33
(ယဃ့း. ၃:၁၆-၂၁)
1-2 ယွၤကတိၤတၢ်ဒီးယၤန့ၣ်လီၤ. အဝဲစံးဝဲဒၣ်, “ပှၤကညီလၢအသံသ့ဧၢ,
တဲဘၣ်နပှၤဂီၢ်မုၢ်တၢ်လၢကမၤအသး
ဖဲယဒုးအိၣ်ထီၣ်တၢ်ဒုးလၢကီၢ်ပူၤန့ၣ်တက့ၢ်. ကီၢ်န့ၣ်အပှၤဂီၢ်မုၢ်ဃုထၢပှၤလၢအဝဲသ့ၣ်အကျါဒၣ်ဝဲတဂၤလၢ
ကမ့ၢ်ပှၤခိးကွၢ်တၢ်ဖိတဂၤန့ၣ်လီၤ.
3 ဖဲအဝဲထံၣ်ဒုၣ်ဒါဟဲသုးဘူးဃီၤအသးန့ၣ်, အဝဲအူသီၣ်ထီၣ်ကွဲၤ လၢတၢ်ဟ့ၣ်ပလီၢ်ပှၤကိးဂၤဒဲးအဂီၢ်န့ၣ်လီၤ.
4 ပှၤတဂၤဂၤမ့ၢ်နၢ်ဟူတၢ်သီၣ်န့ၣ်, ဘၣ်ဆၣ်မ့ၢ်တပာ်သူၣ်ပာ်သး ဝဲလၢအဂ့ၢ်ဒီးဒုၣ်ဒါဟဲဒီးမၤသံအီၤန့ၣ်, အန့ၣ်တစု, အဝဲအတၢ်သံ
န့ၣ်မ့ၢ်ဒၣ်အတၢ်ကမၣ်ဒၣ်ဝဲန့ၣ်လီၤ.
5 အဝဲအတၢ်သံန့ၣ်မ့ၢ်အတၢ်ကမၣ်ဒၣ်ဝဲမ့ၢ်လၢအဝဲတကနၣ်ဃုာ်ဘၣ် တၢ်ဟ့ၣ်ပလီၢ်အဃိန့ၣ်လီၤ. အဝဲမ့ၢ်ကနၣ်ဃုာ်တၢ်ဟ့ၣ်ပလီၢ်န့ၣ်, အဝဲပူၤဖျဲးသ့ဝဲန့ၣ်လီၤ.
6 ပှၤခိးကွၢ်တၢ်မ့ၢ်ထံၣ်ဘၣ်ဒုၣ်ဒါဟဲဝဲနာ်သက့မ့ၢ်တအူထီၣ်ကွဲၤဘၣ်ဒီး ဒုၣ်ဒါကဟဲဒီးမၤသံကွံာ်ပှၤတၢ်ဒဲးဘးဖိတဖၣ်န့ၣ်, ဘၣ်ဆၣ်ယကပာ်မူ
ပာ်ဒါပှၤခိးကွၢ်တၢ်ဖိလၢအဝဲသ့ၣ်အတၢ်သံအဃိန့ၣ်လီၤ.
7 ခဲကနံၣ်အံၤ, ပှၤကညီလၢအသံသ့ဧၢ, ယဒုးကဲထီၣ်နၤပှၤခိးကွၢ်တၢ်ဖိတဂၤလၢအံၣ်စရ့လး အပှၤကလုာ်အဂီၢ်န့ၣ်လံ. နကဘၣ်တဲဘၣ်အဝဲသ့ၣ်
လၢတၢ်ဟ့ၣ်ပလီၢ်တဖၣ်လၢယဟ့ၣ်လီၤနၤန့ၣ်လီၤ.
8 ယမ့ၢ်ပာ်ဖျါထီၣ်လၢပှၤအအၢအသီတဂၤကဘၣ်သံဝဲ, ဘၣ်ဆၣ်နမ့ၢ်တဟ့ၣ်ပလီၢ်အီၤလၢအဝဲ
ကလဲလိာ်ကွံာ်အကျဲတဖၣ်ဒ်သိးအဝဲအုၣ်က့ၤခီၣ်က့ၤလီၤအသးကသ့, ဒီးအဝဲကသံဒံးဒၣ်ဒ်ပှၤတၢ်ဒဲးဘးတဂၤအသိးဒီး
ယကပာ်မူပာ်ဒါနၤလၢအဝဲအတၢ်သံအဃိန့ၣ်လီၤ.
