8
1 ပဒီပုၢ်ဝဲၢ်သ့ၣ်ဧၢ, ကစၢ်ယွၤအဘျုးအဖှိၣ်မၤတၢ်ကဲထီၣ်လိၣ်ထီၣ် တ့ၢ်ဝဲဖဲတၢ်အိၣ်ဖှိၣ်လၢကီၢ်မၤက့းဒနံပူၤတဖၣ်မနုၤတမံၤလဲၣ်န့ၣ်
ပသးအိၣ်လၢသုကသ့ၣ်ညါဘၣ်သုဝဲလီၤ.
2 အဝဲသ့ၣ်ဒိးဘၣ်တၢ်မၤကွၢ်အီၤဆူၣ်ဆူၣ်ကိၤကိၤခီဖျိတၢ် ကီတၢ်ခဲလၢအဘၣ်လဲၤခီဖျိဝဲသ့ၣ်တဖၣ်လီၤ. ဘၣ်ဆၣ်ဒီးအဝဲသ့ၣ်အတၢ်သးခုဒိၣ်ဝဲအါဝဲတုၤဒၣ်လဲာ်
ဖှီၣ်ဝဲယာ်ဝဲဒိၣ်မးသနာ်က့ဟ့ၣ်မးတၢ်အါအါဂီၢ်ဂီၢ်လၢတၢ်
သူၣ်အိၣ်သးအိၣ်အပူၤလီၤ.
3 ယစံးဘၣ်သုနီၢ်ကတုၤသ့ဝဲ, လၢအဝဲသ့ၣ်ဟ့ၣ်တၢ်ဖဲ အဟ့ၣ်ဝဲသ့, ဒီးအါန့ၢ်အဟ့ၣ်ဝဲသ့တက့ၢ်လီၤ. လၢအတၢ်သး
ဆူၣ်ဒၣ်ဝဲအပူၤန့ၣ်
4 အဝဲသ့ၣ်ဃ့ကညးပှၤဒီးဃ့န့ၢ်တၢ်အခွဲးအယာ်လၢအကမၤသကိး ဘၣ်တၢ်လၢတၢ်မၤစၢၤကစၢ်ယွၤအပှၤဂီၢ်မုၢ်ဖဲကီၢ်ယူဒၤအပူၤန့ၣ်လီၤ.
5 မ့ၢ်တၢ်လၢအဒိၣ်န့ၢ်အါန့ၢ်တၢ်လၢပမုၢ်လၢ်ပဝဲကသ့တက့ၢ်လီၤ. အဆိကတၢၢ်အဝဲသ့ၣ်ဟ့ၣ်လီၤအသးဆူကစၢ်အအိၣ်, ဒီး အန့ၣ်ဝံၤအလီၢ်ခံ, လၢကစၢ်ယွၤအတၢ်ဘၣ်အသးအပူၤ, ဟ့ၣ်လီၤအသးဆူပအိၣ်စ့ၢ်ကီးန့ၣ်လီၤ.
6 လၢတၢ်န့ၣ်အဃိ, ပသဆၣ်ထီၣ်စီၤတံတူးလၢအစးထီၣ်တၢ်မၤတမံၤအံၤတဂၤန့ၣ် အခံဒ်သိးအကမၤဒံးဝဲဒီးမၤစၢၤသုလၢသုကမၤလၢမၤပှဲၤ
တၢ်အဲၣ်အတၢ်ဖံးတၢ်မၤလီၤဆီတမံၤအံၤန့ၣ်လီၤ.
7 လၢတၢ်အိၣ်ဒီးသုခဲလၢာ်အပူၤ, လၢတၢ်စူၢ်တၢ်နာ်, တၢ်စံးတၢ်ကတိၤဒီးတၢ်သ့ၣ်ညါနၢ်ပၢၢ်အပူၤ, လၢသုတၢ် သးဆူၣ်မၤစၢၤတၢ်, ဒီးလၢသုတၢ်အဲၣ်ဘၣ်ပှၤအပူၤန့ၣ်,
သုထူးဝဲတီၤဝဲဒိၣ်မးလီၤ. ဒီးလၢတၢ်န့ၣ်အဃိပအဲၣ်ဒိးလၢသုကအိၣ်ဒီးတၢ်သးအိၣ်
အတၢ်ဟ့ၣ်တၢ်အါ, လၢတၢ်အဲၣ်အတၢ်ဖံးတၢ်မၤတမံၤအံၤ
အပူၤစ့ၢ်ကီးန့ၣ်လီၤ.
8 ယတပာ်လီၤတၢ်သိၣ်တၢ်သီဒီးတၢ်ဘျၢနီတမံၤဘၣ်. မ့မ့ၢ်, ခီဖျိယပာ်ဖျါထီၣ်ပှၤဂၤတဖၣ်သးဆူၣ်ဟ့ၣ်တၢ်ဆံးအါ အဂ့ၢ်န့ၣ်, ယဂုာ်ကျဲးစၢးဃုသ့ၣ်ညါယဲသုတၢ်အဲၣ်တၢ်ကွံ
ဒၣ်ဝဲမ့ၢ်တၢ်နီၢ်နီၢ်ဆံးအါလဲၣ်အဂ့ၢ်န့ၣ်လီၤ.
