7
(ဟးထီၣ်.၃၄:၁၁-၁၆)
1 ယွၤ, သုကစၢ်ယွၤကဆှၢနုာ်သုဆူကီၢ်လၢသုကလဲၤနုာ်မၤန့ၢ် အီၤအပူၤ, ဒီးအဝဲဒၣ်ကနီၣ်ထီၣ်ကွံာ်ပှၤအါကလုာ်လၢကီၢ်န့ၣ်အပူၤလီၤ. တုၤသုလဲၤထီၣ်ဒုးတၢ်န့ၣ်, အဝဲကနီၣ်ထီၣ်ကွံာ်ပှၤကလုာ်နွံ ကလုာ်လၢအဒိၣ်န့ၢ်သုဒီးအဂံၢ်အဘါဆူၣ်န့ၢ်သုလၢအမ့ၢ်ပှၤဃ့ၤ သးဖိတဖၣ်, ပှၤကံၣ်ကၣ်ဖိတဖၣ်, ပှၤအမိၢ်ဖိတဖၣ်, ပှၤကနၤဧၣ်ဖိတဖၣ်, ပှၤပရးစၤဖိတဖၣ်, ပှၤဃံၤဝံဖိတဖၣ်ဒီး ပှၤယဘူၣ်ဖိတဖၣ်န့ၣ်လီၤ.
2 ဖဲယွၤ, သုကစၢ်ယွၤဟ့ၣ်လီၤပှၤဂီၢ်မုၢ်တဖၣ်အံၤလၢသုစုပူၤ ဒီးသုမၤနၢၤကွံာ်အီၤန့ၣ်, သုကဘၣ်မၤသံကွံာ်အီၤခဲလၢာ်န့ၣ်လီၤ. မၤတၢ်ဒီသိၣ်ဒီမှံၤဒီးအဝဲသ့ၣ်မ့ၢ်ဂ့ၤ, ဒုးနဲၣ်အဝဲသ့ၣ်လၢသုတၢ်သးကညီၤမ့ၢ်ဂ့ၤ, န့ၣ်တဂ့ၤ.
3 ဒိးတ့ဒိးဖျီသုးသးဒီးအဝဲသ့ၣ်နီတဂၤတဂ့ၤ. ဒီးပျဲသုဖိတဖၣ်ဒိးတ့ဒိးဖျီအသးဒီးအဝဲသ့ၣ်နီတဂၤတဂ့ၤ.
4 အဂ့ၢ်ဒ်အံၤ, သုမ့ၢ်မၤဒ်န့ၣ်ဒီးအဝဲသ့ၣ်ကဆှၢယံၤကွံာ်သုဖိ တဖၣ်ဒီးယွၤဒ်သိးကဘူၣ်ထီၣ်ဘါထီၣ်ကစၢ်အဂၤတဖၣ်အဂီၢ်န့ၣ်လီၤ. တၢ်န့ၣ်မ့ၢ်မၤအသးဒ်န့ၣ်ဒီး, ယွၤကသးဒိၣ်ထီၣ်ဘၣ်သုဒီးမၤဟး ဂီၤကွံာ်သုတဘျီဃီန့ၣ်လီၤ.
5 လၢတၢ်န့ၣ်အဃိ, မၤလီၤပှီၢ်ကွံာ်အဝဲသ့ၣ်အတၢ်လုၢ်လီၢ်တဖၣ်, မၤကၢ်ကွံာ်အဝဲသ့ၣ်အလၢၢ်ထူၣ်စီဆှံတဖၣ်ဆူအက့အခီတဖၣ်ကျီ ကွံာ်အဝဲသ့ၣ်အကစၢ်မုၢ်အၡ့ရၤအပနီၣ်တဖၣ်ဒီးဒွဲၣ်အူထီၣ်ကွံာ် အဝဲသ့ၣ်အတၢ်ဂီၤတၢ်ဖီၣ်တဖၣ်န့ၣ်တက့ၢ်.
6 မၤတၢ်အံၤ, မ့ၢ်လၢသုဘၣ်ဃးဒီးယွၤ, သုကစၢ်ယွၤအဃိန့ၣ်လီၤ. လၢပှၤဂီၢ်မုၢ်လၢဟီၣ်ခိၣ်ဒီဘ့ၣ်အကျါန့ၣ်, အဝဲဃုထၢထီၣ်သုလၢကမ့ၢ်အဝဲအပှၤဂီၢ်မုၢ်လီၤဆီဝဲန့ၣ်လီၤ.
