လံာ်သိၣ်လီၤသီလီၤတၢ်
DEUTERONOMY
လံာ်သိၣ်လီၤသီလီၤတၢ်အံၤဘၣ်တၢ်ပာ်ဖှိၣ်ထီၣ်အီၤဒ်စီၤမိၤၡ့ အတၢ်ကတိၤလီၤတၢ်တဖၣ်လၢအပိာ်ထွဲလိာ်အခံတမံၤဘၣ်တမံၤ ဆူကီၢ်အံၣ်စရ့လးအပှၤဂီၢ်မုၢ်လၢပှၤမိၤအးဖိအကီၢ်ပူၤန့ၣ်လီၤ. ဖဲန့ၣ်အဝဲသ့ၣ်အိၣ်ဆိကတီၢ်လၢအပှၢ်မုၢ်ကနၢအတၢ်လဲၤဖးထီ အကတၢၢ်ဒီးဘူးထီၣ်လၢအကနုာ်လီၤဒီးမၤန့ၢ်ကီၢ်ကနၤဧၣ်လံန့ၣ်လီၤ. တၢ်ဂ့ၢ်တၢ်ကျိၤအကါဒိၣ်တနီၤလၢအဘၣ်တၢ်ကွဲးနီၣ်အီၤလၢလံာ် အံၤအပူၤမ့ၢ်ဝဲဒ်လၢလာ်အသိးန့ၣ်လီၤ.
၁. စီၤမိၤၡ့တဲကဒါက့ၤတၢ်မၤတ့ၢ်အသးအဂ့ၢ်ဖးဒိၣ်တဖၣ်လၢ အပူၤကွံာ်အနံၣ်လွံၢ်ဆံအတီၢ်ပူၤန့ၣ်လီၤ. အဝဲထုးန့ၢ်က့ၤပှၤဂီၢ်မုၢ်အသးလၢကသ့ၣ်နီၣ်ထီၣ် ကစၢ်ယွၤဆှၢတ့ၢ်အဝဲသ့ၣ်ခီဖျိကွံာ်ပှၢ်မုၢ်ကနၢဒ်လဲၣ်ဒ်လဲၣ်ဒီးကဘၣ်စူၢ် ကစၢ်ယွၤအကလုၢ်ဒီးသူၣ်တီသးရၤဒီးအီၤအဂ့ၢ်န့ၣ်လီၤ.
၂. စီၤမိၤၡ့ကွၢ်ကဒါက့ၤတၢ်မၤလိာ်အထံၣ်တဆံဒီးတဲဖျါလီၤ ဆီတၢ်အကါဒိၣ်ဘၣ်ဃးဒီးတၢ်မၤလိာ်အခီၣ်ထံးကတၢၢ်တတီၤ, ဒီးသဆၣ်ထီၣ်ပှၤဂီၢ်မုၢ်အခံလၢကပာ်ဒိၣ်ထဲယွၤတဂၤဧိၤန့ၣ်လီၤ. အန့ၣ်ဝံၤဒီးအဝဲကွၢ်ကဒါက့ၤတၢ်ဘူၣ်တၢ်ဘါအတၢ်သိၣ်တၢ်သီ အကလုာ်ကလုာ်လၢကပၢကီၢ်အံၣ်စရ့လးအတၢ်အိၣ်မူလၢကီၢ်တၢ်စံးပာ်အပူၤန့ၣ်လီၤ.
၃. စီၤမိၤၡ့ဒုးသ့ၣ်နီၣ်ထီၣ်ပှၤဂီၢ်မုၢ်လၢ ကစၢ်ယွၤအတၢ်အၢၣ်လီၤအီလီၤဒီးအဝဲသ့ၣ်အခီပညီ, ဒီးကိးထီၣ်အဝဲသ့ၣ်လၢကမၤသီထီၣ်က့ၤအတၢ်ဟ့ၣ်လီၤအးလီၤအသး ဆူမူဒါလၢကဘၣ်မၤပှဲၤဝဲလၢတၢ်သိၣ်တၢ်သီန့ၣ်အဂီၢ်လီၤ.
