23
1 ပှၤပိာ်ခွါလၢတၢ်ဒ့ကွံာ်အဒံၣ်ချံမ့ၢ်ဂ့ၤ, တၢ်ဒီၣ်တဲာ်ကွံာ်အပိာ်ခွါအက့ၢ်အဂီၤမ့ၢ်ဂ့ၤ, တနုာ်လီၤဘၣ်ဆူယွၤအပှၤဂီၢ်မုၢ်အကျါနီတဂၤဘၣ်.
2 ပှၤတဂၤလၢ်လၢ်မ့ၢ်အိၣ်ဖျဲၣ်ထီၣ်လၢမိၢ်ပၢ်လၢတဒိးတ့ဒိးဖျီ အသးတဖၣ်မ့ၢ်ဂ့ၤ, ဒီးပှၤဟဲလီၤစၢၤလီၤသွဲၣ်လၢပှၤဒ်န့ၣ်အသိးမ့ၢ်ဂ့ၤတုၤလီၤ လၢပှၤအစိၤတဆံဒၣ်လဲာ်န့ၣ်, တနုာ်လီၤဘၣ်ဆူယွၤအပှၤဂီၢ်မုၢ်အကျါနီတဂၤဘၣ်.
3 ပှၤဧၣ်မိၣ်ဖိမ့ၢ်ဂ့ၤ, ပှၤမိၤအးဖိမ့ၢ်ဂ့ၤ, ဒီးပှၤလၢအလီၤစၢၤလီၤသွဲၣ်လၢအဝဲသ့ၣ်တုၤလီၤလၢပှၤအစိၤ တဆံဒၣ်လဲာ်န့ၣ်, တနုာ်လီၤဘၣ်ဆူယွၤအပှၤဂီၢ်မုၢ်အကျါနီတဂၤဘၣ်.
4 အဂ့ၢ်ဒ်အံၤ, ဖဲသုဟးထီၣ်လၢကီၢ်အဲၤကူပတူးအပူၤန့ၣ်, အဝဲသ့ၣ်ဂ့ၢ်လိာ်လၢကဟ့ၣ်သုတၢ်အီၣ်ဒီးထံလၢကျဲန့ၣ်လီၤ. ဒီးအဝဲသ့ၣ်ဒိးလဲစီၤဘဧိၢ်အဖိခွါစီၤဘံးလၣ်, လၢအမ့ၢ်ကီၢ်မ့းစပတၤမံ, ပှၤဝ့ၢ်ပသူၢ်ဖိတဂၤဒ်သိးကဆိၣ်အၢသု န့ၣ်လီၤ.
5 ဘၣ်ဆၣ်ဒီးယွၤသုကစၢ်ယွၤတဒိကနၣ်ဘၣ်စီၤဘံးလၣ်ဘၣ်. အခိၣ်တလိာ်အဝဲလဲလိာ်ကွံာ်တၢ်ဆိၣ်အၢတမံၤဆူတၢ်ဆိၣ်ဂ့ၤတမံၤ မ့ၢ်လၢအဝဲအဲၣ်သုအဃိန့ၣ်လီၤ.
6 ဖဲတၢ်ဆၢကတီၢ်လၢသုမ့ၢ်ဒံးဒၣ်ပှၤတကလုာ်န့ၣ်, မၤတၢ်နီတမံၤလၢသုကမၤစၢၤပှၤကလုာ်တဖၣ်အံၤမ့ၢ်ဂ့ၤမၤဘီၣ်ထီၣ်ညီထီၣ်အဝဲသ့ၣ်မ့ၢ်ဂ့ၤ, န့ၣ်တဂ့ၤ.
7 သးဘၣ်အၢပှၤအဒိၣ်တဖၣ်တဂ့ၤ. အဝဲသ့ၣ်မ့ၢ်သုဘူးသုတံၢ်တဖၣ် န့ၣ်လီၤ. ဒီးသးဘၣ်အၢပှၤအဲၤကူပတူးဖိတဖၣ်န့ၣ်တဂ့ၤ, တဘျီန့ၣ်သုအိၣ်ဆိးတ့ၢ်လၢအဝဲသ့ၣ်အကီၢ်ပူၤန့ၣ်လီၤ.
