5
1 ခဲကနံၣ်အံၤ, တၢ်စံးတ့ၢ်စဲဃဲၤဝဲဒၣ်လၢတၢ်အိၣ်မူအအၢ အသီဘၣ်ဃးဒီးမုၣ်ခွါအတၢ်ဘၣ်ထွဲအိၣ်ဝဲလၢသုသိးသုကျါ, လၢအအၢမးဝဲတုၤဒၣ်လဲာ်, ပှၤသူခိၣ်ဖိဒၣ်လဲာ်တမၤတၢ်အၢတၢ်သီဒ်န့ၣ်အသိးဘၣ်လီၤ. ယဘၣ်တၢ်စံးဘၣ်တဲဘၣ်တ့ၢ်ယၤလၢပှၤပိာ်ခွါတဂၤအိၣ်ဃုာ်ဒီး
အမိၢ်ယၢ်န့ၣ်လီၤ.
2 မ့မ့ၢ်ဒ်န့ၣ်ဒီး, သုပာ်ထီၣ်ထီသုသးကသ့ဝဲလၢကျဲဒ်လဲၣ်. အခိၣ်တလိာ်, သုကြၢးအိၣ်ပှဲၤဒီးတၢ်သူၣ်အုးသးအုး, ဒီးပှၤပိာ်ခွါလၢအမၤတၢ်ဒ်န့ၣ်အသိးတဂၤကြၢးဘၣ်တၢ်ဟီထီၣ် ကွံာ်အီၤလၢသုသိးသုကျါန့ၣ်လီၤ.
3-4 ဒီးယမ့ၢ်အိၣ်ယံၤဒီးသုလၢနီၢ်ခိနီၢ်ခီသနာ်က့, ယအိၣ်ဒံးဒၣ်လဲာ်ဒီးသုဖဲန့ၣ်လၢသူၣ်လၢသး, ဒီးလၢပကစၢ်ယ့ၣ်ၡူးအမံၤန့ၣ်ယဟ့ၣ်ထီၣ်တ့ၢ်လံတၢ်စံၣ်ညီၣ်, ဒ်ယအိၣ်ဒီးသုဖဲန့ၣ်အသိး, လၢပှၤမၤတ့ၢ်တၢ်မၤလီၤပျံၤလီၤဖုး တဂၤအံၤန့ၣ်လီၤ. ဖဲသုအိၣ်ဖှိၣ်သကိးတပူၤဃီ, ဒီးယထံၣ်လိာ်ယသးဒီးသုလၢယနီၢ်သးအပူၤ, ခီဖျိပကစၢ်ယ့ၣ်ၡူးအစိကမီၤလၢအအိၣ်ဒီးသုန့ၣ်,
5 သုကဘၣ်ဟ့ၣ်လီၤကွံာ်ပှၤတဂၤအံၤဆူမုၣ်ကီၤလံၢ်အစုပူၤ, ဒ်သိးအနီၢ်ခိကဘၣ်တၢ်မၤဟးဂီၤကွံာ်အီၤ, ဒ်သိးအသးကဘၣ်တၢ်အုၣ်က့ၤခီၣ်က့ၤအီၤဖဲကစၢ်အမုၢ် တနံၤန့ၣ်လီၤ.
6 သုပာ်ကဖၢလၢသုသးန့ၣ်, တမ့ၢ်တၢ်လၢအကြၢးဝဲဘၣ်ဝဲ ဘၣ်. သုသ့ၣ်ညါတၢ်ကတိၤတထံၣ်လၢအစံးဝဲ, “ကိၣ်မံၣ်ထဲတစဲးဖိဧိၤမၤဖးထီၣ်ကိၣ်ကမူၣ်ကျဲအသးဒီးထံ
ဒီကိၢ်လိၣ်ညါ” န့ၣ်လီၤ.
7 သုကဘၣ်ထုးကွံာ်ကိၣ်မံၣ်လီၢ်လံၤဘၣ်ဃးဒီးတၢ်ဒဲးဘး, ဒ်သိးသုကကဆှီထီၣ်လၢာ်လၢာ်ဆ့ဆ့အဂီၢ်န့ၣ်လီၤ. တုၤနုၤတစုသုကလီၤဂာ်ဒီးကိၣ်ကမူၣ်ကျဲအသးဒီးထံအသီ တကိၢ်လိၣ်လၢအတအိၣ်ဃုာ်ဒီးကိၣ်မံၣ်ဘၣ်, ဒ်ယနာ်သပှၢ်ကတၢၢ်လၢသုမ့ၢ်တၢ်နီၢ်နီၢ်အသိးန့ၣ်လီၤ.