9 သုသ့ၣ်ညါပကစၢ်ယ့ၣ်ၡူးခရံာ်အဘျုးအဖှိၣ်လီၤ. အဝဲဒၣ်ထူးတီၤဆံးအါသနာ်က့, လၢသုဃိ, လၢသုဂီၢ်အဝဲဒၣ်မၤဖှီၣ်လီၤအသးဒ်သိးအကဒုး ထူးထီၣ်တီၤထီၣ်သုခီဖျိအဝဲအတၢ်ဖှီၣ်တၢ်ယာ်န့ၣ်လီၤ.
10 ယတၢ်ထံၣ်မ့ၢ်ဝဲ, ကဂ့ၤတက့ၢ်လၢသုကမၤဝံၤက့ၤတၢ်လၢ သုစးထီၣ်တ့ၢ်သုဝဲဖဲအပူၤကွံာ်တနံၣ်န့ၣ်, ခဲကနံၣ်အံၤလီၤ. သုမ့ၢ်ပှၤအဆိကတၢၢ်, တမ့ၢ်ထဲလၢတၢ်စးထီၣ်မၤတၢ်
တကပၤဧိၤဘၣ်. မ့ၢ်စ့ၢ်ကီးလၢတၢ်သးဆူၣ်မၤတၢ်တကပၤန့ၣ်လီၤ.
11 လၢတၢ်န့ၣ်အဃိ, လဲၤဆူညါဒီးမၤဝံၤက့ၤတၢ်မၤတက့ၢ်. အိၣ်ဒီးတၢ်သးဆူၣ်လၢသုကမၤဝံၤအီၤဒ်သုအိၣ်တ့ၢ်သုဝဲဒီး တၢ်သးဆူၣ်လၢသုကကူၣ်ထီၣ်ဖးလီၤလၢအဂ့ၢ်အသိးန့ၣ်
တက့ၢ်. ဒီးမၤအီၤလၢတၢ်လၢအအိၣ်ဒီးသုခဲကနံၣ်အံၤန့ၣ်
တက့ၢ်.
12 သုမ့ၢ်အိၣ်ဒီးတၢ်သးဆူၣ်ဟ့ၣ်တၢ်န့ၣ်, ကစၢ်ယွၤကတူၢ်လိာ် သုတၢ်ဟ့ၣ်, ဒ်အကြၢးဒီးတၢ်အိၣ်ဒီးသုလၢသုကဟ့ၣ်အဂီၢ်ဒီး
တမ့ၢ်လၢတၢ်တအိၣ်ဒီးသုန့ၣ်ဘၣ်လီၤ.
13 ယတဂုာ်ကျဲးစၢးမၤဖှံလီၤပှၤဂၤအတၢ်ဝံတၢ်ယိးခီဖျိ ယပာ်ထီၣ်တၢ်ဝံတၢ်ယိးတဘိၣ်လၢသုလိၤဘၣ်.
14 ဘၣ်ဆၣ်ဒီး, ဖဲဆၢကတီၢ်အဝဲအံၤန့ၣ် ဒ်သုတၢ်အိၣ်အါအါဂီၢ်ဂီၢ် အသိး, မ့ၢ်ဒၣ်တၢ်အကြၢးဝဲဘၣ်ဝဲတမံၤလၢသုကမၤစၢၤပှၤလိၣ်
ဘၣ်တၢ်တဖၣ်န့ၣ်လီၤ. တုၤနုၤတစုဖဲသုလိၣ်ဘၣ်တၢ်,
ဒီးအဝဲသ့ၣ်အတၢ်အိၣ်အါအါအဆၢကတီၢ်န့ၣ်,
အဝဲသ့ၣ်ကမၤစၢၤသုလီၤ. လၢကျဲဒ်အံၤအပူၤန့ၣ်, ပှၤခံခီယၢ်ဘးကဘၣ်တၢ်မၤစၢၤအီၤပှဲၤသိးသိးလီၤ.
15 ဒ်တၢ်ကွဲးအသးစံးဝဲအသိး, “ပှၤလၢအပာ်ဖှိၣ်တၢ်အါအါ ဂီၢ်ဂီၢ်တဂၤ, အတၢ်တအိၣ်ဝဲအါတလၢဘၣ်, ဒီးပှၤလၢ
အပာ်ဖှိၣ်တၢ်စှၤတဂၤ, အတၢ်တအိၣ်စှၤတလၢဘၣ်.”
16 ပစံးဘျုးကစၢ်ယွၤအဒိၣ်အအါလၢအဟ့ၣ်စီၤတံတူးတၢ်သး ဆူၣ်ဒ်ပှၤအသိး, လၢအကမၤစၢၤသုအဃိန့ၣ်လီၤ.
17 တမ့ၢ်ထဲအဝဲဒၣ်တူၢ်လိာ်ပတၢ်ဃ့ဘၣ်. လၢအဝဲအတၢ်သးအိၣ် ဒၣ်ဝဲအပူၤ, အသးဆူၣ်မၤစၢၤသုတုၤဒၣ်လဲာ်, ပာ်လီၤအသးလၢအကလဲၤဝဲဆူသုအိၣ်လီၤ.
