ပှၤကရံၣ်သူးဖိတဖၣ်အအိၣ်
အဆိကတၢၢ်တဘ့ၣ်
CORINTHIANS
စီၤပီလူးအလံာ်ပရၢဆူပှၤကရံၣ်သူးဖိတဖၣ်ဘၣ်တၢ်ကွဲးအီၤဒ်သိးအကမၤစၢၤတၢ်ကွၢ်ဆၢၣ်မဲာ်တၢ်ကီတၢ်ခဲဘၣ် ဃးပှၤခရံာ်ဖိအတၢ်အိၣ်မူဒီးတၢ်စူၢ်တၢ်နာ်လၢအအိၣ်ထီၣ်ဝဲဒၣ်ဖဲ တၢ်အိၣ်ဖှိၣ်လၢစီၤပီလူးသူၣ်ထီၣ်တ့ၢ်ဝဲလၢဝ့ၢ်ကရံၣ်သူးအပူၤအဂီၢ် န့ၣ်လီၤ. ဖဲဆၢကတီၢ်အဝဲန့ၣ်ကရံၣ်သူးမ့ၢ်ပှၤကြံးခ်ဖိအဝ့ၢ်ဖးဒိၣ်တဖျၢၣ် လၢအဘၣ်ဃးဒီးဟီၣ်ခိၣ်ဒီဘ့ၣ်, ဒီးမ့ၢ်ကီၢ်အဃါယၤဘၣ်ဃးဒီးရိမ့ၤအတၢ်ပၢ, အဝ့ၢ်ခိၣ်န့ၣ်လီၤ. ဝ့ၢ်အံၤအမံၤဟူလၢအတၢ်ဂုၤထီၣ်ပသီထီၣ်လၢ တၢ်ကူၣ်တၢ်ကၤတကပၤ, အတၢ်ဆဲးတၢ်လၤလၢတၢ်ပာ်ထီၣ်ထီသးလၢအဃိသ့ဝဲ, အတၢ်အိၣ်မူလၢအလီၤရၢၢ်လီၤစၢၢ်လၢအဘၣ်ကူဘၣ်ဂာ်သကုၤတၢ်ပူၤ, ဒီးအတၢ်ဘူၣ်တၢ်ဘါအကလုာ်ကလုာ်တဖၣ်အဃိန့ၣ်လီၤ.
ပှၤတၢ်မၢဖိတဂၤအံၤအတၢ်သးစၢၢ်ဆၢမိၢ်ပှၢ်မ့ၢ်ဝဲတၢ်ကီ တၢ်ခဲဒ်တၢ်လီၤမုၢ်လီၤဖး, တၢ်အိၣ်မူတဂ့ၤတဝါလၢတၢ်အိၣ်ဖှိၣ်အပူၤ, ဒီးတၢ်သံကွၢ်ဘၣ်ဃးမုၣ်ခွါအတၢ်ဘၣ်ထွဲဒီးတၢ်ထီၣ်ဖိန့ၢ်မါ, တၢ်ဂ့ၢ်ဘၣ်ဃးပှၤကညီအခီၣ်ၡ့ၣ်, တၢ်အိၣ်ဖှိၣ်အတၢ်ပၢတၢ်ပြးအဂ့ၢ် အဝီ, သးစီဆှံအတၢ်ဟ့ၣ်တဖၣ်ဒီးတၢ်ဂဲၤဆၢထၢၣ်သမူထီၣ်က့ၤ န့ၣ်လီၤ. လၢတၢ်ထံၣ်အဒိၣ်အယိာ်မးအပူၤအဝဲဒၣ်ပာ်ဖျါထီၣ်ဝဲလၢ တၢ်သးခုကစီၣ်အဝဲအံၤကတိၤတၢ်ဘၣ်ဃးဒီးတၢ်သံကွၢ်လၢတၢ်ဂ့ၢ်တၢ်ကျိၤ လၢထးတဖၣ်အံၤအဂ့ၢ်ဒ်လဲၣ်န့ၣ်လီၤ.