အဂ့ၢ်ဒ်အံၤခဲကနံၣ်အံၤ, ဖဲလၢခရံာ်, ပဘူၣ်လဲၤကပာ်
အသိဖိ, ဘၣ်တၢ်လုၢ်ထီၣ်တ့ၢ်လံအီၤအဆၢကတီၢ်န့ၣ်, ပဘူၣ်လဲၤကပာ်အမူးအိၣ်ကတဲာ်ကတီၤအသးလံန့ၣ်လီၤ.
8 မ့မ့ၢ်ဒ်န့ၣ်ဒီး, မ်ပကမၤသကိးပဘူၣ်လဲၤကပာ်, တမ့ၢ်လၢကိၣ်အိၣ်ဒီးကိၣ်မံၣ်လီၢ်လံၤဘၣ်ဃးတၢ်ဒဲးဘးဒီးတၢ် အၢတၢ်သီန့ၣ်ဘၣ်. မ့မ့ၢ်, လၢကိၣ်တအိၣ်ဒီးကိၣ်မံၣ်, ကိၣ်ဘၣ်ဃးတၢ်ကဆှီဒီးတၢ်မ့ၢ်တၢ်တီန့ၣ်လီၤ.
9 လၢယလံာ်ပရၢလၢယကွဲးန့ၢ်တ့ၢ်သုအပူၤန့ၣ်, ယစံးဘၣ်တဲဘၣ်သုလၢသုသုတရ့လိာ်မၤဘၣ်ထွဲသုသးဒီးပှၤ အၢပှၤသီတဖၣ်တဂ့ၤန့ၣ်လီၤ.
10 အဝဲအံၤန့ၣ်, တမ့ၢ်ယသးအိၣ်စံးယဲပှၤသူခိၣ်ဖိတဖၣ်လၢ အအၢအသီမ့ၢ်ဂ့ၤ, အသးကွံတလၢတၢ်မ့ၢ်ဂ့ၤ,
မ့ၢ်တၢ်ဟုၣ်တၢ်ဘျၣ်မ့ၢ်ဂ့ၤ, ဘါထီၣ်တၢ်ဂီၤတၢ်ဖီၣ်မ့ၢ်ဂ့ၤန့ၣ်ဘၣ်. သုမ့ၢ်ဘၣ်ဟးဆှဲးပှၤသ့ၣ်တဖၣ်န့ၣ်ဒီး, သုကဘၣ်ဟးထီၣ်ကွံာ်လၢဟီၣ်ခိၣ်ချၢလၢာ်လၢာ်ဆ့ဆ့လီၤ.
11 တၢ်လၢယသးအိၣ်စံးန့ၣ်မ့ၢ်, သုသုတရ့လိာ်မၤထွဲသုသးဒီး ပှၤတဂၤလၢအကိးလီၤအသးလၢဒီပုၢ်ဝဲၢ်, ဘၣ်ဆၣ်ဒီးအၢဝဲသီဝဲ
မ့တမ့ၢ်အိၣ်ဒီးတၢ်သးကွံတလၢတၢ်, မ့တမ့ၢ်ဘါထီၣ်တၢ်ဂီၤတၢ်ဖီၣ်, မ့တမ့ၢ်မ့ၢ်ဝဲပှၤကတိၤသီၣ်ဝံသဲကလၤတၢ်, မ့တမ့ၢ်ပှၤအီသံးဖိ,
မ့တမ့ၢ်ဟုၣ်တၢ်ဘျၣ်တၢ်န့ၣ်လီၤ. တဘၣ်ဆ့ၣ်နီၤအီၣ်ဃုာ်ဒၣ်လဲာ်တၢ်ဒီးပှၤဒ်န့ၣ်အသိးတဂၤ
န့ၣ်တဂ့ၤ.
12-13 နီၢ်နီၢ်န့ၣ်, တမ့ၢ်ယတၢ်ဖံးတၢ်မၤလၢယကစံၣ်ညီၣ်ပှၤအိၣ်လၢတၢ်ချၢ န့ၣ်ဘၣ်. ကစၢ်ယွၤကစံၣ်ညီၣ်အဝဲသ့ၣ်လီၤ. ဘၣ်ဆၣ်ဒီးမ့ၢ်သုတကြၢးစံၣ်ညီၣ်ပှၤအိၣ်လၢသုတၢ်အိၣ်ဖှိၣ်အပူၤ
ဘၣ်ဧါ. ဒ်တၢ်ကွဲးအသးစံးဝဲအသိး, “ထုးထီၣ်ကွံာ်ပှၤအၢပှၤသီလၢသုသိးသုကျါန့ၣ်တက့ၢ်.”