6
1 ဒီးစီၤဒၤရယါဝ့ၣ်ပာ်လီၤတ့ၢ်အသးလၢကနီၤဖးလီၤအဘီအမုၢ် ဆူကီၢ်ဖိကီၢ်ဆၣ်တကယၤခံဆံဒီးပာ်ထီၣ်ပဒိၣ်ဖးဒိၣ်အဂၤတကယၤ ခံဆံလၢကပၢတၢ်စုာ်စုာ်န့ၣ်လီၤ.
2 ဒီးလၢပဒိၣ်ဖးဒိၣ်တဖၣ်အံၤအဖီခိၣ်န့ၣ်ဃုထၢတ့ၢ်ဝဲစီၤဒၤနံးယ့လး ဒီးပှၤအဂၤခံဂၤလၢကပၢဆှၢပဒိၣ်ဖးဒိၣ်တဖၣ်ဒီးကကွၢ်ထွဲတၢ် ဘၣ်ဃးဒီးစီၤပၤအတၢ်ဘၣ်ဘျုးတဖၣ်ဒ်သိးစီၤပၤအသုတဘၣ် တၢ်မၤတံာ်တာ်အီၤတဂ့ၤအဂီၢ်န့ၣ်လီၤ.
3 တယံာ်ဘၣ်ဒီးစီၤဒၤနံးယ့လးအိၣ်ဖျါထီၣ်ဝဲလၢအမၤတၢ်သ့ ဂ့ၤန့ၢ်ဒံးပှၤပၢဆှၢအံးကွၢ်တၢ်အဂၤတဖၣ်ဒီးပဒိၣ်ဖးဒိၣ်တဖၣ် န့ၣ်လီၤ. မ့ၢ်လၢအဝဲဒၣ်ဖျိးစိအဃိ, စီၤပၤပာ်သူၣ်ပာ်သးတ့ၢ် ဒ်သိးကပာ်ထီၣ်အီၤလၢဘီမုၢ်ဒီဘ့ၣ်ညါအဖီခိၣ်န့ၣ်လီၤ.
4 တုၤနုၤတစု, ပှၤပၢဆှၢအံးထွဲကွၢ်ထွဲတၢ်အဂၤတဖၣ်ဒီးပဒိၣ်ဖးဒိၣ် တဖၣ်ကျဲးစၢးဝဲဒ်သိးကထံၣ်န့ၢ်တၢ်ကမၣ်လၢစီၤဒၤနံးယ့လးအတၢ်ပၢ ဆှၢဘီမုၢ်အကျိၤအကျဲအပူၤန့ၣ်လီၤ. ဘၣ်ဆၣ်ဒီးတထံၣ်န့ၢ်ဘၣ်ဝဲဘၣ်. အဂ့ၢ်ဒ်အံၤ, စီၤဒၤနံးယ့လးန့ၣ်ဘၣ်တၢ်နာ်န့ၢ်အီၤဒီးတမၤက မၣ်တၢ်နီတမံၤမ့ၢ်ဂ့ၤ, တမၤတၢ်တတီတလိၤဘၣ်မ့ၢ်ဂ့ၤန့ၣ်ဘၣ်.
5 မၤသးဒ်န့ၣ်ဒီး, အဝဲသ့ၣ်စံးလိာ်အသး, “မ့တမ့ၢ်ဘၣ်လၢတၢ်ဘၣ်ထွဲဒီးအတၢ်ဘူၣ်တၢ်ဘါအဂ့ၢ်န့ၣ်ပဃုထံၣ် တၢ်ဂ့ၢ်ထီဒါစီၤဒၤနံးယ့လးတသ့ဘၣ်နီတမံၤဘၣ်.”
6 လၢတၢ်န့ၣ်အဃိအဝဲသ့ၣ်လဲၤဆူစီၤပၤအအိၣ်ဒီးစံး, “စီၤပၤဒၤရယါဝ့ၣ်ဧၢ, မ်နမူနဲလီၤထူလီၤယိာ်တက့ၢ်.