9 နမ့ၢ်ဟ့ၣ်ပလီၢ်ပှၤအၢပှၤသီတဂၤဒီးအဝဲမ့ၢ်တဆိကတီၢ်မၤ တၢ်ဒဲးဘးဘၣ်န့ၣ်အဝဲကသံဒၣ်ဒ်ပှၤတၢ်ဒဲးဘးဖိတဂၤအသိး,
ဘၣ်ဆၣ်နသးသမူကပူၤဖျဲးဝဲဒၣ်လီၤ.”
10 ယွၤကတိၤတ့ၢ်တၢ်ဒီးယၤလီၤ. အဝဲစံးဝဲ, “ပှၤကညီလၢအသံ သ့ဧၢ, တဲကဒါက့ၤပှၤအံၣ်စရ့လးဖိတဖၣ်တၢ်လၢအဝဲသ့ၣ်စံးဝဲ
န့ၣ်တက့ၢ်. အဝဲသ့ၣ်စံးလၢပအိၣ်ဒီးတၢ်ဝံဃၢယိးဃၢတဖၣ်လၢ
ပတၢ်ဒဲးဘးဒီးတၢ်ကမၣ်တဖၣ်လၢပမၤတ့ၢ်အီၤအဃိန့ၣ်လီၤ.
ပမ့ၢ်တၢ်ကလီကလီဒီးပဘျုးတအိၣ်လၢၤဘၣ်ပအိၣ်မူကသ့ဒ်လဲၣ်.
11 တဲဘၣ်အဝဲသ့ၣ်လၢဒ်ယၤ, ယွၤပၢဘၣ်တၢ်ခဲလၢာ်ကစၢ်မ့ၢ်ကစၢ်ယွၤ လၢအမူဝဲတဂၤအသိးန့ၣ်, ယစံးယဲ, ယတမုာ်လၤသးခုလၢ
တၢ်ထံၣ်ဘၣ်ပှၤတၢ်ဒဲးဘးဖိတဂၤသံန့ၣ်ဘၣ်.
ယအဲၣ်ဒိးထံၣ်ဒါခီလၢအဝဲသ့ၣ်ဆိကတီၢ်မၤတၢ်ဒဲးဘးဒီးမူဝဲန့ၣ်လီၤ.
ကီၢ်အံၣ်စရ့လးဧၢ, ဆိကတီၢ်ကွံာ်တၢ်အၢတၢ်သီလၢနမၤအီၤန့ၣ်
တက့ၢ်. ဘၣ်မနုၤအဃိနအဲၣ်ဒိးသံန့ၣ်လဲၣ်.
12 ခဲကနံၣ်အံၤ, ပှၤကညီလၢအသံသ့ဧၢ, တဲဘၣ်ပှၤအံၣ်စရ့လးဖိ တဖၣ်လၢဖဲပှၤအဂ့ၤတဂၤမၤတၢ်ဒဲးဘးန့ၣ်, တၢ်အဂ့ၤလၢအဝဲ
မၤတ့ၢ်ဝဲန့ၣ်တအုၣ်က့ၤခီၣ်က့ၤအီၤဘၣ်. ဖဲပှၤအၢပှၤသီတဂၤ
ဆိကတီၢ်ကွံာ်အတၢ်မၤတၢ်အၢတၢ်သီန့ၣ်, အဝဲတဘၣ်တၢ်စံၣ်ညီၣ်
အီၤဘၣ်. ဒီးဖဲပှၤအဂ့ၤတဂၤစးထီၣ်မၤတၢ်ဒဲးဘးန့ၣ်,
အဝဲအသးသမူတဘၣ်တၢ်ပျဲပူၤဖျဲးအီၤဘၣ်.
13 ဘၣ်တဘၣ်ယကအၢၣ်လီၤဟ့ၣ်တၢ်မူဆူပှၤအဂ့ၤတဂၤလီၤ. ဘၣ်ဆၣ်အဝဲမ့ၢ်ဆိကမိၣ်ထီၣ်ဝဲလၢအဝဲအတၢ်ဂ့ၤလၢအပူၤကွံာ် တဖၣ်လၢပှဲၤဝဲလံ, ဒီးစးထီၣ်မၤတၢ်ဒဲးဘးန့ၣ်, ယတသ့ၣ်နီၣ်
ထီၣ်က့ၤတၢ်ဂ့ၤလၢအဝဲမၤတ့ၢ်ဝဲတဖၣ်နီတမံၤဘၣ်. အဝဲကသံ
လၢအတၢ်ဒဲးဘးတဖၣ်အဃိန့ၣ်လီၤ.