အဆၢဒိၣ် ၁၃ လၢအပာ်ဖျါထီၣ်တၢ်အဲၣ်တၢ်ကွံဒ်အမ့ၢ်ကစၢ်ယွၤ အတၢ်ဟ့ၣ်အဂ့ၤကတၢၢ်ဆူအပှၤဂီၢ်မုၢ်တဖၣ်အအိၣ်န့ၣ်, ဘၣ်တဘၣ်ကမ့ၢ်ဝဲတၢ်ကွဲးအတီၤလၢအဘၣ်တၢ်သ့ၣ်ညါအီၤအဂ့ၤ ကတၢၢ်တတီၤလၢလံာ်တဘ့ၣ်အံၤအပူၤသ့ၣ်သ့ၣ်လီၤ.
1
1 လၢစီၤပီလူး, လၢအဘၣ်တၢ်ကိးအီၤခီဖျိကစၢ်ယွၤအတၢ်ဘၣ် အသး, ဒ်သိးအကကဲထီၣ်ယ့ၣ်ၡူးခရံာ်အတၢ်မၢဖိတဂၤ, ဒီးပဒီပုၢ်ဝဲၢ်စီၤစိၤစသ့ၣ်,
2 ဆူကစၢ်ယွၤအတၢ်အိၣ်ဖှိၣ်လၢအအိၣ်ဝဲဖဲဝ့ၢ်ကရံၣ်သူး, ဆူကယဲၢ်ပှၤလၢအဘၣ်တၢ်ကိးအီၤဒ်သိးအကကဲထီၣ်ကစၢ်ယွၤ အပှၤဂီၢ်မုၢ်စီဆှံ, လၢအဘၣ်ဃးဒီးအီၤလၢတၢ်ပာ်ဖှိၣ်ဃုာ်သး တပူၤဃီဒီးယ့ၣ်ၡူးခရံာ်အပူၤ, ပၣ်ဃုာ်ဒီးကယဲၢ်ပှၤအိၣ်လၢတၢ်လီၢ်ကိးပူၤဒဲးလၢအဘူၣ်ထီၣ်ဘါ ထီၣ်ပကစၢ်ယ့ၣ်ၡူးခရံာ်, အဝဲသ့ၣ်အကစၢ်ဒီးပကစၢ်တဂၤ, အအိၣ်
3 မ်ပပၢ်ကစၢ်ယွၤဒီးကစၢ်ယ့ၣ်ၡူးခရံာ်ဟ့ၣ်သုတၢ်ဘျုးတၢ်ဖှိၣ်, ဒီးတၢ်ဃူတၢ်ဖိးတက့ၢ်.
4 ထီဘိန့ၣ်, ယစံးဘျုးစံးဖှိၣ်ယကစၢ်ယွၤလၢသုဂီၢ်အဂ့ၢ်မ့ၢ်လၢ တၢ်ဘျုးတၢ်ဖှိၣ်လၢအဝဲဒၣ်ဟ့ၣ်တ့ၢ်သုခီဖျိယ့ၣ်ၡူးခရံာ် အဃိန့ၣ်လီၤ.
5 အဂ့ၢ်ဒ်အံၤ, လၢတၢ်ပာ်ဖှိၣ်ဃုာ်သုသးတဖျၢၣ်ဃီဒီးခရံာ်အပူၤ န့ၣ်, သုထူးထီၣ်တီၤထီၣ်တ့ၢ်လၢတၢ်ကိးမံၤဒဲးအပူၤ, ဃုာ်ဒီးတၢ်စံးတၢ်ကတိၤခဲလၢာ်, ဒီးတၢ်သ့ၣ်ညါနၢ်ပၢၢ်ခဲလၢာ် န့ၣ်လီၤ.
