3
1 တုၤလီၤလၢလါနွံလါတလါန့ၣ်, ကီၢ်အံၣ်စရ့လးအပှၤဂီၢ်မုၢ်ဆီ လီၤအတၢ်အိၣ်တၢ်ဆိးလၢအဝ့ၢ်ဒၣ်ဝဲတဖၣ်အပူၤဝံၤခဲလၢာ်လံ. အန့ၣ်ဒီးအိၣ်ဖှိၣ်ရိဖှိၣ်လၢဝ့ၢ်ယရူၤၡလ့ၣ်အပူၤ,
2 ဒီးစီၤယိၤစါဒးအဖိခွါစီၤယိၤၡူ, အပှၤလုၢ်တၢ်အခိၣ်သကိး သကိးဒီးအီၤတဖၣ်, ဒီးစီၤၡၤလတံၤအ့လးအဖိခွါစီၤစရူၤဘၤဘ့လး, ဃုာ်ဒီးအဝဲအဘူးအတံၢ်တဖၣ်, ဘှီထီၣ်ကဒါက့ၤပှၤအံၣ်စရ့လးဖိ အကစၢ်ယွၤအတၢ်လုၢ်လီၢ်, ဒ်သိးအဝဲသ့ၣ်ဆိၣ်ကဲၤထီၣ်တၢ်လုၢ်တၢ်ပာ် တဖၣ်လၢအဖီခိၣ်ဒ်တၢ်သိၣ်လိသီလိလၢအဘၣ်တၢ်ကွဲးလီၤအီၤလၢ ကစၢ်ယွၤအပှၤကညီစီၤမိၤၡ့အလံာ်တၢ်သိၣ်တၢ်သီအပူၤအသိးကသ့န့ၣ်လီၤ.
3 ပှၤဘၣ်တၢ်စိာ်မၢကဲကုၢ်လၢအဟဲက့ၤကဒါက့ၤတဖၣ်မ့ၢ်ပျံၤဘၣ်ပှၤ ဂီၢ်မုၢ်လၢအအိၣ်ဆိးဝဲဖဲကီၢ်ပူၤဒၣ်လဲာ်, အဝဲသ့ၣ်ဘှီထီၣ်ကဒါက့ၤတၢ်လုၢ်လီၢ်ဖဲအအိၣ်ပာ်စၢၤတ့ၢ်အလီၢ် လၢညါလီၤ. အန့ၣ်ဝံၤဒီးလၢတၢ်လုၢ်လီၢ်န့ၣ်အဖီခိၣ်အဝဲသ့ၣ်စးထီၣ်ဆိၣ် ကဲၤကဒါက့ၤတၢ်လုၢ်တၢ်ပာ်တဖၣ်လၢဂီၤဒီးဟါဒ်အညီနုၢ်အသိးန့ၣ်လီၤ.
4 အဝဲသ့ၣ်, သ့ၣ်နီၣ်မၤလၤကပီၤဘူၣ်ဒဲဒ်တၢ်သိၣ်တၢ်သီတဖၣ်အိၣ်ဝဲ အသိးဒီးကိးမုၢ်နံၤဒဲးန့ၣ်အဝဲသ့ၣ်လုၢ်ထီၣ်တၢ်လုၢ်တၢ်ပာ်တဖၣ် ဒ်မုၢ်တနံၤန့ၣ်အတၢ်အိၣ်ဝဲအသိး,
5 ဒီးလၢန့ၣ်အမဲာ်ညါ, အဝဲသ့ၣ်လုၢ်ထီၣ်တၢ်လုၢ်တၢ်ပာ်တဖၣ်ဒ် အညီနူၢ်အသိးလၢကဘၣ်တၢ်ဆူးကဲၤအီၤဒီဒုဒီးအဂၤတဖၣ်လၢ ကဘၣ်တၢ်လုၢ်ထီၣ်အီၤလၢလါထီၣ်သီအဘူၣ်ဒီးလၢတၢ်အိၣ်ဖှိၣ်ရိဖှိၣ်ညီ နူၢ်အဂၤတဖၣ်ဖဲတၢ်ဘူၣ်ထီၣ်ဘါထီၣ်ယွၤအကတီၢ်ဒီးလုၢ်ထီၣ်စ့ၢ် ကီးတၢ်သူၣ်အိၣ်သးအိၣ်အတၢ်လုၢ်တၢ်ပာ်တဖၣ်ဆူယွၤန့ၣ်လီၤ.