8 စးထီၣ်လၢအဝဲသ့ၣ်အစၢၤအသွဲၣ်တဖၣ်သၢစိၤတစိၤဒီးဆူညါန့ၣ် တၢ်ကဘၣ်ဂံၢ်ဃုာ်အီၤလၢယွၤအပှၤဂီၢ်မုၢ်အကျါန့ၣ်လီၤ.
9 ဖဲသုအိၣ်ဆိးလၢတၢ်သူၣ်ဒဲအလီၢ်, ဖဲတၢ်ဒုးတၢ်ယၤအဆၢကတီၢ် န့ၣ်, သုဘၣ်ဟးဆှဲးတၢ်တမံၤလၢ်လၢ်လၢကမၤတကဆှီ သုဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲအသိးန့ၣ်လီၤ.
10 ပှၤပိာ်ခွါတဂၤမ့ၢ်အိၣ်ဘၣ်ဖုးဒီးအတၢ်ယွၤလီၤဘၣ်ဃးဒီးပိာ် ခွါလၢမုၢ်နၤန့ၣ်ကဲထီၣ်ပှၤလၢအတကဆှီဘၣ်တဂၤအဃိကဘၣ်ဟးထီၣ် လၢပှၤသူၣ်ဒဲအလီၢ်အချၢန့ၣ်လီၤ.
11 ဖဲမုၢ်ဟါလီၤအကတီၢ်န့ၣ်အဝဲကဘၣ်သ့စီကွံာ်အသး, ဒီးဖဲမုၢ်လီၤနုာ်အကတီၢ်န့ၣ်အဝဲဟဲက့ၤနုာ်လီၤဆူတၢ်သူၣ်ဒဲ အလီၢ်သ့န့ၣ်လီၤ.
12 သုဘၣ်အိၣ်ဒီးတၢ်လီၢ်တတီၤလၢသူၣ်ဒဲအလီၢ်အချၢဒ်သိးသုကလဲၤ ဟးတၢ်အဃၢအဂီၢ်န့ၣ်လီၤ.
13 စိာ်ဃုာ်ဒီးနီၣ်က့တဘိဒ်တၢ်ပီးတၢ်လီအသိး, ဒ်သိးဖဲသုလဲၤတၢ်အဃၢဝံၤန့ၣ်သုခူၣ်တၢ်ပူၤကသ့ဝဲဒီးမၤ ဘၢအီၤကသ့အဂီၢ်တက့ၢ်.
14 မၤကဆှဲကဆှီသုသူၣ်ဒဲအလီၢ်ဒ်တၢ်ဘူၣ်တၢ်ဘါအိၣ်ဝဲအလုၢ်အလၢ်အသိး, မ့ၢ်လၢယွၤသုကစၢ်ယွၤအိၣ်လၢသုသူၣ်ဒဲအလီၢ်, ဒ်သိးကဒီဒၣ်အိၣ်ပှိၤသုဒီးဟ့ၣ်လီၤသုတၢ်မၤနၢၤလၢ သုဒုၣ်သုဒါအဖီခိၣ်အဃိန့ၣ်တက့ၢ်. မၤတၢ်လၢအတကြၢးတဘၣ်တဃံတလၤနီတမံၤလၢယွၤကဃၣ်ဒူၣ်ချၢကွံာ် အသးလၢသုအဂီၢ်န့ၣ်တဂ့ၤ.
15 ကုၢ်တဂၤမ့ၢ်ဃ့ၢ်ထူၣ်ဖျဲးကွံာ်လၢအကစၢ်အအိၣ်, ဒီးဟဲဆူသုအိၣ်လၢတၢ်ကဟုကယာ်အဂီၢ်န့ၣ်, သုတဘၣ်ဆှၢကဒါက့ၤအီၤဘၣ်.
16 အဝဲကအိၣ်ဆိးဖဲဝ့ၢ်တဖျၢၣ်ဖျၢၣ်လၢအကဃုထၢဝဲ, ဒီးသုတဘၣ်မၤအီၤအၢအၢသီသီဘၣ်.
17 ဒီးပှၤအံၣ်စရ့လးဖိအပိာ်ခွါမ့ၢ်ဂ့ၤ, အပိာ်မုၣ်မ့ၢ်ဂ့ၤ, တဘၣ်ကဲထီၣ်တၢ်လုၢ်လီၢ်အပှၤဃဲသဲမုၣ်နီတဂၤဘၣ်.
