ပှၤကရံၣ်သူးဖိတဖၣ်အအိၣ်
ခံဘ့ၣ်တဘ့ၣ်
CORINTHIANS
စီၤပီလူးအလံာ်ပရၢခံဘ့ၣ်တဘ့ၣ်ဆူပှၤကရံၣ်သူးဖိတဖၣ်အအိၣ် န့ၣ်, ဘၣ်တၢ်ကွဲးအီၤဖဲတၢ်ကီတၢ်ခဲလၢအဘၣ်ဃးအဝဲအတၢ်ဘၣ် ထွဲဒီးကရံၣ်သူးအတၢ်အိၣ်ဖှိၣ်အဆၢကတီၢ်န့ၣ်လီၤ. အိၣ်ဖျါလၢပှၤတၢ်အိၣ်ဖှိၣ်ဖိတနီၤထီဒါတ့ၢ်စီၤပီလူး ဆူၣ်ဆူၣ်ကလဲာ်လီၤ. ဘၣ်ဆၣ်ဒီးအဝဲပာ်ဖျါအတၢ်ဆၢမုၢ်လၢ်အဒိၣ် အအါလၢအကဒိးန့ၢ်ဘၣ်တၢ်မၤဃူမၤဖိးက့ၤအဝဲသ့ၣ်ဒီးအီၤ, ဒီးဖဲတၢ်ဆၢမုၢ်လၢ်တမံၤအံၤဘၣ်တၢ်မၤလၢထီၣ်ပှဲၤထီၣ်အီၤ န့ၣ်, အဝဲပာ်ဖျါထီၣ်အတၢ်သးဖှံအဒိၣ်အအါလီၤ.
ဖဲလံာ်ပရၢတဘ့ၣ်အံၤအဆိကတၢၢ်တတီၤန့ၣ်, စီၤပီလူးကွၢ်ဆိကမိၣ်ကတိၤတၢ်ဘၣ်ဃးအဝဲအတၢ်ဘၣ် ထွဲဒီးတၢ်အိၣ်ဖှိၣ်ဖဲဝ့ၢ်ကရံၣ်သူး, တဲနၢ်ပၢၢ်ဝဲလၢဘၣ်မနုၤအဃိအဝဲစံးဆၢက့ၤတၢ်ဆူၣ်ဆူၣ်ကိၤ ကိၤ, တၢ်ကတိၤဒုၣ်ဒွဲၣ်ဒီးတၢ်ကတိၤထီဒါအီၤလၢတၢ်အိၣ်ဖှိၣ် အပူၤ, ဒီးပာ်ဖျါထီၣ်အတၢ်သူၣ်ဖှံသးညီလၢတၢ်ကတိၤအဆူၣ် အကိၤအဝဲအံၤဒုးအိၣ်ထီၣ်တၢ်ပီၢ်ယၢ်လီၤသးဒီးတၢ်မၤဃူမၤဖိး မၤဘၣ်လိာ်ဖိးဒ့က့ၤတၢ်အဃိန့ၣ်လီၤ. အန့ၣ်ဝံၤအလီၢ်ခံ, အဝဲဒၣ်ဃ့ကညးတၢ်အိၣ်ဖှိၣ်ဒ်သိးအကဟ့ၣ်မၤဘူၣ်တၢ်လၢ တၢ်သူၣ်ကညီၤသးကညီၤအပူၤ, ဒ်သိးအကမၤစၢၤပှၤခရံာ်ဖိလၢ အလိၣ်ဘၣ်တၢ်မၤစၢၤလၢကီၢ်ယူဒၤအပူၤတဖၣ်လီၤ. ဖဲအဆၢဒိၣ်လၢခံကတၢၢ်တဖၣ်အပူၤန့ၣ်, စီၤပီလူးကတိၤဒီဒၣ်အလီၢ်အလၤဒ်ပှၤတၢ်မၢဖိတဂၤအသိး, ထီဒါပှၤစှၤဂၤဖဲဝ့ၢ်ကရံၣ်သူးလၢအပာ်ဖျါထီၣ်တ့ၢ်အသးဒ် ပှၤတၢ်မၢဖိအမ့ၢ်အတီတဖၣ်, ဖဲအဝဲသ့ၣ်ပာ်တၢ်ကမၣ်လၢစီၤပီလူးအလိၤဒီးစံးလၢအဝဲဒၣ် မ့ၢ်တၢ်မၢဖိအဘျၣ်တဂၤန့ၣ်လီၤ.
