3
(ဂံၢ်.၂၁း၃၁-၃၅)
1 မၤကဒီးတစု, ပလဲၤဆူကလံၤစိးလိၤလိၤဆူဘၤၡၣ်အလီၢ်ကဝီၤ ဒီးစီၤပၤဧိာ်ဟဲထီၣ်ဒီးကယဲၢ်အပှၤတဖၣ်လၢကဒုးပှၤအဂီၢ်ဖဲ တၢ်လီၢ်ဘူးဒီးဝ့ၢ်အ့ဒြံၤန့ၣ်လီၤ.
2 ဘၣ်ဆၣ်ဒီးယွၤစံးဘၣ်ယၤ, ပျံၤအီၤတဂ့ၤ. ယကဟ့ၣ်လီၤအီၤ, အပှၤတဖၣ်, ဒီးကယဲၢ်အလီၢ်ကဝီၤခဲလၢာ်ဆူနအိၣ်န့ၣ်လီၤ. မၤအီၤတမံၤဃီဒ်နမၤဘၣ်တ့ၢ်ပှၤဧၣ်မိၣ်ဖိတဖၣ်အစီၤပၤလၢအပၢ တၢ်လၢဝ့ၢ်ဃ့ၡဘိၣ်, စီၤစံဃိၣ်, အသိးန့ၣ်တက့ၢ်.
3 မၤသးဒ်န့ၣ်ဒီး, ယွၤဟ့ၣ်လီၤကွံာ်စ့ၢ်ကီးစီၤပၤစီၤဧိာ်ဒီး အပှၤဂီၢ်မုၢ်ဆူပစုပူၤဒီးပကျီသံကွံာ်အီၤခဲလၢာ်လီၤ.
4 တကတီၢ်ဃီန့ၣ်, ပမၤန့ၢ်ကွံာ်အဝ့ၢ်တဖၣ်ခဲလၢာ်, ဝ့ၢ်လၢပတဟံးန့ၢ်ဘၣ်အီၤန့ၣ်တအိၣ်လီၤတဲာ်ဘၣ်နီတဝ့ၢ်ဘၣ်. ပမၤန့ၢ်ဝ့ၢ်ခဲလၢာ်အဝ့ၢ်ဃုဆံလၢအၢ်ကိးအလီၢ်ကဝီၤဒီကဝီၤညါ ဖဲကီၢ်ဘၤၡၣ်အစီၤပၤပၢတၢ်န့ၣ်လီၤ.
5 ဝ့ၢ်ခဲလၢာ်အံၤဘၣ်တၢ်မၤခၢၣ်သနၢၣ်အီၤဒီးဝ့ၢ်ခိၣ်ဒူလၢအထီတ ဖၣ်, တြဲၤဖးဒိၣ်ဒီးနီၣ်ဘိတဖၣ်လၢတၢ်ကကးတံၢ်တြဲၤဖးဒိၣ်တဖၣ် အဂီၢ်ဒီးဒူသဝီတဖၣ်လၢအခိၣ်ဒူတအိၣ်ဘၣ်အိၣ်ဝဲအါဖျၢၣ်စ့ၢ် ကီးန့ၣ်လီၤ.
6 ပမၤဟးဂီၤကွံာ်ဝ့ၢ်ခဲလၢာ်ဒီးမၤသံကွံာ်ကယဲၢ်ပှၤပိာ်ခွါ, ပှၤပိာ်မုၣ်ဒီးဖိသၣ်တဖၣ်, ဒ်သိးဒၣ်ပမၤတ့ၢ်အီၤလၢဝ့ၢ်တဖၣ် အပူၤလၢအဘၣ်ဃးဒီးဝ့ၢ်ဃ့ၡဘိၣ်အစီၤပၤစီၤစံဃိၣ်အသိးန့ၣ်လီၤ.
7 ပဟံးန့ၢ်ကွံာ်ဆၣ်ဖိကီၢ်ဖိလၢအဘၣ်တၢ်ဘုၣ်အီၤတဖၣ်ဒီးဂုာ်ဆူၣ် ဖျိဆူၣ်အဝ့ၢ်တဖၣ်န့ၣ်လီၤ.
8 အကတီၢ်ဖဲန့ၣ်, ပဟံးန့ၢ်ကွံာ်တၢ်လီၢ်အံၤလၢ ထံကျိယၢ်ဒ့ၣ်အမုၢ်ထီၣ်တကပၤ, စးထီၣ်လၢထံကျိအၢ်နိၣ်တုၤဆူကစၢၢ်ဃ့ရမိၣ်လၢပှၤဧၣ်မိၣ်ဖိ အစီၤပၤခံဂၤအံၤအအိၣ်န့ၣ်လီၤ.