၄. စီၤယိၤၡူဘၣ်တၢ်ဟ့ၣ်စိဟ့ၣ်ကမီၤအီၤဒ်ခိၣ်နၢ်လၢခံတဂၤ အသိးလၢကစၢ်ယွၤအပှၤဂီၢ်မုၢ်အဂီၢ်န့ၣ်လီၤ. ဖဲအသးဝံၣ်ထီၣ်ထါတယုၢ်လၢအမၤလၤကပီၤကစၢ်ယွၤအ တၢ်သူၣ်တီသးရၤ, ဒီးတဲဖျါထီၣ်တၢ်ဆိၣ်ဂ့ၤဆိၣ်ဝါတမံၤလၢ အံၣ်စရ့လးအဒူၣ်တဖၣ်အဂီၢ်ဝံၤအလီၢ်ခံန့ၣ်, စီၤမိၤၡ့သံဝဲလၢကီၢ်မိၤအးအပူၤ, လၢထံကျိယၢ်ဒ့ၣ်အမုၢ်ထီၣ်တကပၤန့ၣ်လီၤ.
လံာ်အံၤအတၢ်ဂ့ၢ်မိၢ်ပှၢ်ဖးဒိၣ်မ့ၢ်ဝဲကစၢ်ယွၤအုၣ်က့ၤခီၣ်က့ၤ တၢ်ဒီးဆိၣ်ဂ့ၤတ့ၢ်အဝဲအဃုထၢဖိအပှၤဂီၢ်မုၢ်လၢအအဲၣ်ဝဲ ဒၣ်န့ၣ်လီၤ. အဝဲအပှၤဂီၢ်မုၢ်ကဘၣ်သ့ၣ်နီၣ်ထီၣ်က့ၤတၢ်အံၤ, ဒီးအဲၣ်အီၤဒီးစူၢ်အီၤ, ဒ်သိးအဝဲသ့ၣ်ကဒိးန့ၢ်ဘၣ်တၢ်မူဒီး တၢ်ဆိၣ်ဂ့ၤတဘိယူၢ်ဃီအဂီၢ်န့ၣ်လီၤ.
လံာ်စီဆှံအဆၢဖိတဖၣ်လၢအမ့ၢ်လံာ်အံၤအနီၣ်ဝံာ်ခံန့ၣ်မ့ၢ်ဝဲ ၆:၄-၆, ဒီးအိၣ်ဃုာ်ဒီးတၢ်ကတိၤတဖၣ်လၢယ့ၣ်ၡူးကိးအီၤလၢတၢ် မၤလိာ်အဒိၣ်ကတၢၢ်လၢတၢ်မၤလိာ်တဖၣ်အကျါ, လၢအမ့ၢ်ဝဲ, “အဲၣ်ယွၤ, နကစၢ်ယွၤလၢနသးဒီဖျၢၣ်, ဃုာ်ဒီးနတၢ်ကူၣ်တၢ်ဆးဒီးနဂံၢ်နဘါခဲလၢာ်တက့ၢ်.” န့ၣ်လီၤ.
1
1 လၢလံာ်အံၤအပူၤအိၣ်ဒီးတၢ်ကတိၤတဖၣ်လၢစီၤမိၤၡ့ကတိၤတ့ၢ် ဝဲဆူကီၢ်အံၣ်စရ့လးအပှၤဂီၢ်မုၢ်, ဖဲအဝဲသ့ၣ်အိၣ်လၢပှၢ်မုၢ်ကနၢအပူၤလၢထံကျိယၢ်ဒ့ၣ်အမုၢ်ထီၣ် အခါန့ၣ်လီၤ. အဝဲသ့ၣ်အိၣ်လၢထံကျိယၢ်ဒ့ၣ်အတၢ်တြီၤပူၤဘူးဒီးဝ့ၢ်စူး, လၢအအိၣ်ဖဲလၢတၢ်ဘၢၣ်စၢၤဖဲတခီမ့ၢ်ဝ့ၢ်ပၤရၣ်ဒီးလၢအဂၤတခီ န့ၣ်အိၣ်ဒီးဝ့ၢ်တိဖလး, ဝ့ၢ်လၤဘၣ်, ဝ့ၢ်ဃစ့ရိးဒီးဝ့ၢ်ဒံစၤဟးတဖၣ်န့ၣ်လီၤ.
2 (တၢ်လဲၤကျဲလၢကစၢၢ်စံၤနါဆူကၤဒ့ၣ်ဘၢ်နံခီဖျိကီၢ်အဒိၣ် အတၢ်လူၢ်တၢ်တြီၤအကျဲန့ၣ်, ယံာ်ဝဲတဆံတသီန့ၣ်လီၤ.)
