လံာ်ပှၤစံၣ်တဲၤတဲလီၤတၢ်
ECCLESIASTES
လံာ်ပှၤစံၣ်တဲၤတဲလီၤတၢ်အံၤအိၣ်ဒီး, “ပှၤဆိကမိၣ်တၢ်အဒိၣ်အယိာ်တဂၤ” အတၢ်ဆိကမိၣ်တဖၣ်လီၤ. ပှၤတဂၤအံၤကွၢ်ထံဆိကမိၣ်က့ၤဝဲယိာ်ယိာ်လၢပှၤဟီၣ်ခိၣ်ဖိ အတၢ်အိၣ်မူဖုၣ်ကိာ်အံၤအိၣ်ပှဲၤဒီးတၢ်ကမဲာ်ကမီာ်ဆံးအါဆံး အါ, ဃုာ်ဒီးတၢ်စံၣ်ညီၣ်တတီတလိၤခူသူၣ်တဖၣ်ဒီးတၢ်သးဘၣ်တံာ်တာ်တ ဖၣ်, ဒီးလၢခံကတၢၢ်န့ၣ်အဝဲပာ်ဂၢၢ်ပာ်ကျၢၤဝဲလၢ, “တၢ်အိၣ်မူန့ၣ်အဘျုးတအိၣ်ဘၣ်” န့ၣ်လီၤ. ကစၢ်ယွၤအကျဲတဖၣ်လၢအပၢၤတၢ်တိာ်ဘၣ်ထွဲဒီးပှၤဟီၣ်ခိၣ်ဖိ အတၢ်အိၣ်မူတုၤအကတၢၢ်န့ၣ်, အဝဲနၢ်ပၢၢ်တသ့ဘၣ်. ဘၣ်ဆၣ်ဒီးလၢတၢ်အံၤအပူၤဒၣ်လဲာ်, အဝဲဟ့ၣ်ကူၣ်ပှၤဂီၢ်မုၢ်လၢ ကမၤတၢ်ဆူၣ်ဆူၣ်, ဒီးမုာ်လၤသးခုလၢယွၤအတၢ်ဟ့ၣ်တဖၣ်အါအါဒီးယံာ်ယံာ်တသ့ဖဲ အသ့လီၤ.
အဝဲအတၢ်ဆိကမိၣ်အဒိၣ်အယိာ်တဖၣ်အါတက့ၢ်ပာ်ဖျါတၢ် အဘျုးတအိၣ်ဒီးတၢ်လီၤသးဟးဂီၤဒၣ်လဲာ်န့ၣ်လီၤ. ဘၣ်ဆၣ်, လံာ်အံၤဘၣ်အိၣ်လၢပလံာ်စီဆှံပူၤအဂ့ၢ်န့ၣ်, မ့ၢ်လၢကဒုးနဲၣ်ဝဲလၢတၢ်စူၢ်တၢ်နာ်ဒ်လံာ်စီဆှံအကျဲအံၤ အခၢးလဲၢ်ဝဲတုၤအကတူၢ်လိာ်တၢ်ဂ့ၢ်တၢ်ကျိၤဘၣ်ထွဲဒီးတၢ်ထံၣ် လၢအခံးတကပၤဒီးတၢ်သးဒ့ဒီတဖၣ်ဒၣ်လဲာ်န့ၣ်လီၤ. ပှၤအါဂၤဃုန့ၢ်တၢ်သးမံသးမုာ်ခီဖျိအကွၢ်လီၤက့ၤအသး လၢ “လံာ်ပှၤစံၣ်တဲၤတဲလီၤတၢ်” အမဲာ်ထံကလၤအပူၤ, ဒီးထံၣ်န့ၢ်ဝဲလၢလံာ်စီဆှံတဘ့ၣ်ဃီလၢအဒုးကွၢ်ထံက့ၤပှၤ တၢ်ဆိကမိၣ်တဖၣ်အံၤ, ဟ့ၣ်စ့ၢ်ကီးပှၤတၢ်မုၢ်လၢ်လၢကစၢ်ယွၤအပူၤ, ယွၤလၢအဟ့ၣ်တၢ်အိၣ်မူအခီပညီလၢအဒိၣ်ကတၢၢ်န့ၣ်လီၤ.
