21
1 ပစံးဒၣ်ကလိာ်, ပှၤတဂၤကဘၣ်တၢ်ထံၣ်န့ၢ်အီၤလၢဘၣ်တၢ်မၤသံအီၤ လၢကီၢ်လၢယွၤ, သုကစၢ်ယွၤဟ့ၣ်လီၤသုအစံာ်ပျီ တဘ့ၣ်အပူၤဒီးသုတသ့ၣ်ညါမတၤမၤသံကွံာ်အီၤလဲၣ်န့ၣ်ဘၣ်လီၤ.
2 သုပှၤခိၣ်ပှၤနၢ်တဖၣ်ဒီးပှၤစံၣ်ညီၣ်ကွီၢ်တဖၣ်ကဘၣ်ဟးထီၣ်ဒီး ထိၣ်တဲာ်တၢ်ဒ့ၣ်စၢၤအယံၤလၢတၢ်လီၢ်ဖဲတၢ်စိၣ်ဘၣ်တၢ်ထံၣ်အီၤ တုၤဆူဝ့ၢ်အိၣ်ဘူးတဖၣ်, တဖျၢၣ်စုာ်စုာ်န့ၣ်လီၤ.
3 ဝံၤဒီး, ဝ့ၢ်လၢအအိၣ်ဘူးကတၢၢ်ဒီးတၢ်လီၢ်ဖဲတၢ်စိၣ်ဘၣ်တၢ်ထံၣ်န့ၢ်အီၤ, အပှၤခိၣ်ပှၤနၢ်တဖၣ်, ကဘၣ်ဃုထၢဂီၤဖံးမိၢ်သးစၢ်တဒုလၢတၢ် တသူဒံးအီၤလၢတၢ်မၤအဂီၢ်နီတစုန့ၣ်လီၤ.
4 အဝဲသ့ၣ်ကဘၣ်လဲၤမိၤဂီၤဖံးမိၢ်န့ၣ်ဆူတၢ်လီၢ်တတီၤဘူးဒီး ထံဖိကျိလၢတဃ့ထီကွံာ်နီတစု, ဒီးဖဲန့ၣ်တၢ်ကဘၣ်ဒီၣ်တဲာ်ကွံာ်အကိာ်န့ၣ်လီၤ.
5 ပှၤလ့ၤဝံဖိပှၤလုၢ်တၢ်ခိၣ်တဖၣ်ကဘၣ်လဲၤစ့ၢ်ကီးဖဲန့ၣ်, မ့ၢ်လၢအဝဲသ့ၣ်ကဘၣ်စံၣ်ညီၣ်နီၤဖးကယဲၢ်ကွီၢ်ဘၣ်ဃးဒီးတၢ်သိၣ် တၢ်သီကိးထံၣ်ဒဲးလၢအပၣ်ဃုာ်ဒီးတၢ်မၤဆူၣ်မၤစိးအဃိန့ၣ် လီၤ. ယွၤ, သုကစၢ်ယွၤဃုထၢတ့ၢ်အဝဲသ့ၣ်ဒ်သိးကမၤအတၢ်ဒီးကတဲဖျါထီၣ်တၢ်ဆိၣ်ဂ့ၤတဖၣ်လၢအဝဲအမံၤအပူၤန့ၣ်လီၤ.
6 ဝံၤဒီး, ကယဲၢ်ပှၤခိၣ်ပှၤနၢ်ခဲလၢာ်လၢဝ့ၢ်အိၣ်ဘူးကတၢၢ်ဒီးတၢ် လီၢ်ဖဲပှၤလၢတၢ်မၤသံအီၤအစိၣ်ဘၣ်တၢ်ထံၣ်န့ၢ်အီၤ, ကဘၣ်သ့ကွံာ်အစုတဖၣ်လၢဂီၤဖံးမိၢ်အလိၤ,
7 ဒီးစံး, ပတမၤသံဘၣ်ပှၤတဂၤန့ၣ်ဘၣ်, ဒီးမတၤမၤသံအီၤလဲၣ်န့ၣ်, ပတသ့ၣ်ညါဘၣ်.