3 ဖဲအဝဲသ့ၣ်ဟးထီၣ်ကွံာ်လၢကီၢ်အဲၤကူပတူးဝံၤအလီၢ်ခံအနံၣ် လွံၢ်ဆံ, လါတဆံတလါထီၣ်အခီၣ်ထံးကတၢၢ်တသီန့ၣ်စီၤမိၤၡ့တဲဘၣ်ပှၤဂီၢ် မုၢ်လၢကယဲၢ်တၢ်ကိးမံၤဒဲးလၢယွၤမၤလိာ်တ့ၢ်အီၤဒ်သိးအကတဲ ဘၣ်အဝဲသ့ၣ်န့ၣ်လီၤ.
4 တၢ်အံၤမ့ၢ်ဖဲယွၤမၤနၢၤကွံာ်ပှၤဧၣ်မိၣ်ဖိတဖၣ်အစီၤပၤစံဃိၣ် လၢအပၢတၢ်လၢဝ့ၢ်ဃ့ၡဘိၣ်, ဒီးကီၢ်ဘၤၡၣ်အစီၤပၤစီၤဧိာ်လၢအပၢတၢ်လၢဝ့ၢ်ဧၤၡတြိးဒီး ဝ့ၢ်အ့ဒြၤတဖၣ်, အလီၢ်ခံန့ၣ်လီၤ.
5 စီၤမိၤၡ့စးထီၣ်တဲနၢ်ပၢၢ်ကစၢ်ယွၤအတၢ်ဘူၣ်တၢ်ဘါအတၢ်သိၣ်တၢ် သီတဖၣ်ဒီးတၢ်သိၣ်လိတဖၣ်, ဖဲတၢ်ဆၢကတီၢ်လၢပှၤဂီၢ်မုၢ်အိၣ်ဝဲလၢထံကျိယၢ်ဒ့ၣ်အမုၢ်ထီၣ် လၢကီၢ်မိၤအးအလီၢ်ကဝီၤပူၤအခါန့ၣ်လီၤ.
6 အဝဲစံးဝဲဒၣ်, “ဖဲပအိၣ်လၢကစၢၢ်စံၤနါန့ၣ်ယွၤ, ပကစၢ်ယွၤစံးဘၣ်ပှၤ, သုအိၣ်ဆိးတ့ၢ်ဖဲကစၢၢ်အံၤယံာ်တ့ၢ်လံ.
7 ဘိၣ်ထီၣ်စှၢၤထီၣ်သုတၢ်ဖိတၢ်လံၤဒီးလဲၤဆူညါတက့ၢ်. လဲၤဆူပှၤဧၣ်မိၣ်ဖိတဖၣ်အကီၢ်လၢအအိၣ်ဒီးတၢ်လူၢ်တၢ်တြီၤဒီး ဆူကယဲၢ်တၢ်လီၢ်အိၣ်ခိၣ်အိၣ်ဃၢၤတဖၣ်, လၢအမ့ၢ်ဆူထံကျိယၢ်ဒ့ၣ်အတြီၤပူၤ, ဆူတၢ်လူၢ်တၢ်တြီၤဒီး တၢ်ပၢၤခိၣ်တဖၣ်, ဆူလီၢ်ကဝီၤလၢကလံၤထံးတကပၤဒီးဆူပီၣ်လဲၣ်ဖးဒိၣ်မဲးဒံး ထၢၣ်ရ့နယၢၣ်အကၢၢ်နံၤန့ၣ်တက့ၢ်. လဲၤဆူကီၢ်ကနၤဧၣ်ဒီးဆူညါဆူကီၢ်လဘၤနိၣ်အကစၢၢ်ကလိ တဖၣ်ယံၤဝဲတုၤဆူထံကျိမိၢ်ပှၢ်ဖရၤသးန့ၣ်တက့ၢ်.
8 ကယဲၢ်တၢ်ခဲလၢာ်အံၤမ့ၢ်ကီၢ်လၢယၤ, ယွၤ, အၢၣ်လီၤတ့ၢ်လၢကဟ့ၣ် အီၤဆူသုမိၢ်ပၢ်ဖံဖုလၢပျၢၤတဖၣ်လၢအမ့ၢ်စီၤအၤဘြၤဟၣ်, စီၤအံၤစဲးဒီးစီၤယၤကိာ်ဒီးဆူအဝဲသ့ၣ်အစၢၤအသွဲၣ်တဖၣ် အအိၣ်န့ၣ်လီၤ. လဲၤဒီးမၤန့ၢ်အီၤတက့ၢ်.”