7 တမ့ၢ်ယွၤအဲၣ်သု, ဒီးဃုထၢသုမ့ၢ်လၢသုနီၣ်ဂံၢ်အါန့ၢ်ဒံး ပှၤအဂၤတဖၣ်အဃိဘၣ်. သုမ့ၢ်ပှၤအဆံးကတၢၢ်တကလုာ် လၢဟီၣ်ခိၣ်ချၢန့ၣ်လီၤ.
8 မ့မ့ၢ်ယွၤအဲၣ်သုဒီးသးအိၣ်ဟံးဃာ်တၢ်အၢၣ်လီၤအီလီၤလၢအဝဲ မၤတ့ၢ်ဝဲဒီးသုမိၢ်ပၢ်ဖံဖုလၢပျၢၤတဖၣ်န့ၣ်လီၤ. လၢတၢ်န့ၣ်အဃိအဝဲအုၣ်က့ၤခီၣ်က့ၤသုခီဖျိအတၢ်ဒိၣ်တၢ်မုၢ် ဒီးမၤထူၣ်ဖျဲးသုလၢကုၢ်အလီၢ်လၢကီၢ်အဲၤကူပတူးအစီၤပၤ အစုပူၤန့ၣ်လီၤ.
9 သ့ၣ်နီၣ်ထီၣ်က့ၤလၢယွၤ, သုကစၢ်ယွၤမ့ၢ်ကစၢ်ယွၤထဲတဂၤဧိၤ, ဒီးလၢအဝဲမ့ၢ်ပှၤလၢအကလုၢ်တီန့ၣ်တက့ၢ်. အဝဲကဟံးဃာ်အတၢ်အၢၣ်လီၤအီလီၤဒီးဒုးနဲၣ်အတၢ်အဲၣ်အထူအယိာ် ဆူပှၤတဖၣ်လၢအအဲၣ်အီၤဒီးစူၢ်အတၢ်မၤလိာ်, တုၤလီၤလၢပှၤအစိၤတကထိန့ၣ်လီၤ.
10 ဘၣ်ဆၣ်ဒီးအဝဲတမၤယံာ်မၤနီၣ်ဘၣ်အသးလၢကစံၣ်ညီၣ်ပှၤတဖၣ်လၢ အသးဟ့အီၤန့ၣ်ဘၣ်.
11 ဒီးခဲကနံၣ်အံၤ, စူၢ်တၢ်လၢအဘၣ်တၢ်သိၣ်လိသီလိသုန့ၣ်တက့ၢ်. စူၢ်ကယဲၢ်တၢ်ဘူၣ်တၢ်ဘါအတၢ်သိၣ်တၢ်သီတဖၣ်လၢအဟ့ၣ်လီၤသုလၢ မုၢ်မဆါတနံၤအံၤန့ၣ်တက့ၢ်.
(သိၣ်သီ.၂၈:၁-၁၄)
12 သုမ့ၢ်ဒိကနၣ်တၢ်မၤလိာ်တဖၣ်အံၤဒီးစူၢ်အီၤလၢတၢ်သူၣ်တီသး ရၤအပူၤန့ၣ်, အန့ၣ်တစု, ယွၤ, သုကစၢ်ကဟံးဃာ်ထွဲဒံးအတၢ် အၢၣ်လီၤဒီးသုဒီးကဒုးနဲၣ်သုလၢအတၢ်အဲၣ်တထံၣ်ဃီဒ်အဝဲ အၢၣ်လီၤတ့ၢ်သုမိၢ်ပၢ်ဖံဖုလၢပျၢၤတဖၣ်အသိးန့ၣ်လီၤ.
13 အဝဲဒၣ်ကအဲၣ်သုဒီးဆိၣ်ဂ့ၤသုဒ်သိးသုကအါထီၣ်လၢနီၣ်ဂံၢ်ဒီး အိၣ်ဒီးဖိတဖၣ်အါအါဂီၢ်ဂီၢ်န့ၣ်လီၤ. အဝဲကဆိၣ်ဂ့ၤသုစံာ်ဧိၤပျီဧိၤတဖၣ်, ဒ်သိးသုကအိၣ်ဒီးဘုဧိၤဟုဧိၤ, စပံးထံ, ဒီးသ့ၣ်စၤယံးအသိန့ၣ်လီၤ. ဒီးအဝဲဒၣ်ကဆိၣ်ဂ့ၤသုခီဖျိတၢ်ဟ့ၣ်လီၤသုလၢဂီၤဘုၣ်ဂီၤ ဖံးဒီးသိအါအါကလဲာ်န့ၣ်လီၤ. အဝဲကဟ့ၣ်လီၤသုလၢကယဲၢ်တၢ်ဆိၣ်ဂ့ၤခဲလၢာ်အံၤ, လၢကီၢ်တဘ့ၣ်အပူၤလၢအဝဲအၢၣ်လီၤတ့ၢ်သုမိၢ်ပၢ်ဖံဖု လၢပျၢၤန့ၣ်, လၢအဝဲကဟ့ၣ်လီၤသုန့ၣ်လီၤ.