8 ယွၤဧၢ, ပျၢ်ကွံာ်နပှၤဂီၢ်မုၢ်အံၣ်စရ့လး, ပှၤလၢနမၤပူၤဖျဲး တ့ၢ်အီၤလၢကီၢ်အဲၤကူပတူးန့ၣ်အတၢ်ကမၣ်တက့ၢ်. ပျၢ်ကွံာ်ပတၢ်ကမၣ်ဒီးတဘၣ်ပာ်ပှၤဒ်ပှၤအိၣ်မူအိၣ်ဒါလၢပှၤလၢ အတၢ်ကမၣ်တအိၣ်တဂၤဘၣ်တၢ်မၤသံအီၤအဃိန့ၣ်တဂ့ၤ.
9 ဒီးလၢသုမၤတၢ်လၢယွၤအဲၣ်ဒိးဝဲအဃိဒီး, သုတဘၣ်တၢ်ပာ်သုဒ်ပှၤအိၣ်မူအိၣ်ဒါလၢတၢ်မၤသံအဃိဘၣ်လီၤ.
10 ဖဲယွၤ, သုကစၢ်ယွၤဟ့ၣ်သုတၢ်မၤနၢၤလၢတၢ်ဒုးအပူၤဒီးသုဖီၣ်န့ၢ်ပှၤဘၣ်စၢဃာ်တဖၣ်န့ၣ်,
11 သုကထံၣ်ဘၣ်ပိာ်မုၣ်ဃံလၤတဂၤလၢအဝဲသ့ၣ်အကျါဒီးသုကအဲၣ်ဒိး, ဒိးတ့ဒိးဖျီသုသးဒီးအီၤလီၤ.
12 က့ၤကိးအီၤဆူသုဟံၣ်, တၢ်လီၢ်ဖဲအဝဲကလူၤကွံာ်အခိၣ်, တံာ်ကွံာ်အစုမ့ၣ်တဖၣ်,
13 ဒီးလဲလိာ်အကူအသိးတဖၣ်န့ၣ်တက့ၢ်. အဝဲကဘၣ်အိၣ်လၢသုဟံၣ် ပူၤဒီးဟီၣ်တၢ်ယၢၤတၢ်လၢအမိၢ်အပၢ်တဖၣ်အဃိ လၢတလါအတီၢ်ပူၤလီၤ. တၢ်န့ၣ်ဝံၤအလီၢ်ခံ, သုဒိးတ့ဒိးဖျီသုသးဒီးအီၤသ့ဝဲလီၤ.
14 လၢခံ, သုမ့ၢ်တအဲၣ်ဒိးလၢၤအီၤဘၣ်န့ၣ်, သုကဘၣ်ပျဲ အဝဲဟးထီၣ်သဘျ့ကွံာ်န့ၣ်လီၤ. မ့ၢ်လၢသုမၤဆူၣ်အီၤလၢကမံဃုာ်ဒီးသုဝံၤလံအဃိ, သုပာ်အီၤဒ်ကုၢ်တဂၤအသိးဒီးဆါကွံာ်အီၤတသ့လၢၤဘၣ်.
15 ပစံးဒၣ်ကလိာ်, ပှၤတဂၤအိၣ်ဒီးအမါခံဂၤဒီးအဝဲသ့ၣ်ခံဂၤ လိာ်ကဆံးစၢ်န့ၢ်အီၤလၢဖိခွါတဖၣ်, ဘၣ်ဆၣ်ဖိခွါဝဲၢ်ကိတမ့ၢ်ဘၣ်အဝဲအမါလၢအအဲၣ်ဝဲဒိၣ်တဂၤအဖိ ဘၣ်န့ၣ်လီၤ.
16 တုၤပှၤတဂၤန့ၣ်စံၣ်ညီၣ်နီၤဖးတၢ်လၢကနီၤဟ့ၣ်အဖိတဖၣ်လၢအဝဲ အတၢ်စုလီၢ်ခီၣ်ခိၣ်ဒ်လဲၣ်ဒီး, အဝဲတဘၣ်ပာ်ဖျါအတၢ်ကွၢ်မဲာ်အဝဲအမါလၢအအဲၣ်ဝဲဒိၣ်တဂၤအဖိခွါခီဖျိဟ့ၣ်အီၤတၢ်ဟ့ၣ်နီၤလၢအဘၣ်ဃးဒီးဖိခွါဝဲၢ်ကိ န့ၣ်ဘၣ်.