7 ပဝဲခဲလၢာ်လၢအပၢဆှၢနဘီနမုၢ်ဒ်ပှၤပၢဆှၢအံးထွဲကွၢ်ထွဲတၢ်, ကီၢ်စဲၣ်အပဒိၣ်ဖးဒိၣ်တဖၣ်, ဒီးပှၤပၢတၢ်ဖိတဖၣ်, ဘၣ်သူၣ်ဘၣ် သးအၢၣ်လီၤသကိးလၢနဲဒၣ်, စီၤပၤကဟ့ၣ်လီၤအကလုၢ် တမံၤဒီးမၤဆူၣ်မၤကျၢၤအီၤဃံးဃံးန့ၣ်လီၤ. ဟ့ၣ်လီၤနကလုၢ်ဒ်သိးလၢအသီသၢဆံအတီၢ်ပူၤန့ၣ်မ့တမ့ၢ် ဘၣ်ထဲတၢ်ကိးထီၣ်ဆူနအိၣ်ဒီးပှၤတဘၣ်ဘါထုကဖၣ်တၢ်ဆူ ကစၢ်တဂၤဂၤမ့ၢ်ဂ့ၤပှၤကညီတဂၤဂၤအအိၣ်မ့ၢ်ဂ့ၤနီတဂၤဘၣ်. ပှၤတဂၤလၢ်လၢ်လၢအလုၢ်သ့ၣ်ခါပတာ်တၢ်ကလုၢ်အံၤန့ၣ် ကဘၣ်တၢ်တ့ၢ်လီၤကွံာ်အီၤဆူခ့ယုၢ်တဖၣ်အတဝၢအပူၤန့ၣ်လီၤ.
8 မၤသးဒ်န့ၣ်ဒီးနဲဒၣ်, စီၤပၤဧၢ, ဟ့ၣ်လီၤတၢ်ကလုၢ်အံၤဒီး ဆဲးလီၤနမံၤလၢတၢ်ကွဲးအသးအဖီခိၣ်တက့ၢ်. ဒီးတၢ်ကလုၢ်န့ၣ်ကအိၣ်ဝဲခၢၣ်သနၢၣ်ဒ်ပှၤမၤဒဲဖိဒီးပှၤပၤရၣ်ဖိ တဖၣ်အတၢ်သိၣ်တၢ်သီလၢတၢ်လဲလိာ်ကွံာ်အီၤတသ့ဘၣ်န့ၣ်လီၤ.”
9 ဒီးလၢတၢ်န့ၣ်အဃိစီၤပၤဒၤရယါဝ့ၣ်ဆဲးလီၤအမံၤလၢအကလုၢ် လံာ်တၢ်ကွဲးနီၣ်အဖီခိၣ်န့ၣ်လီၤ.
10 ဖဲစီၤဒၤနံးယ့လးသ့ၣ်ညါတ့ၢ်လၢစီၤပၤဆဲးလီၤအမံၤလၢအက လုၢ်လံာ်တၢ်ကွဲးနီၣ်အဖီခိၣ်ဒၣ်လဲာ်, အဝဲက့ၤဆူအဟံၣ်န့ၣ်ဒီး, လၢအဟံၣ်ဖီခိၣ်တကထၢအဒၢးဖိအပူၤန့ၣ်ကွၢ်ဃီၤတၢ်ခီဖျိ ပဲတြီဖိတဖၣ်ဆူဝ့ၢ်ယရူၤၡလ့ၣ်ဒီးတီၤလီၤဘါထုကဖၣ်စံးထီၣ် ပတြၢၤတၢ်အဘျုးအဖှိၣ်တနံၤသၢဘျီဒ်အညီနုၢ်မၤတ့ၢ်ဝဲ အသိးန့ၣ်လီၤ.