14 ပှၤဂီၢ်မုၢ်လၢဟီၣ်ခိၣ်ချၢလၢကဘၣ်တၢ်ဆိၣ်ဂ့ၤထူးထူးတီၤတီၤ ထဲသိးဒီးသုတအိၣ်ဘၣ်နီတကလုာ်ဘၣ်. ပိာ်ခွါမ့တမ့ၢ်ပိာ်မုၣ်လၢသုကျါမ့ၢ်ဂ့ၤ, သုဆၣ်ဖိကီၢ်ဖိလၢသုဘုၣ်အီၤအဖါမ့တမ့ၢ်အမိၢ်မ့ၢ်ဂ့ၤန့ၣ်, အတူာ်ဖိတအိၣ်ဘၣ်.
15 ယွၤကအိၣ်ပှိၤဒီဒၣ်သုလၢကယဲၢ်တၢ်ဆူးတၢ်ဆါခဲလၢာ်, ဒီးအဝဲတဒုးလီၤတၢ်ဆါလီၤပျံၤလီၤဖုးတဖၣ်လၢသုလိၤနီ တမံၤဒ်သုလဲၤခီဖျိဘၣ်တ့ၢ်အီၤလၢကီၢ်အဲၤကူပတူးအပူၤအသိး န့ၣ်ဘၣ်. မ့မ့ၢ်အဝဲကဒုးလီၤဘၣ်တၢ်န့ၣ်ခဲလၢာ်လၢသုဒုၣ်သုဒါတဖၣ် အလိၤန့ၣ်လီၤ.
16 မၤဟးဂီၤကွံာ်ကယဲၢ်ပှၤကိးကလုာ်ဒဲးလၢယွၤ, သုကစၢ်ယွၤဟ့ၣ်လီၤအီၤလၢသုစုပူၤဒီးဒုးနဲၣ်ဖျါထီၣ်သု တၢ်သးကညီၤဘၣ်အဝဲသ့ၣ်နီတမံၤတဂ့ၤ. ဘူၣ်ထီၣ်ဘါထီၣ်အဝဲသ့ၣ်အကစၢ်တဖၣ်တဂ့ၤ. အဂ့ၢ်ဒ်အံၤ, တၢ်န့ၣ်မ့ၢ်တၢ်လၢအမၤသံသုသ့န့ၣ်လီၤ.
17 တဲလီၤသုသးလၢပှၤတဖၣ်အံၤအနီၣ်ဂံၢ်အါန့ၢ်ဒံးသုဒီးသုနီၣ် ထီၣ်ကွံာ်အီၤတန့ၢ်ဘၣ်န့ၣ်တဂ့ၤ.
18 ပျံၤဘၣ်အဝဲသ့ၣ်တဂ့ၤ. သ့ၣ်နီၣ်ထီၣ်တၢ်လၢယွၤ, သုကစၢ်ယွၤမၤတ့ၢ်ဘၣ်ကီၢ်အဲၤကူပတူးအစီၤပၤဒီးအပှၤဂီၢ်မုၢ် ခဲလၢာ်အဂ့ၢ်န့ၣ်တက့ၢ်.
19 သ့ၣ်နီၣ်ထီၣ်တၢ်သံသတြိာ်လီၤပျံၤလီၤဖုးတဖၣ်, လၢသုထံၣ်ဘၣ်တ့ၢ်အီၤလၢသုမဲာ်ချံဒၣ်ဝဲ, တၢ်လီၤလးတဖၣ်ဒီးတၢ်လီၤကမၢကမၣ်တဖၣ်, ယွၤသုကစၢ်ယွၤမၤထူၣ် ဖျဲးသုခီဖျိတၢ်စိတၢ်ကမီၤဖးဒိၣ်ဒီးတၢ်ဂံၢ်ဆူၣ်ဘါဆူၣ်န့ၣ်တက့ၢ်. ဒ်ကျဲတဘိဃီလၢယွၤမၤဟးဂီၤကွံာ်ပှၤအဲၤကူပတူးဖိတဖၣ် အသိးန့ၣ်, အဝဲကမၤဟးဂီၤကွံာ်ကယဲၢ်ပှၤဂီၢ်မုၢ်ခဲလၢာ်အံၤလၢသုပျံၤဘၣ် အီၤခဲအံၤန့ၣ်လီၤ.