1
1 လၢစီၤပီလူး, ယ့ၣ်ၡူးခရံာ်အပှၤတၢ်မၢဖိတဂၤခီဖျိ ကစၢ်ယွၤအတၢ်ဘၣ်အသး, ဒီးလၢပဒီပုၢ်ဝဲၢ်စီၤတံၤမသ့း,
ဆူကစၢ်ယွၤအတၢ်အိၣ်ဖှိၣ်လၢဝ့ၢ်ကရံၣ်သူး, ဒီးဆူကစၢ်ယွၤအပှၤဂီၢ်မုၢ်ခဲလၢာ်လၢအအိၣ်ဝဲသကုၤဆးဒးကီၢ် အဃါယၤ,
2 မ်ကစၢ်ယွၤ, ပပၢ်ဒီးကစၢ်ယ့ၣ်ၡူးခရံာ်ဟ့ၣ်သုတၢ်ဘျုးတၢ်ဖှိၣ် ဒီးတၢ်ဃူတၢ်ဖိးတက့ၢ်.
3 မ်ပစံးဘျုးသကိးကစၢ်ယွၤ, ဒီးပကစၢ်ယ့ၣ်ၡူးခရံာ်အပၢ်, ပၢ်လၢအသးကညီၤတၢ်, ကစၢ်ယွၤ, လၢကယဲၢ်တၢ်မၤစၢၤဟဲလၢအအိၣ်န့ၣ်တက့ၢ်.
4 အဝဲဒၣ်တိစၢၤမၤစၢၤပှၤလၢကယဲၢ်ပတၢ်ကီတၢ်ခဲအပူၤ, ဒ်သိးပမၤစၢၤပှၤဂုၤပှၤဂၤလၢအအိၣ်ဒီးတၢ်ကီတၢ်ခဲအကလုာ် ကလုာ်ကသ့ဝဲအဂီၢ်, အိၣ်ဒီးတၢ်သူတၢ်မၤစၢၤတမံၤဃီလၢ ပနီၢ်ကစၢ်ဒၣ်ပဝဲ ပဒိးန့ၢ်တ့ၢ်လၢကစၢ်ယွၤအအိၣ်န့ၣ်လီၤ.
5 ဒ်ပဒိးန့ၢ်ဃုာ်တၢ်လၢခရံာ်အတၢ်တူၢ်ဘၣ်တၢ်အါအါဂီၢ်ဂီၢ် အပူၤအသိးခီဖျိခရံာ်န့ၣ်, ပဒိးန့ၢ်ဃုာ်တၢ်လၢကစၢ်ယွၤအတၢ်မၤစၢၤအဒိၣ်အမုၢ်အပူၤ န့ၣ်လီၤ.
6 ပမ့ၢ်တူၢ်ဘၣ်တၢ်ဒီးမ့ၢ်ဝဲလၢတၢ်မၤစၢၤဒီးတၢ်အုၣ်က့ၤခီၣ်က့ၤသု အဂီၢ်, ပမ့ၢ်ဘၣ်တၢ်မၤစၢၤပှၤဒီးဖဲန့ၣ်, သုဝဲစ့ၢ်ကီးသုဘၣ်တၢ်မၤစၢၤသုဒီးသုဘၣ်တၢ်ဟ့ၣ်သုတၢ်ဂံၢ် တၢ်ဘါ, လၢသုကတူၢ်တၢ်ကီတၢ်ခဲတၢ်နးတၢ်ဖှီၣ်တကလုာ် ဃီလၢပဘၣ်တ့ၢ်ပဝဲန့ၣ်, လၢတၢ်သူၣ်စူၤသးစူၤအပူၤအဂီၢ်န့ၣ်လီၤ.