18 လၢအဝဲဒၣ်အသိးန့ၣ်, ပဆှၢလီၤဃုာ်ဒီပုၢ်ဝဲၢ်တဂၤလၢအဘၣ်တၢ်ယူးယီၣ်ပာ်ကဲ အီၤလၢတၢ်အိၣ်ဖှိၣ်ကိးဖုဒဲးအပူၤ, လၢအဝဲအတၢ်ဖံး
တၢ်မၤ, တၢ်စံၣ်တဲၤတဲလီၤတၢ်သးခုကစီၣ်အဃိန့ၣ်လီၤ.
19 ဒီးလၢတၢ်ဝဲန့ၣ်အမဲာ်ညါ, အဝဲဘၣ်တၢ်ဃုထၢထီၣ်တ့ၢ်အီၤလၢတၢ်အိၣ်ဖှိၣ် တဖၣ်ဒ်သိးအကလဲၤတၢ်က့ၤတၢ်ဒီးပှၤ, ဖဲပစိာ်တၢ်အဲၣ်တၢ်ကွံအတၢ်ဖံးတၢ်မၤတမံၤအံၤ
လၢကစၢ်ယွၤအလၤကပီၤအဂီၢ်ဒီးဒ်သိးပကပာ်ဖျါ
ပတၢ်သးအိၣ်မၤစၢၤတၢ်အဆၢကတီၢ်န့ၣ်လီၤ.
20 ပအိၣ်ဒီးတၢ်ပလီၢ်ပဒီပသး, ဒ်သိးပသုတထိၣ်ဂဲၤထီၣ်တၢ်ကဒူး ကဒ့ၣ်, တၢ်တမံသူၣ်မံသးတမံၤမံၤဘၣ်ဃးဒီးကျဲလၢပသုးကျဲၤ
ကွၢ်ထွဲတၢ်သးအိၣ်အတၢ်ဟ့ၣ်အါအါဂီၢ်ဂီၢ်တမံၤအံၤတဂ့ၤ
အဂီၢ်န့ၣ်လီၤ.
21 ပတၢ်တိာ်ပာ်ကွၢ်စိမ့ၢ်ဝဲ, ပကမၤတၢ်လၢအကြၢးဝဲဘၣ်ဝဲ, တမ့ၢ်ထဲလၢကစၢ်ယွၤအမဲာ်ညါဘၣ်. မ့မ့ၢ်လၢပှၤကညီ အမဲာ်ညါစ့ၢ်ကီးန့ၣ်လီၤ.
22 လၢတၢ်န့ၣ်အဃိ, လၢအဝဲသ့ၣ်တဖၣ်အသိးအကျါန့ၣ်ပဆှၢ လီၤစ့ၢ်ကီးပဒီပုၢ်ဝဲၢ်န့ၣ်လီၤ. ပမၤကွၢ်အီၤအါစုအါဘျီဒီးထံၣ်ဘၣ်လၢထီဘိအဝဲအသး
ဆူၣ်မၤစၢၤတၢ်ဒိၣ်မးန့ၣ်လီၤ. ဒီးခဲကနံၣ်အံၤဒ်အဝဲအိၣ်လံဒီးတၢ်စူၢ်တၢ်နာ်အဒိၣ်အမုၢ်
လၢသုပူၤအသိးန့ၣ်, အဝဲအသးဆူၣ်ဒိၣ်န့ၢ်အလီၢ်လၢအကမၤ
စၢၤတၢ်န့ၣ်လီၤ.
23 မ့မ့ၢ်စီၤတံတူးန့ၣ်, အဝဲဒၣ်မ့ၢ်ယတံၤသကိးဒီးမၤဃုာ်တၢ်ဒီးယၤလၢ တၢ်မၤစၢၤသုအဂီၢ်လီၤ. မ့မ့ၢ်ဒီပုၢ်ဝဲၢ်အဂၤတဖၣ်လၢအလဲၤ
ဃုာ်ဒီးအီၤန့ၣ်, အဝဲသ့ၣ်မ့ၢ်တၢ်အိၣ်ဖှိၣ်တဖၣ်အခၢၣ်စးဒီးစိာ်
တၢ်လၤကပီၤလၢခရံာ်အဂီၢ်န့ၣ်လီၤ.
24 ပာ်ဖျါထီၣ်သုတၢ်အဲၣ်တၢ်ကွံလၢအဝဲသ့ၣ်အဖီခိၣ်, ဒ်သိးတၢ်အိၣ်ဖှိၣ်ကိးဖုဒဲးကသ့ၣ်ညါဘၣ်လီၤတံၢ်သုတၢ်အဲၣ်တၢ် ကွံအဂ့ၢ်, ဒီးသ့ၣ်ညါလၢ, ပတၢ်ကတိၤပာ်ကဖၢလၢပသး
လၢသုဂ့ၢ်န့ၣ် မ့ၢ်ဝဲတီဝဲကစီဒီန့ၣ်တက့ၢ်.