5
1 ဒီးလၢအကတီၢ်အဝဲန့ၣ်, ဝံခံဂၤလၢအမ့ၢ်ဝံဃးကဲဒီးစီၤဧံး ဒိၤအဖိခွါဝံစကၤရယၤတဖၣ်, စးထီၣ်ကတိၤတၢ်လၢပှၤအံၣ်စရ့လးဖိအကစၢ်ယွၤအမံၤအပူၤဆူပှၤ ယူဒၤဖိတဖၣ်လၢအအိၣ်ဆိးလၢကီၢ်ယူဒၤဒီးဝ့ၢ်ယရူၤၡလ့ၣ်အပူၤ န့ၣ်လီၤ.
2 တုၤစီၤၡၤလတံၤအ့လးအဖိခွါစီၤစရူၤဘၤဘ့လးဒီးစီၤယိၤ စါဒးအဖိခွါစီၤယိၤၡူနၢ်ဟူအဝဲသ့ၣ်အတၢ်ကစီၣ်တဖၣ်န့ၣ်, အဝဲသ့ၣ်စးထီၣ်သူၣ်ထီၣ်ကဒါက့ၤတၢ်လုၢ်ဟံၣ်လၢဝ့ၢ်ယရူၤၡလ့ၣ်အ ပူၤ, ဒီးဝံခံဂၤအံၤမၤစၢၤအဝဲသ့ၣ်န့ၣ်လီၤ.
3 တကတီၢ်ဃီဃၣ်ဃၣ်န့ၣ်, ပဒိၣ်ဖးဒိၣ်စီၤတးနဲလၢကီၢ်ဖရၤသးအမုၢ် နုာ်, စီၤၡသၢ်ဘိစနဲၤ, ဒီးပဒိၣ်ပပှၢ်သကိးသကိးတဖၣ်ဟဲဆူ ဝ့ၢ်ယရူၤၡလ့ၣ်ဒီးသံကွၢ်ဝဲဆူၣ်ဆူၣ်, “မတၤဟ့ၣ်လီၤသုတၢ် ကလုၢ်လၢသုကသူၣ်ထီၣ်တၢ်လုၢ်ဟံၣ်ဒီးမၤပှဲၤထီၣ်အီၤန့ၣ်လဲၣ်.”
4 အဝဲသ့ၣ်ဃ့စ့ၢ်ကီးကယဲၢ်ပှၤခဲလၢာ်အမံၤလၢအမၤစၢၤတၢ်သူၣ်ထီၣ် တၢ်လုၢ်ဟံၣ်န့ၣ်လီၤ.
5 ဘၣ်ဆၣ်, ကစၢ်ယွၤကွၢ်လီၤပှၤယူဒၤဖိအခိၣ်အနၢ်တဖၣ်, ဒီးကီၢ်ပၤရၣ်အပဒိၣ်ပပှၢ်တဖၣ်, ပာ်လီၤအသးလၢတချုးဒံးလၢအဝဲ သ့ၣ်ကွဲးလံာ်ပရၢဆူစီၤပၤဖးဒိၣ်ဒၤရယါဝ့ၢ်အအိၣ်ဒီးမၤန့ၢ် တၢ်စံးဆၢတမံၤသ့ဒံးဘၣ်န့ၣ်, တစံၣ်ညီၣ်ဒံးတၢ်နီတမံၤဘၣ်န့ၣ်လီၤ.
6 အအံၤမ့ၢ်တၢ်ပာ်ဖျါလၢအဆှၢဝဲဆူစီၤပၤဖးဒိၣ်အအိၣ်န့ၣ်လီၤ.
7 “စီၤပၤဖးဒိၣ်ဒၤရယါဝ့ၣ်ဧၢ, မ်နပၢဘၣ်တၢ်လၢတၢ်ဃူတၢ်ဖိး အပူၤန့ၣ်တက့ၢ်.
