8
1 ဒီးယအိၣ်ဒီးတၢ်ထံၣ်လၢညါခီတမံၤလၢ တၢ်စိတၢ်ကမီၤခဲလၢာ်အယွၤန့ၣ်လီၤ. လၢတၢ်ထံၣ်လၢညါခီအံၤအပူၤယထံၣ်တၤသၣ်မံတနာ်န့ၣ်လီၤ.
2 ယွၤသံကွၢ်ယၤ, စီၤဧၤမိၣ်ဧၢ, နထံၣ်တၢ်မနုၤလဲၣ်. ဒီးယစံးဆၢ တၤသၣ်မံတနာ်” လီၤ. ဒီးယွၤစံးဝဲဒၣ်, တၢ်အကတၢၢ်တုၤဃီၤလံလၢယပှၤဂီၢ်မုၢ်အံၣ်စရ့လးအဂီၢ်န့ၣ်လံ. ယတပျဲပူၤလၢၤဘၣ်အီၤဘၣ်.
3 လၢမုၢ်တနံၤန့ၣ်တၢ်သးဝံၣ်တဖၣ်လၢနူၢ်ဧိၤစီၤဧိၤ အပူၤကကဲထီၣ်တၢ်သူၣ်အုးသးအုးအတၢ်ဟီၣ်တၢ်ယၢၤတဖၣ်န့ၣ်လီၤ. တၢ်သံစိၣ်တဖၣ်ကအိၣ်လၢတၢ်လီၢ်ကိးပူၤဒဲး, ဒီးကဘၣ်တၢ်စူးကွံာ်အီၤကစုဒုန့ၣ်လီၤ.
4 ကနၣ်တၢ်အံၤတက့ၢ်, သုဝဲပှၤလၢအယီၢ်တံၢ်ပှၤလိၣ်ဘၣ်တၢ်မၤ စၢၤဒီးကျဲးစၢးမၤဟးဂီၤကွံာ်ပှၤဖှီၣ်ဖိယာ်ဖိလၢကီၢ်ပူၤသ့ၣ်ဧၢ,
5 သုစံးလီၤသုသး, လၢပကဆါဘၣ်ပဘုဧိၤဟုဧိၤအဂီၢ်န့ၣ် ပခိးတုၤမုၢ်နံၤစီဆှံတဖၣ်လၢာ်ကွံာ်တကဲလၢၤဘၣ်. ဒီးလၢပကဆါဘၣ်ကဒီးပတၢ်အဂီၢ်ဆံးယံာ်မး မုၢ်အိၣ်ဘှံးနံၤကလဲၤပူၤကွံာ်လဲၣ်. အန့ၣ်တစုပကမၤအါထီၣ်တၢ်အပှ့ၤ, သူနီၣ်ဃီၣ်လီတၢ်, စီၤပီၢ်တတီလၢပ ကလီန့ၢ်ပှၤပှ့ၤတၢ်ဖိသ့ၣ်တဖၣ်န့ၣ်လီၤ.
6 ဒီးပဆါဘုကၠူၣ်လၢတဂီာ်တသီၣ်ဘၣ်လၢအပှ့ၤအါအါကသ့ဝဲ, ပကဃုထံၣ်ပှၤဖှီၣ်ဖိယာ်ဖိလၢအလိးက့ၤအကမၢ်ထဲကဟ့ၣ်ဝဲ အခီၣ်ဖံးတစူၣ်အပှ့ၤဒၣ်လဲာ်တန့ၢ်ဘၣ်, ဒီးပကပှ့ၤအီၤဒ်ကုၢ်တဂၤအသိးန့ၣ်လီၤ.
7 ဒီးအံၣ်စရ့လးအကစၢ်ယွၤမၤတၢ်ဆိၣ်ဒီးစံး, ယတသးပ့ၤနီၣ်အဝဲသ့ၣ်အတၢ်မၤအအၢအသီတဖၣ်နီတဘျီဘၣ်.
8 ဒီးဟီၣ်ခိၣ်ကဟူးဝးဆှဲးဆှိးဝဲလၢတၢ်န့ၣ်အဃိဒီးပှၤအိၣ်ဝဲလၢ ကီၢ်ပူၤခဲလၢာ်ကအိၣ်လၢတၢ်မိၣ်တၢ်မးအပူၤလီၤ. ထံကီၢ်ဒီတဘ့ၣ်ကဂံၤဂုၤအသးဒီးကစံၣ်စုးဒီးကလီၤသွီဝဲဒ်ထံကျိ နံၤလါလၢကီၢ်အဲၤကူပတူးအသိးန့ၣ်လီၤ.