14 ဘၣ်တဘၣ်ယကဟ့ၣ်ပလီၢ်ပှၤအၢပှၤသီတဂၤလၢအဝဲကသံ, ဘၣ်ဆၣ်အဝဲမ့ၢ်ဆိကတီၢ်မၤတၢ်ဒဲးဘးဒီးမၤတၢ်လၢအဘၣ်ဒီး ဂ့ၤဝဲလီၤ.
15 အဒိ, အဝဲမ့ၢ်ဟ့ၣ်ကဒါက့ၤတၢ်ဟ့ၣ်ကီၤလၢအဟံးန့ၢ်တ့ၢ်ဝဲ လၢစ့ဟ့ၣ်လိၢ်လီၤတခါအဂီၢ်မ့ၢ်ဂ့ၤ, မ့ၢ်ဟ့ၣ်ကဒါက့ၤတၢ်လၢ
အဟုၣ်တ့ၢ်ဝဲမ့ၢ်ဂ့ၤ, အဝဲမ့ၢ်ဆိကတီၢ်မၤတၢ်ဒဲးဘးဒီးပိာ်ထွဲ
တၢ်ဘူၣ်တၢ်ဘါအတၢ်သိၣ်တၢ်သီတဖၣ်လၢအဟ့ၣ်တၢ်မူန့ၣ်
အဝဲတသံဝဲဘၣ်.
16 ယကပျၢ်ကွံာ်တၢ်ဒဲးဘးတဖၣ်လၢအဝဲမၤတ့ၢ်ဝဲ, ဒီးအဝဲကမူဝဲ, မ့ၢ်လၢအဝဲမၤတ့ၢ်တၢ်လၢအဘၣ်ဒီး ဂ့ၤဝဲအဃိန့ၣ်လီၤ.
17 ဒီးနပှၤဂီၢ်မုၢ်စံးဝဲ, တၢ်လၢယမၤန့ၣ်တဘၣ်ဘၣ်. တမ့ၢ်ဘၣ်, မ့ၢ်ဒၣ်အဝဲသ့ၣ်အကျဲန့ၣ်တဘၣ်တခီန့ၣ်လီၤ.
18 ဖဲပှၤတီပှၤလိၤတဂၤဆိကတီၢ်မၤတၢ်ဂ့ၤဒီးစးထီၣ်မၤတၢ်အၢတၢ်သီန့ၣ်, အဝဲကသံလၢတၢ်န့ၣ်အဃိလီၤ.
19 ဖဲပှၤအၢပှၤသီတဂၤပျဲကွံာ်အတၢ်မၤတၢ်ဒဲးဘးဒီးမၤတၢ်လၢ အဘၣ်ဒီးဂ့ၤဝဲန့ၣ်, အဝဲအုၣ်က့ၤခီၣ်က့ၤတ့ၢ်အသးသမူန့ၣ်လီၤ.
20 ဘၣ်ဆၣ်ကီၢ်အံၣ်စရ့လးဧၢ, နစံးနဲလၢတၢ်လၢယမၤန့ၣ်တဘၣ် ဘၣ်လီၤ. ယကစံၣ်ညီၣ်နၤလၢတၢ်လၢနမၤအီၤအဃိလီၤ.”
21 လၢပဘၣ်တၢ်စိာ်မၢကဲကုၢ်ပှၤ, တဆံခံနံၣ်တနံၣ်, လါတဆံလါ တလါထီၣ်ယဲၢ်သီတသီန့ၣ်, ပှၤတဂၤလၢအဃ့ၢ်ပူၤဖျဲးထီၣ်လၢ
ဝ့ၢ်ယရူၤၡလ့ၣ်ဟဲဝဲ, ဒီးတဲဘၣ်တ့ၢ်ယၤလၢဝ့ၢ်န့ၣ်လီၤကွံာ်လံ
န့ၣ်လီၤ.
22 မုၢ်တဟါလၢတချုးအဝဲဟဲန့ၣ်, ယကလၢၢ်ဘၣ်ယွၤအတၢ်အိၣ်ဝဲ အတၢ်စိတၢ်ကမီၤန့ၣ်လီၤ. ဖဲပှၤတဂၤန့ၣ်ဟဲတုၤဝဲလၢလီၢ်ခံတ
ဂီၤန့ၣ်, ယွၤဟ့ၣ်ကဒါက့ၤယၤစိကမီၤလၢယကကတိၤက့ၤတၢ်န့ၣ်လီၤ.