20 အဝဲကဒုးအိၣ်ထီၣ်ဒၣ်လဲာ်တၢ်ပျံၤတၢ်ဖုးလၢအဝဲသ့ၣ်အကျါဒီး ကမၤဟးဂီၤကွံာ်ပှၤလၢအဃ့ၢ်ပူၤအသးဒီးဃ့ၢ်အိၣ်ခူသူၣ်တဖၣ် န့ၣ်လီၤ.
21 လၢတၢ်န့ၣ်အဃိ, ပျံၤဘၣ်ပှၤဂီၢ်မုၢ်တဖၣ်အံၤတဂ့ၤ. ယွၤ, သုကစၢ်ယွၤအိၣ်ဒီးသုလီၤ. အဝဲမ့ၢ်ကစၢ်ယွၤတဂၤလၢအဒိၣ် နီၢ်မး, ဒီးပှၤတဂၤလၢကြၢးဘၣ်တၢ်ပျံၤအီၤန့ၣ်လီၤ.
22 တစဲးဘၣ်တစဲးန့ၣ်, အဝဲကနီၣ်ထီၣ်ကွံာ်ပှၤကလုာ်တဖၣ်အံၤ, ဖဲသုလဲၤထီၣ်ဒုးတၢ်န့ၣ်လီၤ. သုမၤဟးဂီၤကွံာ်အဝဲသ့ၣ်ခဲ လၢာ်တဘျီဃီတန့ၢ်ဘၣ်. အဂ့ၢ်ဒ်အံၤ, သုမ့ၢ်မၤဒ်န့ၣ်ဒီးဆၣ်ဖိကီၢ်ဖိအမံၤတဖၣ်ကအါထီၣ် ဝဲဒီးကကဲထီၣ်တၢ်မၤပျံၤမၤဖုးလၢသုဂီၢ်န့ၣ်လီၤ.
23 ယွၤကဟ့ၣ်လီၤကွံာ်သုဒုၣ်သုဒါတဖၣ်ဆူသုစုပူၤဒီးမၤပျံၤ အီၤဒိၣ်ဒိၣ်ကလဲာ်တုၤလၢအဝဲသ့ၣ်ဘၣ်တၢ်မၤဟးဂီၤကွံာ်အီၤတစု န့ၣ်လီၤ.
24 အဝဲကဟ့ၣ်လီၤကွံာ်အဝဲသ့ၣ်အစီၤပၤတဖၣ်ဆူသုစုပူၤန့ၣ်လီၤ. သုကမၤသံကွံာ်အဝဲသ့ၣ်ဒီးအဝဲသ့ၣ်ကဘၣ်တၢ်သးပ့ၤနီၣ်ကွံာ် အီၤန့ၣ်လီၤ. ပှၤမၤတံာ်တာ်သုတသ့ဘၣ်နီတဂၤဘၣ်. သုကမၤဟးဂီၤကွံာ်ပှၤကိးဂၤဒဲးန့ၣ်လီၤ.
25 ဒွဲၣ်အူကွံာ်တၢ်ဂီၤတၢ်ဖီၣ်တဖၣ်တက့ၢ်. သးကွံထူမ့ၢ်ဂ့ၤ, စ့မ့ၢ်ဂ့ၤလၢအအိၣ်လၢအဝဲသ့ၣ်အလိၤန့ၣ်တဂ့ၤ, ဒီးဟံးန့ၢ်အီၤလၢသုဂီၢ်တဂ့ၤ. သုမ့ၢ်မၤဒီးတၢ်န့ၣ်မ့ၢ် တၢ်လၢအမၤသံသုသ့န့ၣ်လီၤ. အဂ့ၢ်ဒ်အံၤယွၤသးဟ့တၢ်ဘါထီၣ်တၢ်ဂီၤတၢ်ဖီၣ်န့ၣ်လီၤ.
26 က့ၤစိာ်တၢ်ဂီၤတၢ်ဖီၣ်တဖၣ်န့ၣ်နီတခါဆူသုဟံၣ်တဖၣ်အပူၤတ ဂ့ၤ. မ့တမ့ၢ်ဘၣ်ဒီးတၢ်ဆိၣ်အၢတမံၤဃီလၢအလီၤဘၣ်လၢအဝဲ သ့ၣ်အလိၤန့ၣ်ကလီၤဘၣ်လၢသုလိၤလီၤ. သုကဘၣ်သးဟ့ဒီးသးဘၣ်အၢတၢ်ဂီၤတၢ်ဖီၣ်တဖၣ်အံၤ မ့ၢ်လၢအဝဲသ့ၣ်အိၣ်လၢယွၤအတၢ်ဆိၣ်အၢအဖီလာ်အဃိန့ၣ်လီၤ.