11 ဒီးဖဲစီၤဒၤနံးယ့လးအဒုၣ်အဒါတဖၣ်ပာ်သူၣ်ပာ်သးထံၣ်န့ၢ် တ့ၢ်အီၤလၢအဘါထုကဖၣ်တၢ်ဆူကစၢ်ယွၤအအိၣ်ဒီး,
12 အဝဲသ့ၣ်ခဲလၢာ်လဲၤသကိးဆူစီၤပၤအအိၣ်လၢကဆှိးထီၣ်ပာ် တၢ်ကမၣ်လၢစီၤဒၤနံးယ့လးအလိၤန့ၣ်လီၤ. ဒီးအဝဲသ့ၣ်စံး, “နဲဒၣ်, စီၤပၤဧၢ, နဆဲးလီၤတ့ၢ်နမံၤဒီးဟ့ၣ်လီၤတ့ၢ်နကလုၢ်လၢ, လၢအသီသၢဆံအတီၢ်ပူၤန့ၣ်မ့တမ့ၢ်ဘၣ်လၢတၢ်ကိးထီၣ်ထဲဆူနအိၣ်န့ၣ်, ပှၤတဂၤလၢ်လၢ်လၢအဘါထုကဖၣ်တၢ်ဆူကစၢ်တဂၤဂၤအအိၣ်မ့ၢ်ဂ့ၤ, ဃ့တၢ်လၢပှၤကညီတဂၤဂၤအအိၣ်မ့ၢ်ဂ့ၤန့ၣ်ကဘၣ် တၢ်တ့ၢ်လီၤကွံာ်အီၤဆူခ့ယုၢ်တဖၣ်အတဝၢပူၤန့ၣ်လီၤ.” ဒီးစီၤပၤစံးဆၢဝဲဒၣ်, “မ့ၢ်. တၢ်န့ၣ်မ့ၢ်တၢ်ကလုၢ်အိၣ်ကျၢၤ ခၢၣ်သနၢၣ်ဒ်ပှၤမၤဒဲဒီးပှၤပၤရၣ်ဖိအတၢ်သိၣ်တၢ်သီလၢတၢ်လဲ လိာ်ကွံာ်အီၤတသ့ဘၣ်န့ၣ်လီၤ.”
13 တုၤနုၤတစုအဝဲသ့ၣ်စံးဘၣ်စီၤပၤ, “စီၤဒၤနံးယ့လး, လၢအမ့ၢ် ပှၤယူဒၤဖိလၢအဘၣ်တၢ်စိာ်မၢကဲကုၢ်အီၤတဖၣ်အကျါတဂၤ န့ၣ်တပာ်ကဲဘၣ်နဲဒၣ်စီၤပၤ, ဒီးတစူၢ်ဘၣ်တၢ်ကလုၢ်လၢနဟ့ၣ် လီၤအီၤန့ၣ်ဘၣ်. အဝဲဘါထုကဖၣ်တၢ်တနံၤသၢဘျီတီတီန့ၣ်လီၤ.”
14 ဖဲစီၤပၤနၢ်ဟူဘၣ်တ့ၢ်တၢ်အံၤဒီးအသူၣ်ကိၢ်သးဂီၤဝဲဒီးပာ်လီၤ အသးလၢကဃုထံၣ်န့ၢ်ကျဲတဘိဘိဒ်သိးကမၤပူၤဖျဲးစီၤဒၤ နံးယ့လးန့ၣ်လီၤ. ကျဲးစၢးဝဲသပှၢ်ပှၢ်တုၤမုၢ်လီၤနုာ်တစုန့ၣ်လီၤ.
15 အန့ၣ်ဒီးစီၤဒၤနံးယ့လးအဒုၣ်အဒါတဖၣ်ဟဲက့ၤဆူစီၤပၤအအိၣ် ဒီးစံးဘၣ်အီၤ, “နဲဒၣ်စီၤပၤဧၢ, နသ့ၣ်ညါနဲလၢ, ဒ်ပှၤမၤဒဲဒီးပှၤပၤရၣ်ဖိအတၢ်သိၣ်တၢ်သီတဖၣ်အိၣ်ဝဲအသိးန့ၣ်, တၢ်ကလုၢ်လၢစီၤပၤဟ့ၣ်လီၤအီၤန့ၣ်ဘၣ်တၢ်လဲလိာ် အီၤတသ့နီတမံၤဘၣ်.”