17 အဝဲကဘၣ်ဟ့ၣ်အတၢ်စုလီၢ်ခီၣ်ခိၣ်အတၢ်ဟ့ၣ်နီၤခံစးဆူဖိခွါဝဲၢ်ကိ, ဖဲအဝဲတမ့ၢ်ဘၣ်အဝဲအမါလၢအအဲၣ်ဒိၣ်ဝဲအဖိခွါဒၣ်လဲာ်န့ၣ်လီၤ. ပှၤတဂၤန့ၣ်ကဘၣ်သ့ၣ်ညါနီၣ်အဖိခွါဝဲၢ်ကိဒီးဟ့ၣ်အီၤတၢ်ဟ့ၣ် နီၤလၢအဝဲကြၢးဒိးန့ၢ်ဝဲအလီၢ်အိၣ်ဒ်တၢ်သိၣ်တၢ်သီအိၣ်ဝဲအသိးန့ၣ်လီၤ.
18 ပစံးဒၣ်ကလိာ်, ပှၤတဂၤအိၣ်ဒီးဖိခွါတဂၤလၢအခိၣ်ကိၤဒီးပူထီၣ်ထီထီၣ်တၢ်, မိၢ်ပၢ်တဖၣ်စံၣ်ညီၣ်အီၤဒၣ်လဲာ်, မ့ၢ်ဖိခွါတဂၤလၢတစူၢ်အမိၢ်အပၢ်တဖၣ်ဘၣ်န့ၣ်လီၤ.
19 အဝဲအမိၢ်အပၢ်တဖၣ်ကဘၣ်လဲၤကိးအီၤဆူဝ့ၢ်ဖဲအဝဲအိၣ်ဝဲ ဆိးဝဲအခိၣ်အနၢ်တဖၣ်အမဲာ်ညါဒီးမၢအဆၢထၢၣ်လၢကကွၢ်ဆၢၣ်မဲာ် ကွီၢ်အဂီၢ်န့ၣ်လီၤ.
20 မိၢ်ပၢ်တဖၣ်ကဘၣ်စံးဘၣ်ဝ့ၢ်အခိၣ်အနၢ်တဖၣ်ဒ်အံၤ, ပဖိခွါအံၤအခိၣ်ကိၤဒီးပူထီၣ်လီထီၣ်တၢ်ဒီးဂ့ၢ်လိာ်လၢ ကစူၢ်ပှၤအဂီၢ်လီၤ. အဝဲမၤလၢာ်ဂီၤကျိၣ်စ့ဒီးမ့ၢ်ပှၤအီမူၤသံးတဂၤလီၤ.
21 ဝံၤဒီးဝ့ၢ်အပှၤကညီတဖၣ်ကဘၣ်ကွံာ်သံအီၤလၢလၢၢ်, ဒီးသုကပူၤဖျဲးလၢတၢ်အၢတၢ်သီအံၤန့ၣ်လီၤ. ပှၤကိးဂၤဒဲးလၢကီၢ်အံၣ်စရ့လးအပူၤကနၢ်ဟူဘၣ်တၢ်မၤတ့ၢ်အသး ဒီးပျံၤတၢ်န့ၣ်လီၤ.
22 ပှၤတဂၤမ့ၢ်ဘၣ်တၢ်မၤသံအီၤလၢတၢ်ကမၣ်တမံၤအဃိဒီးအဝဲ အစိၣ်ဘၣ်တၢ်ဘျးထီၣ်အီၤလၢထူၣ်တထူၣ်အလိၤန့ၣ်,
23 တၢ်စိၣ်န့ၣ်တဘၣ်အိၣ်တ့ၢ်ဖဲန့ၣ်ဒီတနၤညါဘၣ်. တၢ်ကဘၣ်ခူၣ်လီၤကွံာ်အီၤတနံၤဃီမ့ၢ်လၢ, ပှၤသံအစိၣ်တစိၣ်ဘျး လီၤအသးလၢထူၣ်တထူၣ်အလိၤန့ၣ်ဒုးလီၤဘၣ်ကစၢ်ယွၤအတၢ်ဆိၣ်အၢ လၢထံကီၢ်အလိၤအဃိန့ၣ်လီၤ. ခူၣ်လီၤကွံာ်တၢ်စိၣ်ဒ်သိးသုတမၤဘၣ်အၢဘၣ်သီကီၢ်လၢယွၤ, သုကစၢ်ယွၤကဟ့ၣ်သုတဂ့ၤ, အဂီၢ်န့ၣ်တက့ၢ်.