1-2 ယွၤကတိၤတၢ်ဒီးယၤန့ၣ်လီၤ. အဝဲစံးဝဲဒၣ်, “ပှၤကညီလၢအသံသ့ဧၢ, စံးလၢကီၢ်အဒိၣ် ကြၢးဘၣ်တၢ်စံၣ်ညီၣ်န့ၣ်တက့ၢ်. 3 တဲဘၣ်ပှၤဂီၢ်မုၢ်, တၢ်လၢယၤ, ယွၤပၢဘၣ်တၢ်ခဲလၢာ်ကစၢ် ကစံးဝဲန့ၣ်တက့ၢ်. ကီၢ်အဒိၣ်အကစၢၢ်ကလိသ့ၣ်ဧၢ, ယမ့ၢ်သုဒုၣ်သုဒါန့ၣ်လီၤ. ယကဒုးကဲထီၣ်သုလၢတၢ် လီၢ်အိၣ်သယုၢ်လီၤဃီတတီၤန့ၣ်လီၤ. 4 ယကပာ်လီၤတဲာ်သုဝ့ၢ်တဖၣ်လၢတၢ်ဟးဂူာ် ဟးဂီၤအပူၤဒီးသုကီၢ်လၢတၢ်အိၣ်သယုၢ်လီၤဃီအပူၤန့ၣ်လီၤ. အန့ၣ်တစု, သုကသ့ၣ်ညါလၢယမ့ၢ်ယွၤန့ၣ်လီၤ. 5 သုမ့ၢ်တ့ၢ်ကီၢ်အံၣ်စရ့လးအဒုၣ်အဒါတပယူာ်ဃီဒီးပျဲအပှၤဂီၢ်မုၢ် ဘၣ်တၢ်မၤသံမၤဝီအီၤလၢတၢ်ဟးဂီၤအမုၢ်တနံၤ, လၢတၢ်တတၢးတနါအဆၢကတီၢ်, တၢ်ဆၢကတီၢ်ဖဲတၢ်စံၣ်ညီၣ်လၢ ခံကတၢၢ်လၢအဝဲအတၢ်ဒဲးဘးတဖၣ်အဂီၢ်န့ၣ်လီၤ. 6 လၢတၢ်န့ၣ်အဃိဒ်, ယၤ, ယွၤပၢဘၣ်တၢ်ခဲလၢာ်ကစၢ်မ့ၢ်ကစၢ် ယွၤလၢအမူဝဲနီၢ်နီၢ်အသိး, ယစံးယဲလၢ, တၢ်သံမ့ၢ်သုတၢ် ဘူၣ်တၢ်တီၤဒီးသုဃ့ၢ်ပူၤဖျဲးသုသးလၢအီၤတသ့ဘၣ်. သုတၢ်ကမၣ်အိၣ်ဝဲလၢသုမၤသံတၢ်အဃိဒီးတၢ်မၤ သံန့ၣ်ကလူၤပိာ်ထွဲသုခံန့ၣ်လီၤ. 7 ယကဒုးကဲထီၣ်ကီၢ်အဒိၣ်အတၢ်လူၢ်တၢ်တြီၤအကီၢ်လၢတၢ်လီၢ် တတီၤလၢအဘျုးတအိၣ်ဘၣ်, ဒီးမၤသံပှၤကိးဂၤဒဲးလၢ အလဲၤခီဂာ်အီၤန့ၣ်လီၤ. 8 ယကဖၢဘၢကစၢၢ်ကလိတဖၣ်လၢတၢ်သံစိၣ်တဖၣ်ဒီးပှၤတဖၣ်လၢ အဘၣ်တၢ်မၤသံအီၤလၢတၢ်ဒုးအပူၤအစိၣ်တဖၣ် ကပှဲၤဝဲဖဲတၢ်လူၢ်တဖၣ်ဒီးတြီၤတဖၣ်န့ၣ်လီၤ. 