(ဟးထီၣ်.၁၈:၁၃-၂၇)
9 စီၤမိၤၡ့စံးဘၣ်ပှၤဂီၢ်မုၢ်, “ဖဲပအိၣ်ဒံးလၢကစၢၢ်စံၤနါ အခါန့ၣ်, ယစံးဘၣ်တ့ၢ်သု, မူဒါလၢတၢ်ပၢဆှၢသုအဂီၢ်န့ၣ်ဒိၣ်မးလၢ ယဂီၢ်လီၤ. ယမၤအီၤထဲတဂၤဧိၤတသ့ဘၣ်.
10 ယွၤ, သုကစၢ်ယွၤမၤအါထီၣ်သုနီၣ်ဂံၢ်ဒ်ဆၣ်ဧိၤဖီဧိၤတဖၣ်လၢ မူခိၣ်လိၤအသိးန့ၣ်လီၤ.
11 မ်ယွၤ, သုမိၢ်ပၢ်ဖံဖုလၢပျၢၤတဖၣ်အကစၢ်ယွၤမၤအါထီၣ်သု အစးတဖၣ်လၢအကထိတဖၣ်ဒီးဒုးဘီၣ်ထီၣ်ညီထီၣ်သုဒ်အအၢၣ်လီၤတ့ၢ် ဝဲအသိးန့ၣ်တက့ၢ်.
12 မ့မ့ၢ်ဒၣ်ထဲယၤတဂၤဧိၤန့ၣ်, ယစိာ်ထီၣ်မူဒါအဃၢလၢတၢ်မၤလိၤ မၤဘၣ်သုတၢ်ဂ့ၢ်လိာ်ဘှီလိာ်တဖၣ်အဂီၢ်ကသ့ဒ်လဲၣ်.
13 ဃုထၢထီၣ်ပှၤတနီၤ, လၢအကူၣ်သ့, အိၣ်ဒီးတၢ်သ့ၣ်ညါနၢ်ပၢၢ်ဒီး မ့ၢ်ပှၤလၢအတၢ်လဲၤခီဖျိအါဝဲလၢတဒူၣ်ဘၣ်တဒူၣ်စုာ်စုာ်အပူၤ, ဒီးယကဒုးကဲထီၣ်အဝဲသ့ၣ်လၢသုခိၣ်သုနၢ်န့ၣ်လီၤ.”
14 သုအၢၣ်လီၤထွဲလၢတၢ်အံၤမ့ၢ်တၢ်လၢပဂ့ၤမၤအီၤတမံၤလီၤ.
15 မၤသးဒ်န့ၣ်ဒီး, ယဟံးန့ၢ်ပှၤကူၣ်တၢ်သ့ဒီးခိၣ်နၢ်တဖၣ်လၢအတၢ် လဲၤခီဖျိအါဝဲလၢသုဃုထၢထီၣ်အီၤလၢသုဒူၣ်တဖၣ်အကျါ, ဒီးယပာ်ထီၣ်အဝဲသ့ၣ်ဒ်သုခိၣ်သုနၢ်အသိးန့ၣ်လီၤ. ပှၤတနီၤအမူအဒါအိၣ်ဝဲလၢပှၤတကထိအဖီခိၣ်, တနီၤလၢပှၤတကယၤအဖီခိၣ်, တနီၤလၢပှၤယဲၢ်ဆံအဖီခိၣ်, ဒီးတနီၤလၢပှၤတဆံအဖီခိၣ်အဂီၢ်န့ၣ်လီၤ. ယဃုထၢပာ်လီၤစ့ၢ် ကီးပှၤခိၣ်ပှၤနၢ်အဂၤတဖၣ်လၢပှၤအဒူၣ်တဖၣ်န့ၣ်လီၤ.
16 အကတီၢ်ဖဲန့ၣ်, ယသိၣ်လိနဲၣ်ယုၤအဝဲသ့ၣ်, လၢကဒိကနၣ်တၢ်ဂ့ၢ်လိာ် ဘှီလိာ်တဖၣ်လၢအဟဲထီၣ်လၢအပှၤဂီၢ်မုၢ်အကျါန့ၣ်လီၤ. ယမၢအစံၣ်ညီၣ်တီတၢ်ဂ့ၢ်လိာ်ဘှီလိာ်တီတီလိၤလိၤလၢအဘၣ်ဃး ဒီးအပှၤဂီၢ်မုၢ်ဒၣ်ဝဲမ့ၢ်ဂ့ၤ, ဘၣ်ဃးဃုာ်ဒီးပှၤတခီဘီမုၢ်ဖိတဖၣ်လၢအအိၣ်ဆိးလၢအကျါမ့ၢ် ဂ့ၤန့ၣ်လီၤ.