6 တၢ်ကစီၣ်ဘၣ်ဃးခရံာ်အဂ့ၢ်အိၣ်သူၣ်လီၤအသးကျၢၤကျၢၤလၢ သုပူၤတုၤဒၣ်လဲာ်
7 ဖဲသုအိၣ်ခိးတၢ်ကလီၣ်ဖျါထီၣ်ပကစၢ်ယ့ၣ်ၡူးခရံာ်အဖၢမုၢ် န့ၣ်တၢ်ဆိၣ်ဂ့ၤဆိၣ်ဝါထဲတမံၤဒၣ်လဲာ်, သုတလီၤတိၢ်လၢသုကဒိး န့ၢ်အီၤန့ၣ်ဘၣ်.
8 အဝဲဒၣ်ကဒုးအိၣ်ဂၢၢ်အိၣ်ကျၢၤစ့ၢ်ကီးသုတုၤလၢအကတၢၢ်, ဒ်သိးဖဲပကစၢ်ယ့ၣ်ၡူးခရံာ်အမုၢ်တနံၤန့ၣ်, သုကအိၣ်ပူၤပူၤဖျဲးဖျဲးဒီးတၢ်သရူးကမၣ်အဂီၢ်န့ၣ်လီၤ.
9 ကစၢ်ယွၤလၢအကိးဃီၤသုဒ်သိးသုကရ့လိာ်မုာ်လိာ်သုသး ဒီးအဖိခွါပကစၢ်ယ့ၣ်ၡူးခရံာ်န့ၣ်, ကြၢးဘၣ်တၢ်နာ်န့ၢ်အီၤလီၤ.
10 လၢပကစၢ်ယ့ၣ်ၡူးခရံာ်အမံၤအဃိန့ၣ်, ယဃ့ကညးသုဝဲကိးဒံကိးဂၤဒဲး, ပုၢ်သ့ၣ်ဝဲၢ်သ့ၣ်ဧၢ, ဒ်သိးသုကအၢၣ်လီၤတူၢ်လိာ်တဂၤဒီးတဂၤအတၢ်စံးတၢ်ကတိၤ, ဒီးသုတအိၣ်ဒီးတၢ်လီၤမုၢ်လီၤဖးလၢသုသိးသုကျါတဂ့ၤန့ၣ်လီၤ. ပာ်ဖှိၣ်ထီၣ်သုသးတဖျၢၣ်ဃီလၢာ်လၢာ်ဆ့ဆ့, အိၣ်ဒီးတၢ်ဆိကမိၣ်တမံၤဃီ, ဒီးတၢ်တိာ်ပာ်တမံၤဃီန့ၣ်တက့ၢ်.
11 အဂ့ၢ်ဒ်အံၤ, ပှၤလၢနီၢ်ကျိးအ့ၤအဒူၣ်ဖိထၢဖိအပူၤတနီၤ စံးဘၣ်တဲဘၣ်တ့ၢ်ယၤဖျါဖျါလၢ တၢ်အ့ၣ်လိာ်ဆိးက့အိၣ်ဝဲဒၣ်လၢသုသိးသုကျါလီၤ. ယဒီပုၢ်ဝဲၢ်သ့ၣ်ဧၢ,
12 တၢ်လၢယအဲၣ်ဒိးစံးန့ၣ်မ့ၢ်ဒ်အံၤလီၤ. သုဝဲတဂၤဒီးတဂၤသုစံး, “ယဲယဘၣ်ဃးဒီးစီၤပီလူး,” မ့တမ့ၢ်, “ယဲယဘၣ်ဃးဒီး စီၤအပီးလိၤ,” မ့တမ့ၢ်, “ယဲယဘၣ်ဃးဒီးစီၤပ့းတရူး,” မ့တမ့ၢ်, “ယဲယဘၣ်ဃးဒီးခရံာ်” န့ၣ်လီၤ.
13 ခရံာ်ဘၣ်တၢ်နီၤဖးလီၤအီၤဆူကရူၢ်တဖၣ်လံ, ပှၤလၢအသံလၢသုဂီၢ်လၢထူၣ်စုညါအလိၤန့ၣ်, မ့ၢ်ဝဲစီၤပီလူးဧါ, သုဘၣ်တၢ်ဒိးဘျၢသုလၢစီၤပီလူးအမံၤအပူၤဧါ.
