3
1 မ့မ့ၢ်သုဝဲသ့ၣ်အံၤ, ယဒီပုၢ်ဝဲၢ်သ့ၣ်ဧၢ, ယကတိၤတၢ်ဒီးသုဒ်ယကတိၤတၢ်ဒီးပှၤတဖၣ်လၢအအိၣ်ဒီးသးစီဆှံ န့ၣ်တသ့ဘၣ်. ယဘၣ်ကတိၤတၢ်ဒီးသုဒ်သုဘၣ်ထွဲလၢဟီၣ်ခိၣ်
တဘ့ၣ်အံၤ, ဒ်ပှၤဖိဒံဖိသၣ်လၢခရံာ်ဖိအတၢ်စူၢ်တၢ်နာ်အပူၤ
အသိးန့ၣ်လီၤ.
2 ယဘၣ်ဒုးအီသုလၢတၢ်နုၢ်ထံလီၤ. တမ့ၢ်တၢ်အီၣ်လၢအအိၣ်ဒီးအသံးအကာ်ဘၣ်. အဂ့ၢ်မ့ၢ်လၢသုတအိၣ်ကတဲာ်ကတီၤဒံးသုသးလၢသုကဟံးန့ၢ်အီၣ် တၢ်အီၣ်လၢအအိၣ်ဒီးအသံးအကာ်ဒံးဘၣ်အဃိန့ၣ်လီၤ. ဒီးခဲကနံၣ်အံၤဒၣ်လဲာ်န့ၣ်, သုတအိၣ်ကတဲာ်ကတီၤသုသးလၢတၢ်တမံၤန့ၣ်အဂီၢ်ဒံးဘၣ်န့ၣ်လီၤ.
3 အဂ့ၢ်ဒ်အံၤ, သုအိၣ်မူဒံးသုဝဲဒ်ပှၤလၢအဘၣ်ဃးဒီးဟီၣ်ခိၣ်တဘ့ၣ် အံၤအိၣ်မူဝဲအသိးလီၤ. ဖဲတၢ်သူၣ်က့ၣ်သးကါအိၣ်လၢသုသိးသုကျါ, ဒီးသုအ့ၣ်လိာ်ဆိးက့လိာ်သုသးတဂၤဒီးတဂၤန့ၣ်, မ့ၢ်အမၤဖျါထီၣ်လၢသုဘၣ်ဃးဒီးဟီၣ်ခိၣ်တဘ့ၣ်အံၤ, ဒီးသုအိၣ်မူသုဝဲဒ်အနီၣ်ထိၣ်အိၣ်ဝဲအသိးတမ့ၢ်ဘၣ်ဧါ.
4 ဖဲသုဝဲအကျါတဂၤသုစံး, “ယမ့ၢ်စီၤပီလူးအပျဲၢ်အဘီၣ်,” ဒီးအဂၤတဂၤစံး, “ယမ့ၢ်စီၤအပီးလိၤအပျဲၢ်အဘီၣ်” န့ၣ်, မ့ၢ်သုမၤသုသးဒ်ပှၤဘၣ်ဃးဒီးဟီၣ်ခိၣ်အအံၤတဃၣ်တမ့ၢ် ဘၣ်ဧါ.
5 နီၢ်နီၢ်တခီန့ၣ်, စီၤအပီးလိၤမ့ၢ်မတၤတဂၤလဲၣ်. ဒီးစီၤပီလူးမ့ၢ်မတၤ တဂၤလဲၣ်. ပမ့ၢ်ဒၣ်ကစၢ်ယွၤအခ့အပှၤတဖၣ်, ပှၤတဖၣ်လၢအဆှၢသုဒ်သိးသုကစူၢ်တၢ်နာ်တၢ်ခီဖျိအီၤန့ၣ်လီၤ. ပဝဲတဂၤဒီးတဂၤပမၤတၢ်ဖံးတၢ်မၤလၢကစၢ်ယွၤဟ့ၣ်လီၤအီၤလၢ
အကမၤဝဲအဂီၢ်န့ၣ်လီၤ.
6 ယဲဒၣ်ယဖှံလီၤတၢ်ချံ, မ့မ့ၢ်စီၤအပီးလိၤလူတၢ်မုၢ်တၢ်ဘိလၢ အမဲထီၣ်န့ၣ်လၢထံ, ဘၣ်ဆၣ်ဒီး ပှၤလၢအဒုးဒိၣ်ထီၣ်တၢ်မုၢ်တၢ်ဘိန့ၣ်
မ့ၢ်ကစၢ်ယွၤလီၤ.