16 လၢတၢ်န့ၣ်အဃိ, စီၤပၤဟ့ၣ်လီၤအကလုၢ်ဒ်သိးစီၤဒၤနံးယ့လး ကဘၣ်တၢ်လဲၤစိာ်ဒီးတ့ၢ်လီၤကွံာ်အီၤဆူခ့ယုၢ်တဖၣ်အတဝၢပူၤ န့ၣ်လီၤ. အဝဲစံးဘၣ်စီၤဒၤနံးယ့လး, “မ်နကစၢ်ယွၤလၢနမၤ အတၢ်မၤလၢတၢ်သူၣ်တီသးရၤအပူၤန့ၣ်အုၣ်က့ၤခီၣ်က့ၤနၤတက့ၢ်.”
17 လၢၢ်တဖျၢၣ်ဘၣ်တၢ်ပာ်လီၤတံာ်တၢၤခ့ယုၢ်တဝၢအပူၤခိၣ် ထိးဒီးစီၤပၤအနီၢ်ကစၢ်ဒၣ်ဝဲဒီးအပဒိၣ်တဖၣ်စဲတံၢ်ဝဲလၢအတၢ် စဲပနီၣ်ဒၣ်ဝဲစုာ်စုာ်ဒ်သိးပှၤမၤပူၤဖျဲးစီၤဒၤနံးယ့လးသုတန့ၢ် နီတဂၤတဂ့ၤအဂီၢ်န့ၣ်လီၤ.
18 အန့ၣ်ဝံၤဒီး, စီၤပၤက့ၤနုာ်ဝဲဒၣ်ဆူအနီပူၤန့ၣ်လီၤ. တၢ်အီၣ်တၢ် အီမ့ၢ်ဂ့ၤတၢ်မၤမုာ်မၤလၤအသးမ့ၢ်ဂ့ၤတတူၢ်လိာ်ဝဲနီတမံၤဘၣ်. ဒီးသီတနၤကျၢၤန့ၣ်မံဝဲတန့ၢ်ဘၣ်.
19 လၢမုၢ်ဆ့ၣ်ထီၣ်ဂီၤဂီၤန့ၣ်စီၤပၤဂဲၤဆၢထၢၣ်ဒီၤလဲၤဝဲချ့ချ့ဆူခ့ ယုၢ်အတဝၢပူၤန့ၣ်လီၤ.
20 တုၤလၢအတုၤဃီၤဝဲဖဲန့ၣ်ဒီးကိးထီၣ်ဝဲလၢတၢ်သူၣ်ကိၢ်သးဂီၤ အပူၤ, “စီၤဒၤနံးယ့လး, ကစၢ်ယွၤလၢအမူဝဲတဂၤအခ့အပှၤ ဧၢ, ကစၢ်ယွၤလၢနမၤအတၢ်လၢတၢ်သူၣ်တီ သးရၤအပူၤတဂၤန့ၣ်မၤပူၤဖျဲးနၤလၢခ့ ယုၢ်တဖၣ်န့ၣ်သ့စ့ၢ်ကီးဧါ.”
21 ဒီးစီၤဒၤနံးယ့လးစံးဆၢဝဲဒၣ်, “မ်နဲဒၣ်စီၤပၤမူဝဲ အစိၤစိၤအဃၣ်ဃၣ်တက့ၢ်.
22 ကစၢ်ယွၤလၢယဘါအီၤန့ၣ်ဆှၢလီၤတ့ၢ်ဝဲအကလူးလၢအက ကးတံၢ်ခ့ယုၢ်တဖၣ်အထးခိၣ်ဒ်သိးအသုတမၤဆါယၤတဂ့ၤ အဂီၢ်လီၤ. အဂ့ၢ်ဒ်အံၤ, သ့ၣ်ညါဝဲလၢယမ့ၢ်ပှၤသူၣ်တီသးလိၤဒီး ယတမၤကမၣ်တ့ၢ်နၤ, နဲဒၣ်စီၤပၤအဃိန့ၣ်လီၤ.”