9 (ကစၢၢ်ဃ့ရမိၣ်န့ၣ်ဘၣ်တၢ်ကိးအီၤလၢကစၢၢ်စံရယိၣ်လၢပှၤစံဒိၣ် ဖိတဖၣ်ဒီးကစၢၢ်စနံၢ်လၢပှၤဧၣ်မိၣ်ဖိတဖၣ်န့ၣ်လီၤ.)
10 ပဟံးန့ၢ်ကွံာ်ကီၢ်ဘၤၡၣ်အစီၤပၤစီၤဧိာ်အလီၢ်ကဝီၤခဲလၢာ်လၢ အမ့ၢ်ဝ့ၢ်တဖၣ်လၢအအိၣ်လၢတၢ်လူၢ်ဒီခိၣ်အတၢ်ပၢၤခိၣ်အလိၤ, ကီၢ်ကံးလဧးဒီးကီၢ်ဘၤၡၣ်အလီၢ်ကဝီၤတဖၣ်, ယံၤဝဲလၢမုၢ်ထီၣ်တုၤဆူဝ့ၢ်တဖၣ်လၢအမ့ၢ်စၤလကးဒီးအ့ဒြံၤ န့ၣ်လီၤ.
11 (စီၤပၤစီၤဧိာ်မ့ၢ်အစီၤပၤလၢခံကတၢၢ်တဂၤဖဲဝ့ၢ်ရးဘးန့ၣ်လီၤ. အဝဲအကျုာ်န့ၣ်ဘၣ်တၢ်မၤအီၤလၢလၢၢ်ဒီးအလဲၢ်အိၣ်လွံၢ်ပျၢ်ဒီး အထီအိၣ်ဝဲဃုပျၢ်ဃၣ်ဃၣ်ဒ်နီၣ်ထီၣ်အတီလၢတၢ်ပာ်လီၤအီၤအသိး န့ၣ်လီၤ. တၢ်န့ၣ်ဘၣ်တၢ်ထံၣ်အီၤသ့ဒံးဝဲတုၤခဲကနံၣ်အံၤ, လၢပှၤဧၣ်မိၣ်ဖိအဝ့ၢ်, ဝ့ၢ်ရးဘးအပူၤန့ၣ်လီၤ.)
(တၢ်ဂံၢ်.၃၂:၁-၄၂)
12 ဖဲပဟံးန့ၢ်ကီၢ်န့ၣ်ဒ်ပတၢ်အသိးန့ၣ်, ယဟ့ၣ်လီၤရူၤဘ့ၣ်ဒီးကး အဒူၣ်လၢတၢ်လီၢ်ကဝီၤလၢအအိၣ်လၢဝ့ၢ်ဧရိၤဧ့ၢ်ကလံၤစိးတခီ ဘူးဒီးထံကျိအၢ်နိၣ်ဒီးကီၢ်ကံးလဧးအလီၢ်ကဝီၤလၢအအိၣ်ဒီး အတၢ်လူၢ်တၢ်တြီၤတနီၤဃုာ်ဒီးအခူအဝ့ၢ်တဖၣ်န့ၣ်လီၤ.
13 လၢမနၤၡ့ၤအဒူၣ်တဝာ်အဂီၢ်န့ၣ်ယဟ့ၣ်လီၤအီၤလၢကီၢ်ကံးလဧး အလီၢ်ကဝီၤလၢအအိၣ်လီၤတဲာ်တဖၣ်ဒီးကီၢ်ဘၤၡၣ်ဒီကီၢ်ဖဲ စီၤပၤစီၤဧိာ်ပၢတ့ၢ်ဝဲ, လၢအမ့ၢ်ကီၢ်အၢ်ကိးအလီၢ်ကဝီၤခဲ လၢာ်စ့ၢ်ကီးန့ၣ်လီၤ.
14 စီၤယၤအံၢ်, ပှၤတဂၤလၢမနၤၡ့ၤအဒူၣ်ဟံးန့ၢ်ကီၢ်အၢ်ကိးအလီၢ် ကဝီၤခဲလၢာ်လၢအမ့ၢ်ကီၢ်ဘၤၡၣ်ကယံၤဝဲတုၤလၢကီၢ်ကၡူၢ်ဒီး ကီၢ်မၤကးအကီၢ်ဆၢန့ၣ်လီၤ. ဒီးအဝဲကိးန့ၢ်ဒူသဝီၤတဖၣ်န့ၣ်အမံၤဒ်အဝဲအမံၤအသိးဒီးသဝီ တဖၣ်န့ၣ်ဘၣ်တၢ်သ့ၣ်ညါဒံးအီၤဒ်ဘၤၡၣ်ဃၤအိးယၤအံၣ်လၢအခီ ပညီမ့ၢ်ဝဲစီၤယၤအံၢ်အသဝီတဖၣ်န့ၣ်လီၤ.)