18 ကျိၣ်ဧိၤစ့ဧိၤလၢတၢ်မၤန့ၢ်အီၤလၢကျဲဒ်အံၤအသိးစ့ၢ်ကီး, တၢ်တဘၣ်ဟဲစိာ်အီၤဆူယွၤသုကစၢ်ယွၤအဟံၣ်လၢတၢ်ကမၤလၢပှဲၤတၢ် အၢၣ်လီၤတမံၤအဂီၢ်ဘၣ်. အဂ့ၢ်ဒ်အံၤ, ယွၤသးဟ့တၢ်လုၢ်လီၢ်အပှၤဃဲသဲမုၣ်တဖၣ်န့ၣ်လီၤ.
19 ဖဲသုဒုးလိၢ်လီၤကျိၣ်ဧိၤစ့ဧိၤမ့ၢ်ဂ့ၤ, တၢ်အီၣ်တၢ်အီမ့ၢ်ဂ့ၤ, တၢ်တမံၤလၢ်လၢ်မ့ၢ်ဂ့ၤဆူသုတံၤသကိးပှၤအံၣ်စရ့လးဖိကဒဲ ကဒဲအအိၣ်န့ၣ်, ဃ့က့ၤအီၤအအ့ၣ်ထီၣ်တဂ့ၤ.
20 သုဃ့တၢ်အအ့ၣ်ထီၣ်သ့ဖဲသုဒုးလိၢ်လီၤတၢ်တမံၤလၢ်လၢ်ဆူ ပှၤတခီဘီမုၢ်ဖိတဖၣ်အအိၣ်, ဘၣ်ဆၣ်ဆူသုတံၤသကိးပှၤအံၣ်စရ့ လးဖိကဒဲကဒဲအအိၣ်န့ၣ်သုဃ့အအ့ၣ်ထီၣ်တသ့ဘၣ်. စူၢ်တၢ်သိၣ်တၢ်ဘျၢအံၤ, ဒီးယွၤသုကစၢ်ယွၤကဆိၣ်ဂ့ၤတၢ်လၢသု မၤတမံၤလၢ်လၢ်လၢကီၢ်လၢသုကလဲၤမၤန့ၢ်အီၤအပူၤန့ၣ်လီၤ.
21 တုၤသုမၤတၢ်ဆိၣ်လီၤတမံၤဒီးယွၤသုကစၢ်ယွၤန့ၣ်, သုးဆၢသုးကတီၢ်လၢသုကမၤတၢ်လၢသုအၢၣ်လီၤအီၤန့ၣ်တဂ့ၤ. ယွၤကဟံးဃာ်သုဒ်သုတၢ်အၢၣ်လီၤအသိး, ဒီးသုမ့ၢ်တတိၢ်န့ၢ်ဖံးဃာ်အီၤဒီးကကဲထီၣ်တၢ်ဒဲးဘးလၢသု ဂီၢ်န့ၣ်လီၤ.
22 သုမ့ၢ်တမၤတၢ်ဆိၣ်တမံၤဒီးယွၤန့ၣ်, တမ့ၢ်ဘၣ်တၢ်ဒဲးဘးဘၣ်.
23 ဘၣ်ဆၣ်ဒီးသုမ့ၢ်မၤတၢ်ဆိၣ်တမံၤဒ်သုတၢ်သးအိၣ်ဒၣ်ဝဲအသိး န့ၣ်မၤလီၤတံၢ်လၢသုကတိၢ်န့ၢ်ဖံးဃာ်အီၤတက့ၢ်.
24 တုၤသုဟးလၢကျဲဖိတဘိလၢပှၤတဂၤဂၤအစပံးလီၢ်အပူၤန့ၣ်, သုအီၣ်စပံးသၣ်တဖၣ်ဒ်သုအဲၣ်ဒိးအီၣ်အသိးသ့ဝဲ, ဘၣ်ဆၣ်ဒီးသုတဘၣ်က့ၤစိာ်အီၤနီတမံၤလၢသုတၢ်ပူၤတၢ်တ့ၤ အပူၤဘၣ်.
25 တုၤသုလဲၤတၢ်လၢပှၤတဂၤဂၤအစံာ်ပျီပူၤဒီး, သုအီၣ်ဘုစဲၤတဖၣ်လၢသုဒဲးအီၤလၢသုစုခဲလၢာ်သ့ဝဲ, ဘၣ်ဆၣ်ဒီးသုတဘၣ်ကူးဘုစဲၤနီတစဲၤလၢထးဂဲာ်ဘၣ်.