7 လၢတၢ်န့ၣ်အဃိပတၢ်မုၢ်လၢ်လၢသုပူၤန့ၣ်, တဘၣ်တၢ်မၤဟူးမၤဝးအီၤနီတစုဘၣ်. ပသ့ၣ်ညါလၢ, ဒ်သုဒိးန့ၢ်ဃုာ်တၢ်လၢပတၢ်တူၢ်ဘၣ်တၢ်တဖၣ် အပူၤအသိးန့ၣ်, သုဒိးန့ၢ်ဘၣ်ဃုာ်စ့ၢ်ကီးတၢ်လၢတၢ်မၤစၢၤလၢ ပဒိးန့ၢ်အီၤအပူၤန့ၣ်လီၤ.
8 ဒီပုၢ်ဝဲၢ်သ့ၣ်ဧၢ, ပသးအိၣ်ဒုးသ့ၣ်နီၣ်ထီၣ်သုဘၣ်ဃးဒီးတၢ်ကီ တၢ်ခဲလၢပလဲၤခီဖျိတ့ၢ်ပဝဲလၢကီၢ်အၤစံအပူၤန့ၣ်လီၤ. တၢ်ဝံ တၢ်ယိးလၢအဘၣ်တၢ်ပာ်ထီၣ်အီၤလၢပလိၤတဖၣ်န့ၣ်, ဒိၣ်ဝဲ ဃၢဝဲတုၤဒၣ်လဲာ်ပတၢ်မုၢ်လၢ်လၢပကအိၣ်မူဒံးဆူညါန့ၣ် လၢာ်ကွံာ်ဝဲစီဖ့ကလ့ၤန့ၣ်လီၤ.
9 တၢ်မၤအသးဒီးပှၤဒ်တၢ်ဟ့ၣ်လီၤတ့ၢ်ပှၤတၢ်စံၣ်ညီၣ်လၢ ပကဘၣ်သံပဝဲန့ၣ်လီၤ. ဘၣ်ဆၣ်ဒီး, တၢ်တမံၤအံၤန့ၣ်မၤတ့ၢ်အသးဒ်သိးပသုတသန့ၤပသးလၢပနီၢ် ကစၢ်ဒၣ်ဝဲတဂ့ၤ. မ့မ့ၢ်, ပကသန့ၤပသးထဲလၢကစၢ်ယွၤလၢအဒုးဂဲၤဆၢထၢၣ်သမူထီၣ် က့ၤပှၤသံတဖၣ်အဂီၢ်န့ၣ်လီၤ.
10 အဝဲဒၣ်အုၣ်က့ၤခီၣ်က့ၤတ့ၢ်ပှၤလၢတၢ်လီၤပျံၤလီၤဖုးဖး ဒိၣ်တဖၣ်လၢအဘၣ်ဃးဒီးတၢ်သံ, ဒီးကအုၣ်က့ၤခီၣ်က့ၤပှၤ, ဒီးပပာ်လီၤတ့ၢ်ပတၢ်မုၢ်လၢ်လၢအဝဲဒၣ်အပူၤလၢအဝဲဒၣ် ကအုၣ်က့ၤခီၣ်က့ၤကဒီးပှၤ,
11 မ့ၢ်လၢသုမၤစၢၤပှၤခီဖျိသုတၢ်ထုကဖၣ်လၢပဂီၢ် အဃိန့ၣ်လီၤ. လၢတၢ်န့ၣ်အဃိ, တၢ်ကမၤအသးလၢတၢ်ထုကဖၣ်အါယုၢ်လၢပဂီၢ်ကဘၣ် တၢ်စံးဆၢအီၤ, ဒီးကစၢ်ယွၤကဆိၣ်ဂ့ၤပှၤဒီးပှၤအါဒံအါဂၤ ကထုထီၣ်အကလုၢ်ဆူအအိၣ်လၢတၢ်စံးဘျုးစံးဖှိၣ်အီၤလၢ ပဂီၢ်န့ၣ်လီၤ.
