ်စံၤနါအဒီခိၣ်ဒီးကိးထီၣ်စီၤမိၤၡ့ ဆူကစၢၢ်ဒီခိၣ်န့ၣ်လီၤ. ဒီးစီၤမိၤၡ့လဲၤထီၣ်ဝဲဒၣ်,
21 ဒီးယွၤစံးဘၣ်အီၤ, “က့ၤလီၤဒီးဒုးပလီၢ်ပှၤဂီၢ်မုၢ်လၢအ သုတခီဂာ်တၢ်အဆၢဒ်သိးကဟဲဒီးကွၢ်ယၤတဂ့ၤ. အဝဲသ့ၣ်မ့ၢ်မၤဝဲဒ်န့ၣ်ဒီးကသံဝဲအါဂၤလီၤ.
22 ပှၤလုၢ်တၢ်အခိၣ်တဖၣ်ဒၣ်လဲာ်လၢအဟဲဘူးဒီးယၤန့ၣ်ကဘၣ်မၤကဆှီ အသးလီၤ. မ့တမ့ၢ်ဘၣ်ဒီးယကစံၣ်ညီၣ်အဝဲသ့ၣ်လီၤ.”
23 ဒီးစီၤမိၤၡ့စံးဘၣ်ယွၤ, “ပှၤဂီၢ်မုၢ်ဟဲထီၣ်တသ့ဘၣ်. အဂ့ၢ်ဒ်အံၤ, နမၤလိာ်တ့ၢ်ပှၤလၢပကဘၣ်ပာ်အီၤဒ်ကစၢၢ်စီဆှံ ဒီးမၤတၢ်ပနီၣ်အဆၢဝးတရံးအီၤန့ၣ်လီၤ.”
24 ဒီးယွၤစံးဆၢက့ၤအီၤ, “က့ၤလီၤဒီးဟဲကိးထီၣ်စီၤအၤဟရိၣ်ဃုာ်ဒီးနၤတက့ၢ်. ဘၣ်ဆၣ်ဒီးပှၤလုၢ်တၢ်အခိၣ်တဖၣ်ဒီးပှၤဂီၢ်မုၢ်တဘၣ်ခီဂာ်တၢ်အဆၢ လၢကဟဲထီၣ်ဆူယအိၣ်အဂီၢ်န့ၣ်ဘၣ်. မ့တမ့ၢ်ဒီးယကစံၣ်ညီၣ်အဝဲသ့ၣ်လီၤ.”
25 တုၤနုၤတစုစီၤမိၤၡ့က့ၤလီၤဝဲဆူပှၤဂီၢ်မုၢ်အအိၣ်ဒီးတဲဘၣ်အဝဲ သ့ၣ်တၢ်လၢယွၤစံးဘၣ်တ့ၢ်ဝဲန့ၣ်လီၤ.