8 ကစၢ်စီၤပၤဖးဒိၣ်ကြၢးသ့ၣ်ညါဝဲလၢပလဲၤတ့ၢ်ဆူကီၢ်ယူဒၤ ဒီးထံၣ်ဘၣ်လၢတၢ်ဒိၣ်ကစၢ်ယွၤအတၢ်လုၢ်ဟံၣ်ဘၣ်တၢ်သူၣ်ထီၣ်ကဒါ က့ၤအီၤလၢလၢၢ်ကိၢ်လိၢ်ဖးဒိၣ်တဖၣ်, အိၣ်ဒီးသ့ၣ်ကျိၤတဖၣ်ဘၣ်တၢ်ထီထီၣ်အီၤလၢတၢ်ဒူၣ်အလိၤလံ. တၢ်ဖံးတၢ်မၤအံၤဘၣ်တၢ်မၤအီၤလီၤတံၢ်လီၤဆဲးဒီးလဲၤထီၣ်ဆူ ညါကွ့ၢ်ကွ့ၢ်လံန့ၣ်လီၤ.
9 ဖဲန့ၣ်ပသံကွၢ်တ့ၢ်ပှၤဂီၢ်မုၢ်အခိၣ်အနၢ်တဖၣ်လၢကတဲပှၤမ့ၢ်မတၤ ဟ့ၣ်စိဟ့ၣ်ကမီၤတ့ၢ်အဝဲသ့ၣ်လၢကသူၣ်ထီၣ်က့ၤတၢ်လုၢ်ဟံၣ်ဒီး မၤပှဲၤထီၣ်အီၤန့ၣ်လဲၣ်.
10 ပသံကွၢ်စ့ၢ်ကီးအဝဲသ့ၣ်လၢအမံၤတဖၣ်ဒ်သိးပဘိးဘၣ်သ့ၣ်ညါနၤ လၢပှၤခိၣ်ပှၤနၢ်တဖၣ်လၢတၢ်မၤအံၤအဂီၢ်မ့ၢ်မတၤလဲၣ်ကသ့န့ၣ် လီၤ.
11 အဝဲသ့ၣ်စံးဆၢဝဲလၢပမ့ၢ်မူခိၣ်ဒီးဟီၣ်ခိၣ်အကစၢ်ယွၤအခ့ အပှၤတဖၣ်, ဒီးပဘှီထီၣ်ကဒါက့ၤတၢ်လုၢ်ဟံၣ်, လၢအဘၣ်တၢ်ဘှီထီၣ်တ့ၢ်ဒီးမၤပှဲၤတ့ၢ်အီၤအဂံၢ်ခိၣ်ထံးလၢကီၢ် အံၣ်စရ့လးအစီၤပၤဖးဒိၣ်တဂၤလၢအပူၤကွံာ်အါနံၣ်အါလါတ့ၢ်လံန့ၣ်လီၤ.
12 ဘၣ်ဆၣ်ဒီးမ့ၢ်လၢပမိၢ်ပၢ်ဖံဖုလၢပျၢၤတဖၣ်မၤဒိၣ်ထီၣ်တ့ၢ် ကစၢ်ယွၤလၢမူခိၣ်အသးအဃိ, အဝဲပျဲကီၢ်ဘၤဘူၤလိၣ်အစီၤပၤနဘူၤကးန့စၢ်, စီၤပၤအစၢၤအသွဲၣ်တဂၤလၢပှၤက့ၤစ့းဖိအဘီအမုၢ်အပူၤမၤနၢၤ ကွံာ်အဝဲသ့ၣ်န့ၣ်လီၤ. တၢ်လုၢ်ဟံၣ်ဘၣ်တၢ်မၤဟးဂီၤကွံာ်အီၤဒီးပှၤဂီၢ်မုၢ်ဘၣ်တၢ်စိာ် မၢကဲကုၢ်ကွံာ်အီၤဆူကီၢ်ဘၤဘူၤလိၣ်န့ၣ်လီၤ.