12 ပပာ်ကဖၢလၢပသးမ့ၢ်လၢပသးလၢပသ့ၣ်ညါဒၣ်တၢ်, သးလၢအနီၤဖးတၢ်ဂ့ၤဒီးတၢ်အၢအဆၢဒုးနာ်နီၢ်နီၢ် ပှၤလၢပတၢ်အိၣ်မူလၢဟီၣ်ခိၣ်တဘ့ၣ်အံၤအချၢဒီးလီၤဆီ ဒၣ်တၢ်ပတၢ်ဘၣ်ထွဲဒီးသုတဖၣ်, ဘၣ်တၢ်ပၢဆှၢအီၤလၢကစၢ်ယွၤအတၢ်ဟ့ၣ်လၢအမ့ၢ် ဝဲတၢ်ကတိၤတၢ်လိၤလိၤပျီပျီဒီးတၢ်ပာ်သးသပှၢ်ပှၢ်, လၢတၢ်စိကမီၤဘၣ်ဃးယွၤအဘျုး, ဒီးတဘၣ်တၢ်ပၢဆှၢ အီၤလၢပှၤကညီအတၢ်ကူၣ်ဘၣ်ကူၣ်သ့ဘၣ်အဃိန့ၣ်လီၤ.
13 ပကွဲးတၢ်ဆူသုအိၣ်န့ၣ်မ့ၢ်ထဲတၢ်လၢသုဖးသ့, ဒီးသုနၢ်ပၢၢ် သ့န့ၣ်လီၤ. ဘၣ်ဆၣ်ဒီး ခဲကနံၣ်အံၤ, သုမ့ၢ်နၢ်ပၢၢ်ပှၤထဲတနီၤဧိၤ သနာ်က့, ယဆၢမုၢ်လၢ်လၢသုကနၢ်ပၢၢ်က့ၤပှၤလၢာ်လၢာ် ဆ့ဆ့,
14 ဒ်သိးဖဲပကစၢ်ယ့ၣ်ၡူးအမုၢ်တနံၤန့ၣ်, သုကပာ်ကဖၢလၢသုသး လၢပဃိဒ်ပကပာ်ကဖၢလၢပသးလၢသုဃိအသိးန့ၣ်လီၤ.
15 ဘၣ်ဃးဒီးတၢ်သ့ၣ်တဖၣ်အံၤခဲလၢာ်န့ၣ်, ယနာ်ယဲဒၣ်လီၤတံၢ်လီၤဆဲးတုၤဒၣ်လဲာ်ဖဲအသီခါန့ၣ်, ယပာ်လီၤတ့ၢ်ယသးလၢယကလဲၤအိၣ်သကိးသုဒ်သိးသု ကဘၣ်တၢ်ဆိၣ်ဂ့ၤသုခံဘျီအဂီၢ်န့ၣ်လီၤ.
16 အဂ့ၢ်ဒ်အံၤ, ယကူၣ်ထီၣ်ဖးလီၤတ့ၢ်ယဲလၢယကအိၣ် သကိးသုဖဲယလဲၤလၢကျဲဆူကီၢ်မၤက့းဒနံ, ဒီးအသီတဘျီကဒီးဖဲယဟဲက့ၤလၢကျဲ, ဒ်သိးယကဒိးန့ၢ်တၢ်မၤစၢၤလၢသုအိၣ်လၢယတၢ်လဲၤဆူကီၢ် ယူဒၤအဂီၢ်န့ၣ်လီၤ.
17 လၢယတၢ်ကူၣ်ထီၣ်ဖးလီၤတမံၤအံၤအပူၤန့ၣ်, မ့ၢ်ယအိၣ်ဖျါဒ်ပှၤလၢအသးကဒံကဒါတဂၤဧါ. ဖဲယကူၣ်ထီၣ် ဖးလီၤတၢ်တဖၣ်န့ၣ်, မ့ၢ်ယမၤအီၤအိၣ်ဒီးတၢ်အဲၣ်လီၤသးအတၢ်ပာ်သူၣ်ပာ်သးအိၣ် ဒီးတၢ်သးအိၣ်အၢၣ်လီၤညီတၢ်, ဒီးဂ့ၢ်လိာ်ညီတၢ်လၢတဘျီဃီ အတီၢ်ပူၤန့ၣ်ဧါ.
18 ဒ်ကစၢ်ယွၤစံးကတိၤတၢ်မ့ၢ်တၢ်တီသပှၢ်ကတၢၢ်အသိး န့ၣ်, ယတၢ်အၢၣ်လီၤအီလီၤဒီးသုတမ့ၢ်ဝဲ “မ့ၢ်” ဒီး “တမ့ၢ်”လၢတဘျီဃီအတီၢ်ပူၤဘၣ်.
