ပှၤကလီးစဲဖိတဖၣ်အအိၣ်
COLOSSIANS
စီၤပီလူးအလံာ်ပရၢဆူပှၤကလီးစဲဖိတဖၣ်အအိၣ်အံၤ ဘၣ်တၢ်ကွဲးအီၤဆူတၢ်အိၣ်ဖှိၣ်လၢအအိၣ်လၢဝ့ၢ်ကလီးစဲ, ဝ့ၢ်တဖျၢၣ်လၢအဘၣ်ဃးဒီးကီၢ်အၤစံမံနၤဒီးသူၣ်လီၤအသးလၢ ဝ့ၢ်အ့းဖ့းစူးအမုၢ်ထီၣ်တခီန့ၣ်လီၤ. တၢ်အိၣ်ဖှိၣ်အံၤတဘၣ်တၢ်သူၣ်ထီၣ်အီၤလၢစီၤပီလူးနာ်သက့, ဖဲအဝဲဆှၢလီၤပှၤမၤတၢ်ဖိတဖၣ်လၢဝ့ၢ်အ့းဖ့းစူး, ရိမ့ၤအဝ့ၢ်ခိၣ်လၢကီၢ်အၤစံအပူၤန့ၣ်, အဝဲနာ်ဝဲလၢအမူအဒါအိၣ်စ့ၢ်ကီးလၢတၢ်အိၣ်ဖှိၣ်အံၤ အဂီၢ်လီၤ. စီၤပီလူးသ့ၣ်ညါဘၣ်ဝဲလၢကလီးစဲတၢ်အိၣ်ဖှိၣ် အပူၤန့ၣ် အိၣ်ဒီးသရၣ်အဘျၣ်တဖၣ်လၢအစံးဝဲလၢ ဒ်သိးပှၤကသ့ၣ်ညါကစၢ်ယွၤဒီးဒိးန့ၢ်တၢ်အုၣ်က့ၤခီၣ်က့ၤ အလၢအပှဲၤအဂီၢ်န့ၣ်ပှၤကဘၣ်ဘူၣ်ထီၣ်ဘါထီၣ်တၢ်ဘၣ်ဃးဒီး သူၣ်ဂ့ၢ်သးဂ့ၢ်အခိၣ်အနၢ်အပှၤဒိၣ်စိဒိၣ်ကမီၤတဖၣ်လီၤ. အါန့ၢ်အန့ၣ်အဝဲသ့ၣ်သိၣ်လိသီလိစ့ၢ်ကီးဝဲလၢပှၤဘၣ် တိၢ်န့ၢ်လုၢ်လၢ်လီၤဆီဒ်တၢ်ကူးတရံးအသိးတဖၣ်ဒီးဘၣ် တိၢ်န့ၢ်မၤထွဲစ့ၢ်ကီးတၢ်သိၣ်တၢ်သီလၢအဃံးမးဘၣ်ဃးဒီး တၢ်အီၣ်တၢ်အီဒီးတၢ်အဂုၤအဂၤတဖၣ်လီၤ.
စီၤပီလူးကွဲးထီဒါတၢ်သိၣ်လိသီလိတဖၣ်အံၤခီဖျိ ပှၤခရံာ်ဖိအတၢ်ကစီၣ်အမ့ၢ်အတီလီၤ. အတၢ်စံးဆၢအဂ့ၢ် မိၢ်ပှၢ်မ့ၢ်ဝဲ, ယ့ၣ်ၡူးခရံာ်ဟ့ၣ်ပှၤတၢ်အုၣ်က့ၤခီၣ်က့ၤအလၢ အပှဲၤသ့ဝဲဒီးတၢ်စူၢ်တၢ်နာ်ဒီးလုၢ်လၢ်အဂုၤအဂၤတဖၣ်, နီၢ်နီၢ်တခီမ့ၢ်တၢ်လၢအဒုးယံၤထီၣ်ပှၤဒီးအီၤန့ၣ်လီၤ. ခီဖျိယ့ၣ်ၡူးခရံာ်န့ၣ်, ကစၢ်ယွၤတ့လီၤပာ်လီၤဟီၣ်ခိၣ် ဒီးခီဖျိအီၤန့ၣ်, ကစၢ်ယွၤကဟံးက့ၤဟီၣ်ခိၣ်ဆူအကစၢ်ဒၣ်ဝဲ အအိၣ်လီၤ. တၢ်မုၢ်လၢ်ဘၣ်ဃးဒီးတၢ်အုၣ်က့ၤခီၣ်က့ၤ ဟီၣ်ခိၣ်န့ၣ်အိၣ်သ့ဒၣ်ခီဖျိတၢ်အိၣ်မူလၢခရံာ်အပူၤဧိၤန့ၣ်လီၤ. စီၤပီလူးတဲဖျါထီၣ်စ့ၢ်ကီးတၢ်သိၣ်လီၤသီလီၤဖးဒိၣ်တထံၣ် အံၤအတၢ်ဘၣ်ထွဲဒီးပှၤစူၢ်က့ၤနာ်က့ၤတၢ်ဖိတဖၣ်အတၢ်အိၣ်မူ န့ၣ်လီၤ.