14 ယစံးဘျုးကစၢ်ယွၤလၢယတဘျၢဘၣ်သုဝဲအဂၤနီတဂၤဘၣ် ဒီးယဘျၢဘၣ်ထဲစီၤကြံစပူၤဒီးစီၤကါယူးအဃိန့ၣ်လီၤ.
15 လၢတၢ်န့ၣ်အဃိပှၤစံးလၢသုဘၣ်တၢ်ဘျၢသုလၢယမံၤ အပူၤန့ၣ်တသ့နီတဂၤဘၣ်.
16 (အိ, မ့ၢ်လီၤ. ယဘျၢဘၣ်စ့ၢ်ကီးစီၤစတ့းဖနၣ်ဒီးအဒူၣ်ဖိထၢဖိ လီၤ. မ့မ့ၢ်, လၢအဝဲသ့ၣ်အမဲာ်ညါ, ယဘျၢဘၣ်ဒံးယဲပှၤအဂၤတဖၣ် ကစီဒီဧါ, တဘျၢဘၣ်လဲၣ်န့ၣ်, ယတသ့ၣ်နီၣ်ဘၣ်.)
17 ခရံာ်တဆှၢလီၤဒီးမၢလီၤယၤဒ်သိးယကဒိးဘျၢတၢ်ဘၣ်. မ့ၢ်အဝဲဒၣ်ဆှၢလီၤဒီးမၢလီၤယၤဒ်သိးယကစံၣ်တဲၤတဲလီၤတၢ် သးခုကစီၣ်, ဒီးယကစံၣ်တဲၤတဲလီၤအီၤတအိၣ်ဒီးတၢ်သူပှၤကညီအတၢ် ကူၣ်ဘၣ်ကူၣ်သ့ဘၣ်. အဂ့ၢ်မ့ၢ်ဒ်သိးတၢ်စိတၢ်ကမီၤဘၣ်ဃးဒီးခရံာ်အတၢ်သံလၢထူၣ်စု ညါအလိၤန့ၣ်သုတဘၣ်တၢ်ဒုးလီၤမၢ်ကွံာ်အီၤတဂ့ၤန့ၣ်လီၤ.
18 အဂ့ၢ်ဒ်အံၤ, လၢပှၤလီၤမၢ်တဖၣ်အဂီၢ်န့ၣ်, တၢ်ကစီၣ်ဘၣ်ဃးခရံာ်အတၢ်သံလၢထူၣ်စုညါအလိၤတမ့ၢ်တၢ်လၢ အခီပညီအိၣ်ဘၣ်. မ့မ့ၢ်, လၢပဝဲပှၤဒိးန့ၢ်တၢ်အုၣ်က့ၤခီၣ်က့ၤတဖၣ် အဂီၢ်န့ၣ်, ခရံာ်အတၢ်သံလၢထူၣ်စုညါအလိၤမ့ၢ်ဝဲကစၢ်ယွၤအစိ ကမီၤလီၤ.
19 အဂ့ၢ်ဒ်အံၤတၢ်ကွဲးအသးစံးဝဲ,
“ယကမၤဟးဂီၤကွံာ်ပှၤကူၣ်သ့အတၢ်ကူၣ်ဘၣ်ကူၣ်သ့ဒီး တၢၤကွံာ်ပှၤသ့လံာ်သ့လဲၢ်တဖၣ်အတၢ်သ့ၣ်ညါနၢ်ပၢၢ်န့ၣ် လီၤ.”
20 မ့မ့ၢ်ဒ်န့ၣ်ဒီး, ပှၤကူၣ်ဘၣ်ကူၣ်သ့မ့ၢ်ဂ့ၤ, ပှၤသ့လံာ်သ့လဲၢ်မ့ၢ်ဂ့ၤ, မ့တမ့ၢ်ဘၣ်ဒီးပှၤသ့ဂ့ၢ်လိာ်ဘှီလိာ်တၢ်လၢဟီၣ်ခိၣ်တဘ့ၣ်အံၤ အပူၤန့ၣ်အိၣ်ဝဲဖဲလဲၣ်ပူၤလဲၣ်. ကစၢ်ယွၤဒုးနဲၣ်တ့ၢ်ဝဲဒၣ်လၢဟီၣ်ခိၣ်တဘ့ၣ်အံၤအတၢ်ကူၣ်ဘၣ်ကူၣ် သ့မ့ၢ်ဒၣ်တၢ်သူၣ်တဆးသးတဆးန့ၣ်လီၤ.