19 အဂ့ၢ်ဒ်အံၤယ့ၣ်ၡူးခရံာ်, ကစၢ်ယွၤအဖိခွါတဂၤ, လၢအဘၣ်တၢ်စံၣ်တဲၤတဲလီၤအဂ့ၢ်လၢသုသိးသုကျါလၢစီၤစံလၤ, စီၤတံၤမသ့းဒီးယနီၢ်ကစၢ်ဒၣ်ယဲန့ၣ်တမ့ၢ် ပှၤတဂၤလၢ အ “မ့ၢ်” ဒီး “တမ့ၢ်” လၢတဘျီဃီအတီၢ် ပူၤဘၣ်. အခိၣ်တလိာ်, အဝဲဒၣ်မ့ၢ်ဝဲယွၤအ “မ့ၢ်” န့ၣ်လီၤ.
20 အဂ့ၢ်ဒ်အံၤ, အဝဲဒၣ်မ့ၢ်ဝဲ “မ့ၢ်” လၢယွၤတၢ်စံးပာ်ခဲလၢာ် အဂီၢ်လီၤ. လၢတၢ်တမံၤအံၤအဃိ, ခီဖျိယ့ၣ်ၡူးခရံာ်န့ၣ်ပ “အၤမ့ၣ်” ဘၣ်တၢ်ကတိၤထီၣ်ဖျဲးအီၤလၢကစၢ်ယွၤအလၤ ကပီၤအဂီၢ်လီၤ.
21 ကစၢ်ယွၤအနီၢ်ကစၢ်ဒၣ်ဝဲမ့ၢ်ပှၤလၢအဒုးအိၣ်စံာ်အိၣ်ကျၢၤ ပဝဲဒီးသုဝဲလီၤတံၢ်လီၤဆဲးလၢတၢ်ပာ်ဖှိၣ်ဃုာ်ပှၤလၢခရံာ် အပူၤလီၤ. ကစၢ်ယွၤအနီၢ်ကစၢ်ဒၣ်ဝဲမ့ၢ်ပှၤလၢအမၢလီၤ ဒီးဟ့ၣ်စိဟ့ၣ်ကမီၤတ့ၢ်ပှၤ,
22 ပာ်လီၤတ့ၢ်အတၢ်ပနီၣ်ဒၣ်ဝဲလၢပလိၤဒ်သိးကပာ်ဖျါဝဲလၢအမ့ၢ် ပကစၢ်, ဒီးဟ့ၣ်တ့ၢ်ပှၤသးစီဆှံလၢပသးပူၤဒ်တၢ်အုၣ်ခီၣ် အသးလၢတၢ်ခဲလၢာ်လၢအအိၣ်ကတဲာ်ကတီၤပာ်စၢၤဝဲလၢ ပဂီၢ်န့ၣ်လီၤ.
23 ယကိးထီၣ်ကစၢ်ယွၤဒ်သိးအကကဲထီၣ်ယပှၤအုၣ်အသး မ့ၢ်လၢ, အဝဲဒၣ်သ့ၣ်ညါယသူၣ်ယသးအဃိလီၤ. ယပာ်လီၤတ့ၢ်ယသးလၢယတလဲၤဆူဝ့ၢ်ကရံၣ်သူးန့ၣ် မ့ၢ်ဒ်သိးယသုတမၤဘၣ်ဒိဘၣ်ထံသုတဂ့ၤအဂီၢ်လီၤ.
24 ပတဂုာ်ကျဲးစၢးနဲၣ်သုလၢသုကဘၣ်စူၢ်တၢ်နာ်တၢ်ဒ်အံၤဒ် နုၤဘၣ်. ပသ့ၣ်ညါလၢသုအိၣ်ဆၢထၢၣ်သုဝဲကျၢၤကျၢၤလၢ တၢ်စူၢ်တၢ်နာ်အပူၤလီၤ. အခိၣ်တလိာ်ပမၤသကိးတၢ်ဒီးသု, လၢသုတၢ်သူၣ်ဖှံသးညီဒၣ်ဝဲအဂီၢ်န့ၣ်လီၤ.