ပဂ့ၤပာ်သူၣ်ပာ်သးစ့ၢ်ကီးလၢစီၤအီးန့ၤစံမူး, ကုၢ်လၢစီၤပီလူးကွဲးန့ၢ်စီၤဖံၤလ့မိၣ်အလံာ်ပရၢလၢအခၢၣ် စးတဂၤန့ၣ်, လဲၤသကိးတၢ်ဒီးစီၤတူဃံၤကူးလၢအလဲၤစိာ်လံာ် ပရၢအံၤဆူဝ့ၢ်ကလီးစဲန့ၣ်လီၤ.
1
1 လၢ, စီၤပီလူး, ယ့ၣ်ၡူးခရံာ်အပှၤတၢ်မၢဖိဖဲကစၢ် ယွၤအတၢ်ဘၣ်အသးဒီးပဒီပုၢ်ဝဲၢ်စီၤတံၤမသ့း,
2 ဆူ, ပှၤစီဆှံလၢဝ့ၢ်ကလီးစဲ, ဒီပုၢ်ဝဲၢ်လၢခရံာ်အပူၤလၢ အကလုၢ်တီဝဲတဖၣ်အအိၣ်,
တၢ်ဘျုးတၢ်ဖှိၣ် ဒီးတၢ်ဃူတၢ်ဖိးလၢအဟဲလၢပပၢ်ကစၢ်ယွၤ အအိၣ်န့ၣ်မ်အဘၣ်လၢ်သုတက့ၢ်.
3 ဖဲပဃ့ဘါထုကဖၣ်လၢသုဂီၢ်န့ၣ်, ပစံးဘျုးဘၣ်ကစၢ်ယွၤပကစၢ်ယ့ၣ်ၡူးခရံာ်အပၢ်ထီဘိလီၤ.
4 အဂ့ၢ်ဒ်အံၤ, ပနၢ်ဟူဘၣ်တ့ၢ်လံဘၣ်ဃးဒီးသုတၢ်စူၢ်တၢ်နာ်လၢ ယ့ၣ်ၡူးခရံာ်အပူၤဒီးသုတၢ်အဲၣ်ဘၣ်ပှၤစီဆှံခဲလၢာ်,
5 လၢသုတၢ်မုၢ်လၢ်လၢအဘၣ်တၢ်ကတီၤပာ်န့ၢ်သုဂီၢ်လၢမူခိၣ် အဃိန့ၣ်လီၤ. ဘၣ်ဃးဒီးတၢ်မုၢ်လၢ်အံၤအဂ့ၢ်န့ၣ်, သုနၢ်ဟူတ့ၢ်လၢအခီၣ်ထံးလံၤလံၤခီဖျိတၢ်ကစီၣ်အမ့ၢ် အတီလၢအမ့ၢ်တၢ်သးခုအကစီၣ်န့ၣ်လီၤ.
6 တၢ်သးခုအကစီၣ်အံၤဟဲစိာ်ဃုာ်ဒီးတၢ်ဆိၣ်ဂ့ၤ, ရၤလီၤအသးသကုၤဟီၣ်ခိၣ်ဒီဘ့ၣ်ညါ, ဒ်အမၤတ့ၢ်လံ အသးလၢသုကျါစးထီၣ်မုၢ်တနံၤဖဲသုနၢ်ဟူတၢ်ဘၣ်ဃး ယွၤအဘျုးအဖှိၣ်အဆိကတၢၢ်တဘျီ, ဒီးသ့ၣ်ညါထံအီၤဒ် အမ့ၢ်တၢ်နီၢ်နီၢ်အသိး,
7 ခီဖျိပှၤလၢတၢ်အဲၣ်အီၤဒီးယွၤအခ့အပှၤသကိးဒီးပှၤစီၤ အ့းပၤဖြါန့ၣ်လီၤ. အဝဲမ့ၢ်ပခၢၣ်စး, ခရံာ်အခ့အပှၤလၢ အကလုၢ်တီတဂၤ,
8 ဒီးအဝဲဘိးဘၣ်သ့ၣ်ညါပှၤလၢသုတၢ်အဲၣ်လၢယွၤအသးဟ့ၣ်လီၤ သုအဂ့ၢ်န့ၣ်လီၤ.