17 ယတဲအဝဲသ့ၣ်လၢ, အသုတကွၢ်မဲာ်တၢ်လၢအတၢ်စံၣ်ညီၣ်တဖၣ်အပူၤတ ဂ့ၤ. လၢတၢ်စံၣ်ညီၣ်အပူၤန့ၣ်ကဘၣ်ဒိကနၣ်ပှၤအဒိၣ်မ့ၢ်ဂ့ၤ, ပှၤအဆံးမ့ၢ်ဂ့ၤဒ်သိးသိးန့ၣ်လီၤ. တဘၣ်ပျံၤဘၣ်ပှၤနီတဂၤဘၣ်. အဂ့ၢ်ဒ်အံၤ, တၢ်စံၣ်ညီၣ်တဲာ်တဖၣ်လၢ အမၤဝဲန့ၣ်ဟဲလၢကစၢ်ယွၤအအိၣ်လီၤ. တၢ်ဂ့ၢ်တမံၤဂ့ၤတမံၤဂ့ၤမ့ၢ်ကီကဲာ်ဆိးလၢအဂီၢ်န့ၣ်, ကဘၣ်ဟဲစိာ်ဝဲဆူယအိၣ်လီၤ. ဒီးယကစံၣ်ညီၣ်တဲာ်အီၤန့ၣ်လီၤ.
18 တဘျီဃီန့ၣ်, ယဟ့ၣ်သုတၢ်သိၣ်လိနဲၣ်ယုၤတဖၣ်လၢတၢ်အဂၤကိးမံၤ ဒဲးလၢသုကဘၣ်မၤအီၤအဂီၢ်လီၤ.
(ဂံၢ်.၁၃:၁-၃၃)
19 ပမၤတၢ်လၢယွၤ, ပကစၢ်ယွၤမၤလိာ်တ့ၢ်ပှၤန့ၣ်လီၤ. ပဟးထီၣ်ကွံာ်လၢကစၢၢ်စံၤနါ, ဒီးလဲၤခီဖျိပှၢ်မုၢ်ကနၢဖး ဒိၣ်ဖးလဲၣ်ဒီးလီၤပျံၤလီၤဖုး, လၢပတၢ်လဲၤကျဲဆူပှၤဧၣ်မိၣ်ဖိတဖၣ်အကီၢ်လၢအပှဲၤဒီးတၢ်လူၢ်တၢ်တြီၤန့ၣ်လီၤ. ဖဲပလဲၤတုၤလၢဝ့ၢ်ကၤဒ့ၣ်ဘၢ်န့န့ၣ်,
20 ယတဲဘၣ်သု, ခဲအံၤသုဟဲတုၤဆူပှၤဧၣ်မိၣ်ဖိတဖၣ်အကီၢ်လၢအပှဲၤ ဒီးတၢ်လူၢ်တၢ်တြီၤလၢယွၤ, ပကစၢ်ယွၤ, ပမိၢ်ပၢ်ဖံဖုလၢပျၢၤတဖၣ်အကစၢ်ယွၤဟ့ၣ်လီၤပှၤန့ၣ်လံ.
21 ကွၢ်တကၢ်. ကီၢ်လၢယွၤပကစၢ်ယွၤဟ့ၣ်လီၤသုန့ၣ်, အိၣ်ဖဲန့ၣ်လီၤ. လဲၤဒီးမၤန့ၢ်အီၤဒ်အဝဲမၤလိာ်တ့ၢ်ဝဲအသိး န့ၣ်တက့ၢ်. မၤယံာ်မၤနီၢ်သုသးဒီးပျံၤတၢ်တဂ့ၤ.
22 ဘၣ်ဆၣ်ဒီးသုဟဲဆူယအိၣ်ဒီးစံး, မ်ပဆှၢလီၤပှၤတဖၣ်လၢပမဲာ် ညါလၢကလဲၤကွၢ်ဟုၣ်ကွၢ်စုကီၢ်န့ၣ်, ဒ်သိးအဝဲသ့ၣ်တဲဘၣ်ပှၤကသ့လၢကျဲအဂ့ၤကတၢၢ်လၢပဂ့ၤပိာ်အီၤ မ့ၢ်ကျဲမတၤလဲၣ်, ဒီးဖဲန့ၣ်ဝ့ၢ်ဒ်လဲၣ်တဖၣ်အိၣ်ဝဲလဲၣ်, န့ၣ်တက့ၢ်.