23 စီၤပၤအသးခုဒိၣ်ဒိၣ်ကလဲာ်ဒီးမၤလိာ်တ့ၢ်ဝဲလၢပှၤကထုးထီၣ် က့ၤစီၤဒၤနံးယ့လးလၢခ့ယုၢ်အတဝၢအပူၤန့ၣ်လီၤ. မၤသးဒ်န့ၣ်ဒီး, အဝဲသ့ၣ်ထုးထီၣ်က့ၤအီၤဒီးထံၣ်ဘၣ်ဝဲလၢ အတဘၣ်ဒိဘၣ်ထံးဘၣ်နီတမံၤဘၣ်လၢအတၢ်စူၢ်တၢ်နာ်ကစၢ် ယွၤအဃိန့ၣ်လီၤ.
24 ဒီးစီၤပၤဟ့ၣ်လီၤအကလုၢ်လၢတၢ်ကဖီၣ်ဒီးတ့ၢ်လီၤကွံာ်ပှၤဆှိး ထီၣ်ပာ်တၢ်ကမၣ်လၢစီၤဒၤနံးယ့လးအလိၤတဖၣ်ဃုာ်ဒီးအဖိ အမါတဖၣ်ဆူခ့ယုၢ်အတဝၢအပူၤန့ၣ်လီၤ. ဒီးတချုးလၢအလီၤတုၤ ဆူတၢ်ပူၤအခံဒးဒံးဒၣ်လဲာ်ဘၣ်ဒီးခ့ယုၢ်တဖၣ်စံၣ်ပှီၤလၢ အလိၤဒီးအီၣ်ကွံာ်အီၤတုၤအဃံအကွဲလၢာ်တစုန့ၣ်လီၤ.
25 တၢ်န့ၣ်တဖၣ်အလီၢ်ခံန့ၣ်စီၤပၤဒၤရယါဝ့ၣ်ကွဲးလီၤ တၢ်ဆူကယဲၢ်ပှၤဂီၢ်မုၢ်လၢထံကီၢ်ခဲလၢာ်, ပှၤကိးကလုာ်ဒဲး, ဒီးပှၤကတိၤကျိာ်အကလုာ်ကလုာ်တဖၣ်လၢဟီၣ်ခိၣ်ဒီဘ့ၣ်ညါ အအိၣ်, “မ်တၢ်ဃူတၢ်မုာ်ဂံၢ်အါထီၣ်အသးလၢသုဂီၢ်တက့ၢ်.
26 ယဟ့ၣ်လီၤယကလုၢ်ဆူယဘီယမုၢ်ဒီဘ့ၣ်ညါအပူၤလၢပှၤကိး ဂၤဒဲးကဘၣ်ပျံၤဒီးယူးယီၣ်ပာ်ကဲစီၤဒၤနံးယ့လး အကစၢ်ယွၤန့ၣ်လီၤ.
အဝဲမ့ၢ်ကစၢ်ယွၤလၢအမူဝဲ,
အိၣ်ဝဲဆိးဝဲအစိၤစိၤအဃၣ်ဃၣ်လီၤ.
အဝဲအဘီအမုၢ်န့ၣ်တဟးဂီၤနီတစုဘၣ်, ဒီးအစိအကမီၤန့ၣ် အကတၢၢ်တအိၣ်ဘၣ်.
27 အဝဲအုၣ်က့ၤခီၣ်က့ၤတၢ်ဒီးမၤပူၤဖျဲးတၢ်,
အဝဲမၤတၢ်ပနီၣ်လီၤလးဒီးတၢ်လီၤလိၢ်လီၤလး တဖၣ်လၢမူခိၣ်ဒီးလၢဟီၣ်ခိၣ်လီၤ.
အဝဲအုၣ်က့ၤခီၣ်က့ၤတ့ၢ်စီၤဒၤနံးယ့လးလၢခ့ယုၢ်တဖၣ်အ တၢ်မၤသံမၤဝီအီၤန့ၣ်လီၤ.”
28 ဒီးစီၤဒၤနံးယ့လးဘီၣ်ထီၣ်ညီထီၣ်လၢစီၤပၤဒၤရယါဝ့ၣ်အတၢ်ပၢတၢ် ပြးဒီးကီၢ်ပၤရၣ်အစီၤပၤစီၤကိရ့ၣ်ပၢတၢ်အစိၤန့ၣ်လီၤ.
စီၤဒၤနံးယ့လးအတၢ် ထံၣ်လၢညါခီတဖၣ်