6 ပှၤဂီၢ်မုၢ်မ့ၢ်တစးထီၣ်ဘှီထီၣ်ကဒါက့ၤဒံးတၢ်လုၢ်ဟံၣ်နာ်က့, လၢလါနွံလါတလါထီၣ်တသီအနံၤန့ၣ်, အဝဲသ့ၣ်စးထီၣ်ဆူးကဲၤတၢ် လုၢ်တၢ်ပာ်တဖၣ်ဆူယွၤန့ၣ်လီၤ.
7 ပှၤဂီၢ်မုၢ်ဟ့ၣ်လီၤစ့လၢပှၤမၤတၢ်လၢလၢၢ်တဖၣ်ဒီးပှၤစုသ့ တဖၣ်ဒီးဟ့ၣ်တၢ်အီၣ်တၢ်အီ, ဒီးသ့ၣ်စၤယံးအသိဒ်သိးကဘၣ်တၢ်ဆှၢအီၤဆူဝ့ၢ်ထါယၢၣ်ဒီးဝ့ၢ် စံဒိၣ်တဖၣ်လၢတၢ်ကလဲလိာ်အီၤဒီးလဘၤနိၣ်အသ့ၣ်ဆှိအ့ရ့းတဖၣ် လၢကဘၣ်တၢ်ဟဲစိာ်အီၤလၢပီၣ်လဲၣ်အကျဲတကပၤဆူဝ့ၢ်ယၤဖိၤန့ၣ် လီၤ. ကယဲၢ်တၢ်အံၤခဲလၢာ်ဘၣ်တၢ်မၤအီၤဒၣ်လၢကီၢ်ပၤရၣ်အစီၤပၤဖး ဒိၣ်စီၤကိရ့ၣ်အတၢ်ပျဲန့ၣ်လီၤ.
8 လၢတၢ်န့ၣ်အဃိအဝဲသ့ၣ်စးထီၣ်အတၢ်မၤဖဲလါခံလါတလါလၢနံၣ် န့ၣ်အပူၤ, ဖဲအဝဲသ့ၣ်ဟဲက့ၤကဒါက့ၤဆူတၢ်လုၢ်ဟံၣ်အလီၢ်လၢဝ့ၢ်ယရူၤ ၡလ့ၣ်ဝံၤအလီၢ်ခံလီၤ. စီၤစရူၤဘၤဘ့လး, စီၤယိၤၡူဒီးအပှၤထံဖိကီၢ်ဖိကဒဲကဒဲလၢအအိၣ်လီၤတဲာ်တဖၣ်, ပှၤလုၢ်တၢ်အခိၣ်တဖၣ်ဒီးပှၤလ့ၤဝံဖိတဖၣ်, ဒီးကယဲၢ်ပှၤဘၣ်စိာ်မၢကဲကုၢ်လၢအဟဲက့ၤကဒါက့ၤဆူ ဝ့ၢ်ယရူၤၡလ့ၣ်တဖၣ်, မၤသကိးတၢ်လၢတၢ်မၤအပူၤန့ၣ်လီၤ. ကယဲၢ်ပှၤလ့ၤဝံဖိတဖၣ်လၢအသးအိၣ်အနံၣ်ခံဆံမ့ၢ်ဂ့ၤပှၢ်န့ၣ် အဝဲန့ၣ်မ့ၢ်ဂ့ၤဘၣ်တၢ်ပာ်လီၤအီၤလၢပှၤကွၢ်ထွဲပၢဆှၢတၢ်ဖံး တၢ်မၤဘၣ်ဃးဒီးတၢ်သူၣ်ထီၣ်ကဒါက့ၤတၢ်လုၢ်ဟံၣ်န့ၣ်လီၤ.
9 ပှၤလ့ၤဝံဖိစီၤယ့ၤၡူဒီးအဖိခွါတဖၣ်ဒီးအဘူးအတံၢ်တဖၣ်, စီၤကးမံၤအ့လးဒီးအဖိခွါတဖၣ် (ပှၤဟိဒၤဝယ့ၤအဒူၣ်အထၢ) ပာ်ဖှိၣ်တ့ၢ်အသးလၢတၢ်သူၣ်ထီၣ်ကဒါက့ၤတၢ်လုၢ်ဟံၣ်န့ၣ်လီၤ. (အဝဲသ့ၣ်ဘၣ်တၢ်မၤစၢၤအီၤလၢပှၤလ့ၤဝံဖိတဖၣ်လၢပှၤဃ့နါဒး အဒူၣ်အထၢတခီန့ၣ်လီၤ.)