23-24 ယွၤကတိၤတ့ၢ်တၢ်ဒီးယၤန့ၣ်လီၤ. အဝဲစံးဝဲဒၣ်, “ပှၤကညီလၢအသံသ့ဧၢ, ပှၤဂီၢ်မုၢ်လၢအအိၣ်ဆိး
လၢဝ့ၢ်တဖၣ်လၢအဟးဂီၤလၢကီၢ်အံၣ်စရ့လးအပူၤစံးတၢ်ဒ်အံၤ
လီၤ. စီၤအၤဘြၤဟၣ်မ့ၢ်ဒၣ်ပှၤကညီထဲတဂၤဧိၤ, ဒီးအဝဲဘၣ်
တၢ်ဟ့ၣ်အီၤလၢကီၢ်ဒီဘ့ၣ်ညါန့ၣ်လီၤ. ပဝဲဒၣ်ပမ့ၢ်ပှၤကညီအါ
ဂၤအဃိဒီးခဲအံၤကီၢ်န့ၣ်မ့ၢ်ပတၢ်န့ၣ်လီၤ.
25 တဲဘၣ်အဝဲသ့ၣ်လၢ, ယၤယွၤပၢဘၣ်တၢ်ခဲလၢာ်ကစၢ်စံးတၢ်အံၤ တက့ၢ်. သုအီၣ်တၢ်ညၣ်လၢတၢ်သွံၣ်အိၣ်ဒံးလၢအပူၤန့ၣ်လီၤ. သုဘါထီၣ်တၢ်ဂီၤတၢ်ဖီၣ်တဖၣ်န့ၣ်လီၤ. သုမၤသံတၢ်န့ၣ်လီၤ. တၢ်မနုၤဒုးဆိကမိၣ်သုလၢကီၢ်အံၤမ့ၢ်သုတၢ်န့ၣ်လဲၣ်.
26 သုသန့ၤထီၣ်သုသးလၢသုနးတဖၣ်န့ၣ်လီၤ. သုတၢ်ဖံးတၢ်မၤ တဖၣ်လီၤသးဘၣ်အၢန့ၣ်လီၤ. ပှၤကိးဂၤဒဲးမၤတၢ်မၤကမုၣ်
ကမၣ်ခွါန့ၣ်လီၤ. တၢ်မနုၤဒုးဆိကမိၣ်သုလၢကီၢ်အံၤမ့ၢ်သု
တၢ်န့ၣ်လဲၣ်.
27 တဲဘၣ်အဝဲသ့ၣ်လၢယၤ, ယွၤပၢဘၣ်တၢ်ခဲလၢာ်ကစၢ်, ဟ့ၣ်ပလီၢ်အဝဲသ့ၣ်လၢ, ဒ်ယမ့ၢ်ကစၢ်ယွၤလၢအမူဝဲနီၢ်နီၢ်တဂၤ
အသိးန့ၣ်, ယစံးယဲလၢပှၤဂီၢ်မုၢ်လၢအအိၣ်ဆိးလၢဝ့ၢ်တဖၣ်
လၢအဟးဂီၤအပူၤန့ၣ်, ကဘၣ်တၢ်မၤသံအီၤန့ၣ်လီၤ.
ပှၤတဖၣ်လၢအအိၣ်ဆိးလၢခိခိၣ်ပှၢ်လၢ်ကျါန့ၣ်, ကဘၣ်တၢ်အီၣ်ကွံာ်အီၤ
လၢဆၣ်ဖိကီၢ်ဖိအမံၤတဖၣ်န့ၣ်လီၤ. ပှၤတဖၣ်လၢအအိၣ်ခူသူၣ်
လၢကစၢၢ်ကလိတဖၣ်ဒီးလၢၢ်ကအိပူၤတဖၣ်န့ၣ်, ကသံလၢ
တၢ်ဆါအဃိန့ၣ်လီၤ.
