14
1 သုမ့ၢ်ယွၤသုကစၢ်ယွၤအပှၤဂီၢ်မုၢ်န့ၣ်လီၤ. လၢတၢ်န့ၣ်အဃိဖဲသုသူၣ်အုးသးအုးလၢတၢ်သံအဃိန့ၣ်, ဂဲာ်လီၤသုသးမ့ၢ်ဂ့ၤမၤလ့ၤသုခိၣ်တိသၣ်မ့ၢ်ဂ့ၤဒ်ပှၤဂီၢ် မုၢ်အဂၤမၤဝဲအသိးန့ၣ်တဂ့ၤ.
2 သုဘၣ်ဃးဒီးယွၤသုကစၢ်ယွၤန့ၣ်လီၤ. အဝဲဃုထၢတ့ၢ်သုလၢသု ကမ့ၢ်အဝဲအပှၤဂီၢ်မုၢ်ဒၣ်ဝဲလၢကယဲၢ်ပှၤဂီၢ်မုၢ်တဖၣ်လၢအအိၣ်လၢ ဟီၣ်ခိၣ်အံၤအကျါန့ၣ်လီၤ.
(ဘူၣ်ဘါ.၁၁:၁-၄၇)
3 တၢ်လၢယွၤဘိးဘၣ်သ့ၣ်ညါတ့ၢ်ဝဲလၢတကဆှီတမံၤလၢ်လၢ်န့ၣ်အီၣ် အီၤတဂ့ၤ.
4 သုကအီၣ်ဘၣ်ဆၣ်ဖိကီၢ်ဖိတဖၣ်လၢအမ့ၢ်ဝဲ, ဂီၤဘုၣ်ဂီၤဖံး, သိ, မဲာ်တဲးလဲးတဖၣ်,
5 တၤယုၢ်, တၤဟိစဘံ, တၤယုၢ်ဃးဃမိၢ်, မဲာ်တဲးလဲးအမံၤ, တၤဖးဒံၡိၣ်, တၤဖးသအိမံၤ, ဒီးတၤဖးစမ့ၢ်တဖၣ်,
6 ကယဲၢ်ဆၣ်ဖိကီၢ်ဖိတဖၣ်လၢအခီၣ်မ့ၣ်သ့ၣ်ဖးခံခီ, ဒီးဂံာ်ဘျဲးအဆၣ်လၢအကလိာ်ထီၣ်ဝဲန့ၣ်လီၤ.
7 ဘၣ်ဆၣ်ဒီးသုတဘၣ်အီၣ်ဆၣ်ဖိကီၢ်ဖိတဖၣ်လၢအခီၣ်တသ့ၣ်ဖးဒီး တဂံာ်ဘျဲးဘၣ်အဆၣ်လၢအကလိာ်ထီၣ်ဝဲန့ၣ်နီတဒုဘၣ်. သုတဘၣ်အီၣ်ကီၤလၤအူးတဖၣ်, ပဒဲတဖၣ်, ယုၢ်ၡၤဖးတဖၣ်န့ၣ်ဘၣ်. တၢ်ကဘၣ်ပာ်အဝဲသ့ၣ်ဒ်တၢ်တကဆှီဘၣ်အသိးန့ၣ်လီၤ. အဝဲသ့ၣ်ဂံာ်ဘျဲးအဆၣ်လၢအကလိာ်ထီၣ်ဝဲ, ဘၣ်ဆၣ်အခီၣ်မ့ၣ်တဖၣ်တသ့ၣ်ဖးဘၣ်.
8 အီၣ်ထိးတဖၣ်တဂ့ၤ. တၢ်ကဘၣ်ပာ်အီၤဒ်တၢ်တကဆှီဘၣ်အသိးန့ၣ် လီၤ. အဝဲသ့ၣ်အခီၣ်မ့ၣ်တဖၣ်သ့ၣ်ဖးဘၣ်ဆၣ်တဂံာ်အဆၣ်လၢအကလိာ်ထီၣ်ဝဲ န့ၣ်ဘၣ်. ဆၣ်ဖိကီၢ်ဖိတဖၣ်အံၤအီၣ်အီၤနီတဒုမ့ၢ်ဂ့ၤထိးဘၣ်အစိၣ်တဖၣ် မ့ၢ်ဂ့ၤဒၣ်လဲာ်န့ၣ်တဂ့ၤ.