23 တၢ်န့ၣ်ယထံၣ်အီၤလီၤဂာ်ဒ်တၢ်အဂ့ၤတမံၤ, လၢပကြၢးမၤအီၤအဃိ ဒီးယဃုထၢထီၣ်ပှၤတဆံခံဂၤ, တဂၤစုာ်စုာ်လၢဒူၣ်တဒူၣ်စုာ်စုာ်အပူၤန့ၣ်လီၤ.
24 အဝဲသ့ၣ်လဲၤနုာ်လီၤဆူကီၢ်လၢအပှဲၤဒီးတၢ်လူၢ်တၢ်တြီၤအပူၤ ယံၤဝဲတုၤလၢအ့ၡကိၤလးအတၢ်တြီၤပူၤဒီးလဲၤကွၢ်ဟုၣ်ကွၢ်စုးကီၢ်န့ၣ်လီၤ.
25 အဝဲသ့ၣ်ဟဲက့ၤစိာ်န့ၢ်ပှၤသ့ၣ်သၣ်တနီၤလၢအထံၣ်ဘၣ်ဝဲဖဲန့ၣ်, ဒီးတဲဖျါထီၣ်ဝဲလၢကီၢ်လၢယွၤ, ပကစၢ်ယွၤဟ့ၣ်လီၤပှၤန့ၣ်, အဟီၣ်ခိၣ်ညၣ်ထ့ၣ်ဂ့ၤဝဲဒိၣ်မးလီၤ.
26 ဘၣ်ဆၣ်ဒီးသုပူထီၣ်တၢ်ထီဒါယွၤ, သုကစၢ်ယွၤအတၢ်မၤလိာ်, ဒီးသုတသးအိၣ်လဲၤနုာ်ဘၣ်ဆူကီၢ်န့ၣ်အပူၤဘၣ်.
27 သုကဒူးကဒ့ၣ်လိာ်သုသးတဂၤဒီးတဂၤဒီးစံးလၢယွၤသးဟ့ပှၤ လီၤ. အဝဲထုးထီၣ်ကွံာ်ပှၤလၢကီၢ်အဲၤကူပတူးအပူၤ, မ့ၢ်ဒၣ်လၢအကဟ့ၣ်လီၤပှၤဆူပှၤဧၣ်မိၣ်ဖိတဖၣ်အံၤအစုပူၤ, ဒ်သိးအဝဲသ့ၣ်မၤသံပှၤကသ့အဂီၢ်န့ၣ်လီၤ.
28 ဘၣ်မနုၤအဃိပကဘၣ်လဲၤဖဲန့ၣ်လဲၣ်. ပပျံၤတၢ်လီၤ. ပှၤလၢပဆှၢလီၤတ့ၢ်အီၤတဖၣ်တဲဘၣ်ပှၤလၢ, ပှၤဂီၢ်မုၢ်ဖဲန့ၣ် တဖၣ်အဂံၢ်အဘါဆူၣ်န့ၢ်ပှၤဒီးအနီၢ်ထီန့ၢ်ပှၤတက့ၢ်, ဒီးလၢအဝဲသ့ၣ်အိၣ်ဆိးလၢဝ့ၢ်တဖၣ်လၢအိၣ်ဒီးအခိၣ်ဒူလၢ အကစီၤထီၣ်ထီတုၤဝဲဆူမူခိၣ်န့ၣ်လီၤ. အဝဲသ့ၣ်ထံၣ်ဘၣ်ပှၤဧနးဖိတဖၣ်လၢအနီၢ်ဒိၣ်နီၢ်သွါဖဲန့ၣ်လီၤ.
29 ဘၣ်ဆၣ်ဒီးယတဲဘၣ်သု, ပျံၤပှၤဂီၢ်မုၢ်တဖၣ်န့ၣ်တဂ့ၤ.
30 ယွၤ, သုကစၢ်ယွၤကဆှၢသုဒီးအဝဲကဒုးတၢ်လၢသုဂီၢ်, ဒ်သိးဒၣ်သုထံၣ်အဝဲမၤတ့ၢ်ဝဲလၢကီၢ်အဲၤကူပတူးအပူၤအသိး,
31 ဒီးလၢပှၢ်မုၢ်ကနၢအပူၤအသိးန့ၣ်လီၤ. သုထံၣ်ဘၣ်တ့ၢ်လၢအဝဲ ဟဲစိာ်သုလၢကျဲဒီဘိညါတုၤဆူတၢ်လီၢ်အံၤပူၤပူၤဖျဲး ဖျဲးဒ်လဲၣ်, ဒ်ပၢ်တဂၤစိာ်အဖိအသိးန့ၣ်လီၤ.