21 အဂ့ၢ်ဒ်အံၤ, လၢအဝဲဒၣ်အတၢ်ကူၣ်ဘၣ်ကူၣ်သ့အပူၤန့ၣ်, ကစၢ်ယွၤမၤဝဲဒ်သိးပှၤဟီၣ်ခိၣ်ဖိအသုတသ့ၣ်ညါအီၤခီဖျိ အဝဲသ့ၣ်အတၢ်ကူၣ်ဘၣ်ကူၣ်သ့ဒၣ်ဝဲတဂ့ၤ. မ့မ့ၢ်ခီဖျိ, တၢ်ကစီၣ်လၢပစံၣ်တဲၤတဲလီၤ, လၢပှၤစံးလၢအလၢအပှဲၤဒီးတၢ်သူၣ်တဆးသးတဆးန့ၣ်, ကစၢ်ယွၤပာ်လီၤအသးလၢအကအုၣ်က့ၤခီၣ်က့ၤပှၤစူၢ်က့ၤနာ်က့ၤ တၢ်တဖၣ်လီၤ.
22 လၢတၢ်အုၣ်အသးအဂီၢ်န့ၣ်, ပှၤယူဒၤဖိတဖၣ်သးအိၣ်ဒိးန့ၢ်ဘၣ် တၢ်လီၤလး, မ့မ့ၢ်ပှၤကြံးခ် ဖိတဖၣ်ကွၢ်ဃုတၢ်ကူၣ်ဘၣ်ကူၣ်သ့လီၤ.
23 မ့မ့ၢ်ပဝဲသ့ၣ်တဖၣ်အံၤ, ပစံၣ်တဲၤတဲလီၤခရံာ်လၢအဘၣ်တၢ်ပျၤထီအီၤလၢထူၣ်စုညါ အလိၤ, တၢ်ကစီၣ်လၢအမၤဆါပှၤယူဒၤဖိတဖၣ်အသး, ဒီးမ့ၢ်တၢ်ကလီကလီလၢပှၤကလုာ်ဂၤသ့ၣ်တဖၣ်အဂီၢ်န့ၣ်လီၤ.
24 ဘၣ်ဆၣ်ဒီးလၢပှၤလၢကစၢ်ယွၤကိးတ့ၢ်အီၤတဖၣ်, ပှၤယူဒၤဖိဒီးပှၤကလုာ်ဂၤခံဖုလၢာ်အဂီၢ်န့ၣ်, တၢ်ကစီၣ်အဝဲအံၤ မ့ၢ်ခရံာ်လၢအမ့ၢ်ကစၢ်ယွၤအစိကမီၤဒီးကစၢ်ယွၤအတၢ်ကူၣ်ဘၣ် ကူၣ်သ့န့ၣ်လီၤ.
25 အဂ့ၢ်ဒ်အံၤ, တၢ်လၢအအိၣ်ဖျါလီၤဂာ်ဒ်အမ့ၢ်ကစၢ်ယွၤအတၢ်သး တဆးန့ၣ်ကူၣ်ဘၣ်ကူၣ်သ့ဒိၣ်န့ၢ်ပှၤကညီအတၢ်ကူၣ်ဘၣ်ကူၣ်သ့, ဒီးတၢ်လၢအအိၣ်ဖျါလီၤဂာ်ဒ်အမ့ၢ်ကစၢ်ယွၤအတၢ်ဂံၢ်စၢ်ဘါစၢ်န့ၣ် အဂံၢ်အဘါဆူၣ်န့ၢ်ပှၤကညီအဂံၢ်အဘါလီၤ.