9 ကယဲၢ်မ့ၢ်ညၣ်လၢအအိၣ်ဒီးအရုအဒံးတဖၣ်, ဒီးအသဒံၣ်တဖၣ်န့ၣ်သု ကအီၣ်ဘၣ်အီၤ,
10 ဘၣ်ဆၣ်ဒီးကယဲၢ်မ့ၢ်တၢ်လၢအအိၣ်လၢထံကျါလၢအတအိၣ်ဒီးအရု အဒံးတဖၣ်, ဒီးအသဒံၣ်တဖၣ်န့ၣ်သုတအီၣ်ဘၣ်အီၤဘၣ်. တၢ်န့ၣ်ကဘၣ်တၢ်ပာ်အီၤဒ်တၢ်တကဆှီအသိးန့ၣ်လီၤ.
11 ကယဲၢ်ထိၣ်လၢအကဆှီတဖၣ်န့ၣ်သုကအီၣ်ဘၣ်အီၤလီၤ.
12 မ့မ့ၢ်တၢ်လၢသုတဘၣ်အီၣ်တဖၣ်န့ၣ်မ့ၢ်အအံၤ, လံာ်ကြီကြာ်, ဒီးလီတာ်ခၣ်ဆူၣ်, ဒီးလံာ်ထိးထံ,
13 ဒီးလံာ်ဃး, ဒီးလီတာ်ဒ်အကလုာ်အသိး,
14 ဒီးကယဲၢ်စိးဝၣ်ဃးဒ်အကလုာ်အသိး,
15 ဒီးထိၣ်ကီၤလၤအူး, ဒီးထိၣ်သဘၣ်, ဒီးထိၣ်ၡဃးဒီးလံာ်ပီၢ် တ့ဒ်အကလုာ်အသိး,
16-17 ဒိကအိ, ဒီးထိၣ်ဂီၤဖံး, ဒီးထိၣ်လဲၤလုးတကုာ်, ဒီးထိၣ်စီၢ်မီ, ဒီးလီတာ်ဝါ, ဒီးထိၣ်ကံၣ်ပီၣ်လဲၣ်,
18 ဒီးထိၣ်ဃၤစံး, ဒီးဝါလၢၢ်ထံဒ်အကလုာ်အသိး, ဒီးဘီစံၣ်ဃီၣ်, ဒီးဘျါဧိၤတြၤဧိၤန့ၣ်လီၤ.
19 ကယဲၢ်တၢ်ဖိဃၢ်လၢအအိၣ်ဒီးအဒံးတဖၣ်န့ၣ်တကဆှီဝဲအဃိ, အီၣ်အီၤတဂ့ၤ.
20 ကယဲၢ်တၢ်ဖိဃၢ်လၢအကဆှီဝဲတဖၣ်န့ၣ်သုကအီၣ်ဘၣ်အီၤလီၤ.
21 ဆၣ်ဖိကီၢ်ဖိတဒုလၢ်လၢ်လၢအသံဒၣ်အတၢ်န့ၣ်အီၣ်အီၤတဂ့ၤ. သုတဘၣ်ပျဲအီၣ်ပှၤတခီဘီမုၢ်ဖိလၢအအိၣ်ဆိးလၢသုကျါမ့ၢ် ဂ့ၤ, သုကဘၣ်ဆါအီၤဆူပှၤတခီဘီမုၢ်ဖိအဂၤမ့ၢ်ဂ့ၤန့ၣ်လီၤ. မ့မ့ၢ်သုဘၣ်ဃးဒီးသုကစၢ်ယွၤဒီးသုမ့ၢ်အပှၤဂီၢ်မုၢ်န့ၣ် လီၤ. ချီသိဖိတဒုမ့ၢ်ဂ့ၤ, မဲာ်တဲးလဲးဖိတဒုမ့ၢ်ဂ့ၤလၢအမိၢ် အနုၢ်ထံအပူၤတဂ့ၤ.
22 ပာ်လီၤဆီတၢ်ဆံဆဲၣ်ပူတပူလၢကယဲၢ်တၢ်လၢသုစံာ်ဧိၤပှဲၤဧိၤ ဟ့ၣ်ထီၣ်ဝဲကိးနံၣ်ဒဲးအပူၤတက့ၢ်.