9 လၢတၢ်န့ၣ်အဃိ, စးထီၣ်မုၢ်တနံၤလၢပနၢ်ဟူဘၣ်သုဂ့ၢ်လံၤလံၤ န့ၣ်ပတဆိတ့ၢ်ဘါထုကဖၣ်လၢသုဂီၢ်ဘၣ်. ပတၢ်ထုကဖၣ်လၢ သုဂီၢ်မ့ၢ်ဒ်သိးယွၤကမၤပှဲၤသုဒီးတၢ်သ့ၣ်ညါအတၢ်ဘၣ်အသးဒီး တၢ်ကူၣ်ဘၣ်ကူၣ်သ့ဒီးတၢ်သ့ၣ်ညါနၢ်ပၢၢ်ခဲလၢာ်လၢယွၤ အသးဟ့ၣ်လီၤဝဲ,
10 ဒ်သိးသုကအိၣ်မူတၢ်အိၣ်မူလၢအကြၢးဒီးကစၢ်, တၢ်အိၣ်မူလၢအမၤမုာ်အီၤသတးဒီးသုတၢ်အိၣ်မူ ကဟ့ၣ်ထီၣ်တၢ်မၤအဂ့ၤကိးကလုာ်ဒဲး, ဒီးသုကဒိၣ်ထီၣ်လၢတၢ်သ့ၣ်ညါကစၢ်ယွၤအပူၤအဂီၢ်န့ၣ်လီၤ.
11 မ်သုဘၣ်တၢ်ဟ့ၣ်ဂံၢ်ဟ့ၣ်ဘါသုလၢတၢ်စိတၢ်ကမီၤခဲလၢာ်လၢ အဟဲလၢယွၤ, လၢအအိၣ်ပှဲၤမးဒီးအလၤကပီၤ, ဒ်သိးသုတူၢ်တၢ်ကိးမံၤဒဲးလၢတၢ်သူၣ်စူၤသးစူၤအပူၤကန့ၢ် အဂီၢ်,
12 ဒီးလၢတၢ်သူၣ်ခုသးခုအပူၤစံးထီၣ်ပတြၢၤပၢ်လၢအဒုးထီၣ် ဘးလံပှၤဒ်သိးပကန့ၢ်သါဃုာ်တၢ်ဒီးပှၤစီဆှံတဖၣ်လၢတၢ်ကပီၤ အဘီအမုၢ်အပူၤန့ၣ်တက့ၢ်.
13 အဝဲထုးထီၣ်ကွံာ်ပှၤလၢတၢ်ခံးတၢ်နၤအတၢ်ပၢအဖီလာ် ဒီးစိာ်ခီပှၤဆူအဖိခွါလၢတၢ်အဲၣ်အီၤတဂၤအဘီအမုၢ် အပူၤန့ၣ်လီၤ.
14 ခီဖျိဖိခွါအံၤန့ၣ်ပဒိးန့ၢ်ဘၣ်တၢ်ပှ့ၤက့ၤပှၤ, တၢ်ပျၢ်ပတၢ်ဒဲးဘးတဖၣ်န့ၣ်လီၤ.
15 ခရံာ်မ့ၢ်ကစၢ်ယွၤလၢပထံၣ်အီၤတသ့ဘၣ်တဂၤအက့ၢ်အဂီၤလီၤ. အဝဲမ့ၢ်ယွၤအဖိဝဲၢ်ကိလၢအအိၣ်ဆိဒီးအတီၤထီန့ၢ်တၢ်ဘၣ်တ့ အဂုၤအဂၤခဲလၢာ်န့ၣ်လီၤ.