15 ယဟ့ၣ်လီၤကီၢ်ကံးလဧးဆူစီၤမၤကံၢ်အဒူၣ်ထၢ, လၢအဘၣ်ဃးဒီးမနၤၡ့ၤအဒူၣ်အစုပူၤန့ၣ်လီၤ.
16 ဒီးလၢရူၤဘ့ၣ်အဒူၣ်ဒီးကးအဒူၣ်အဂီၢ်န့ၣ်ယဟ့ၣ်လီၤတၢ်လီၢ် ကဝီၤစးထီၣ်လၢကီၢ်ကံးလဧးအဆၢတုၤလၢထံကျိအၢ်နိၣ်န့ၣ်လီၤ. ထံကျိအၢ်နိၣ်အခၢၣ်သးန့ၣ်မ့ၢ်ဝဲအကီၢ်ဆၢလၢကလံၤထံး, ဒီးအဝဲသ့ၣ်အကလံၤစိးအကီၢ်ဆၢန့ၣ်မ့ၢ်ဝဲထံကျိယးဘိး, လၢအမ့ၢ်ဝဲပှၤဧၣ်မိၣ်ဖိတဖၣ်အကီၢ်ဆၢတနီၤန့ၣ်လီၤ.
17 လၢမုၢ်နုာ်တခီန့ၣ်အဝဲသ့ၣ်အလီၢ်ကဝီၤလဲၤတုၤဝဲတုၤဆူ ထံကျိယၢ်ဒ့ၣ်စးထီၣ်လၢပီၣ်လဲၣ်ကၤလံၤလါလၢကလံၤစိးတခီ, တုၤလီၤဆူပီၣ်လဲၣ်သံလၢကလံၤထံးတခီ, ဒီးဆူကစၢၢ်ပံးစကၤ အခီၣ်ထံးလၢမုၢ်ထီၣ်တခီန့ၣ်လီၤ.
18 တကတီၢ်ဃီန့ၣ်, ယဟ့ၣ်လီၤအဝဲသ့ၣ်လၢတၢ်သိၣ်လိနဲၣ်ယုၤတဖၣ်ဒ်လၢ လာ်အံၤန့ၣ်လီၤ. ပကစၢ်ယွၤဟ့ၣ်လီၤတ့ၢ်သုလၢကီၢ်အံၤလၢထံကျိယၢ်ဒ့ၣ်မုၢ်ထီၣ် တခီဒ်သိးသုကမၤန့ၢ်အီၤအဂီၢ်လီၤ. ခဲကနံၣ်အံၤမၢသုပှၤဒုးသုးဖိတဖၣ်ကံာ်တူာ်ထီၣ်အတၢ်စုကဝဲၤ ဒီးဆှၢလီၤအဝဲသ့ၣ်ဆူထံကျိယၢ်ဒ့ၣ်အဘးခီလၢကီၢ်အံၣ်စရ့ လးအဒူၣ်အဂၤတဖၣ်အမဲာ်ညါဒ်သိးကမၤစၢၤအဝဲသ့ၣ်လၢကမၤန့ၢ်အကီၢ် အဂီၢ်န့ၣ်တက့ၢ်.
19 ထဲဒၣ်သုမါတဖၣ်ဒီးဖိတဖၣ်ဒီးဆၣ်ဖိကီၢ်ဖိလၢသုဘုၣ်အီၤတဖၣ်ဧိၤ, (ယသ့ၣ်ညါလၢသုအိၣ်ဒီးဆၣ်ဖိကီၢ်ဖိလၢသုဘုၣ်အီၤအါမး) ကဘၣ်အိၣ်တ့ၢ်လၢသုလီၢ်ခံလၢဝ့ၢ်တဖၣ်လၢယဟ့ၣ်လီၤသုအပူၤန့ၣ် လီၤ.
20 မၤစၢၤသုပှၤအံၣ်စရ့လးဖိကဒဲကဒဲတဖၣ်တုၤလၢအဝဲသ့ၣ်မၤန့ၢ် ကီၢ်တဘ့ၣ်လၢယွၤဟ့ၣ်လီၤအဝဲသ့ၣ်လၢထံကျိယၢ်ဒ့ၣ်အမုၢ်နုာ်, ဒီးတုၤလၢယွၤပျဲအဝဲသ့ၣ်အိၣ်ဆိးဖဲန့ၣ်မုာ်မုာ်ခုၣ်ခုၣ်, ဒ်အမၤတ့ၢ်လံလၢသုဂီၢ်ဖဲအံၤအသိးန့ၣ်တက့ၢ်. အန့ၣ်ဝံၤဒီး, သုဟဲက့ၤကဒါက့ၤဆူကီၢ်အံၤလၢယဟ့ၣ်လီၤသုန့ၣ်သ့ဝဲဒၣ်လီၤ.