32 ယတဲတ့ၢ်သုဒ်န့ၣ်ဘၣ်ဆၣ်, သုတနာ်ဒံးဘၣ်ယွၤဘၣ်.
33 အဝဲလဲၤဆိဒၣ်လဲာ်လၢသုမဲာ်ညါဒီးဃုထံၣ်တၢ်လီၢ်တတီၤလၢသူၣ် ဒဲအဂီၢ်ဘၣ်ဆၣ်သုတနာ်ဒံးဘၣ်အီၤဘၣ်. အဝဲလဲၤဆိတၢ်လၢသုမဲာ်ညါလၢမ့ၣ်အူထူၣ်အပူၤလၢမုၢ်နၤဒီး လၢတၢ်အၢၣ်အထူၣ်အပူၤလၢမုၢ်ဆါ, ဒ်သိးကဒုးနဲၣ်သု ကျဲအဂီၢ်န့ၣ်လီၤ.
(ဂံၢ်.၁၄:၂၀-၄၅)
34 ယွၤနၢ်ဟူဘၣ်တ့ၢ်သုတၢ်ကဒူးကဒ့ၣ်တဖၣ်ဒီးအသးဒိၣ်ထီၣ်, ဒီးလၢတၢ်န့ၣ်အဃိအဝဲတဲဖျါထီၣ်ဝဲသမှံၤသပှၢ်လၢ,
35 လၢပှၤအၢပှၤသီတစိၤအံၤအကျါန့ၣ်, ပှၤတနုာ်လီၤဘၣ်နီ တဂၤဆူကီၢ်လၢအပှဲၤဒီးဟီၣ်ခိၣ်ညၣ်ထ့ၣ်လၢယအၢၣ်လီၤတ့ၢ်လၢ ယကဟ့ၣ်သုမိၢ်ပၢ်ဖံဖုလၢပျၢၤန့ၣ်ဘၣ်.
36 ထဲဒၣ်စီၤယဖူန့ၤအဖိခွါစီၤကၤလ့းဧိၤကနုာ်လီၤဘၣ်ဆူကီၢ် န့ၣ်လီၤ. အဝဲအသးတီတ့ၢ်ယၤဒီးယကဟ့ၣ်အီၤဒီးအဝဲအစၢၤအသွဲၣ်တဖၣ်လၢ ကီၢ်တဘ့ၣ်လၢအဝဲလဲၤကွၢ်ဟုၣ်ကွၢ်စုးတ့ၢ်ဝဲန့ၣ်လီၤ.
37 လၢသုဃိန့ၣ်, ကစၢ်ယွၤသးဒိၣ်ထီၣ်ယၤဒီးစံးဝဲ, နဲဒၣ်ဒၣ်လဲာ်န့ၣ်, စီၤမိၤၡ့ဧၢ, နတလဲၤနုာ်လီၤဘၣ်ဆူကီၢ်န့ၣ် အပူၤဘၣ်.
38 ဘၣ်ဆၣ်ဒီးဒုးဆူၣ်ထီၣ်ပှၤမၤစၢၤနၤ, စီၤနိၣ်အဖိခွါစီၤယိၤၡူ အတၢ်ပာ်လီၤသးန့ၣ်တက့ၢ်. အဝဲကဆှၢပှၤအံၣ်စရ့လးဖိလၢကလဲၤ မၤန့ၢ်ထံကီၢ်န့ၣ်အဂီၢ်လီၤ.
39 အန့ၣ်ဝံၤဒီးယွၤစံးဘၣ်ပဝဲကိးဂၤဒဲး, သုဖိတဖၣ်လၢ, အသးစၢ်ကဲာ်ဆိးဒံးလၢကနီၤဖးတၢ်အဘၣ်ဒီးတၢ်တဘၣ်အဆၢ, သုဖိတဖၣ်လၢသုစံးလၢကဘၣ်တၢ်ဖီၣ်န့ၢ်အီၤလၢသုဒုၣ်သုဒါ တဖၣ်ဧိၤန့ၣ်ကလဲၤနုာ်လီၤဘၣ်ဆူကီၢ်န့ၣ်အပူၤလီၤ. ယကဟ့ၣ်လီၤကီၢ်န့ၣ်ဆူအဝဲသ့ၣ်အအိၣ်ဒီးအဝဲသ့ၣ်ကမၤန့ၢ်အီၤ န့ၣ်လီၤ.