16 ခီဖျိခရံာ်န့ၣ်ယွၤတ့လီၤတၢ်ခဲလၢာ်လၢအအိၣ်လၢမူခိၣ်ဒီးလၢ ဟီၣ်ခိၣ်, တၢ်လၢပထံၣ်အီၤသ့ဒီးတၢ်လၢပထံၣ်အီၤတသ့ဘၣ် တဖၣ်အိၣ်ဃုာ်ဒီးတၢ်စိတၢ်ကမီၤဘၣ်ဃးဒီးသူၣ်ဒီးသးတဖၣ်, ကစၢ်တဖၣ်, ပှၤပၢထံပၢကီၢ်တဖၣ်, ပဒိၣ်ပပှၢ်တဖၣ်န့ၣ်လီၤ. ယွၤတ့လီၤတၢ်ခဲလၢာ်ခီဖျိခရံာ်ဒီးလၢခရံာ်အဂီၢ်လီၤ.
17 ခရံာ်အိၣ်ဆိတ့ၢ်လၢတၢ်ခဲလၢာ်အမဲာ်ညါဒီးအဝဲဒၣ်ဟံးဃာ်တၢ် ခဲလၢာ်တပူၤဃီန့ၣ်လီၤ.
18 ခရံာ်မ့ၢ်တၢ်အိၣ်ဖှိၣ်အခိၣ်ဒီးတၢ်အိၣ်ဖှိၣ်မ့ၢ်ခရံာ်အနီၢ်ခိလီၤ. အဝဲမ့ၢ်နီၢ်ခိအံၤအတၢ်မူအခီၣ်ထံးခီၣ်ဘိလီၤ. ခရံာ်မ့ၢ်ယွၤ အဖိဝဲၢ်ကိလၢအဘၣ်တၢ်ဒုးဂဲၤဆၢထၢၣ်က့ၤအီၤလၢတၢ်သံ အဆိကတၢၢ်, ဒ်သိးဒီးအဝဲကဒိၣ်စိလၢတၢ်ခဲလၢာ်အဖီခိၣ် အဂီၢ်န့ၣ်လီၤ.
19 အဂ့ၢ်ဒ်အံၤ, ဘၣ်ကစၢ်ယွၤအသးလၢအဝဲအသကဲာ်ပဝး အန့ဆၢၣ်အလၢအပှဲၤကအိၣ်လၢခရံာ်အပူၤ,
20 ဒီးခီဖျိအီၤန့ၣ်ကစၢ်ယွၤကမၤဘၣ်လိာ်က့ၤတၢ်ခဲလၢာ်ဒီး အနီၢ်ကစၢ်ဒၣ်ဝဲ, ဒီးခီဖျိဖိခွါအတၢ်ဒိးသံအသးလၢထူၣ်စုညါ အလိၤန့ၣ်, အဝဲမၤတၢ်ဃူတၢ်ဖိးဒီးတၢ်အိၣ်လၢဟီၣ်ခိၣ် ဒီးမူခိၣ်ခဲလၢာ်, ဒီးကိးက့ၤအဝဲသ့ၣ်ဆူအနီၢ်ကစၢ်ဒၣ်ဝဲအအိၣ် န့ၣ်လီၤ.
21 တဘျီန့ၣ်, သုအိၣ်ယံၤဒီးကစၢ်ယွၤဒီးသုထီဒါအီၤခီဖျိတၢ် ဆိကမိၣ်, ဒီးတၢ်ဖံးတၢ်မၤအအၢအသီတဖၣ်န့ၣ်လီၤ.
22 ဘၣ်ဆၣ်အခဲအံၤ, ခီဖျိခရံာ်အတၢ်ဒိးသံအသးလၢနီၢ်ခိနီၢ်ခီ န့ၣ်, ကစၢ်ယွၤဒုးကဲထီၣ်သုလၢအတံၤအသကိးတဖၣ်ဒ်သိး အကကိးက့ၤသုဆူအအိၣ်ဒီးလၢအဝဲအမဲာ်ညါန့ၣ်သုကစီဆှံ, တအိၣ်ဘၣ်ဒီးတၢ်ကမၣ်ဘၣ်ဒီးတၢ်ပာ်ဒ့ၣ်ပာ်ကမၣ်တသ့ဘၣ် အဂီၢ်န့ၣ်လီၤ.