1
1 တၢ်တဖၣ်အံၤမ့ၢ်စီၤဒၤဝံးအဖိခွါ, စီၤပၤလၢယရူၤၡလ့ၣ်အ ပူၤ, ပှၤဆိကမိၣ်တၢ်အဒိၣ်အယိာ်တဂၤအတၢ်ကတိၤတဖၣ်န့ၣ်လီၤ.
2 တၢ်အဘျုးတအိၣ်ဘၣ်. အဘျုးတအိၣ်ဘၣ်, ပှၤဆိကမိၣ်တၢ်အဒိၣ်အယိာ်တဂၤစံးဝဲဒၣ်လီၤ. တၢ်အိၣ်မူအံၤအဘျုးတအိၣ်ဘၣ်. တၢ်ခဲလၢာ်န့ၣ်အဘျုး တအိၣ်ဘၣ်.
3 နမၤလၢာ်နတၢ်အိၣ်မူလၢတၢ်ဖံးတၢ်မၤ, တၢ်ကျဲးစၢးလၢာ်ဂံၢ်လၢာ်ဘါ, ဘၣ်ဆၣ်ဒီးနအိၣ်ဒီးတၢ်မနုၤလၢနကပာ်ကဖၢလၢနသးအဂီၢ်လဲၣ်.
4 ပှၤအစိၤတဖၣ်ဟဲဝဲဒီးပှၤအစိၤတဖၣ်လဲၤဝဲလီၤ. ဘၣ်ဆၣ်, ဟီၣ်ခိၣ်အိၣ်ဒၣ်ဒ်အလီၢ်လီၢ်လီၤ.
5 မုၢ်ဟဲထီၣ်ဒံးဒၣ်တၢ်ဒီးလီၤနုာ်ဒံးဒၣ်တၢ်ဒီးက့ၤကဒါက့ၤ လၢတၢ်လီၤဘှံးလီၤတီၤအပူၤဆူတၢ်လီၢ်လၢကဘၣ်စးထီၣ်ကဒီး အသးန့ၣ်လီၤ.
6 ကလံၤအူဆူကလံၤထံး, ကလံၤအူဆူကလံၤစိး, လဲၤတရံးတဝီဝံၤတဝီဒီးဟဲက့ၤကဒီးလီၤ.
7 ထံကျိကိးဘိဒဲးယွၤနုာ်လီၤဆူပီၣ်လဲၣ်ပူၤ, ဘၣ်ဆၣ်ဒီးပီၣ်လဲၣ်တပှဲၤဒံးဒၣ်လဲာ်ဘၣ်. ထံက့ၤကဒါက့ၤဆူထံ ကျိတဖၣ်အိၣ်ထီၣ်အခီၣ်ထံး, ဒီးစးထီၣ်က့ၤအသးတဘျီကဒီးန့ၣ်လီၤ.
8 တၢ်ခဲလၢာ်ဆှၢတၢ်ဆူတၢ်ဘှံးသူၣ်တီၤသးအပူၤ, တၢ်ဘှံးသူၣ်တီၤသးလၢအဒိၣ်ကဲၣ်ဆိးတုၤပတဲလၢတၢ်ကတိၤ တဖၣ်တသ့ဘၣ်န့ၣ်လီၤ. ပမဲာ်ချံတဖၣ်ကွၢ်တၢ်သနာ်က့, တလၢကွၢ်ဘၣ်. ပနၢ်တဖၣ်တလၢနၢ်ဟူတၢ်ဘၣ်.
9 တၢ်လၢအမၤတ့ၢ်လံအသးလၢညါန့ၣ်ကမၤကဒီးအသးလီၤ. တၢ်လၢတၢ်မၤတ့ၢ်လံအီၤလၢညါန့ၣ်, ကဘၣ်တၢ်မၤကဒီးအီၤလီၤ. တၢ်အသီတအိၣ်လၢဟီၣ်ခိၣ်ချၢနီတမံၤဘၣ်.