13 ဒီးဖဲစီၤပၤကိရ့ၣ်ပၢတၢ်ဒ်ကီၢ်ဘၤဘူၤလိၣ်အစီၤပၤဖးဒိၣ် တဂၤအသိးအခီၣ်ထံးတနံၣ်န့ၣ်, စီၤကိရ့ၣ်ဟ့ၣ်လီၤတ့ၢ်တၢ်ကလုၢ်လၢတၢ် လုၢ်ဟံၣ်ကဘၣ်တၢ်သူၣ်ထီၣ်ကဒါက့ၤအီၤန့ၣ်လီၤ.
14 အဝဲဟ့ၣ်က့ၤတၢ်လုၢ်ဟံၣ်အဃၢၤအဃိၢ်ထူဒီးစ့လၢစီၤပၤနဘူၤကး န့စၢ်ဟံးန့ၢ်ကွံာ်လၢဝ့ၢ်ယရူၤၡလ့ၣ်အတၢ်လုၢ်ဟံၣ်အပူၤဒီးက့ၤ ပာ်ဝဲလၢတၢ်လုၢ်ဟံၣ်လၢကီၢ်ဘၤဘူၤလိၣ်န့ၣ်လီၤ. စီၤပၤဖးဒိၣ်ကိရ့ၣ်ဟ့ၣ်က့ၤတၢ်အဃၢၤအဃိၢ်တဖၣ်အံၤဆူ ပှၤတဂၤလၢအမံၤမ့ၢ်စီၤၡ့ၡဘးစၢ်, ပှၤလၢအဝဲဃုထၢပာ်လီၤဝဲဒ် ကီၢ်ယူဒၤအပဒိၣ်ဖးဒိၣ်, အစုပူၤန့ၣ်လီၤ.
15 စီၤပၤဖးဒိၣ်တဲဘၣ်တ့ၢ်အီၤလၢကဟံးထီၣ်ကွံာ်တၢ်တဖၣ်န့ၣ်ဒီး က့ၤစိာ်ပာ်က့ၤအီၤလၢဝ့ၢ်ယရူၤၡလ့ၣ်အတၢ်လုၢ်ဟံၣ်အပူၤဒီးဘှီ ကဒါက့ၤတၢ်လုၢ်ဟံၣ်ဖဲအလီၢ်လၢအအိၣ်ပာ်စၢၤတ့ၢ်လၢညါန့ၣ်လီၤ.
16 လၢတၢ်န့ၣ်အဃိ, စီၤၡ့ၡဘးစၢ်ဟဲဒီးပာ်လီၤတၢ်လုၢ်ဟံၣ်အခီၣ် ထံးန့ၣ်လီၤ. တၢ်သူၣ်ထီၣ်ဘှီထီၣ်စးထီၣ်အသးဖဲန့ၣ်တုၤခဲ ကနံၣ်အံၤ, ဘၣ်ဆၣ်တၢ်လုၢ်ဟံၣ်န့ၣ်တဝံၤဒံးဘၣ်.
17 ဒီးခဲကနံၣ်အံၤ, မ့ၢ်ဘၣ်ကစၢ်စီၤပၤဖးဒိၣ်အသးဒီး, မ်ပှၤကွၢ်တၢ်တမံၤလၢစီၤပၤအတၢ်ကွဲးနီၣ်တဖၣ်လၢကီၢ်ဘၤဘူၤ လိၣ်အပူၤဒ်သိးတၢ်ကထံၣ်န့ၢ်မ့ၢ်စီၤပၤဖးဒိၣ်ကိရ့ၣ်ဟ့ၣ်လီၤ တ့ၢ်အကလုၢ်ဧါ, တဟ့ၣ်လီၤတ့ၢ်ဘၣ်လဲၣ်လၢတၢ်ကသူၣ်ထီၣ်ကဒါက့ၤဝ့ၢ်ယရူၤၡလ့ၣ် အတၢ်လုၢ်ဟံၣ်, ဝံၤဒီးဘိးဘၣ်သ့ၣ်ညါက့ၤပှၤလၢနတၢ်ဘၣ်နသးလၢတၢ်ဂ့ၢ်အံၤ အဂီၢ်မ့ၢ်ဒ်လဲၣ်န့ၣ်တက့ၢ်.”