26 ခဲကနံၣ်အံၤ, ယဒီပုၢ်ဝဲၢ်သ့ၣ်ဧၢ, ဖဲကစၢ်ယွၤကိးသုအခါ, သုမ့ၢ်တ့ၢ်တၢ်မနုၤလဲၣ်န့ၣ် သ့ၣ်နီၣ်ထီၣ်သုဝဲတက့ၢ်. လၢပှၤကညီအတၢ်ထံၣ်တကပၤန့ၣ်သုဝဲ လၢအကူၣ်ဘၣ်ကူၣ်သ့မ့ၢ်ဂ့ၤ, အဂံၢ်ဆူၣ်ဘါဆူၣ်မ့ၢ်ဂ့ၤ, အိၣ်ဒီးအလီၢ်ဒိၣ်လၤထီမ့ၢ်ဂ့ၤအိၣ်ထဲစှၤဂၤလီၤ.
27 ကစၢ်ယွၤဃုထၢဝဲဒ်အတၢ်တိာ်ပာ်အိၣ်ဝဲအသိး, တၢ်လၢပှၤဟီၣ်ခိၣ်ဖိထံၣ် လၢအတအိၣ်ဒီးတၢ်သူၣ်ဆးသးဆးဒ်သိးအကမၤမဲာ်ဆှးပှၤကူၣ် ဘၣ်ကူၣ်သ့, ဒီးအဝဲဒၣ်ဃုထၢတၢ်လၢပှၤဟီၣ်ခိၣ်ဖိထံၣ်လၢ အဂံၢ်စၢ်ဘါစၢ်, ဒ်သိးအကမၤမဲာ်ဆှးပှၤဂံၢ်ဆူၣ်ဘါဆူၣ်အဂီၢ် န့ၣ်လီၤ.
28 အဝဲဒၣ်ဃုထၢတၢ်လၢပှၤဟီၣ်ခိၣ်ဖိကွၢ်တလီၤ, ဒီးပာ်လၢအတဂိာ် တသီၣ်, ဒီးဆိကမိၣ်လၢအတမ့ၢ်တၢ်နီတမံၤဘၣ်န့ၣ် ဒ်သိးအကမၤ ဟးဂီၤတၢ်လၢပှၤဟီၣ်ခိၣ်ဖိဆိကမိၣ်အမ့ၢ်တၢ်အကါဒိၣ်န့ၣ်လီၤ.
29 အဝဲအံၤမ့ၢ်ဒ်သိးမတၤတဂၤမးကတိၤဒိၣ်ကတိၤသွါအသးလၢ ကစၢ်ယွၤအမဲာ်ညါသုတသ့တဂ့ၤအဂီၢ်န့ၣ်လီၤ.
30 မ့မ့ၢ်ကစၢ်ယွၤပာ်ဖှိၣ်တ့ၢ်သုဒီးယ့ၣ်ၡူးခရံာ်, ဒီးကစၢ်ယွၤဒုးကဲယ့ၣ်ၡူးလၢပတၢ်ကူၣ်ဘၣ်ကူၣ်သ့န့ၣ်လီၤ. ခီဖျိခရံာ်န့ၣ်ပဘၣ်တၢ်မၤဘၣ်လိာ်ဖိးဒ့ပှၤဒီးယွၤ, ပကဲထီၣ်ယွၤအပှၤစီဆှံတကလုာ်ဒီးဘၣ်တၢ်ဒုးထူၣ်ဖျဲးထီၣ်ကွံာ်ပှၤလီၤ.
31 လၢတၢ်န့ၣ်အဃိ, ဒ်တၢ်ကွဲးအသးစီဆှံစံးဝဲအသိးန့ၣ် “ပှၤတဂၤလၢ်လၢ်လၢအအဲၣ်ဒိးကတိၤဒိၣ်ကတိၤသွါတၢ်န့ၣ် ကဘၣ်ကတိၤဒိၣ်ကတိၤသွါတၢ်ဘၣ်ဃးတၢ်လၢကစၢ်မၤတ့ၢ်ဝဲန့ၣ် လီၤ.”