10 အဝဲသ့ၣ်စံးဝဲ, “ကွၢ်တက့ၢ်. တၢ်အသီအိၣ်ဖဲအံၤတမံၤလီၤ.” ဘၣ်ဆၣ်, တမ့ၢ်ဘၣ်. တၢ်န့ၣ်မၤတ့ၢ်လံအသးလၢညါဃဲးဃဲး, လၢပတချုးအိၣ်ဖျဲၣ်ထီၣ်ဒံးဒၣ်လဲာ်န့ၣ်လီၤ.
11 တၢ်လၢအမၤတ့ၢ်အသးလၢအပူၤကွံာ်န့ၣ်, ပှၤတသ့ၣ်နီၣ်လၢၤနီတဂၤ ဘၣ်. ဒီးလၢမုၢ်နံၤလၢအကဟဲတဖၣ်အပူၤန့ၣ်, ပှၤတသ့ၣ်နီၣ်ထီၣ်လၢၤတၢ်မၤတ့ၢ်အသးလၢညါဒီးတၢ်မၤအသးခဲအံၤ အဘၢၣ်စၢၤနီတဂၤဘၣ်.
12 ယၤ, ပှၤဆိကမိၣ်တၢ်အဒိၣ်အယိာ်, ယမ့ၢ်တ့ၢ်စီၤပၤလၢကီၢ်အံၣ်စရ့ လးအဖီခိၣ်လၢဝ့ၢ်ယရူၤၡလ့ၣ်အပူၤန့ၣ်လီၤ.
13 ယပာ်လီၤယသးလၢယကသမံသမိးဒီးမၤလိတၢ်ခဲလၢာ်လၢအဘၣ်တၢ်မၤ တ့ၢ်အီၤလၢဟီၣ်ခိၣ်ချၢအံၤန့ၣ်လီၤ.
14 ယထံၣ်တ့ၢ်တၢ်ခဲလၢာ်လၢတၢ်မၤတ့ၢ်လံအီၤလၢဟီၣ်ခိၣ်အံၤ, ဒီးယစံးဘၣ်နၤ, တၢ်ခဲလၢာ်န့ၣ်အဘျုးတအိၣ်ဘၣ်. မၤအသးဒ်တၢ်လူၤဖီၣ်ကလံၤအသိးန့ၣ်လီၤ.
15 တၢ်လၢအက့ၣ်န့ၣ်နမၤဘျၢအီၤတန့ၢ်ဘၣ်. တၢ်လၢအတအိၣ်ဘၣ်တဖၣ်န့ၣ်, နဂံၢ်အီၤတသ့ဘၣ်.
16 ယစံးလီၤတ့ၢ်ယသး, ယကဲထီၣ်ပှၤဖးဒိၣ်တဂၤလံ. ယကူၣ်သ့ဒိၣ်န့ၢ်ဒံးပှၤတဂၤဂ့ၤတဂၤဂ့ၤလၢအပၢဝ့ၢ်ယရူၤၡလ့ၣ် လၢယမဲာ်ညါန့ၣ်လီၤ. တၢ်ကူၣ်သ့ဒီးတၢ်သ့ၣ်ညါ နီၢ်နီၢ်မ့ၢ်တၢ်မနုၤလဲၣ်န့ၣ်, ယသ့ၣ်ညါယဲလီၤ.
17 ယပာ်လီၤယသးလၢယကမၤလိတၢ်သ့ၣ်ညါဒီးတၢ်သးတဆး, တၢ်ကူၣ်သ့ဒီးတၢ်ပျုၢ်အတၢ်လီၤဆီန့ၣ်လီၤ. ဘၣ်ဆၣ်ယထံၣ်သ့ၣ်ညါလၢအအံၤစ့ၢ်ကီးကမ့ၢ်ဒၣ်တၢ်လူၤဖီၣ်ကလံၤ န့ၣ်လီၤ.
18 နဒံးကူၣ်သ့ဒီးနတၢ်ကိၢ်တၢ်ဂီၤဒံးအါထီၣ်လီၤ. နတၢ်သ့ၣ်ညါဒံးအါ, တၢ်န့ၣ်မၤဘၣ်ဒိဘၣ်ထံးနၤဒံးဒိၣ်န့ၣ်လီၤ.