23 တၢ်လၢအလီၢ်အိၣ်တမံၤန့ၣ်, မ့ၢ်ဒ်သိးသုကလဲၤဒံးတၢ်လၢတၢ် ကလုၢ်တီဒီးလၢတၢ်စူၢ်တၢ်နာ်အဂၢၢ်အကျၢၤအပူၤ, ဒီးဒ်သိးသုသုတပျဲပှၤမၤကဒံကဒါသုတၢ်မုၢ်လၢ်လၢ သုဒိးန့ၢ်တ့ၢ်သုဝဲဖဲသုနၢ်ဟူဘၣ်တၢ်သးခုကစီၣ်အခါ တဂ့ၤန့ၣ်လီၤ. ယၤစီၤပီလူးယကဲထီၣ်တ့ၢ်လံတၢ်အခ့အပှၤဘၣ် ဃးတၢ်သးခုကစီၣ်လၢအဘၣ်တၢ်စံၣ်တဲၤတဲလီၤတ့ၢ်အီၤဆူ ပှၤကိးဂၤဒဲးလၢဟီၣ်ခိၣ်ချၢအံၤန့ၣ်လီၤ.
24 အခဲအံၤယသူၣ်ခုသးခုလၢယတူၢ်ဘၣ်တၢ်လၢသုဂီၢ်အဃိ လီၤ. အဂ့ၢ်ဒ်အံၤယတၢ်တူၢ်တၢ်လၢနီၢ်ခိနီၢ်ခီအံၤန့ၣ်, မ့ၢ်ယမၤလၢထီၣ်ပှဲၤထီၣ်တၢ်လၢအအိၣ်လီၤဖျဲၣ်လီၤဟိဒံးဝဲဘၣ် ဃးခရံာ်အတၢ်တူၢ်တၢ်လၢအနီၢ်ခိ, လၢအမ့ၢ်အတၢ်အိၣ်ဖှိၣ် အဂီၢ်န့ၣ်လီၤ.
25 ကစၢ်ယွၤဒုးကဲထီၣ်ယၤလၢတၢ်အိၣ်ဖှိၣ်အခ့အပှၤလၢယကမၤ တၢ်ဂ့ၤလၢသုဂီၢ်, ဒ်သိးယကစံၣ်တဲၤတဲလီၤကစၢ်ယွၤအတၢ်ကစီၣ်လၢလၢ ပှဲၤပှဲၤန့ၣ်လီၤ.
26 အအံၤမ့ၢ်တၢ်ခူသူၣ်လၢယွၤပာ်ခူသူၣ်တ့ၢ်ဝဲလၢပှၤဟီၣ်ခိၣ်ဖိ အမဲာ်ညါလၢတၢ်အစိၤလၢအပူၤကွံာ်တဖၣ်, ဘၣ်ဆၣ်ဒီးခဲအံၤ လီၣ်ဖျါထီၣ်န့ၢ်လံအပှၤဂီၢ်မုၢ်န့ၣ်လံ.
27 ကစၢ်ယွၤအတၢ်ရဲၣ်တၢ်ကျဲၤမ့ၢ်ဒ်သိးအကလီၣ်ဖျါထီၣ်န့ၢ် အပှၤဂီၢ်မုၢ်လၢအဝဲအတၢ်ခူသူၣ်န့ၣ်လီၤ. တၢ်ခူသူၣ်လၢအအိၣ်ဒီးအလုၢ်အပှ့ၤဒီးအလၤထူးကပီၤတီၤအံၤ မ့ၢ်ဝဲလၢပှၤကိးကလုာ်ဒဲးအဂီၢ်ဒီးတၢ်ခူသူၣ်အံၤမ့ၢ်ဝဲခရံာ် အိၣ်လၢသုပူၤ, အခီပညီသုကန့ၢ်သါဃုာ်ကစၢ်ယွၤအလၤ အကပီၤန့ၣ်လီၤ.
28 ပစံၣ်တဲၤတဲလီၤခရံာ်ဒီးတဲပလီၢ်ပှၤကိးဂၤဒီးသိၣ်လိသီ လိပှၤကိးကလုာ်ဒဲးလၢတၢ်ကူၣ်သ့ခဲလၢာ်အပူၤ, ဒ်သိးပကဆှၢက့ၤပှၤတဂၤစုာ်စုာ်ဒ်ပှၤဒိၣ်တုာ်ခိၣ်ပှဲၤလၢခရံာ် အပူၤအသိးဆူကစၢ်ယွၤအအိၣ်အဂီၢ်န့ၣ်လီၤ.
29 လၢတၢ်အံၤအဂီၢ်ယဂုာ်မၤယဲလၢာ်ဂံၢ်လၢာ်ဘါဒ်ခရံာ်မၤ ဆူၣ်ထီၣ်ယသးဒိၣ်ဒိၣ်ကလဲာ်အသိးန့ၣ်လီၤ.