23 အန့ၣ်ဝံၤဒီးလဲၤဆူတၢ်လီၢ်တတီၤဖဲယွၤသုကစၢ်ယွၤဃုထၢအီၤ လၢတၢ်ကဘူၣ်ထီၣ်ဘါထီၣ်အီၤအဂီၢ်ဒီးဖဲန့ၣ်လၢယွၤအမဲာ်ညါန့ၣ် အီၣ်သုတၢ်ဆံဆဲၣ်ပူတပူဘၣ်ဃးဒီးဘုဧိၤဟုဧိၤသုစပံးထံ ဒီးသုသ့ၣ်စၤယံးအသိ, သုဂီၤဘုၣ်ဂီၤဖံးဒီးသုသိအဝဲၢ်ကိန့ၣ်တက့ၢ်. မၤတၢ်အံၤဒ်သိးဒီးသုကမၤလိန့ၢ်တၢ်အိၣ်ဒီး တၢ်ယူးယီၣ်ပာ်ကဲယွၤသုကစၢ်ယွၤထီဘိတထံၣ်ဃီန့ၣ်တက့ၢ်.
24 တၢ်ဘူၣ်ထီၣ်ဘါထီၣ်အလီၢ်မ့ၢ်ယံၤကဲာ်ဆိးဒီးသုဟံၣ်လၢသု ကဟဲစိာ်သုတၢ်ဟးထီၣ်ဆံဆဲၣ်ပူတပူလၢယွၤဆိၣ်ဂ့ၤသုအဂီၢ် န့ၣ်ဒီးမၤတၢ်ဒ်အံၤတက့ၢ်.
25 ဆါလီၤကွံာ်သုတၢ်ဟးထီၣ်ဒီးလဲၤစိာ်စ့ဃုာ်ဒီးသုဆူတၢ်ဘူၣ် ထီၣ်ဘါထီၣ်အလီၢ်တတီၤန့ၣ်တက့ၢ်.
26 ဒီးသူစ့န့ၣ်လၢတၢ်လၢသုအဲၣ်ဒိးအီၤတမံၤလၢ်လၢ်လၢအမ့ၢ်ဂီၤ ဖံးမ့ၢ်ဂ့ၤ, သိမ့ၢ်ဂ့ၤ, စပံးထံမ့ၢ်ဂ့ၤ, သံးမ့ၢ်ဂ့ၤအဂီၢ်, ဒီးဖဲန့ၣ်လၢယွၤသုကစၢ်ယွၤအမဲာ်ညါန့ၣ်, သုဝဲဒီးသုပှၤဟံၣ်ဖိဃီဖိတဖၣ်ကဘၣ်အီၣ်တၢ်ဒီးမၤသူၣ်ဖှံ သးညီသုသးန့ၣ်လီၤ.
27 ပှၤလ့ၤဝံဖိတဖၣ်လၢအအိၣ်ဆိးလၢသုဝ့ၢ်တဖၣ်အပူၤန့ၣ်, လဲၤကပာ်အီၤတဂ့ၤ. အဝဲသ့ၣ်တအိၣ်ဘၣ်ဒီးအတၢ်စုလီၢ်ခီၣ်ခိၣ် ဒၣ်ဝဲဘၣ်.
28 လၢသၢနံၣ်တနံၣ်အကတၢၢ်ကိးနံၣ်ဒဲးန့ၣ်, ဟဲစိာ်သုတၤသူတၤသၣ်အတၢ်ဆံဆဲၣ်ပူတပူခဲလၢာ်ဒီးပာ်ဖှိၣ်အီၤလၢသုဝ့ၢ်တဖၣ် အပူၤန့ၣ်တက့ၢ်.
29 တၢ်အီၣ်အံၤမ့ၢ်လၢပှၤလ့ၤဝံဖိတဖၣ်အဂီၢ်မ့ၢ်လၢအဝဲသ့ၣ်တအိၣ် ဒီးအတၢ်ဖိတၢ်လံၤဒၣ်ဝဲဘၣ်, ဒီးမ့ၢ်လၢပှၤတခီဘီမုၢ်ဖိတဖၣ်ပှၤဖိၣ်ဃဲတဖၣ်ဒီးပှၤမုၣ်ကမဲ တဖၣ်လၢအအိၣ်ဆိးလၢသုဝ့ၢ်တဖၣ်အပူၤအဂီၢ်န့ၣ်လီၤ. အဝဲသ့ၣ်ကဘၣ်ဟဲဒီးဟံးန့ၢ်ကယဲၢ်တၢ်လၢအလိၣ်ဘၣ်ဝဲန့ၣ်လီၤ. မၤတၢ်အံၤ, ဒီးယွၤသုကစၢ်ယွၤကဆိၣ်ဂ့ၤသုလၢကယဲၢ်တၢ်လၢသု မၤအီၤတမံၤလၢ်လၢ်အပူၤန့ၣ်လီၤ.