28 ယကဒုးကဲထီၣ်ထံကီၢ်အံၤလၢတၢ်အိၣ်တယုၢ်အိၣ်လီၤဃီအလီၢ် တပူၤလၢအဘျုးတအိၣ်ဘၣ်ဒီးတၢ်စိတၢ်ကမီၤလၢအဝဲသ့ၣ်
ပာ်ကဖၢလၢတ့ၢ်အသးဒိၣ်မးလၢအဃိန့ၣ်, ကကတၢၢ်ကွံာ်ဝဲဒၣ်
လီၤ. ကီၢ်အံၣ်စရ့လးအကစၢၢ်ကလိတဖၣ်, ကဘၣ်တၢ်ခဲဘၢ
အီၤတုၤဒၣ်လဲာ်ပှၤလဲၤထီၣ်က့ၤလီၤခီဖျိအီၤတသ့နီတဂၤဘၣ်န့ၣ်လီၤ.
29 တုၤမ့ၢ်ယစံၣ်ညီၣ်ပှၤဂီၢ်မုၢ်လၢအဝဲသ့ၣ်အတၢ်ဒဲးဘးတဖၣ်အဃိဒီး ဒုးကဲထီၣ်ထံကီၢ်လၢတၢ်အိၣ်လီၤဃီအလီၢ်န့ၣ်, အဝဲသ့ၣ်ကသ့ၣ်ညါ
ဝဲလၢယမ့ၢ်ယွၤန့ၣ်လီၤ.”
30 ယွၤစံးဝဲဒၣ်, “ပှၤကညီလၢအသံသ့ဧၢ, နပှၤဂီၢ်မုၢ်ကတိၤတၢ်ဘၣ် ဃးဒီးနဂ့ၢ်ဖဲအဝဲသ့ၣ်ထံၣ်လိာ်အသးလၢဝ့ၢ်ခိၣ်ဒူတဖၣ်မ့ၢ်ဂ့ၤ, လၢအဝဲသ့ၣ်အဟံၣ်တဖၣ်အတြဲၤအကျဲစၢၤတဖၣ်မ့ၢ်ဂ့ၤန့ၣ်လီၤ. အဝဲသ့ၣ်စံးလိာ်သကိးအသးတဂၤဒီးတဂၤလၢ, ခဲအံၤပကလဲၤဒီးဒိ
ကနၣ်တၢ်ကတိၤမနုၤဟဲလၢယွၤအအိၣ်လဲၣ်န့ၣ်လီၤ.
31 လၢတၢ်န့ၣ်အဃိ, ယပှၤဂီၢ်မုၢ်ပာ်ဖှိၣ်ထီၣ်အသးဒ်သိးကနၢ်ဟူ တၢ်လၢနကစံးအီၤ, ဘၣ်ဆၣ်အဝဲသ့ၣ်တမၤတၢ်လၢနတဲဘၣ်
အဝဲသ့ၣ်လၢကဘၣ်မၤဝဲန့ၣ်ဘၣ်. တၢ်ကတိၤတဖၣ်လၢအလီၤ
အဲၣ်လီၤကွံန့ၣ်အိၣ်ဝဲလၢအနိးဖံးတဖၣ်အလိၤ, ဘၣ်ဆၣ်အဝဲသ့ၣ်
မၤထွဲဒံးဒၣ်အတၢ်သူၣ်လီသးကွံအကျဲတဖၣ်န့ၣ်လီၤ.
32 လၢအဝဲသ့ၣ်တဖၣ်အဂီၢ်န့ၣ်, နတမ့ၢ်တၢ်အါန့ၢ်ဒံးပှၤတဂၤလၢ အဒုးအိၣ်ထီၣ်တၢ်သူၣ်မုာ်သးခုလၢတၢ်သးဝံၣ်တၢ်အဲၣ်တၢ်သးဝံၣ်
တဖၣ်မ့ၢ်ဂ့ၤဒ့သီတူၢ်တခါမ့ၢ်ဂ့ၤန့ၣ်ဘၣ်. အဝဲသ့ၣ်ဒိကနၣ်နတၢ်
ကတိၤတဖၣ်ခဲလၢာ်ဒီးတစူၢ်ဘၣ်ဝဲလၢအကျါနီတထံၣ်ဘၣ်.
33 ဘၣ်ဆၣ်တုၤနတၢ်ကတိၤတဖၣ်လၢထီၣ်ပှဲၤထီၣ်ဝဲ, ကလၢထီၣ် ပှဲၤထီၣ်ဝဲသပှၢ်ကတၢၢ်န့ၣ်, အန့ၣ်တစု, အဝဲသ့ၣ်ကသ့ၣ်ညါ
ဝဲလၢဝံတဂၤအိၣ်ဝဲလၢအဝဲသ့ၣ်အကျါန့ၣ်လီၤ.”