7 ပှၤတဂၤလၢအဖှံလီၤတၢ်ချံမ့ၢ်ဂ့ၤ, ပှၤတဂၤလၢအလူထံမ့ၢ်ဂ့ၤ, တမ့ၢ်တၢ်လၢအကါဒိၣ်နီၢ်နီၢ်ဘၣ်. ပှၤလၢအကါဒိၣ်န့ၣ်မ့ၢ်ကစၢ်ယွၤ, အဂ့ၢ်မ့ၢ်လၢအဝဲဒုးဒိၣ်ထီၣ်တၢ်မုၢ်တၢ်ဘိအဃိန့ၣ်လီၤ.
8 ပှၤလၢအဖှံတၢ်ချံ, ဒီးပှၤလၢအလူထံ, ပှၤခံဂၤန့ၣ်အဘၢၣ်စၢၤ, တၢ်လီၤဆီတအိၣ်ဘၣ်. ကစၢ်ယွၤကဟ့ၣ်ဘူးဟ့ၣ်လဲအဝဲသ့ၣ်
တဂၤဒီးတဂၤဒ်အကြၢးဒီးတၢ်ဖံးတၢ်မၤလၢအမၤဝဲန့ၣ်လီၤ.
9 အဂ့ၢ်ဒ်အံၤ, ပမ့ၢ်ပှၤမၤသကိးတၢ်တဖၣ်လၢအမၤဃုာ်တၢ်တပူၤဃီလၢကစၢ်ယွၤ အဂီၢ်, ဒီးသုမ့ၢ်ကစၢ်ယွၤအစံာ်လီၢ်ပှဲၤလီၢ်န့ၣ်လီၤ. သုမ့ၢ်စ့ၢ်ကီးကစၢ်ယွၤအတၢ်သူၣ်ထီၣ်လီၤ.
10 ယသူတၢ်ဟ့ၣ်လၢကစၢ်ယွၤဟ့ၣ်ယၤဒီးမၤပှၤသူၣ်ထီၣ်တၢ်လၢ အသ့အဘၣ်တဂၤအတၢ်မၤဒီးပာ်လီၤတၢ်အခီၣ်ထံး, ဒီးပှၤအဂၤတဂၤသူၣ်ထီၣ်တၢ်လၢအလိၤလီၤ. ဘၣ်ဆၣ်ဒီးပှၤတဂၤဒီးတဂၤကသူၣ်ထီၣ်ဘှီထီၣ်တၢ်ဒ်လဲၣ်ဒ်လဲၣ်
န့ၣ်ကဘၣ်ပလီၢ်ပဒီအသးလီၤ.
11 အဂ့ၢ်ဒ်အံၤ, ကစၢ်ယွၤပာ်လီၤတ့ၢ်လံယ့ၣ်ၡူးခရံာ်ဒ်တၢ်အခီၣ်ထံးထဲ တခါဧိၤ, ဒီးတၢ်ပာ်လီၤတၢ်အခီၣ်ထံးအဂုၤအဂၤတခါဧိၤဒၣ်လဲာ်တသ့ဘၣ်.
12 ပှၤတနီၤကသူထူမ့တမ့ၢ်စ့မ့တမ့ၢ်လၢၢ်လုၢ်ဒိၣ်ပှ့ၤဒိၣ်တဖၣ်လၢ အကသူၣ်ထီၣ်တၢ်လၢအခီၣ်ထံးအလိၤအဂီၢ်လီၤ. ပှၤအဂၤတဖၣ်
ကသူသ့ၣ်, မ့တမ့ၢ်တပံၢ်မ့တမ့ၢ်လီၢ်ဘိလီၤ.
13 ဒီးပှၤတဂၤဘၣ်တဂၤအတၢ်ဖံးတၢ်မၤဂ့ၤဆံးအါဆံးအါန့ၣ်, ပှၤကထံၣ်ဘၣ်ဝဲဖဲမုၢ်တနံၤလၢခရံာ်လီၣ်ဖျါထီၣ်အီၤန့ၣ်လီၤ. အဂ့ၢ်ဒ်အံၤ, ဖဲနံၤအဝဲန့ၣ်, မ့ၣ်အူကလီၣ်ဖျါထီၣ်ပှၤကိးဂၤဒဲးအတၢ်ဖံးတၢ်မၤလီၤ. မ့ၣ်အူကမၤကွၢ်အီၤဒီးပာ်ဖျါထီၣ်အဂ့ၤဝဲနီၢ်နီၢ်ဆံးအါလဲၣ်န့ၣ်လီၤ.
14 တၢ်လၢအဘၣ်တၢ်သူၣ်ထီၣ်အီၤလၢတၢ်အခီၣ်ထံးအလိၤ မ့ၢ်တဘၣ်တၢ်မၤဟးဂီၤကွံာ်အီၤလၢမ့ၣ်အူဘၣ်ဒီးပှၤသူၣ်ထီၣ်
တၢ်ဖိကဒိးန့ၢ်ဘၣ်ခိၣ်ဖးလီၤ.