10 တုၤပှၤတဖၣ်န့ၣ်စးထီၣ်ပာ်လီၤတၢ်လုၢ်ဟံၣ်အလၢၢ်သနၢၣ်ဒီးပှၤလုၢ် တၢ်အခိၣ်လၢအအိၣ်ဒီးအဆ့ကၤဒိၣ်တဖၣ်ဟံးန့ၢ်အလီၢ်အိၣ်ဒီးကွဲၤ တဖၣ်လၢအစုပူၤ, ဒီးပှၤလ့ၤဝံဖိတဖၣ်လၢစီၤအၤစာ်အဒူၣ်အထၢတဖၣ်ဆၢထၢၣ်ဖဲန့ၣ် အိၣ်ဒီးအစှၢၣ်စှံးတဖၣ်န့ၣ်လီၤ. အဝဲသ့ၣ်စံးထီၣ်ပတြၢၤယွၤဒ်တၢ်မၤလိာ်လၢအဘၣ်တၢ်ဟ့ၣ်လီၤတ့ၢ် အီၤလၢစီၤပၤစီၤဒၤဝံးအစိၤအသိးန့ၣ်လီၤ.
11 အဝဲသ့ၣ်သးဝံၣ်စံးထီၣ်ပတြၢၤယွၤဒီးသးဝံၣ်ကဒါက့ၤတၢ်သး ဝံၣ်အကူာ်လၢအမ့ၢ်ဝဲ, “ယွၤန့ၣ်ဂ့ၤဝဲ, ဒီးအတၢ်အဲၣ်လၢအံၣ်စရ့လးအဂီၢ်မ့ၢ်တၢ်လီၤ ထူလီၤယိာ်လီၤ.”
ပှၤကိးဂၤဒဲးကိးသတြီထီၣ်လၢအဂံၢ်အဘါခဲလၢာ်, စံးထီၣ်ပတြၢၤယွၤ, မ့ၢ်လၢတၢ်ပာ်လီၤတၢ်လုၢ်ဟံၣ်ခီၣ်ထံးအတၢ် မၤဘၣ်တၢ်စးထီၣ်လံအီၤအဃိန့ၣ်လီၤ.
12 ပှၤလုၢ်တၢ်အခိၣ်လၢအသးပှၢ်အါဂၤ, ပှၤလ့ၤဝံဖိတဖၣ်, ဒီးပှၤအခိၣ်တဖၣ်လၢဒူၣ်ထၢတဖၣ်အပူၤလၢအထံၣ်ဘၣ်တ့ၢ်တၢ်လုၢ်ဟံၣ် အဂံၢ်ခိၣ်တဖျၢၣ်န့ၣ်, အဝဲသ့ၣ်ဟီၣ်တၢ်ယၢၤတၢ်ဖဲအဝဲသ့ၣ်ကွၢ်ဃီၤတၢ်လုၢ်ဟံၣ်အံၤအလၢၢ် သနၢၣ်ဘၣ်တၢ်ပာ်လီၤအီၤန့ၣ်လီၤ. မ့မ့ၢ်ပှၤအဂၤလၢအအိၣ်ဖဲန့ၣ်တဖၣ်ကိးပသူထီၣ်လၢတၢ်သူၣ်ခုသးခု အဃိန့ၣ်လီၤ.
13 ပှၤနီၤဖးတၢ်သူၣ်ခုသးခုအတၢ်ကိးပသူထီၣ်ဒီးတၢ်ဟီၣ်တၢ်ယၢၤ အဆၢတသ့နီတဂၤဘၣ်. အဂ့ၢ်ဒ်အံၤ, တၢ်သီၣ်လၢအဝဲသ့ၣ်ဒုးအိၣ်ထီၣ်န့ၣ်သီၣ်ဒိၣ်ဝဲတုၤ ဒၣ်လဲာ်ဘၣ်တၢ်နၢ်ဟူအီၤလၢတၢ်ဖးယံၤဖးကွ့ၤသ့ဝဲန့ၣ်လီၤ.