40 မ့မ့ၢ်သုဝဲပှၤဂီၢ်မုၢ်အံၤ, ဃၣ်ကဒါက့ၤသုသးဒီးက့ၤကဒါ က့ၤဆူပှၢ်မုၢ်ကနၢအပူၤလၢကျဲလဲၤဆူပီၣ်လဲၣ်က့ၣ်ကွီၤအကၣ်ဘၣ် န့ၣ်တက့ၢ်.
41 သုစံးဆၢက့ၤလၢ, စီၤမိၤၡ့ဧၢ, ပမၤတ့ၢ်တၢ်ဒဲးဘးထီဒါယွၤ န့ၣ်လီၤ. ဘၣ်ဆၣ်ဒီးခဲကနံၣ်ပကလဲၤထီၣ်ဒုးတၢ်, ဒ်ယွၤ, ပကစၢ်ယွၤမၤလိာ်တ့ၢ်ပှၤအသိးန့ၣ်လီၤ. အန့ၣ်တစု, ပှၤတဂၤစုာ်စုာ်ကတဲာ်ကတီၤထီၣ်အသးလၢကလဲၤထီၣ်ဒုးတၢ် အဂီၢ်, မ့ၢ်လၢသုဆိကမိၣ်လၢတၢ်လဲၤထီၣ်ဒုးကီၢ်တဘ့ၣ်လၢအပှဲၤဒီးတၢ်လူၢ်တၢ်တြီၤန့ၣ်, ကမ့ၢ်တၢ်လၢအညီအဃိန့ၣ်လီၤ.
42 ဘၣ်ဆၣ်ဒီးယွၤစံးဘၣ်ယၤ, ဟ့ၣ်ပလီၢ်အဝဲသ့ၣ်လၢအသုတလဲၤထီၣ် ဒုးတၢ်တဂ့ၤ. အဂ့ၢ်ဒ်အံၤ, ယတအိၣ်ဘၣ်ဒီးအဝဲသ့ၣ်ဘၣ်. ဒီးအဝဲသ့ၣ်အဒုၣ်အဒါတဖၣ်ကမၤနၢၤကွံာ်အီၤန့ၣ်လီၤ.
43 ယတဲဘၣ်တ့ၢ်သုတၢ်လၢယွၤစံးတ့ၢ်ဝဲတဖၣ်, ဘၣ်ဆၣ်ဒီးသုတပာ်ကဲ အီၤနီတစဲးဘၣ်. သုပူထီၣ်တၢ်ထီဒါယွၤ, ဒီးလၢသုတၢ်ပာ်ထီၣ်ထီသးအပူၤန့ၣ်သုလဲၤထီၣ်ဆူကီၢ်လၢအပှဲၤ ဒီးတၢ်လူၢ်တၢ်တြီၤအပူၤလၢသုကဒုးတၢ်အဂီၢ်န့ၣ်လီၤ.
44 အန့ၣ်တစု, ပှၤဧၣ်မိၣ်ဖိတဖၣ်လၢအအိၣ်ဆိးဝဲလၢတၢ်လူၢ်တဖၣ် န့ၣ်, ဟဲထီၣ်ထီဒါသု, ဒ်ကနဲတဖုတဂီၢ်န့ၣ်လီၤ. အဝဲသ့ၣ်လူၤသုတုၤဒၣ်လဲာ်ဆူဝ့ၢ်ဃိၢ်မါဒီးမၤနၢၤကွံာ်သု ဖဲန့ၣ်လၢကီၢ်အဒိၣ်လၢအပှဲၤဒီးတၢ်လူၢ်တၢ်တြီၤအပူၤန့ၣ်လီၤ.
45 မၤသးဒ်န့ၣ်ဒီးသုကိးထီၣ်တၢ်ဆူယွၤအအိၣ်လၢတၢ်မၤစၢၤအဂီၢ်လီၤ. ဘၣ်ဆၣ်ဒီးအဝဲတဒိကနၣ်သုမ့ၢ်ဂ့ၤ, တကနၣ်ဃုာ်သုမ့ၢ်ဂ့ၤနီတမံၤဘၣ်.
46 လၢတၢ်န့ၣ်အဃိ, ပအိၣ်ဆိးလၢဝ့ၢ်ကၤဒ့ၣ်အပူၤအါနံၤအါသီန့ၣ် လီၤ.