9 ဒီးလၢမုၢ်တနံၤန့ၣ်, ယကဒုးလီၤနုာ်မုၢ်လၢမုၢ်ထူၣ်အကတီၢ်ဒီး မၤခံးလီၤဟီၣ်ခိၣ်ဖဲမုၢ်ဆါခီစီၣ်ဝဲၤကဲၤလီၤ. ယၤ, တၢ်စိတၢ်ကမီၤခဲလၢာ်အယွၤစံးဝဲဒၣ်.
10 ယကဘိးကဒါကွံာ်သုတၢ်ဘူၣ်တၢ်ဘါအမူးတဖၣ်ဆူတၢ်သံတၢ်ပှၢ် ဒီးလဲလိာ်ကွံာ်သုတၢ်သးခုအတၢ်သးဝံၣ်ဆူတၢ်သူၣ်အုးသးအုး အတၢ်ဟီၣ်တၢ်ယၢၤတဖၣ်န့ၣ်လီၤ. ယကမၤတုၤသုလူၤကျိသုခိၣ် တဖၣ်ဒီးသိးထီၣ်ထၢၣ်တၢ်ကံးညၣ်ဒီးသုကလီၤဂာ်ဒီးမိၢ်ပၢ်လၢ အဟီၣ်အယၢၤလၢအဖိခွါအိၣ်ထဲတဂၤဧိၤအဃိန့ၣ်လီၤ. မုၢ်တနံၤန့ၣ်ကခၣ်တုၤတၢ်အကတၢၢ်န့ၣ်လီၤ.
11 ကွၢ်ကွၢ်, မုၢ်နံၤတဖၣ်ဟဲဝဲ, ဖဲယကဆှၢလီၤတၢ်သၣ်ဝံၤလီၤဒိ ဆူကီၢ်ဒီတဘ့ၣ်ညါလီၤ. ပှၤဂီၢ်မုၢ်ကသူၣ်ဝံၤသၣ်စ့ၤ, ဘၣ်ဆၣ်တမ့ၢ်ဘၣ်လၢကိၣ်ဘၣ်. အဝဲသ့ၣ်ကသူၣ်ဝံၤသၣ်စ့ၤဒီးကသူအသးလၢတၢ်ကစီၣ်တမံၤဟဲလၢ ယွၤအအိၣ်လီၤ. ယၤ, တၢ်စိတၢ်ကမီၤအယွၤစံးဝဲဒၣ်.
12 ဒီးပှၤဂီၢ်မုၢ်ကဟးဝ့ၤဝီၤလၢပီၣ်လဲၣ်တပူၤဆူပီၣ်လဲၣ်တပူၤဒၣ်, ဒီးဃ့ၢ်ဝ့ၤဝီၤတၢ်လၢကလံၤစိးတခီဆူမုၢ်ထီၣ်တခီဒ်သိး အကဃုထံၣ်န့ၢ်တၢ်ကစီၣ်တမံၤဟဲလၢယွၤန့ၣ်လီၤ. ဘၣ်ဆၣ်ဒီးတထံၣ်န့ၢ်ဝဲဘၣ်.
13 လၢမုၢ်တနံၤန့ၣ်ပိာ်ခွါသးစၢ်လၢအဂံၢ်ဆူၣ်ဘါဆူၣ်ဒီးပိာ်မုၣ် လၢအဃံအလၤတဖၣ်ကလီၤဘှါဝဲလၢတၢ်သူအသးအဃိန့ၣ်လီၤ.
14 ပှၤလၢအမၤတၢ်ဆိၣ်လၢကီၢ်ၡၤမရံအတၢ်ဂီၤတၢ်ဖီၣ်တဖၣ်အမဲာ်ညါဒီးစံး, “ပှၤဒၣ်ဖိအကစၢ်မူဝဲ,” ဒီး “ဝ့ၢ်ဘ့ၢ်ၡဘၤအကစၢ်မူဝဲ,” တဖၣ်န့ၣ်ကလီၤဃံၤဝဲဒီးတဂဲၤဆၢထၢၣ်ကဒါက့ၤလၢၤဘၣ်.