15 မ့မ့ၢ်ပှၤတဂၤဂၤအတၢ်ဖံးတၢ်မၤမ့ၢ်ဘၣ်တၢ်အီၣ်ကွံာ်အီၤလၢ မ့ၣ်အူဒီး, အတၢ်ကလီၤမၢ်ကွံာ်န့ၢ်အီၤလီၤ. ဘၣ်ဆၣ်ဒီးအဝဲအနီၢ်ကစၢ်ဒၣ်ဝဲကဘၣ်တၢ်အုၣ်က့ၤခီၣ်က့ၤအီၤ, ကမၤမးအသးဒ်အပူၤဖျဲးဝဲလၢမ့ၣ်အူန့ၣ်လီၤ.
16 သုသ့ၣ်ညါသပှၢ်တၢၢ်လၢသုမ့ၢ်ယွၤအတၢ်လုၢ်ဟံၣ်, ဒီးယွၤအသးစီဆှံအိၣ်ဝဲဆိးဝဲလၢသုပူၤကစီဒီလီၤ တမ့ၢ်ဘၣ်ဧါ.
17 မ်ဒ်န့ၣ်ဒီး, ပှၤတဂၤဂၤမ့ၢ်မၤဟးဂီၤကွံာ်ယွၤအတၢ်လုၢ်ဟံၣ်ဒီး, ယွၤကမၤဟးဂီၤကွံာ်အီၤလီၤ. အဂ့ၢ်ဒ်အံၤ, ကစၢ်ယွၤအတၢ်လုၢ်ဟံၣ်န့ၣ်စီဝဲဆှံဝဲ, ဒီးသုနီၢ်ကစၢ်ဒၣ်သုဝဲသုမ့ၢ်အဝဲဒၣ်အတၢ်လုၢ်ဟံၣ်လီၤ.
18 မတၤတဂၤမးတကြၢးလီလီၤက့ၤအသးဒၣ်ဝဲဘၣ်. ပှၤလၢသုကျါတဂၤဂၤမ့ၢ်ဆိကမိၣ်လီၤအသးလၢအမ့ၢ်
ပှၤကူၣ်ဘၣ်ကူၣ်သ့ခီဖျိဟီၣ်ခိၣ်တဘ့ၣ်အံၤအနီၣ်ထိၣ်ဒီး, အဝဲဒၣ်ကြၢးကဲထီၣ်ပှၤအသးတဆးတဂၤ, ဒ်သိးအဝဲဒၣ်ကကဲထီၣ်ပှၤကူၣ်ဘၣ်ကူၣ်သ့နီၢ်နီၢ်တဂၤအဂီၢ်န့ၣ်လီၤ.
19 အဂ့ၢ်ဒ်အံၤ, တၢ်လၢဟီၣ်ခိၣ်တဘ့ၣ်အံၤထံၣ်လၢအမ့ၢ်တၢ်ကူၣ်ဘၣ် ကူၣ်သ့န့ၣ်, လၢကစၢ်ယွၤအမဲာ်ညါမ့ၢ်တၢ်ကလီကလီန့ၣ်လီၤ. ဒ်တၢ်ကွဲးအသးစံးဝဲအသိးန့ၣ်, “ကစၢ်ယွၤဖီၣ်န့ၢ်ပှၤကူၣ်ဘၣ်
ကူၣ်သ့, လၢအဝဲသ့ၣ်အတၢ်ကူၣ်တၢ်ဆးအပူၤလီၤ.”
20 ဒီးတၢ်ကွဲးအသးအဂၤတတီၤစံးဝဲ, “ကစၢ်သ့ၣ်ညါလၢပှၤကူၣ်ဘၣ်ကူၣ်သ့အတၢ်ဆိကမိၣ်မ့ၢ်တၢ်လၢ အလုၢ်တအိၣ်ပှ့ၤတအိၣ်ဘၣ်န့ၣ်လီၤ.”
21 လၢတၢ်န့ၣ်အဃိ, မတၤတဂၤမးတကြၢးကတိၤပာ်ကဖၢလၢ အသးဘၣ်ဃးဒီးတၢ်လၢပှၤကညီမၤဝဲသ့န့ၣ်ဘၣ်. အနီၢ်နီၢ်န့ၣ်,
တၢ်ခဲလၢာ်ခဲဆ့မ့ၢ်ဒၣ်သုတၢ်
22 စီၤပီလူး, စီၤအပီးလိၤ, စီၤပ့းတရူး, ဟီၣ်ခိၣ်တဘ့ၣ်အံၤ, တၢ်မူဒီးတၢ်သံ, ဆၢကတီၢ်ခဲအံၤဒီးခါဆူညါ, တၢ်သ့ၣ်တဖၣ်အံၤခဲလၢာ်မ့ၢ်သုတၢ်,
23 ဒီးသုမ့ၢ်ခရံာ်အတၢ်, ဒီးခရံာ်မ့ၢ်ယွၤအတၢ်လီၤ.