9 ယကဒုးအိၣ်သယုၢ်လီၤဃီနၤတစိၤသးဒီးပှၤတအိၣ်ဆိးကဒီး ဘၣ်လၢနဝ့ၢ်ပူၤနီတဂၤလၢၤဘၣ်. အန့ၣ်တစုသုကသ့ၣ်ညါလၢ ယမ့ၢ်ယွၤန့ၣ်လီၤ. 10 ယၤ, ယွၤမ့ၢ်အဝဲသ့ၣ်အကစၢ်ယွၤဒၣ်လဲာ်န့ၣ်, သုစံးလၢ ပှၤကလုာ်ခံကလုာ်လၢအမ့ၢ်ယူဒၤဒီးအံၣ်စရ့ လးဃုာ်ဒီးအဝဲသ့ၣ်အကီၢ်တဖၣ်ဘၣ်ဃးဒီးသု, ဒီးသုကပၢဘၣ်အီၤန့ၣ်လီၤ. 11 ဒီးလၢတၢ်န့ၣ်အဃိ, ဒ်ယၤ, ယွၤပၢဘၣ်တၢ်ခဲလၢာ်ကစၢ်မ့ၢ် ကစၢ်ယွၤလၢအမူဝဲနီၢ်နီၢ်အသိး, ယစံးယဲလၢယ ကဟ့ၣ်ကၣ်သုလၢ, သုတၢ်သးထီၣ်, သုတၢ်သးက့ၣ်ဒီးသုတၢ်သးဟ့ ဘၣ်ယပှၤဂီၢ်မုၢ်အဃိန့ၣ်လီၤ. အဝဲသ့ၣ်ကသ့ၣ်ညါဝဲလၢယစံၣ်ညီၣ်သုလၢတၢ်လၢသုမၤ ဘၣ်တ့ၢ်အဝဲသ့ၣ်အဃိန့ၣ်လီၤ. 12 အန့ၣ်ဒီး, သုကသ့ၣ်ညါသုဝဲလၢယၤ, ယွၤနၢ်ဟူဘၣ်တၢ်လၢ သုစံးအီၤပှဲၤဒီးတၢ်တပာ်လ့ၢ်ပာ်ကါလၢ, ကီၢ်အံၣ်စရ့လးအက စၢၢ်ကလိတဖၣ်အိၣ်သယုၢ်လီၤ ဃီဒီးအဝဲသ့ၣ်မ့ၢ်တၢ်လၢသုကဟးဂီၤ ကွံာ်အီၤအဂီၢ်န့ၣ်လီၤ. 13 ယနၢ်ဟူဘၣ်သုတၢ်ကတိၤထီဒါယၤ” အရၢၢ်အစၢၢ်လၢတၢ်ပာ်ကဖၢလၢသးအပူၤန့ၣ်လီၤ. 14 ယွၤပၢဘၣ်တၢ်ခဲလၢာ်ကစၢ်စံးဝဲ, “ယကဒုးအိၣ်သယုၢ်လီၤဃီသု, တုၤဒၣ်လဲာ်ဟီၣ်ခိၣ်ဒီဘ့ၣ်ညါကသူၣ်ဖှံသးညီဝဲလၢသု တၢ်လီၤကွံာ်အဃိ, 15 ဒ်သိးဒၣ်, သုသူၣ်ဖှံသးညီသုဝဲလၢကီၢ်အံၣ်စရ့လးလၢအမ့ၢ်ယတၢ် ဒၣ်ယဲအတၢ်မၤဟးဂူာ်ဟးဂီၤအဃိန့ၣ်လီၤ. စ့ဧၢ်အကစၢၢ်ကလိတဖၣ် မ့ၢ်မး, ကီၢ်အဒိၣ်ဒီဘ့ၣ်ညါမ့ၢ်ဂ့ၤကအိၣ်သယုၢ်လီၤဃီန့ၣ်လီၤ. အန့ၣ်တစုပှၤကိးဂၤဒဲးကသ့ၣ်ညါဝဲလၢယမ့ၢ်ယွၤန့ၣ်လီၤ.”