21 အန့ၣ်ဝံၤဒီး, ယသိၣ်လိနဲၣ်ယုၤစီၤယိၤၡူန့ၣ်လီၤ. နထံၣ်ဘၣ်တ့ၢ်လံကယဲၢ်တၢ်လၢယွၤ, နကစၢ်ယွၤမၤဘၣ်တ့ၢ်စီၤပၤခံဂၤ, လၢအမ့ၢ်စီၤစံဃိၣ်ဒီးစီၤဧိာ်န့ၣ်လီၤ. ဒီးအဝဲကမၤတၢ်တမံၤဃီဆူပှၤအဂၤတဂၤလၢ်လၢ်,လၢနဘၣ်လဲၤနုာ် ဒုးအကီၢ်န့ၣ်လီၤ.
22 ပျံၤအဝဲသ့ၣ်တဂ့ၤ, အဂ့ၢ်ဒ်အံၤ, ယွၤ, နကစၢ်ယွၤကဒုးတၢ်လၢနဂီၢ်န့ၣ်လီၤ.
23-24 အကတီၢ်ဖဲန့ၣ်, ယဘါထုကဖၣ်တၢ်သပှၢ်ပှၢ်, ယွၤပၢဘၣ်တၢ်ခဲလၢာ်ကစၢ်ဧၢ, ယသ့ၣ်ညါလၢနဒုးထံၣ်ဒံးဒၣ်ယၤ, တၢ်မၤဖးဒိၣ်ဒီးတၢ်လီၤလိၢ်လီၤလးလၢနကမၤအီၤထဲ အစးခီၣ်ထံးဧိၤဒံးန့ၣ်လီၤ. လၢမူခိၣ်မ့ၢ်ဂ့ၤ, လၢဟီၣ်ခိၣ်ချၢမ့ၢ်ဂ့ၤယွၤလၢအမၤတၢ်အဒိၣ် အမုၢ်တဖၣ်ဒ်သိးနမၤတ့ၢ်အံၤသ့ဝဲန့ၣ်, တအိၣ်ဘၣ်နီတဂၤဘၣ်.
25 ယွၤဧၢ, ပျဲယခီဂာ်ထံကျိယၢ်ဒ့ၣ်ဒီးပျဲယထံၣ်ဘၣ်ကီၢ်လၢအပှဲၤ ဒီးဟီၣ်ခိၣ်ညၣ်ထ့ၣ်အဂ့ၤလၢအအိၣ်လၢထံကျိဘးခီ, တၢ်လူၢ်တၢ်တြီၤအကီၢ်ဃံလၤဒီးလဘၤနိၣ်အကစၢ်ကလိတဖၣ်န့ၣ်တက့ၢ်.
26 ဘၣ်ဆၣ်ဒီးမ့ၢ်လၢသုဝဲပှၤဂီၢ်မုၢ်အံၤအဃိ, ယွၤအသးဒိၣ်ထီၣ်ဘၣ်ယၤဒီးတကနၣ်ယၤဘၣ်. အခိၣ်တလိာ်, အဝဲစံးဝဲ, ထဲန့ၣ်ဘၣ်လံ. ယၢၤထီၣ်ကဒီးတၢ်ဂ့ၢ် အံၤလၢၤတဂ့ၤ.
27 လဲၤထီၣ်ဆူကစၢၢ်ပံးစကၤအခိၣ်ထိးဒီးကွၢ်ဃီၤတၢ်ဆူကလံၤစိး ဒီးဆူကလံၤထံး, ဆူမုၢ်ထီၣ်ဒီးဆူမုၢ်နုာ်န့ၣ်တက့ၢ်. ကွၢ်တၢ်လၢနထံၣ်ဘၣ်အီၤန့ၣ်လီၤတံၢ်လီၤဆဲးတက့ၢ်. အဂ့ၢ်ဒ်အံၤ, နတလဲၤခီဂာ်ဘၣ်ထံကျိယၢ်ဒ့ၣ်လ့ၤတက့ၤဘၣ်.
28 မၤလိာ်ဒီးဟ့ၣ်စိၤဟ့ၣ်ကမီၤစီၤယိၤၡူ, တက့ၢ်. ဒုးဆူၣ်ထီၣ်အဂံၢ်အဘါဒီးဒုးတံးသဟီၣ်ထီၣ်အဂံၢ်အဘါတက့ၢ်. အဂ့ၢ်ဒ်အံၤ, အဝဲကဆှၢပှၤဂီၢ်မုၢ်ဆူဘးခီလၢနထံၣ်ဘၣ်အီၤန့ၣ်လီၤ.
29 လၢတၢ်န့ၣ်အဃိ, ပအိၣ်လီၤတဲာ်တ့ၢ်ဖဲတၢ်တြီၤပူၤအံၤလၢ ဝ့ၢ်ဘ့ၤသပဧိၢ်အမဲာ်ညါတခီန့ၣ်လီၤ.